Read Ngomba 2 Kɔlɛ̂ŋtɛ 1 Bible Online

2 Kɔlɛ̂ŋtɛ 1 - Ngomba bible

2 Kɔlɛ̂ŋtɛ 1

¹Yɔ ŋwɑꞋnɛ fú mbɔ̌ mɔ pɔ̂l ẅi Sɛ́ kɑ kɔŋ kɔŋnɛ ńtsɔ́Ꞌ wɑ́ɑ ńdɔk ŋ́ɡɛ ŋɡɑŋntúu-Yɛ́su Kɛlístɔ. Pɛk mɔ́ɔmɑ́ wɛkŋɛ Timɔtɛ̂ɛ ŋwɑꞋnɛ́nɛ yɔ ŋwɑꞋnɛ, ŋ́ɡɑ́ mbɔ̌ cúꞋlɛ-pʉɔ-Sɛ́ tʉ́sɔŋ-Kɔlɛŋntɛ. M bɛn ŋ́ŋwɑꞋnɛ ŋ́ɡɑ́ mbɑ mbɔ̌ pʉɔ-Sɛ́ pɛtsʉʉ, pi pɔ́p nǔu shʉ́-Akɑ̂y tsʉʉ.

²Tɑ̌ɑ wɛkŋɛ Sɛ́ mbɑ Tsɑpʉɔ Yɛ́su Kɛlístɔ sɛ́ ḿbɔ́ nɛ́ pʉʉ ḿbɛn ḿbɔ́ ńníꞋ mɔ́fíitɛ tʉ́m pʉʉ.

³Pɛkŋɛ ɡɑ́ pɑ́Ꞌlɑ́ mbɔ̌ Sɛ́, Lɑ́ pɑꞋ Tsɑpʉɔ wɛkŋɛ Yɛ́su Kɛlístɔ, ẅi nɛtsɑ́ɑ mɛjʉ́ŋ-pʉɔ fú pɔ nǔu wɛ́, nɛtɔ́ɔtɛ wɔ́p fú pɔ nǔu wɛ́.

⁴A tɔ́ɔtɛ wɛkŋɛ ŋɡɔŋ ŋkɑ́ tsʉʉ yi pɛkŋɛ tsɛt ŋɡʉ̈ɔ́Ꞌ nɛpɔ́ yi pɛkŋɛ ɡúu ɡʉ ŋ́kuꞋ nɛtɔ́ɔtɛ pɛcɔ́ pʉɔ pi pɔ́p tsɛt ŋɡʉ̈ɔ́Ꞌ, ńtsʉ́Ꞌ nɛtɔ́ɔtɛ wɔ́p ńtɔ́ɔtɛ nǔu ntɛ́ yi Sɛ́ kɑ tɔ́ɔtɛ́nɛ wɛkŋɛ.

⁵Ndʉ́ŋndʉŋ pɑ́Ꞌ pɛkŋɛ sɛ́ ńjʉ́ɔ ŋɡʉ̈ɔ́Ꞌ tɛꞋ, pɑ́Ꞌ Kɛlístɔ kɑ jʉ́ɔnɛ yɛ́ ŋɡʉ̈ɔ́Ꞌ tɛꞋ lɑ́, Sɛ́ pɛn ḿbɔ́ ńtɔ́ɔtɛ wɛkŋɛ tɛꞋ ńdɛɛ nǔu Kɛlístɔ.

⁶Pɛk lɑɑ ḿbɔ́ ńjʉ́ɔ ŋɡʉ̈ɔ́Ꞌ, mbɔ pʉʉ ɡʉ ńdúꞋnɛ, Sɛ́ lɛɛ nǔu, ńtɔ́ɔtɛ wʉ́ʉ, pʉʉ kɛ́ ḿbɔ́ pɔ nǔu sɛ̂ndúŋ-Sɛ́. Ɛ́ lɑɑ ḿbɔ́ yi Sɛ́ sɛ́ ńtɔ́ɔtɛ wɛ́k, mbɔ ɛ́ pɔ́ pɔ nɛlɔk ńtɔ́ɔtɛ wʉ́ʉ, pɔ́Ꞌɔ pʉʉ kuꞋ nɛsʉk nǔu ŋkɑ́ yi ntɛ́ ŋɡʉ̈ɔ́Ꞌ yi ɛ́ sɛ́ ŋ́kúu wɛ́k, kúunɛ wʉ́ʉ ɡúu.

