Read Ngomba 1 Kɔlɛ̂ŋtɛ 7 Bible Online

1 Kɔlɛ̂ŋtɛ 7 - Ngomba bible

1 Kɔlɛ̂ŋtɛ 7

¹Pɛkŋɛ cú nu ŋkɔ̂ɔnɛ nǔu mɛnu mi pʉʉ kɑ ŋwɑꞋnɛ́nɛ tsɛt ŋwɑꞋnɛ ḿbíkŋɛ wɑ́ɑ. Pʉʉ kɑ cú ŋɡɔ: «Ɛ́ pɔ́ŋ mbɔ̌ ŋu mbɛ́ɛnɛ nɛnɑ́ŋ kɛ́ lɛɛ nǔu nzwɛ́ wɛ[2]».

²Lɑ́ ɛ́ kɛ ńtsʉ́Ꞌ yi ŋu puutɛ mbɑ wɔ̌ lɑ́ pɔ́p nɛ́ nɔɔ nɔɔnɛ, wɛ́tɛ́ ŋu mbɛ́ɛnɛ lɑ́ kúꞋlɛ nzwɛ́ wɛ, wɛ́tɛ́ mɑŋɡɛ́ lɑ́ kúꞋlɛ ndúu mɛ.

³Ɛ́ sɛ́ ḿbíkŋɛ ŋɡɔ ŋu mbɛ́ɛnɛ ɡɛ nu-ŋu mbɛ́ɛnɛ nǔu nzwɛ́ wɛ, mɑŋɡɛ́ ɡɛ nu-mɑŋɡɛ́ nǔu ndúu mɛ.

⁴Mɑŋɡɛ́ kɑ́ ɡẅɛɛ nɛlɔk mbʉʉ yɛ́ ŋ́ɡɛ yúu mi ɑ kɔŋnɛ pɔ́, mbʉʉ yɛ́ pɔ́ pɔ yɛ́ ndúu mɛ. Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ ŋu mbɛ́ɛnɛ kɑ́ ɡẅɛɛ nɛlɔk mbʉʉ yɛ́ ŋ́ɡɛ yúu mi ɑ kɔŋnɛ pɔ́, mbʉʉ yɛ́ pɔ́ pɔ yɛ́ nzwɛ́ wɛ.

⁵Kɔɔ ŋu mbɛ́ɛnɛ lʉꞋ nu mbɔ̌ nzwɛ́ wɛ, kɔɔ mɑŋɡɛ́ kɛ́ ńdʉꞋnɛ yɛ́ mbɔ̌ ndúu mɛ. Ɛ́ lɑɑ ḿbɔ́ pʉʉ ɡɛ pɔ́Ꞌɔ, pɔ nǔu mɔ́ɔ mɔ́ŋkɑ́ ẅi pʉʉ lɔknɛ tɑ́Ꞌ ntsu ńjʉ́ɔ ŋɡɔ pʉʉ ɡʉ ḿbúꞋ mbɔ́ mbɔ̌ Sɛ́, ḿbúꞋ mbɔ́ mbɔ̌ Sɛ́ tɛ ḿbɔ́tnɛ ńnɑ́ŋ, pʉʉ pɛn ńnɑ́ŋ tsɛt lɑ́ɑndɑ́ yʉ́ʉ pɑ́Ꞌ pʉʉ zɛɛnɛ ńnɑ́ŋ, ḿbɔ́k nɛpɔ́ yi ɛ́ lɑɑ ḿbɔ́ Sɑ́ttɑ lɔk pɑ́Ꞌ pʉʉ kɑ́ɑnɛ nɛɡẅɛɛtɛ mbʉʉ yʉ́ʉ ŋ́kwɑꞋnɛ wʉ́ʉ.

⁶Ɛ́ kɑ́ pɔ́ pɑ́Ꞌɑ ḿbɔ́ pɔ nɛpʉ́ʉ ni n zɑ́pnɛ pɔ́, ŋ ɡʉ ńcú pɔ yúu mi pʉʉ lɑɑ ŋ́ɡɛ ɛ́ pɔŋ.

