Read Ngomba 2 Kɔlɛ̂ŋtɛ 12 Bible Online

2 Kɔlɛ̂ŋtɛ 12 - Ngomba bible

2 Kɔlɛ̂ŋtɛ 12

¹M bɛn ŋ́kẅiꞋ ŋ́ŋɑ́Ꞌlɛ ńdɔk ŋ́ɡʉ nɛ́ mbi? Ɛ́ kɑ́ cẅɛ́lɛ́ nɛɡɛ pɔ́Ꞌɔ pɔ́. Lɑ́ ŋ ɡʉ ŋ́kɛ́ ɛ́sẅíi wʉ́ʉ nɛ́ nu ŋkɔ̂ɔnɛ nǔu yúu mi Tsɑpʉɔ kɑ ŋíɛꞋnɛ mík mɑ́ɑ, n jʉ́ɔ mbɑ mi ŋ kɑ jʉ́ɔnɛ pɑ́Ꞌ ŋkɑ́ yi n dɛ́ njʉɔ lɑ́.

²Mɔ sɛ́ ńjí wɛcɔ́ ŋu ẅí ɑ kɑ lɑtnɛ mbʉʉ nǔu Kɛlístɔ, ɛ́ ŋkɔ̂ɔnɛ ḿbɔ́ ŋɡuꞋ ntsɔ̌pɛ́nɛ́kwɑ nɛ́ nɛɡɛ́m pɑ́Ꞌ Sɛ́ kɑ tíinɛ wɛ́ ńdɔk ŋ́kɔ́Ꞌ kɔ́Ꞌnɛ tɛ ŋ́kúu tɛ tʉ́nɛ́pú kɛ ɛ́ kɑ pɔ́ pɔ́Ꞌɔ, kwɑꞋ jʉ́ ɡʉnɛ zúꞋu ɔɔ, mbɔ ŋ kɑ́ jí, kɛ ɑ kɑ lɛ́ pɔ njʉɔ ɔɔ, mbɔ ŋ kɑ́ jí. Sɛ́ jínɛ.

³Mɔ sɛ́ ńjí ŋɡɔ pɛ́ kɑ tíi ŋɡɑŋ ńdɔk ŋ́kɔ́Ꞌ tɛ ŋ́kúu zʉꞋ yi Sɛ́ zúꞋu, ɑ tɔ́ zúꞋu ńzúꞋ nu ɛ́ pɔ́ yi ḿbɔ́ ŋumɛsɔŋ pɔɔ fʉꞋ nɛcú pɔ́, ŋumɛsɔŋ pɛn ńzɛɛ mbɔɔ ɡẅɛɛ nɛcú pɔ́. Kɛ ɛ́ kɑ pɔ́ pɔ́Ꞌɔ, kwɑꞋ ŋɡɑŋ ɡʉnɛ zúꞋu ɔɔ, kɛ ɑ kɑ lɛ́ pɔ njʉɔ ɔɔ, mbɔ ŋ kɑ́ jí. Sɛ́ jínɛ,

⁵ḿbɔ́ n dɔk ŋu ɛ̂wɑ́ ŋ́kɑꞋmɛ. Lɑ́ ŋ́ɡʉ nǔu nɛlɔk túmbʉʉ yɑ́ɑ ŋ́kɑꞋmɛ, mbɔ ḿbɔ́ ŋ ɡɔ́ ńdɔk kɑꞋmɛ, ɛ́fú pɔ́ nǔu pɑ́Ꞌ m bɔ́t pɔ́tnɛ.

⁶Mɔ ḿbɔ́ pɛ́Ꞌnɛ ńdɔk túmbʉʉ yɑ́ɑ ŋ́kɑꞋmɛ, mbɔ ŋ kɑ́ pɔ́ ńdɔk ḿbɑ́ pɑ́nɛ pɔ́, mbíꞋŋɡɔ ŋ ɡʉ ńcú pɔ nu nɛ́nẅín. Lɑ́ ŋ kɑ́ pɔ́ ŋ́ɡʉ ŋ́kɑꞋmɛ pɔ́, ḿbɔ́k pɛ́ nɛjʉ́ɔ wɑ́ɑ ńdɛɛ yúu mi pɛ́ sɛ́ ńjʉ́ɔ ŋ ɡɛ, tɛ mbɑ yi mɔ sɛ́ ńcú.

