Read Ngomba 2 Kɔlɛ̂ŋtɛ 7 Bible Online

2 Kɔlɛ̂ŋtɛ 7 - Ngomba bible

2 Kɔlɛ̂ŋtɛ 7

¹Pɔ́ɔpɛ́mɑ́ pɑ́ɑ pɛ́ tʉʉndɛn, pɑ́Ꞌ Sɛ́ kɑ kɑꞋnɛ mɔnɛ mɛnu mbɔ̌ pɛkŋɛ lɑ́, ɛ́ sɛ́ ḿbíkŋɛ ŋɡɔ kwɑꞋ pɛkŋɛ nɛ́ tú yɛkŋɛ kʉ̈ɔ́ mɛnu mi ɛ́ kɑ́ pɔŋ Sɛ́ pɔ́, mi pɛ́ ɡɛ ɡɛnɛ, tɛ mbɑ mi pɛ́ kwɑŋɛ kwɑŋɛ́nɛ, ŋ́kẅiꞋ ńdɔk nɛpɔ́ kɛ́ lɔ́Ꞌ ŋ́ɡʉ nɛ́ mbi tɛ ńdẅiklɛ, ŋ́ɡɔ ŋ́ɡɛ, ḿbɔ́ ḿbɔ́k Sɛ́.

²Ɛ́ pɛn ḿbɔ́ ḿbíkŋɛ ŋɡɔ pʉʉ ɡɛ tɛ pɛk jí ŋɡɔ nu yɛ́k ɛ́ tsɛt tʉ́m pʉʉ, pɛk kɑ́ fɑɑnɛ nu mbɔ̌ wɛcɔ́ ŋu pɔ́, pɛk ŋkɑɑ ɡɛ ŋu ɛ́fɑɑnɛ sɛ̂ndúŋ-Sɛ́ pɔ́, pɛk kɛ́ mbɔɔ fʉ́klɛ wɛcɔ́ ŋu ńjʉ́ yúu yɛ́ pɔ́.

³Ŋ kɛ́ ḿbɔɔ ńcú pɑ́Ꞌɑ ńdɔk ńcú ŋɡɔ pʉʉ fɑɑnɛ yɛcɔ́ nu pɔ́. Mɔ ńzɛɛ mɔ́ ńdɑ́Ꞌ ɛ́sẅíi wʉ́ʉ ŋɡɔ, nu yʉ́ʉ ɛ́ tsɛt tʉ́m pɛk. Pɛk zúꞋ pɛkŋɛ pɔ́nɛ pɔ nǔu tɑ́Ꞌ nɔɔ, kɛ pɛkŋɛ sɛ́ ńzúꞋ pɔ sʉ́Ꞌnɛ ɔɔ, kɛ pɛkŋɛ pɔ́ pɔ ntsu nɛvú ɔ́ɔ.

⁴Mɔ ńtɛ́m mɔ́ ŋkwɛn yɑɑ ŋ́ɡɑ́ mbɔ̌ pʉʉ, n dɔk pɔ wʉ́ʉ ńtsɑ́ɑtɛ tɛꞋ, m bɛ́t ŋ́ɡẅɛɛ pɔ sʉk tɛꞋ, tsɑ́ɑtɛ tʉ́m mɔ tɛꞋ tɛ mbɑ pɑ́Ꞌ pɛk sɛ́ ńjʉ́ɔ ŋɡʉ̈ɔ́Ꞌ tɛꞋ lɑ́.

⁵Pɛk kɑ zɛɛ ŋ́ɡʉ tɛ ŋ́kúu Mɑsɛndwɑn, wɛcɔ́ nɛjẅiitɛ pɔɔ ɡú pɔ́. Ŋɡʉ̈ɔ́Ꞌ fú mɛshʉ́ mɛshʉ́ ńtɔ́. Pʉɔ ɡɔ́ ḿbɔ́ nzɛmpíi ḿmɑꞋ wɛ́k nɛ́ ntsɔ, tʉ́m yɛ́k pɔ́ tsɛtú ḿbɔ́k mbíꞋ mɛcɔ́ mɛnu.

⁶Lɑ́, Sɛ́ tuk ŋki-mík mɛ́k pɑ́Ꞌ ɑ tuknɛ ŋki-mík-pʉɔ pi pɔ́p sɛ́ ńdɑɑ. Ɛ́ pɔ́ pɑ́Ꞌ ɑ kɑ ɡɛnɛ Titɛus lutnɛ ńtɔ́ ńjʉ́ɔ wɛ́k.

