Read Ngomba 2 Kɔlɛ̂ŋtɛ 6 Bible Online

2 Kɔlɛ̂ŋtɛ 6 - Ngomba bible

2 Kɔlɛ̂ŋtɛ 6

¹Pɑ́Ꞌ pɛkŋɛ pɛ́ Sɛ́ tɛmtɛ́nɛ ḿbɔ́ ɛ́fɑꞋ lɑ́, pɛk sɛ́ ńní mɛtʉʉ mʉ́ʉ ŋɡɔ kɔɔ pʉʉ ɡɛ nǔu ntɛ́ yi, nɛpɔ́ ẅi Sɛ́ tsɑ́ɑnɛ wʉ́ʉ, ŋ́ɡɑ́ fuꞋ níinɛ yʉ́ʉ, ɡʉ ńdɛɛ fɛ̌ɛ.

²Sɛ́ kɑ zɛɛ ńcú ŋɡɔ: Ŋkɑ́ nɛcẅɛ́lɛ wú kɑ pɔ́ tɛ ŋ́kuꞋ, n zúꞋ ŋɡi yu, lɛ́Ꞌ nɛɡɛ pʉɔmɛsɔŋ luk kɑ kuꞋ, n tɔ́ ńcẅɛ́lɛ wú. Pʉʉ jí ŋɡɔ ɛ́ kɛ́ ḿbɔ́ ŋkɔ̂ɔnɛ pɑ́Ꞌɑ ḿbɔ́ ŋkɑ́ sʉ́Ꞌnɛ, yɔ lɛ́Ꞌ yi ḿbɔ́ ŋu luk.

³Ɛ́ ɡʉ nǔu pɛk ɡɑŋntúu, pɛk kɑ́ pɔ́ ŋ́ɡɛ yɛcɔ́ yúu mi mbɔ ŋu kɔɔtɛ nǔu ḿvu sɛ́ pɔ́, pɛ́ fú nǔu ńdɔk ńzɔɔtɛ fɑꞋ yɛ́k pɔ́.

⁴Tɛ ńtsʉ́Ꞌ pɔ́Ꞌɔ, pɛk tʉ́ʉ nǔu kʉ̈ɔ́ lɑ́, ńnyɛt ŋɡɔ pɛk pɑfɑꞋ fɑꞋ-Sɛ́, ńdɔk pɑ́Ꞌ pɛk sɛ́ ɛ́sʉk tɛꞋ, nǔu ŋkɑ́-ŋɡʉ̈ɔ́Ꞌ, nǔu ŋkɑ́ yi nu lɛɛnɛ wɛ́k, nǔu ŋkɑ́ yi pɛk sɛ́ ńcʉ̈ɔꞋ tɛꞋ,

⁵kɛ pɔ ŋkɑ́ yi pɛ́ sɛ́ ńtswɑ́ɑ wɛ́k ɔɔ, kɛ pɔ ŋkɑ́ yi pɛ́ níꞋnɛ wɛ́k tsɑ́ŋ ɔɔ, kɛ pɔ ŋkɑ́ yi pɛ́ tsʉ́ʉnɛ́nɛ lɑ́Ꞌ ḿmɑꞋ nzʉʉ pɛk ɔɔ, kɛ nǔu ŋkɑ́ yi pɛk tʉ́ʉnɛ nǔu mɛfɑꞋ mi ɛ́ tɛn tɛnnɛ ɔɔ, kɛ nǔu ŋkɑ́ yi pɛk sɛ́ ńdɛ́ kɛ́ lɛ́ ɔɔ, mbɑ nǔu ŋkɑ́ yi pɛk sɛ́ ńnɑ́ŋ kɛ́ ŋ́kwɛ́t yúu.