⁷Pɑ́Ꞌ ŋ kɑ jʉ́ɔnɛ mɛnu mɑ̌ɑmɑɑnɛ lɑ́, Sɛ́ jʉ́ɔ ŋɡɔ ŋ ɡɔ ḿbɔ́ ńdɔk ŋ́ŋɑ́Ꞌlɛ, ḿbɛ́m mɑ́ntúu-Sɑ́ttɑ ńnɑ́ŋ ńtswɑ́ɑ wɑ́ɑ, ɛ́ pɔ́ ŋɡʉ̈ɔ́Ꞌ yi ɛ́ kɑ kúunɛ nǔu mɔ pɑꞋ nzɔ́ŋ yi ɛ́ lɛ́Ꞌnɛ nǔu mɔ ḿbɔ́ ńnɑ́ŋ ŋ́ɡɑ́ɑnɛ wɑ́ɑ lɑ́, pɔ́Ꞌɔ, nɛpɔ́ yi ŋ kɛ́ kɑꞋmɛ pɔ́,

⁸ɛ́ ŋkɑ́ yɛ́tɑ́t pɑ́Ꞌ m búꞋnɛ mbɔ́ mbɔ̌ Tsɑpʉɔ ŋɡɔ ɑ fú nǔu mɔ ńcẅɛɛtɛ yîyɑ́ ŋɡʉ̈ɔ́Ꞌ,

⁹ḿbúꞋ mbɔ́ mbɔ̌ wɛ́ pɔ́Ꞌɔ, ɑ tsɔ́Ꞌ ŋɡɔ, mɔ sɛ́ ńdíŋɛ wú, ńcẅɛ́lɛ wú, yú kuꞋ pɔ́Ꞌɔ, mbíꞋŋɡɔ ɔ pɔ́ tɛ ḿbɔ́ ḿbɔ́t pɔ́tnɛ lɑ ńdɔk ŋ́ɡɑ́ shʉ́ pɑ́Ꞌ mɑ́ɑ mɛtʉʉ ɡʉ tsuŋ ɛ́fɑꞋ. Ɛ́ yɛ́tɛ́ lɑ́ ŋ kɔŋ nɛpiitɛ ńdɔk pɑ́Ꞌ ḿbɔ́t pɔ́tnɛ ŋ́kɑꞋmɛ. Pɔ́Ꞌɔ, ńjí ŋɡɔ mɛtʉʉ-Kɛlístɔ ɡʉ ńtɔ́ ḿbɔ́ nǔu mɔ.

¹⁰Ɛ́ yúu mi ɛ́ ɡɛnɛ m bɔ́ tɛ ḿbɔ́ ńjʉ́ɔ ŋɡʉ̈ɔ́Ꞌ, mbíꞋŋɡɔ mɔ ŋu-Kɛlístɔ, nu pɔŋ wɑ́ɑ, ḿbɔ́ tɛ ḿbɔ́ ńjɑ́k yúu, kɛ pɛ́ sɛ́ ŋ́kʉ́ʉnɛ wɑ́ɑ kʉʉnɛ́nɛ ɔɔ, kɛ mɔ sɛ́ sɑ́ŋ pɔ mɛcɔ́ mɛnu kɛ́kɑ́ŋ ɔɔ, nu pɔŋ wɑ́ɑ pɔŋnɛ, mbíꞋŋɡɔ m bɔ́ tɛ ḿbɔ́ ḿbɔ́t pɔ́tnɛ lɑ ńzúꞋ ŋ́ɡẅɛɛ tʉʉ.

¹¹Pʉʉ jʉ́ɔ pɑ́Ꞌ n tsʉ́Ꞌ ɛ́sẅíitɛ pɔ pɑ́Ꞌ pɑ́lɛ́ lɑ́, ɛ́ kɛ́ ɛ́fú pɔ mbɔ̌ pʉʉ, mbíꞋŋɡɔ pʉʉ kɑ ɡẅɛɛnɛ nɛɡɛ pɛ́ jí yɑɑ ntɛ́ nɛfɑꞋ. Tɛ mbɑ pɑ́Ꞌ mɔ tsɛtsɛt pʉʉ mbɔɔ nǔu yɛcɔ́ yúu kuꞋ. Pʉɔ pi pɔ́p tsɛtsɛt pʉʉ pɛ́ fúŋ nɛ́ kwɑꞋ ɡɑŋntúu lɑ́, pɔ́p kɑ́ ɡɛ yɛcɔ́ yúu tɛ ńdɔk ńdɛɛ wɑ́ɑ pɔ́.