⁷Sɛ́ kɑ́ lɔk pɔ ndɑꞋ pɑ́Ꞌ Titɛus tɔ́nɛ pɔ́, ɑ pɛn ńdɔk mbɑ pɑ́Ꞌ pʉʉ kɑ zíinɛ ŋki-mík-Titɛus ɡúu. Titɛus kɑ piitɛ, ɛ́sẅíi wɛ́k nɛ́ ntɛ́ yi pʉʉ sɛ́ ńtsɑ́ɑ nɛjʉ́ɔ wɑ́ɑ pɔ́Ꞌɔ, ḿbɛn ḿbɛ́ɛtɛ ntɛ́ yi pʉʉ sɛ́ ńdɔk ḿmʉk nu yɑ́ɑ pɔ́Ꞌɔ, ḿbɛn ɛ́sẅíi wɛ́k pɑ́Ꞌ pʉʉ tʉ́ʉnɛ ḿbɛꞋ mɛ́lɑ́Ꞌ mɑ́ɑ pɔ́Ꞌɔ. Tɛ n zúꞋ, nu pɛn ŋ́kẅiꞋ ḿbɔŋ wɑ́ɑ tɛꞋ.

⁸Nu ɡẅɛɛ nɛpɔŋ wɑ́ɑ tɛꞋ. ŊwɑꞋnɛ yi ŋ kɑ piitɛ́nɛ ńtúu mbɔ̌ pʉʉ, ɛ́ kɑ ɡɛ pʉʉ mʉk, lɑ́ ŋ kɑ́ pɔ́ ńjʉ́ɔ yɛcɔ́ lɔ́Ꞌ nǔu pɔ́. Ɛ́ lɑɑ ḿbɔ́ yi ŋ kɑ jʉ́ɔ lɔ́Ꞌ nǔu, mbɔ ɛ́ pɔ́ pɔ pɑ́Ꞌ ŋ kɑ pɔ́ ńjí ŋɡɔ ɛ́ ɡʉ ŋ́ɡɛ pʉʉ zɛɛ ḿmʉk.

⁹Lɑ́, mɔ ŋkɔ̂ɔnɛ ḿbɔ́ ńtsɑ́ɑtɛ tsɑ́ɑtɛ́nɛ. Mɔ sɛ́ ḿbɔɔ ńtsɑ́ɑtɛ, pɔ mbíꞋŋɡɔ pʉʉ kɑ mʉk pɔ́, n tsɑ́ɑtɛ mbíꞋŋɡɔ nɛmʉk wʉ́ʉ kɑ ɡɛ pʉʉ kúpmɛ mɑt. Pʉʉ kɑ mʉk nǔu ntɛ́ yi Sɛ́ sɛ́ ŋ́kɔŋ, tɛ ḿbɔ́ pʉʉ pɔɔ cú ŋɡɔ pɛk kɑ ɡɛ yɛcɔ́ nu kɛpɔŋ nǔu pʉʉ pɔ́,

¹⁰mbíꞋŋɡɔ nɛmʉk nǔu ntɛ́ yi Sɛ́ sɛ́ ŋ́kɔŋ, ɛ́ ɡɛ ŋu kúpmɛ mɑt. Ẅîwɑ́ nɛkúpmɛ mɑt ɡɛ ŋu luk, tɛ ḿbɔ́ nu pɔɔ pʉ́k wɛ́ pɑ́Ꞌ ɑ mʉknɛ pɔ́. Lɑ́ nɛmʉk nǔu ntɛ́ yɛ́ pʉɔ-ndǔmbí, ɛ́ ɡɑ́ pɔ nɛvú.

¹¹Pʉʉ líŋɛ pɔ yúu mi yîyɑ́ ntɛ́ nɛmʉk, nǔu ntɛ́ yi Sɛ́ sɛ́ ŋ́kɔŋ, ɛ́ kɑ ɡɛ nǔu pʉʉ lɑ́ ńjʉ́ɔ. Jʉ́ɔ wʉ́ʉ nɛɡwɛtnɛ ŋkɑ́ yi nu sɛ́. Jʉ́ɔ wʉ́ʉ nɛlɔ́ɔ ŋɡɔ pɛ́ likŋɛ mɛfɑɑnɛ mʉ́ʉ ŋ́ɡɑ́ mbɔ̌ pʉʉ. Jʉ́ɔ wʉ́ʉ nɛmʉk nu yɑ́ɑ. Jʉ́ɔ wʉ́ʉ nɛpɔ́k nu. Jʉ́ɔ wʉ́ʉ nɛtsɑ́ɑ nɛjʉ́ɔ wɑ́ɑ. Jʉ́ɔ wʉ́ʉ nɛzɑŋɛ mbʉʉ. Jʉ́ɔ wʉ́ʉ nɛzɑ́p ŋɡʉ̈ɔ́Ꞌ tú-ŋu ẅí ɑ fɑɑnɛ nu. Pʉʉ kɑ lɔk mɛshʉ́ tsʉʉ ńdɛꞋlɛ ŋɡɔ pʉʉ ŋkɑɑ pɛn ḿbɔ́ ńjí yɛcɔ́ nu nǔu yɔ nu pɔ́.