⁷Mɔ sɛ́ ŋ́kɔŋ ŋɡɔ pʉɔ tsʉʉ pɔ́ pɑ́Ꞌ mɔ. Lɑ́ mbɑ wɔ̌ lɑ́ ɡẅɛɛ yɛ́ yúu ɛ́ pɔ́ pɔ yi Sɛ́ kɑ ɡɑ́nɛ. Yɛ wɛcɔ́ ŋu pɔ́ ɑ ɡʉ ńzɔ́Ꞌ, yɛ wɛcɔ́ pɔ́ pɑ́Ꞌ ɑ ńnɑ́ŋ pɔ́Ꞌɔ.

⁸N cú mbɔ̌ pɛkẅi mbɑ mbɔ̌ pɛpfúk pɑŋɡɛ́ ŋɡɔ ɛ́ pɔŋ ŋɡɔ pɔ́p pɔ́tnɛ ńnɑ́ŋ pɑ́Ꞌ mɔ.

⁹Lɑ́ ŋ́kɛ́ ḿbɔ́ yi pɔ́p jʉ́ɔ ŋɡɔ pɔ́p kɑ́ kuꞋ nɛɡẅɛɛ mbʉʉ yɔ́p pɔ́, pɔ́p zɔ́Ꞌ, mbíꞋŋɡɔ mbi nɛzɔ́Ꞌ ńdɛɛ nɛnɑ́ŋ ńtsɑ́ɑ.

¹⁰Ŋ́ɡʉ nǔu pʉɔ pi pɔ́p kɑ lɑ́Ꞌ mɔ́ ńzɔ́Ꞌ, mbɔ mɔ ńcú nu yi Tsɑpʉɔ kɑ zɑ́pnɛ ɛ́ pɔ́ ŋɡɔ, mɑŋɡɛ́ ẅí ɑ zɔ́Ꞌnɛ, ɑ kɑ́ ɡẅɛɛ nɛcẅɛt nǔu ndúu mɛ pɔ́.

¹¹Lɑ́ ŋ́kɛ́ ḿbɔ́ yi ɑ lɑɑ ńcẅɛt nǔu ndúu mɛ, kɔɔ ɑ kɛ ḿbɛn ńzɔ́Ꞌ wɛcɔ́ ŋu, tɛ ńtsʉ́Ꞌ pɔ́Ꞌɔ, ɑ pɛn nzʉʉ pɔ́p ndúu mɛ mɛk cʉ́ɔk. Ŋu mbɛ́ɛnɛ pɛn ŋ́kɛ́ mbɔɔ ɡẅɛɛ nɛzuŋ nzwɛ́ wɛ pɔ́.

¹²Ɛ́ ɡʉ nǔu pɛcɔ́ pʉɔ, n cú ŋɡɔ: «Ŋu lɑɑ ḿbɔ́ ŋu-Kɛlístɔ, ŋ́ɡẅɛɛ mɑŋɡɛ́ ẅí ɑ kɑ pɔ́ ŋu-Kɛlístɔ pɔ́, ẅîwɑ́ mɑŋɡɛ́ pɛ́m ŋɡɔ pɔ́pnɛ́ ńnɑ́ŋ kɔɔ ŋɡɑŋ zuŋ wɛ́.» Mɔ cúnɛ yɔ nu, Tsɑpʉɔ kɑ́nɛ cú pɔ́.

