Read Ngomba 2 Kɔlɛ̂ŋtɛ 5 Bible Online

2 Kɔlɛ̂ŋtɛ 5 - Ngomba bible

2 Kɔlɛ̂ŋtɛ 5

¹Pɛk zɛɛ ḿbɔ́ ńjí ŋɡɔ ntɑp wɔ ẅi pɛkŋɛ tsɛtú, ɛ́ pɔ́ mbʉʉ yɛkŋɛ lɑɑnɛ, ɛ́ lɑɑ ńzɛɛ ḿbɔ́ yɛcɔ́ lɛ́Ꞌ ŋ́kɛmɛ kɛmɛ́nɛ, mbɔ pɛkŋɛ ɡẅɛɛ ndɑ́ tʉ́nɛ́pú, ɛ́ pɔ́ yi ɛ́ ɡʉ ńdɑ́Ꞌ ḿbɔ́ pɔ ɡú. Pʉɔmɛ́sɔŋ ŋkɑɑnɛ pɔ́ɔ, Sɛ́ kɑ pɔ́ɔnɛ.

²Ɛ́ yúu mi ɛ́ ɡɛnɛ pɛkŋɛ pɔ́ ŋkɔ̂ɔnɛ ḿbɔ́ ńdɑɑ, ńtsɑ́ɑ nɛpɔ́ tsɛt ndɑ́ yɛkŋɛ tʉ́nɛ́pú, nɛpɔ́ tsɛtú pɑ́Ꞌ ŋu ẅi ɑ tsɛt ndẅí fí yi ɑ mɑꞋnɛ lɑ́.

³Yîyɑ́ mbʉʉ lɑɑ ŋ́kẅíipɛ wɛkŋɛ, pɛkŋɛ pɔɔ pɛn ḿbɔ́ mbi Sɛ́ ḿbɔ́ pɑkɛ́mɑꞋndẅí pɔ́,

⁴mbíꞋŋɡɔ ɛ́ ŋkɑ́ yi pɛkŋɛ pɛ́tnɛ tsɛt wɔ ntɑp, mɛnu pɔ́ fyɛ́t wɛkŋɛ, pɛkŋɛ lɑɑ. Ɛ́ nɛ́nẅín ŋɡɔ pɛkŋɛ kɑ pɔ́ ŋ́kɔŋ ŋɡɔ pɛ́ fú nǔu pɛkŋɛ ńcẅɛɛtɛ yɔ mbʉʉ, pɛkŋɛ lɔɔ nɛmɑꞋ ndẅí yɛ tʉ́nɛ́pú nǔu, nɛpɔ́ yi mbʉʉ yi ɛ́ kɑ́ pfú ɡʉ mi mbʉʉ yi ɛ́ ɡẅɛɛnɛ nɛpfú.

⁵Sɛ́ kɑ niitɛ́nɛ wɛkŋɛ nǔu ẅîwɑ́ nɛpɔ́, ŋ́ɡɑ́ Zẅikŋɛ yɛ́ mbɔ̌ pɛkŋɛ nɛlɔk ŋ́ɡɛ zɛsɛ́ nǔu yúu mi ɑ ɡʉ ŋ́ɡɛ lɑ́ ŋ́ɡɑ́ mbɔ̌ pɛkŋɛ.

⁶Pɔ́Ꞌɔ lɑ́, pɛkŋɛ ŋkɑ́ tsʉʉ, ńtsʉ́Ꞌ ńnɑ́ŋ pɔ nɛ́ tsɑ́ɑtɛ pɑ́Ꞌtɛ. Pɛkŋɛ kɑ́ pɔ́ ḿmuŋɛ ŋɡɔ pɛkŋɛ lɑɑ ńdɑ́Ꞌ ḿbɛ́t ḿbɔ́ pɔ tsɛt yɔ mbʉʉ, mbɔ pɛkŋɛ pɛ́t kɛ́ pɔ́ nɛjɔ́ŋ Tsɑpʉɔ, mbɔ pɛkŋɛ pɔ́ pɔ ŋɡɑ sɛsɑ.

⁷Ɛ́ lɔk ńcú ŋɡɔ pɛkŋɛ pɛ́t ḿbɔ́ ńdɔk mík mɛkŋɛ ńjʉ́ɔ wɛ́. Lɑ́, pɛkŋɛ nɑ́ŋ ḿbɔ́ ńzẅíꞋlɛ pɑꞋnɛ, mbíꞋŋɡɔ pɛkŋɛ zɑ́p tʉ́m nǔu wɛ́.

⁸Pɛkŋɛ tsʉ́Ꞌ ńnɑ́ŋ pɔ nɛ́ tsɑ́ɑtɛ pɑꞋnɛ, Tú yúu ɡwɛ́ yi pɛkŋɛ sɛ́ ńtsɑ́ɑ ɛ́ pɔ́ nɛcẅɛt tsɛt yɔ mbʉʉ, ŋ́ɡʉ ńtsʉ́Ꞌ nɑ́ŋ pɔ nɛjɔ́ŋ Tsɑpʉɔ.