¹²Ɛ́ kɑ pɔ́ ŋkɑ́ yi ŋ kɑ pɔ́nɛ tsɛtsɛt pʉʉ, pʉʉ tsuŋ ńjʉ́ɔ mɛlii mi ɛ́ lɛꞋlɛ́nɛ ŋɡɔ mɔ kwɑꞋ ŋɡɑŋntúu-Yɛ́su Kɛlístɔ. Ɛ́ pɔ́ pɑ́Ꞌ yîyɑ́ ŋɡʉ̈ɔ́Ꞌ pɔ́ ḿbɔ́ ŋ́kúu wɑ́ɑ ɛ sʉk sʉknɛ, ɛ́ pɔ́ pɑ́Ꞌ pʉʉ jʉ́ɔnɛ mɛlii-mɛnu mɑ̌ɑmɑɑnɛ, ḿbɛn ńjʉ́ɔ ndɑɑkɑ́jʉ́ɔ mɛnu.

¹³Pii yɑ́ɑ yi mɛcɔ́ mɛcúꞋlɛ pʉɔ-Kɛlístɔ kɑ jʉ́nɛ ńdɛɛ wʉ́ʉ ɛ́ kʉ̈ɔ́? Kɛ ɛ́ zɛɛ ḿbɔ́ pɔ pɑ́Ꞌ mɔ ŋkɑɑ ŋkɑ́p yʉ́ʉ cẅɛ́ɛ ɔɔ? Pʉʉ lɑɑ ńjʉ́ɔ ŋɡɔ ẅîwɑ́ nɛpɔ́ kɑ́ pɔ́ ńnɛn pɔ́. Pʉʉ likŋɛ ŋ́ɡɑ́ mbɔ̌ mɔ lɑ́.

¹⁴Ɛ́ pʉ́ɔlɑɑ yi mɔ sɛ́ ŋ́kwɑŋɛ nɛtɔ́ lɑ́Ꞌ pʉʉ nǔu mbɑ́ɑtɛ yɛ́tɑ́t lɑɑ. Lɑ́ mɔ ńtɔ́, pʉʉ kɛ́ ḿbɔɔ wɛcɔ́ pɛ́ tú mɔ tɑ́ŋ, mbíꞋŋɡɔ ŋ kɑ́ pɔ́ ńtɔ́ lɔɔ yúu pʉ́ʉ pɔ́, n tɔ́ pɔ lɔɔ wʉ́ʉ. Ɛ́ zɛɛ ḿbɔ́ pɑꞋnɛ, ɡɛ́ɡɛ́ mbɔ́ŋkʉ̈ɔ́ kɑ́ ɡẅɛɛ nɛlɛp ŋkɑ́p ŋ́ɡɑ́ mbɔ̌ pɛtɑ́t pɔ́p pɔ́, pɛtɑ́t-pɔ́ɔ ɡẅɛɛnɛ nɛlɛp ŋkɑ́p ŋ́ɡɑ́ mbɔ̌ mbɔ́ŋkʉ̈ɔ́ pɔ́p.

¹⁵Ɛ́ ɡʉ nǔu mɔ, mbɔ ɛ́ pɔŋ wɑ́ɑ pɔŋnɛ nɛɡɑ́ kʉ̈ɔ́ lɑ́ yi ŋ ɡẅɛɛnɛ mbɔ̌ pʉʉ. Mbɔ m bɛn ŋ́ɡɑ́ mbɑ tú yɑ́ɑ mbíꞋ wʉ́ʉ. N dɑɑ ḿbɔ́ ŋ́kẅiꞋ ŋ́kɔŋ wʉ́ʉ pɔ ndɛnnú, yʉ́ʉ kɔŋnɛ nzʉʉ mɔ pɛn cẅɛ́tɛ cẅɛ́tɛ́nɛ ɔ́ɔ?

¹⁶Lɑ́, líkcɔ́ ɛ́ fú nǔu pɑ́Ꞌ mɔ ŋ́kɑɑ pɛ́m pʉʉ tɑ́ŋ pɛ́ tú mɔ pɔ́, pɛcɔ́ pʉɔ tsɛtsɛt pʉʉ sɛ́ ńcú ŋɡɔ jínu yɑ́ɑ ɡú tɛꞋ, mɔ sɛ́ ńdɔk jínu lɑ ńcẅɛ́ɛ ŋkɑ́p mbɔ̌ pʉʉ.

¹⁷Ɛ́ yɛ́tɛ́ lɑ́ mɔ sɛ́ ḿbíkŋɛ wʉ́ʉ ŋɡɔ ŋ kɑ túu pʉɔ mbɔ̌ pʉʉ pɛ́Ꞌnɛ pɔ́p kɛ́mɑ́ɑ ńtɔ́ ńcẅɛ́ɛ yɛcɔ́ yúu yʉ́ʉ?