⁶Pɛk sɛ́ ńdɔk wɛk mɑt ńnyɛt ŋɡɔ pɛk pɑfɑꞋ fɑꞋ-Sɛ́. Pɛk ɡẅɛɛ tʉ́m Lɛ́ɛnɛ́nɛ, mbɑ jínu yi ɛ́ fúnɛ mbɔ̌ Sɛ́, ŋ́ɡɛ kɔkmbʉʉ. Pɛk ɡẅɛɛ pɔ pɔŋtʉ́m nzʉʉ pʉɔmɛsɔŋ, ńzẅíꞋlɛ yɛ́k kʉ̈ɔ́ lɑ́ pɔ mbɔ̌ Zẅikŋɛ Lɛ́ɛnɛ́nɛ, ŋ́ɡẅɛɛ ŋkɔŋɛ yi ɛ́ kɑ́ pɔ́ ŋkɔŋ-mík pɔ́,

⁷Pɛk ɛ́sẅíi yɛ́k pɔ nu nɛ́nẅín, yúu mi pɛk ɡɛnɛ nyɛt pɔ mɛtʉʉ Sɛ́. Pɛk lɔk pɔ nu yi ɛ́ tʉ́ʉnɛ ndʉ́ŋndʉŋ ńdɔk ŋ́ɡɛ yɛ́k yúu lɔk ŋ́kɛm ntsɔ tɛ mbɑ yɛ́ lɔk ńdʉɔ́Ꞌ ntsɔ.

⁸Pɛcɔ́ pʉɔ sɛ́ ŋ́ɡɔ́ ŋ́ɡɑ́ mɛkuꞋ mɛ́k, pɛcɔ́ pɔ́ ńtɛ́m sʉ́ʉ nǔu pɛk. Pɛcɔ́ ɡɔ́ ŋ́ɡʉ̈ɔꞋtɛ yúu mi pɛk sɛ́ ŋ́ɡɛ, pɛcɔ́ pɔ́ ńzɔɔtɛ wɛ́k zɔɔtɛnɛ. Pɛ́ sɛ́ ńdɔk wɛ́k ŋ́ɡɛ ɡɑŋcɔtnu, lɑ́ pɛk kɛ́ ḿbɔ́ ɛ́sẅíi pɔ nu nɛ́nẅín.

⁹Pɛ́ sɛ́ ḿmuŋɛ wɛ́k, lɑ́ ŋ́kɛ́ ḿbɔ́ ńjí wɛ́k jínɛ, ńdɔk wɛ́k ɛ́fúŋ pɛpfú lɑ́ pɛk tsuŋ ḿbɔ́ pɔ́p ntʉʉ, ńnyɛt wɛ́k nɛ́ ŋɡʉ̈ɔ́Ꞌ, lɑ́ ŋ́kɛ́ mbɔɔ wɛ́k jẅí.

¹⁰Pɛ́ kwɑŋɛ ŋɡɔ pɛk sɛ́ ḿmʉk yɛcɔ́ nu, lɑ́ pɛk ńnɑ́ŋ ŋkɑ́ tsʉʉ pɔ nɛ́ tsɑ́ɑtɛ. Pɛ́ sɛ́ ńdɔk wɛ́k ɛ́fúŋ pɛpúŋ, lɑ́ pɛk pɔ́ ńdɔk pʉɔ tɛ ńzɑ́ɑ ŋ́ɡɛ ɡɑŋyúu. Pɛ́ sɛ́ ńdíŋɛ wɛ́k pɑ́Ꞌ ŋkɑ́ yi yúu yɛ́k kɑ́ pɔ́ ɡú pɔ́ lɑ́, lɑ́ pɛk kɛ́ ŋ́ɡẅɛɛ yúu tsʉʉ.

¹¹Pʉʉ pɛsúu pɛk pi pɔ́p Kɔlɛ̂ŋntɛ, pɛk sẅíi wʉ́ʉ nɛ nu kɛ́ lẅɛꞋ pfuꞋ,pɛk tɛmtɛ ŋ́ŋíɛꞋ tʉ́m wɛ́k ńnyɛt wʉ́ʉ.

¹²Pɛk kɑ́ pɔ́ ńdʉꞋ nɛkɔŋ wʉ́ʉ pɔ́, yɛcɔ́ yúu lɑɑ ḿbɔ́ ńtɑ́ɑtɛ wʉ́ʉ nɛkɔŋ wɛ́k, mbɔ ɛ́ fú mbɔ̌ pʉʉ.