⁹Ɛ́ lɛɛ pɔ́Ꞌɔ, yúu mi pɛk sɛ́ ńtsɑ́ɑ nɛɡɛ tɛꞋ, ɛ́ nɛɡɛ yúu mi ɛ́ pɔŋnɛ wɛ́. Kɛ pɔ pɑ́Ꞌ pɛk tsɛt yɔ mbʉʉ ɔɔ, kɛ pɔ pɑ́Ꞌ pɛk cẅɛtnɛ tsɛtú ɔɔ,

¹⁰mbíꞋŋɡɔ ɛ́ sɛ́ ḿbíkŋɛ ŋɡɔ pɛkŋɛ pɛtsʉʉ lɛɛ mbi Kɛlístɔ ɑ ŋɑk wɛkŋɛ, ɛ́ lɛɛ pɔ́Ꞌɔ, mbɑ wɔ̌ lɑ́ cẅɛ́ɛ yɛ tsɔ́ꞋfɑꞋ nǔu yúu mi ɑ kɑ ɡɛnɛ, ɛ́ pɔ́ yi sʉ́Ꞌnɛ kɛ yi kɛpɔŋ ɔɔ, ŋkɑ́ yi ɑ kɑ pɔ́nɛ tsɛt yîyɑ́ mbʉʉ.

¹¹Pɑ́Ꞌ pɛk sɛ́ ńjí yúu mi pɛ́ fúŋnɛ ŋɡɔ nɛpɔ́k Tsɑpʉɔ lɑ́, pɛk nɑ́ŋ ńdɔɔ pɔ shʉ́, ŋ́ɡɛ pʉɔ tsuŋ ńjí pʉɔ pi pɛk pɛ́tɛ. Sɛ́ sɛ́ ńtsuŋ ńjí pʉɔ pi pɛk pɛ́tɛ, mɔ sɛ́ ŋ́kwɑŋɛ ŋɡɔ pʉʉ tsɛt tʉ́m pʉ́ʉ ḿbɔ́ ńtsuŋ ńjí ŋu wi mɔ wɛ́tɛ́.

¹²Pɛk kɑ́ pɔ́ pɑ́Ꞌɑ lɑ ḿbɛn ḿbɔ́ ńdɔɔ nɛsẅíi wʉ́ʉ nɛ́ pʉɔ pi pɛk pɛ́tɛ́ pɔ́, pɛk ɡɑ́ wʉ́ʉ pɔ nɛ́ shʉ́ pɑ́Ꞌ ḿbɔ́ pʉʉ kwɑŋɛ wɛ́k, nu yɛ́k pɔŋ wʉ́ʉ pɔŋnɛ. Ɛ́ lɛɛ pɔ́Ꞌɔ, pʉʉ jí nɛtsɔ́Ꞌ nu mbɔ̌ pʉɔ pi pɔ́p sɛ́ ńdɔk yúu mi ɛ́ pɔ́ pɔ nzɛmpíi ŋ́ŋɑ́Ꞌlɛ, lɑ́ mbɔ pɔ́p ḿbɔ́ ŋ́ɡʉ ńdɔk pɔ mi ɛ́ pɔ́ pɔ tsɛt tʉ́m pɔ́p ŋ́ŋɑ́Ꞌlɛ.

¹³Pɛ́ lɑɑ ḿbɔ́ ńjʉ́ɔ ŋɡɔ pɛk sɛ́ ŋ́ɡɛ pɑ́Ꞌ pɛpɑ́lɛ́ lɑ́, mbɔ pɛk pɛ́tɛ, pɔ pɑ́Ꞌ nu-Sɛ́ ɡʉ ńnɛn, ŋ́kɛ́ ḿbɔ́ yi jínu yɛ́k ɡú, mbɔ pʉʉ ɡʉnɛ ńdúꞋnɛ.

¹⁴Yɛ́k pɔ́ pɔ ŋɡɔ pɑ́Ꞌ Kɛlístɔ kɔŋnɛ wɛkŋɛ lɑ́, pɛk sɛ́ ńzúꞋ pɔ ntsu wɛ́. Pɛk sɛ́ ńtsuŋ ńjí ŋɡɔ tɑ́Ꞌ ŋu wɛ́mɔ́Ꞌ kɑ pfú nǔu tú-pʉɔ tsʉʉ. Ɛ́ lɔk pɔ́Ꞌɔ, ḿbɔ́ ŋɡɔ pɔ́p pʉɔ pɛtsʉʉ kɑ tɛmtɛ ḿpfú.