¹³Mɑŋɡɛ́ pɛn ḿbɔ́ ŋu-Kɛlístɔ, ndúu mɛ pɔɔ ŋu-Kɛlístɔ pɔ́, ḿbɛ́m pɑ́Ꞌ pɔ́pnɛ́ ɡʉ ńnɑ́ŋ, kɔɔ ɑ cẅɛt nǔu wɛ́,

¹⁴mbíꞋŋɡɔ ŋu mbɛ́ɛnɛ ẅí ɑ kɑ pɔ́ ŋu-Kɛlístɔ pɔ́, ɑ lɔk pɑ́Ꞌ ɑ kɑ lɑtnɛ mbʉʉ nǔu nzwɛ́ wɛ ẅí ɑ ŋu-Kɛlístɔ, ḿbɔ́ nɛjɔ́ŋ Sɛ́. Mɑŋɡɛ́ ẅí ɑ kɑ pɔ́ ŋu-Kɛlístɔ pɔ́ lɔk pɑ́Ꞌ ɑ lɑtnɛ mbʉʉ nǔu ndúu mɛ ẅi ɑ ŋu-Kɛlístɔ, ḿbɔ́ nɛjɔ́ŋ Sɛ́, ḿbɔ́ yi ɛ́ kɛ́ mbɔɔ pɔ́Ꞌɔ pɔ́, mbɔ mbɔ́ŋkʉ̈ɔ́ pɔ́p kɑ́ ɡẅɛɛ nɛpɔ́ nɛjɔ́ŋ Sɛ́ pɔ́. Pɔ́p pɛn ḿbɔ́ ŋkɔ̂ɔnɛ ḿbɔ́ nɛjɔ́ŋ Sɛ́.

¹⁵Lɑ́ ɛ́ lɑɑ ŋ́kɛ́ ḿbɔ́ yi ŋu ẅí ɑ kɑ́ pɔ́ ŋu-Kɛlístɔ pɔ́ jʉ́ɔ ŋɡɔ ɑ ɡʉ ɛ́fɑk mbʉʉ yɛ, pɛ́ nɑ́ wɛ́ ɑ fɑk. Ɛ́ ɡʉ nǔu yîyɑ́ ntɛ́, yɛcɔ́ yúu kɑ́ kúꞋlɛ ŋu-Kɛlístɔ wɛ mbɛ́ɛnɛ kɛ wɛ mɑŋɡɛ́ pɔ́. Sɛ́ kɑ zɛɛ ɛ́fúŋ wɛkŋɛ pɔ pɑ́Ꞌ pɛkŋɛ ɡʉ ńnɑ́ŋ nɛ́ mbɔ́tnɛ.

¹⁶Ɛ́ zɛɛ ŋ́ɡɔ ḿbɔ́, ɡu ẅi ɔ mɑŋɡɛ́, ḿbɔ́ ŋu-Kɛlístɔ, mbɔ ɔ ɡɛ pɑ́Ꞌ lɑ́ ńtsuŋ ńjí ŋɡɔ ɔ ɡʉ ńdɑ́Ꞌ ŋ́ɡɛ tɛ ndúu mu luk? Kɛ ɡu ẅi ɔ ŋu mbɛ́ɛnɛ, ḿbɔ́ ŋu-Kɛlístɔ, mbɔ ɔ ɡɛ pɑ́Ꞌ lɑ́ ńjí ŋɡɔ ɔ ɡʉ ńdɑ́Ꞌ ŋ́ɡɛ tɛ nzwɛ́ wu luk?

¹⁷Lɑ́ ŋ́ɡʉ nǔu mɔnɛ mɛnu tsʉʉ, mbɔ ɛ́ pɔŋ ŋɡɔ mbɑ wɔ̌ lɑ́ pɔ́ pɔ nǔu zʉꞋ yi Sɛ́ kɑ zɑ́pnɛ ŋɡɔ ɑ pɔ́ zúꞋu, ńnɑ́ŋ nǔu zʉꞋ yi Sɛ́ kɑ ɡɔ́ ɛ́fúŋ wɛ́ ɑ nɑ́ŋ zúꞋu. Ɛ́ yúu mi mɔ sɛ́ ńcú tsɛt mɛcúꞋlɛ-pʉɔ-Kɛlístɔ tsʉʉ ŋɡɔ pɛ́ ɡɛ.