¹³Ŋ ɡʉ ńcú nu mbɔ̌ pʉʉ ŋkɔ̂ɔnɛ pɑ́Ꞌ ŋu cú nu mbɔ̌ mbɔ́ŋkʉ̈ɔ́ pɛ́ lɑ́. Ɛ́ pɔ́ ŋɡɔ pʉʉ kɔŋ wɛ́k ɡúu pɑ́Ꞌ pɛk sɛ́ ŋ́kɔŋ wʉ́ʉ ɡúu.

¹⁴Kɔɔ pʉʉ pɑkɛzɑ́p tʉ́m nǔu Yɛ́su tɛmtɛ pɑꞋ ŋu pɔ́p wɛcɔ́ tɛmtɛnɛ ńnɛn tɑ́Ꞌ ku ŋ́ɡɛ tɑ́Ꞌ yúu lɑ́, ḿbɔ́ nu yi ɛ́ tʉ́ʉnɛ ndʉ́ŋndʉŋ pɔ́p yi ɛ́ kɑ́ tʉ́ʉ zɛɛ ńtɛmtɛ ku ńnɛn ŋɡɔ́ku? Mbɔ kyɛꞌ pɔ́p nzɛ́nzʉ́ʉ pɔ́ tɑ́Ꞌ zʉꞋ ŋɡɔ́ku?

¹⁵Tɛ ɛ́ lɑɑ ḿbɔ́ Kɛlístɔ pɔ́p Bɛliɑl pɔ́ tɑ́Ꞌ ntsu? Tɛ ɑ lɑɑ ḿbɔ́ ŋu ẅí ɑ zɑ́pnɛ tʉ́m nǔu Kɛlístɔ pɔ́p ŋu ẅí ɑ kɑ́ zɑ́p tʉ́m nǔu wɛ́ pɔ́ ŋ́ɡẅɛɛ tɑ́Ꞌ kwɑŋɛ?

¹⁶Mbɔ pɛ́ lɔk ndɑ́-nɔŋpɔꞋ-Sɛ́ pɔ́p yúu mi pɛ́ ɡúꞋlɛ ŋɡɔ ɛ́ mɛsɛ́ ńdɔk ɛ́fúŋ tɑ́Ꞌ yúu ŋɡɔ́ku? Pɛkŋɛ zɛɛ ḿbɔ́ ndɑ́-nɔŋpɔꞋ-Sɛ́ ẅi ɑ ḿbɔ́ ńcú mbɔ̌ pɔ́p, pɑ́Ꞌ kwɑꞋ jʉ́ kɑ cúnɛ ŋɡɔ: Mɔ, ŋ ɡʉ ŋ́ɡɛ ńtsʉ́Ꞌ ńnɑ́ŋ pɔ tsɛtsɛt pɔ́p, ḿbɔ́ nɛn tsɛtsɛt pɔ́p. Mɔ ŋ́ɡɛ ḿbɔ́ Sɛ́ wɔp, pɔ́p pɔ́ pʉɔ pɑ́ɑ.

¹⁷Ɛ́ yúu mi ɛ́ ɡɛ jʉ́ Tsɑpʉɔ cú ŋɡɔ: Pʉʉ fú tsɛtsɛt pɔ́p ńcẅɛt, ɛ́fɑk yʉʉ mbʉʉ, Kɔɔ pʉʉ ɡẅɛɛ yúu mi lɔ́Ꞌ nǔu, Mɔ, m bɛn ŋ́kɛ́ ŋ́kúkŋɛ wʉ́ʉ.

¹⁸Mɔ, ŋ ɡʉ ŋ́ɡɛ ḿbɔ́ mbɔ̌ pʉʉ ḿbɔ́ tɑ́t wʉʉ, Pʉʉ pɔ́ mbɔ̌ mɔ, ḿbɔ́ pɔ́ɔ pɑ́ɑ pɛ́ mbɛ́ɛnɛ mbɑ pɛ́ pɑŋɡɛ́, Tsɑpʉɔ, ŋɡɑŋmɛtʉʉ tsʉʉ cúnɛ.