¹²Pɑ́Ꞌ ŋ kɑ ŋwɑꞋnɛ́nɛ ŋwɑꞋnɛ ŋ́ɡɑ́ mbɔ̌ pʉʉ lɑ́, ŋ kɑ́ pɔ́ ŋ́ŋwɑꞋnɛ mbíꞋ ɡɑŋmɛfɑɑnɛ pɔ́, ŋ́kɛ́ ḿbɔɔ ŋ́ŋwɑꞋnɛ mbíꞋ ŋu ẅí pɛ́ ɡɛnɛ nu kɛpɔŋ nǔu wɛ́ pɔ́. Ḿbɔ́ ŋ́ŋwɑꞋnɛ pɔ ŋɡɔ pʉʉ tʉ́ʉ mbi Sɛ́, ńjʉ́ɔ ntɛ́ yi pʉʉ ńdɔk ŋ́ɡwɛtnɛ nǔu nu yɛ́k.

¹³Yɔ yúu mi ɛ́ kɑ zíinɛ ŋki-mík mɛ́k. Ŋki-mík mɛ́k ŋkɑɑnɛ pɔ́ mɛ́ zíinɛ ndɑꞋ pɔ́, pɛk kɑ pɛn ŋ́kẅiꞋ ńtsɑ́ɑtɛ tɛꞋ nǔu nu yi Titɛus kɑ pɔ́ ńtsɑ́ɑtɛ yɛ́, mbɔ pʉʉ pɛtsʉʉ ɡɛnɛ tʉ́m yɛ́ fíitɛ.

¹⁴Ɛ́ ɡɔ́ ḿbɔ́, mbɔ ŋ kɑ tʉ́ʉ mbi Titɛus ńnɑ́Ꞌ ńdɔk nu yʉ́ʉ ŋ́kɑꞋtɛ. A pɛn fú lɑ́Ꞌ pʉʉ, sʉ́ʉ kɛ́ mbɔɔ wɑ́ɑ kɔ́. Yúu mi pɛk kɑ pɔ́ ńdɔk nu yʉ́ʉ ŋ́kɑꞋtɛ mbi Titɛus nǔu, ɛ́ kɑ pɛn ńcẅɛt ḿbɔ́ pɔ nu nɛ́nẅín, ndʉ́ŋndʉŋ pɑ́Ꞌ pɛk ńjúknɛ ɛ́sẅíi wʉ́ʉ pɔ nɛ́ nu nɛ́nẅín lɑ́.

¹⁵Lɑ́, ɛ́ fú pɔ́Ꞌɔ, m bɛn ŋ́kẅiꞋ ŋ́kɔŋ wʉ́ʉ pɔ ndɛꞋ ndɛꞋ, ńnɑ́ŋ ḿbɔ́ ŋ́kẅíitɛ pɑ́Ꞌ pʉʉ pɛtsʉʉ kɑ tɛmtɛnɛ ńtʉ́ʉ nɛzúꞋ ntsu, mbɑ pɑ́Ꞌ pʉʉ kɑ kúkŋɛ́nɛ wɛ́, ḿbɔ́k wɛ́ pɑ́Ꞌ pɛ́ pɔ́k mɑ́ntúu, ŋ́ɡɑ́ mbʉʉ sɛ́ mbi wɛ́.

¹⁶Mɔ sɛ́ ḿbɔ́ ńtsɑ́ɑtɛ tɛꞋ pɑ́Ꞌ m bɔ́ ŋ́ɡʉ nǔu kʉ̈ɔ́ lɑ́, ńtɛ́m ŋkwɛn yɑɑ ŋ́ɡɑ́ mbɔ̌ pʉʉ, kɛ́ pɔ́k.