¹⁸Ɛ́ lɑɑ ḿbɔ́ yi Sɛ́ kɑ ɡɔ́ ɛ́fúŋ ŋu, mbɔ pɛ́ kɑ púꞋ wɛ́, pɑ́Ꞌ pɛ́ púꞋnɛ pɑyúdɑ lɑ́, tɛ ŋɡɑŋfɑꞋ pɔɔ lʉꞋ ŋɡɔ ɑ kɑ́ pɔ́ ŋu-Yúdɑ pɔ́, ḿbɔ́ yi ɑ kɑ ɡɔ́ fúŋ ŋu, mbɔ pɛ́ ŋ́kɑɑ ŋɡɑŋ púꞋ, kɔɔ ɑ cú ŋɡɔ ɑ ɡʉ ŋ́ɡɛ ńtsʉ́Ꞌ ŋu-Yúdɑ.

¹⁹Nɛpɔ́ yi pɛ́ kɑ púꞋ ŋu kɛ pɛ́ ŋkɑɑ wɛ́ púꞋ pɔ́ kɑ́ pɔ́ yɛcɔ́ nu mbi Sɛ́ pɔ́. NɛkúꞋlɛ nɛpʉ́ʉ-Sɛ́ pɔ́nɛ nu.

²⁰Ɛ́ lɑɑ ḿbɔ́ yi Sɛ́ kɑ ɡɔ́ fúŋ ŋu, ɑ nɑ́ŋ nǔu yɛ́tɛ́ zʉꞋ ɔ́ɔ, ŋɡɑŋ kɛ́ ńnɑ́ŋ pɔ́p zúꞋu,

²¹ḿbɔ́ yi Sɛ́ kɑ ɡɔ́ fúŋ wú ɔ pɔ́ ŋkwɑɑ, kɔɔ púꞋ mbʉʉ yu mbíꞋ pɔ́Ꞌɔ. Lɑ́ ŋ́kɛ́ ḿbɔ́ yi mbɔ shʉ́ cẅɛt, ɔ lɛɛtɛ nǔu[3] ńtsʉ́Ꞌ ndúunút,

²²Pʉʉ jí ŋɡɔ ŋu ẅí Tsɑpʉɔ kɑ ɡɔ́ fúŋ wɛ́, ɑ pɔ́ ŋkwɑɑ, ɑ cẅɛt ndɑ́-kwɑɑ nu kɛpɔŋ, ńtsʉ́Ꞌ ḿbɔ́ pɔ ŋu-Tsɑpʉɔ. Ɛ́ pɛn ḿbɔ́ pɔ ndʉ́ŋndʉŋ nǔu ŋu ẅí pɛ́ kɑ ɡɔ́ fúŋ wɛ́ ɑ pɔ́ ndúunút, ŋɡɑŋ ńtsʉ́Ꞌ ŋkwɑɑ Kɛlístɔ, ńdɔk ḿbɔ́ yɛ́ ŋu-Kɛlístɔ.

²³Kɛlístɔ kɑ tsuꞋ wʉ́ʉ ndɑ́ ŋkwɑɑ nɛ́ tʉʉndɛn yúu. Pɔ́Ꞌɔ lɑ́ kɔɔ pʉʉ tsʉ́Ꞌ pɛkwɑɑ-pʉɔmɛsɔŋ.

²⁴Pɔ́ɔpɛ́mɑ́, mbɑ wɔ̌ lɑ́ pɔ́ mbi Sɛ́, ńnɑ́ŋ pɔ nǔu zʉꞋ yi Sɛ́ kɑ ɡɔ́ fúŋ wɛ́ ɑ pɔ́ ńnɑ́ŋ zúꞋu.