⁷Ɛ́ ɡʉ ŋkɑ́ yi pɛk sɛ́ ŋ́kwɑŋɛ wʉ́ʉ pɛk tsuŋ ńjí ŋɡɔ ɛ́ lɑɑ ḿbɔ́ pɛk pɔɔ wʉ́ʉ pɔ́k, mbíꞋŋɡɔ pɛk sɛ́ ńjí ŋɡɔ, ndʉ́ŋndʉŋ pɑ́Ꞌ pʉʉ sɛ́ ńjʉ́ɔ yʉ́ʉ ŋɡʉ̈ɔ́Ꞌ lɑ́, Sɛ́ pɛn ḿbɔ́ ńtɔ́ɔtɛ wʉ́ʉ ɡúu pɑ́Ꞌ pɛk.

⁸Pɔ́ɔpɛ́mɑ́, pɛk sɛ́ ńtsɑ́ɑ ŋɡɔ pʉʉ jí ndɛn ŋɡʉ̈ɔ́Ꞌ yi pɛk kɑ jʉ́ɔnɛ tsɛt pɑk-ŋɡɔŋ Azîi, pɛk kɑ jʉ́ɔ ŋɡʉ̈ɔ́Ꞌ zúꞋu ńjʉ́ɔ tɛ mɛtʉʉ mɛk mɛ, pɛk tsʉ́Ꞌ ńzúꞋ ŋ́ɡʉ pɔ́ nɛpfú.

⁹KwɑꞋ pɛk yɛ́k kɑ pɛ́m ŋɡɔ pɛ́ zɑ́p ŋɡɔ pɛ́ ɡʉ ńjẅítɛ wɛ́k, ɛ́ lɛɛ pɔ́Ꞌɔ, pɛk pɔɔ pɛn ŋ́kwɑŋɛ ŋɡɔ ɛ́ lɑɑ ḿbɔ́ pɛk nɛ́ tú yɛ́k pɛn ŋ́kuꞋ nɛɡɛ yɛcɔ́ yúu pɔ́, pɛk tsʉ́Ꞌ ŋ́ɡẅɛɛ yɛ́k pɔ nɛnyɛt yɛ́k ŋɡɔŋ nu tsʉʉ mbɔ̌ Sɛ́ ẅi ɑ zẅíimɛ́nɛ pɛpfú tsɛt nɛvú.

¹⁰Pɛk kɑ pɔ́ ntsu-nɛvú ḿbʉ́k pɔ́Ꞌɔ, jʉ́ zɛɛnɛ ńcẅɛɛtɛ wɛ́k, ɑ ɡʉ ŋ́ɡɛ ḿbɛn cẅɛɛtɛ wɛ́k tsɛt mɛcɔ́ mɛŋɡʉ̈ɔ́Ꞌ mɛɡwɛ́. Ɛ́ nɛ́nẅín pɛk tsuŋ ḿbɔ́ ńjí ŋɡɔ ɑ ɡʉ ŋ́ɡɛ ḿbɛn ńcẅɛɛtɛ wɛ́k tsɛt mɛcɔ́ mɛŋɡʉ̈ɔ́Ꞌ mɛɡwɛ́,

¹¹ŋ́ɡɔ ńcẅɛɛtɛ wɛ́k, yʉ́ʉ pɔ́ pɔ́ nǔu, mbíꞌŋɡɔ pʉʉ sɛ́ ńcɛꞋlɛ Sɛ́ nǔu tú yɛ́k. Pɑ́Ꞌ pʉɔ tɛ ńzɑ́ɑ cɛꞋlɛ́nɛ wɛ́ nǔu tú yɛ́k lɑ́, ɑ ɡʉ ŋ́ɡɛ ŋ́ɡɑ́ fuꞋ níinɛ yɛ́k, ɛ́ pɔ́ ńtɔ́ɔtɛ wɛ́k, ɛ́ pɔ́ pɔ́Ꞌɔ, pʉɔ tɛ ńzɑ́ɑ ɡɑ́ pɑꞋlɑ́ mbɔ̌ Sɛ́ wɔp nǔu tú yɛ́k.