¹⁵A kɑ pfú nǔu tú-pʉɔ tsʉʉ, nɛpɔ́ yi pʉɔ pi pɔ́p ntʉʉ kɛ́ pɛn ḿbɔ́ ɡú pɔ́ pɑ́Ꞌ pɔ́p ɡʉ ŋ́ɡɛ yúu mi ɛ́ pɔŋnɛ wɔ́p pɔ́. Pɔ́p ɡʉ ńtsʉ́Ꞌ ḿbɔ́ ɡú, pɔ pɑ́Ꞌ pɔ́p ɡʉ ŋ́ɡɛ yúu mi ɛ́ pɔŋnɛ wɛ́, jʉ́ ẅi ɑ kɑ pfúnɛ nǔu tú yɔ́p lɑ Sɛ́ zẅíimɛ wɛ́ nǔu nɛvú.

¹⁶Pɑ́Ꞌ ɛ́ pɔ́Ꞌɔ lɑ́, pɛk nǔu ŋkɔ̂ɔnɛ ńtsʉ́Ꞌ ḿbɔ́ɔ ńjí ŋu pɔ nǔu ntɛ́ yi pʉɔmɛsɔŋ lɔknɛ ńjí ŋu pɔ́. Ɛ́ lɑɑ ḿbɔ́ yi pɛk kɑ zɛɛ ńjí Kɛlístɔ nǔu yîyɑ́ ntɛ́, mbɔ pɛk ŋkɔ̂ɔnɛ ḿbɔɔ ḿbɛn ḿbɔ́ ńjí wɛ́ pɔ́Ꞌɔ pɔ́.

¹⁷Ŋu pɔ́ tɛ ńdɑt mbʉʉ yɛ nǔu Kɛlístɔ, ńtsʉ́Ꞌ ḿbɔ́ pɔ ŋu fí, ḿbɔ́ tsɛt tʉ́m yɛ́ mbɔɔ pɛn ḿbɔ́ pɑ́Ꞌ ɑ kɑ zɛɛnɛ ḿbɔ́ pɔ́, mbɔ ɑ zɛ nɛnɑ́ŋ wɛ fí.

¹⁸Mîmɑ́ mɛnu tsʉʉ fú mbɔ̌ Sɛ́ ẅi ɑ kɑ lɔknɛ Kɛlístɔ ḿmik mbuu yí ɛ́ kɑ pɔ́nɛ tsɛtsɛt pɛkŋɛ pɛ jʉ́ Sɛ́, ɑ kɑ pɛn ŋ́ɡɑ́ fɑꞋ mbɔ̌ pɛk, ɛ́ pɔ́ nɛɡʉ ɛ́sẅíi pʉɔ ŋɡɔ shʉ́ nɛmɛk mbuu yí ɛ́ kɑ pɔ́nɛ tsɛtsɛt pɔ́p pɛ́ Sɛ́ ɛ́ cẅɛt.

¹⁹Sɛ́ kɑ zɛɛ ḿbɔ́ ŋ́ɡɑ́ Kɛlístɔ, ḿbɔ́ ḿmik mbuu yí pɔ́p pʉɔmɛsɔŋ ndǔmbí ɡẅɛɛnɛ, pɔ́Ꞌɔ, kɛ́ pɛn sɑ́ŋ mɛnu kɛpɔŋ mɔ́p, ŋ́ɡɛ ńdẅiklɛ sẅiŋɛ lɔk ḿmik mbuu mbɔ̌ pɛk.

²⁰Pɛk lɔk pɑ́Ꞌɑ ḿbɔ́ pɛmɑ́ntúu-Kɛlístɔ lɑ ńcú nu. Ɛ́ pɑ́Ꞌɑ ńdɔk ḿbɔ́ ŋɡɔ Sɛ́ ɛ̂wɑ́ fúŋnɛ pʉɔ. Pɛk lɔk lík-Kɛlístɔ, ḿbúꞋ mbɔ́ ŋɡɔ pʉɔ pɛ́m Sɛ́ ŋ́ɡɛ pɔ́p pɛpɔ́p pɛn ḿbɔ́ sʉ́Ꞌnɛ.

²¹Pɑ́Ꞌ ndɔɔ kɑ pɔ́ tú pɛkŋɛ lɑ́, Sɛ́ kɑ tíi mɛnu kɛpɔŋ mɛkŋɛ, ńzɑ́p tú-Kɛlístɔ, mbɔ ɑ ŋkɑɑ yɛcɔ́ nu kɛpɔŋ ɡẅɛɛ. A kɑ ɡɛ pɔ́Ꞌɔ, pɑ́Ꞌ pɛkŋɛ ɡʉ ńdɔk nɛlɑt mbʉʉ nǔu Kɛlístɔ, ḿbɔ́ pʉɔ pi pɔ́p mbɔ̌ Sɛ́ ḿbɔ́ ndʉ́ŋndʉŋ.