¹⁸Ŋ kɑ PúꞋ mbɔ́ mbɔ̌ Titɛus ŋɡɔ ɑ ɡʉ tɛ ńjʉ́ɔ wʉ́ʉ, ńtúu wɔ́p wɛcɔ́ mɔ́ɔmɑ́ wɛkŋɛ ẅí pʉʉ sɛ́ ńjí wɛ́ lɑ́. Kɛ Titɛus kɑ tɔ́ ɛ́fúklɛ wʉ́ʉ ńcẅɛ́ɛ yɛcɔ́ yúu mbɔ̌ pʉʉ ɔɔ? A ŋkɑɑ ńnɛn pɔ nǔu mɛku mɑ́ɑ pɔ́ ɔɔ? Pɛknɛ kɛ́ mbɔɔ ɡẅɛɛ pɔ tɑ́Ꞌ kwɑŋɛ pɔ́ ɔɔ?

¹⁹Líkcɔ́, mbɔ pʉʉ ńdɑ́Ꞌmɔ́ ńzɛ nɛkwɑŋɛ ŋɡɔ pɛk sɛ́ ńdɔɔ nɛzɔŋ tú yɛ́k mbɔ̌ pʉʉ. Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́. Pɛk ɡɔ́ ńcú nu, ɛ́ pɔ́ pɔ nǔu ntɛ́ yi Kɛlístɔ sɛ́ ŋ́kɔŋ, pɛk pɛn ńtʉ́ʉ pɔ mbi Sɛ́ lɑ ńcú. Pɔ́ɔpɛ́mɑ́ pɑ́ɑ pɛ́ tʉʉndɛn, pɛk ɡɔ́ ńcú pɔ́Ꞌɔ, ɛ́ pɔ́ pɔ nɛlɔk ŋ́ɡɛ, pʉʉ kẅiꞋ ńzɑ́p tʉ́m yʉ́ʉ nǔu Sɛ́.

²⁰N zɛɛ ḿbɔ́ ḿbɔ́k pɑꞋ m bɔ́ ŋɡɔ ńtɔ́ lɑ́Ꞌ pʉʉ, ńjʉ́ɔ pʉʉ pɔɔ pɔ́ nǔu ntɛ́ yi mɔ sɛ́ ŋ́kɔŋ pɔ́. Mɔ yɑ́ɑ ɡúu mbɔɔ pɔ́ nǔu ntɛ́ yi pʉʉ sɛ́ ŋ́kɔŋ pɔ́. Mɔ sɛ́ ḿbɔ́k ŋɡɔ mbɔ ŋ ɡɔ́ ńtɔ́ mɛntsu mɛntsu pɔ́ tsɛtsɛt pʉʉ, kɛ́ɡʉ̈ɔꞋ pɔ́ zúꞋu, cʉ́ɔk pɔ́ zúꞋu, nɛzɔŋ zʉꞋ pɔ́ zúꞋu, nɛkẅíi ŋu kɛpɔŋ pɔ́ zúꞋu, sẅíitɛ pɔ́ zúꞋu, ŋɑ́Ꞌlɛ mbʉʉ pɔ́ zúꞋu, ntɑ́kŋɛ pɔ́ zúꞋu.

²¹Mɔ sɛ́ ḿbɛn ḿbɔ́ ḿbɔ́k nɛɡɛ ḿbɛn ńtɔ́ tɛ ŋ́kúu lɑ́Ꞌ pʉʉ, Sɛ́ wɑɑ pɛn ŋ́kɔk ndɛn wɑ́ɑ mbi pʉʉ tɛ líkcɔ́ ŋ ɡẅɛɛ nɛlɑɑ mbíꞋ pʉɔ tɛ ńzɑ́ɑ pi pɔ́p tsɛtsɛt pʉʉ, mbɔ pɔ́p kɑ pɔ́ ŋ́ɡɛ mɛnu kɛpɔŋ, pɔ́p ŋkɑɑ mɔ́ mɑt wɔ́p kúpmɛ, pɔ́p ŋkɑɑ mɔ́ cẅɛt nǔu mɛnu-ndǔmbí mɔ́p pɔ́, ŋ́kɛ́ mbɔɔ nu mpfuꞋ yɔ́p mɛꞋ, ŋ́kɛ́ ḿbɔ́ ŋ́kẅiꞋ ŋ́ɡɛ pɔ mɛnu kɛpɔŋ ntɛ́ nɛ́ ntɛ́ kɛ́ ɡẅɛɛtɛ mbʉʉ yɔp.