¹²Ɛ́ ɡʉ nǔu wɛk nɛnɑ́ŋ tsɛtsɛt pʉɔmɛsɔŋ, ḿbɔ́ yɛ́k yúu mi pɛk lɔknɛ ŋ́kɑꞋmɛ ɛ́ pɑ́Ꞌ pɛk ɡɛ pɔ yúu mi ɛ́ fúnɛ mbɔ̌ Sɛ́. Pɛk kɑ́ pɔ́ ɛ́fúklɛ wɛcɔ́ ŋu pɔ́, pɛk pɑsẅíi pʉɔ nɛ́ nu nɛ́ tʉ́m Lɛ́ɛnɛ́nɛ, mbʉʉ yɛk nɑŋnɛ ɛ́sẅíi wɛ́k pɔ́Ꞌɔ. Ɛ́ pɑ́Ꞌ pɛk kɑ ɡɛnɛ tsɛtsɛt pʉʉ. Pɛk ŋkɑɑ kɛ́ ńdɔk pɔ jínu-pʉɔmɛsɔŋ lɑ ńdɔk ńnɑ́ŋ pɔ́Ꞌɔ pɔ́. Pɛk kɑ lɔk pɔ pɑ́Ꞌ Sɛ́ sɛ́ ŋ́ɡɑ́ fuꞋ níinɛ yɛ́k, ńcẅɛ́lɛ wɛ́k.

¹³Ɛ́ yɛ́tɛ́ lɑ́ pɛk pɔɔ ŋwɑꞋnɛ yɛcɔ́ yúu tsɛt ŋwɑꞋnɛ ŋ́ɡɑ́ mbɔ̌ pʉʉ ɛ́ pɔ́ yi ndɛꞋ nǔu nu yí pʉʉ fúŋnɛ ńzúꞋ pɔ́, ŋ kwɑŋɛ ŋɡɔ pʉʉ ɡʉ zúꞋ tɛ ḿmik.

¹⁴Pɑ́Ꞌ pʉʉ kɑ zɛnɛ nɛzúꞋ ntɛ́ ŋu ẅí mɔ jʉ́ lɑ́, ɛ́ ɡʉ ńdɑ́Ꞌ lɛ́Ꞌ yi Tsɑpʉɔ Yɛ́su Kɛlístɔ tɔ́nɛ, ŋ ɡɔ́ ḿbɔ́ mbɔ̌ pʉʉ ḿbɔ́ yʉ́ʉ yúu-kɑꞋmɛ, pʉʉ pɛn ḿbɔ́ yɑ́ɑ.

¹⁵Ŋ kɑ pɔ́ ńjí ŋɡɔ ɛ́ ɡʉ ḿbɔ́ pɔ pɔ́Ꞌɔ. Ɛ́ yúu mi ɛ́ kɑ ɡɛnɛ lɑ́ n dɔɔ nɛpiitɛ ńdɛɛ njɛ́Ꞌ pʉʉ, lɑ ŋ́ɡɛ ḿbɛn ńdɛɛ, ńjí ŋɡɔ ŋ ɡʉ ŋ́ɡɛ pʉʉ tsɑ́ɑtɛ tsɑ́ɑtɛ́nɛ ŋkɑ́ yɛ́pɑ́.

¹⁶Ŋ kɑ pɔ́ ŋ́kwɑŋɛ nɛɡɔ́ ŋ́ɡʉ Mɑsɛndwɑn ńdɛɛ lɑ́Ꞌ pʉʉ, ḿbɛn ɛ́fú Mɑsɛndwɑn ḿbɛn ńtɔ́ nɛ́ lɑ́Ꞌ pʉʉ, pʉʉ cẅɛ́lɛ́ wɑ́ɑ nɛɡʉ tɛ ŋ́kúu Judɛ̂,

¹⁷ńjí ŋɡɔ ŋ kɑ pɔ́ ŋ́kɔŋ nɛɡɛ pɔ́Ꞌɔ, ńdɔk ḿmɑꞋ pɔ kwɑŋɛ kíi? Kɛ pʉʉ kwɑŋɛ ŋɡɔ n tsʉ́Ꞌ nɛcú nu yi ŋ ɡʉ ŋ́ɡɛ, ńdɔk pɔ jínu-ŋumɛsɔŋ ńcú, tɛ ɛ́ pɔ́ ŋɡɔ m bɔ́ n cú nu, ḿbɛn ŋ́kúpmɛ?