²⁵Ɛ́ ɡʉ nǔu pʉɔ pi pɔ́p ŋkɑɑ zɔ́Ꞌ, mbɔ Tsɑpʉɔ kɑ kɛ́ ńcú nu yi mɔ ńcú mbɔ̌ pɔ́p. Lɑ́, mɔ ńcú pɑ́Ꞌ mɔ sɛ́ ŋ́kwɑŋɛ yɑ́ɑ nǔu nu yɔ́p, ńdɔk pɑ́Ꞌ mɔ ŋu ẅí Tsɑpʉɔ kɑ tsɑ́ɑnɛ mɛjʉ́ŋ mɑ́ɑ, ńdɔk wɑ́ɑ ŋ́ɡɛ ŋu ẅí m bɔ́ ńcú nu pɛ́ zúꞋ.

²⁶Pɑ́Ꞌ yɔ kɛm-njí sɛ́ ńtɛn ndɛn wɔ lɑɑ, ŋ kwɑŋɛ yɑ́ɑ ŋɡɔ ɛ́ pɔŋ mbɔ̌ mbɑ wɔ̌ lɑ́ nɛnɑ́ŋ kɛ́ zɔ́Ꞌ. Ɔ́ɔŋ ɛ́ pɔŋ mbɔ̌ mbɑ wɛ́tɛ́ ŋu lɑ́ nɛnɑ́ŋ pɑ́Ꞌ ɑ pɔ́nɛ.

²⁷Ɛ́ lɑɑ ḿbɔ́ yi pʉʉ mɑŋɡɛ́ zɔ́Ꞌ, ɔ pɑ́ɑ nɛlɔɔ nɛcẅɛt nǔu wɛ́, ŋ́kɛ́ ḿbɔ́ yi ɔ kɑ́ zɔ́Ꞌ, ɔ pɑ́ɑ nɛlɔɔ mɑŋɡɛ́.

²⁸Ɔ lɑɑ ńzɛɛ ńzɔ́Ꞌ, mbɔ ɔ kɑ́ fɑɑnɛ yɛcɔ́ nu pɔ́. Mɔ́ɔ mɑŋɡɛ́ lɑɑ ńzɛɛ ńzɔ́Ꞌ, mbɔ ɑ kɑ́ fɑɑnɛ yɛcɔ́ nu pɔ́. Lɑ́ pʉɔ pi pɔ́p zɔ́Ꞌnɛ ɡʉ ŋ́ɡɛ ḿbɔ́ lɛ́Ꞌ tsʉʉ ḿbɔ́ ńjʉ́ɔ pɔ ŋɡʉ̈ɔ́Ꞌ. N tsɑ́ɑ pɔ ŋɡɔ kɔɔ pʉʉ kúu yîyɑ́ ŋɡʉ̈ɔ́Ꞌ.

²⁹Pɔ́ɔpɛ́mɑ́ pɑ́ɑ, yúu mi n dɔɔ nɛcú pɔ́ pɔ ŋɡɔ: «MɛfʉꞋ-njí kɑ́ pɛn ńzɑ́ɑ pɔ́. Ɛ́ sɛ́ ḿbíkŋɛ ŋɡɔ tɛ ɛ́fú ŋkɔ̂ɔnɛ, pʉɔ pi pɔ́p zɔ́Ꞌnɛ ńnɑ́ŋ pɑ́Ꞌ ŋkɑ́ yi pɔ́p kɑ́ zɔ́Ꞌ.»

³⁰Tɛ ɛ́fú ŋkɔ̂ɔnɛ pʉɔ pí pɔ́p sɛ́ ńdɑɑ, ɡʉ ńnɑ́ŋ pɑ́Ꞌ ŋkɑ́ yi pɔ́p kɑ́ pɔ́ ḿmʉk yɛcɔ́ nu pɔ́. Pʉɔ pí pɔ́p sɛ́ ŋ́ɡwɛ nɑ́ŋ pɑ́Ꞌ ŋkɑ́ yi pɔ́p kɑ́ pɔ́ ńtsɑ́ɑtɛ pɔ́. Pʉɔ pí pɔ́p sɛ́ ńzúu yúu nɑ́ŋ pɑ́Ꞌ ŋkɑ́ yi yúu pɔ́p zúunɛ kɑ́ pɔ́ yɔ́p pɔ́ lɑ́