¹⁸Ŋɡɑ́ŋ! Ɛ́ ɡʉ nǔu nu yi pɛk kɑ sẅíinɛ wʉ́ʉ, pɛk ŋkɑɑ ḿbɔ́ ńcú nu ḿbɛn ŋ́kúpmɛ pɔ́. Sɛ́ sɛ́ ńjí.

¹⁹N cú pɑ́Ꞌɑ mbíꞋŋɡɔ Yɛ́su Kɛlístɔ, mɔ́ɔ-Sɛ́ ẅi pɛk Sílɑs, ŋ́ɡɛ Timɔtɛ̂ɛ kɑ cúnɛ nu yɛ́ mbɔ̌ pʉʉ, ɑ ŋ́kɑɑ ḿbɔ́ ńtɔ́ ḿbɔ́ ŋu ẅi mbɔ ɑ cú nu, ḿbɛn ŋ́kúpmɛ pɔ́. A kɑ tɔ́ ḿbɔ́ pɔ ŋu ẅí ɑ cúnɛ nu, mbɔɔ kúpmɛ.

²⁰Jʉ́ zɛɛnɛ ḿbɔ́ ŋu ẅí ɑ ɡɛnɛ ŋɡɔ kʉ̈ɔ́ lɑ́ yi Sɛ́ kɑ kɑꞋnɛ lɑ́ puutɛ. Pɔ́Ꞌɔ, pɛkŋɛ lɔk lík yɛ́, ńcú ŋɡɔ ɛ́ pɔ́Ꞌɔ, ńdɔk pɔ́Ꞌɔ, ŋ́ɡɑ́ mɛkuꞋ mbɔ̌ Sɛ́.

²¹KwɑꞋ Sɛ́ ɡɛnɛ lɑ́ pɛk pɔ́ ńtɛntɛ tɛntɛnɛ nzʉʉ Kɛlístɔ tɛ mbɑ pʉʉ. A kɑ fɑk wɛkŋɛ,

²²ńcʉ̈ɔꞋ lii yɛ́ nǔu pɛkŋɛ, ńníꞋ Zẅikŋɛ Lɛ́ɛnɛ́nɛ tʉ́m pɛkŋɛ. Ɛ́ lɔk ḿbɔ́ nduŋmbi yúu nǔu yúu mi ɑ ɡʉ ŋ́ɡɑ́ mbɔ̌ pɛkŋɛ.

²³Pʉʉ tsʉ́Ꞌ ɛ sẅíi wʉ́ʉ nɛ́ yúu mi ɛ́ kɑ ɡɛnɛ lɑ m bɔɔ pɛn ńtɔ́ lɑ́Ꞌ pʉʉ Kɔlɛ̂ŋntɛ pɔ́, mɔ ŋ́kɑɑ ḿbɔ́ ŋ́kɔŋ nɛɡɛ pʉʉ zúꞋ kɛ́kɑ́ŋ pɔ́. N cú pɑ́Ꞌɑ ɛ́sẅíi nu. N dɑɑ ńcʉ̈ɔt nu, Sɛ́ jẅí wɑ́ɑ.

²⁴Pɛk sɛ́ ńjí ŋɡɔ wʉʉ nɛzɑ́p tʉ́m nǔu Yɛ́su Kɛlístɔ tɛntɛ, pɛk kɑ́ pɔ́ ńdɔɔ nɛtɔ́ ɛ́fyɛ́t wʉ́ʉ, ńzɑ́p pɑ́Ꞌ pʉʉ ɡʉ ŋ́ɡɛ pɔ́. Pɛk tsɑ́ɑ pɔ nɛtɔ́ ńcẅɛ́lɛ wʉ́ʉ pʉʉ mɛkŋɛ ńzúꞋ sʉ́Ꞌnɛ.