³¹Pʉɔ pí pɔ́p sɛ́ ńjʉ́ fuꞋ tsɛt yɔ mbí nɑ́ŋ pɑ́Ꞌ ŋkɑ́ yi pɔ́p kɑ́ pɔ́ ńjʉ́ pɔ́ lɑ́, mbíꞋŋɡɔ ndǔmbí yɔ yí pɛkŋɛ sɛ́ ńjʉ́ɔ lɑɑ kɛ́ ɡɛ ńdɑ́Ꞌ ḿbɔ́ pɔ ɡú pɔ́.

³²M bɛn ḿbɔ́ ŋ́kɔŋ ŋɡɔ kɔɔ mɛcɔ́ mɛnu ɡɑ́ɑnɛ wʉ́ʉ tʉ́m pʉʉ. Ŋu ẅí ɑ kɑ́ zɔ́Ꞌ kɛ kwɑŋɛ pɔ mɛnu-Tsɑpʉɔ. A lɔɔ pɔ nɛɡɛ yúu mi ɛ́ ɡʉ ḿbɔŋ Tsɑpʉɔ.

³³Lɑ́ ŋ́ɡʉ nǔu ŋu ẅí ɑ zɔ́Ꞌnɛ, mbɔ ɑ kwɑŋɛ pɔ mɛnu ndǔ tsɛ́tsɑ́Ꞌ, ɑ lɔɔ pɔ nɛɡɛ yúu mi ɛ́ ɡʉ ḿbɔŋ nzwɛ́ wɛ.

³⁴Ɛ́ lɛɛ pɔ́Ꞌɔ, jínu yɛ́ pɔɔ tʉ́ʉ nǔu tɑ́Ꞌ nu pɔ́. Mɑŋɡɛ́ ẅí ɑ ŋkɑɑ zɔ́Ꞌ kɛ pɔ mɔ́ɔ mɑŋɡɛ́ ɔ́ɔ, ɑ kɛ ŋ́kwɑŋɛ yɛ́ pɔ mɛnu-Tsɑpʉɔ, ńjí ŋɡɔ ɑ ɡʉ ḿbɔ́ pɔ ŋu-Tsɑpʉɔ nǔu mbɑ kʉ̈ɔ́ lɑ́ yi ɑ sɛ́ ŋ́ɡɛ, mbɑ yi ɑ sɛ́ ŋ́kwɑŋɛ kwɑŋɛ́nɛ. Lɑ́ ŋ́ɡʉ nǔu mɑŋɡɛ́ ẅí ɑ zɔ́Ꞌnɛ, ɑ kwɑŋɛ pɔ mɛnu-ndǔ tsɛ́tsɑ́Ꞌ, ndɔɔ pɔ nɛɡɛ yúu mi ɛ́ ɡʉ mbɔŋ ndúu mɛ.

³⁵Ɛ́ sẅíi wʉ́ʉ nɛ́ mɔnɛ mɛnu, pɔ nɛlɔk ńcẅɛ́lɛ wʉ́ʉ, ŋ kɑ́ pɔ́ ńdɔk ńdʉꞋ pɔ ɡwɑk mbi pʉʉ pɔ́. Mɔ sɛ́ ńtsɑ́ɑ ŋɡɔ pʉʉ tʉ́ʉ nǔu kʉ̈ɔ́ lɑ́, ŋ́ɡɛ pɔ yi ɛ́ pɔŋnɛ ŋɡɔ pɛ́ ɡɛ, ḿbɛn ḿbɔ́ ńtsɑ́ɑ ŋɡɔ pʉʉ lɑt mbʉʉ pɔ ndɑꞋ nǔu fɑꞋ-Tsɑpʉɔ.

³⁶Ɛ́ ɡʉ nǔu mɔ́ɔ mbɛ́ɛnɛ ẅi ɑ kɑŋnɛ mɔ́ɔ mɑŋɡɛ́, nu yɛ́ pɔ́ tú wɛ́ tɛꞋ, lɑ́ ḿbɔ́ ḿbɔ́k nɛɡɛ pɑ́Ꞌ ɛ́ kɑ́ pɔ́ ḿbíkŋɛ pɔ́ nǔu wɛ́, ńjʉ́ɔ ŋɡɔ pɛ́ ɡʉ niitɛ mɛnu pɑ́Ꞌ ɛ́ sɛ́ ḿbíkŋɛ, ɑ ɡɛ pɑ́Ꞌ ɑ jʉ́ɔnɛ. A kɑ́ pɔ́ pɔ́Ꞌɔ ńdɔk ɛ́fɑɑnɛ pɔ yɛcɔ́ nu pɔ́. Ɛ́ pɔŋ ŋɡɔ pɔ́p zɔ́Ꞌ.

³⁷Lɑ́ mbɔ mɔ́ɔ mbɛ́ɛnɛ lɑɑ ńnɑ́ŋ tɛ ŋ́kwɑŋɛ tʉ́m yɛ́ ŋɡɔ, ɑ kɛ́ zɔ́Ꞌ, ŋ́kɛ́ mbɔɔ ɡɛ yúu mi ɛ́ kɑ́ pɔ́ ḿbíkŋɛ pɔ́ nǔu mɔ́ɔ mɑŋɡɛ́; mbɔ ɑ lɑɑ ńtsuŋ ŋ́kwɑŋɛ pɔ́Ꞌɔ, pɔ tʉ́m yɛ́ kɛ́ ŋu ńtsʉ́ʉnɛ wɛ́, ḿbɛn ŋ́kúꞋlɛ mbʉʉ yɛ́, mbɔ ɑ ɡɛ nu sʉ́Ꞌnɛ pɑ́Ꞌ ɑ kɑ́ zɔ́Ꞌ mɔ́ɔ mɑŋɡɛ́ pɔ́.

³⁸Pɔ́Ꞌɔ lɑ́, ŋu ẅí ɑ zɔ́Ꞌnɛ mɔ́ɔ mɑŋɡɛ́ ẅi ɑ kɑŋnɛ píi, ɑ ɡɛ sʉ́Ꞌnɛ. Lɑ́ ŋu ẅí ɑ jʉ́ɔnɛ ŋɡɔ ɑ kɛ́ zɔ́Ꞌ pɔ́, ɑ ɡɛ sʉ́Ꞌnɛ tɛꞋ.

³⁹Ɛ́ ɡʉ nǔu mɑŋɡɛ́ ẅi ɑ zɔ́Ꞌnɛ ɑ kɛ́ ŋ́ɡẅɛɛ pɔ nɛlɑt mbʉʉ yɛ nǔu ndúu mɛ nǔu ŋkɑ́ yi ndúu mɛ pɛ́t ɡú. Ndúu mɛ kɛ́ ḿpfú, ɑ ɡẅɛɛ nɛzɔ́Ꞌ ŋu ẅi jʉ́ mɑŋɡɛ́ kɔŋnɛ. Nu pɔ́ pɔ ŋɡɔ ẅîwɑ́ ŋu mbɛ́ɛnɛ pɔ́ ŋu-Kɛlístɔ.

⁴⁰Lɑ́ ŋ kwɑŋɛ yɑ́ɑ ŋɡɔ ɑ lɑɑ ńnɑ́ŋ kɛ́ pɛn ńzɔ́Ꞌ, mbɔ ɑ ɡʉ ńzúꞋ sʉ́Ꞌnɛ tɛꞋ. M bɛn ḿbɔ́ ŋ́kwɑŋɛ ŋɡɔ Zẅikŋɛ-Sɛ́ nǔu mɔ ɡúu.