Read Ngomba Ŋɡɑlɑ̂t 3 Bible Online

Ŋɡɑlɑ̂t 3 - Ngomba bible

Ŋɡɑlɑ̂t 3

¹Pʉʉ pʉɔ-Ŋɡɑlɑ̂t, jínu yʉ́ʉ pɛ́ kɛkʉ̈ɔ́? Wɔ̌ kɑ lɔknɛ nɛkɑŋ ḿbúunɛ wʉ́ʉ pɑ́Ꞌɑ? Lɑ, mbɔ pɛ́ kɑ niitɛ ɛ́sẅíi wʉ́ʉ nɛ́ nu nǔu nɛvú tɛ ɛ́ pɔ́ pɔ pɑ́Ꞌ ŋkɑ́ yi pʉʉ sɛ́ ńdɔk mík mʉ́ʉ ńjʉ́ɔ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́.

²Ŋ ɡʉ ḿbíkŋɛ wʉ́ʉ nɛ́ tɑ́Ꞌ nu, pʉʉ kɑ lɔk pɑ́Ꞌ pʉʉ kɑ pɔ́ ŋ́ɡɛ yúu mi nɛpʉ́ʉ-Sɛ́ píkŋɛ́nɛ lɑ Sɛ́ ɡɑ́ Zẅikŋɛ Lɛ́ɛnɛ́nɛ mbɔ̌ pʉʉ kɛkʉ̈ɔ́? Kɛ pʉʉ kɑ lɔk pɔ pɑ́Ꞌ pʉʉ zúꞋnɛ Ŋkʉʉ Sʉ́Ꞌnɛ ńzɑ́p tʉ́m nǔu lɑ Sɛ́ ɡɑ́ mbɔ̌ pʉʉ?

³Jínu yʉ́ʉ ɡɛ pɑ́Ꞌɑ ḿbɔ́t pɔ ndɛn wɔ? Ɛ́ ɡɛ ŋɡɔ ku yúu mi pʉʉ kɑ lɔknɛ mɛtʉʉ-Zẅikŋɛ-Sɛ́ ńzɛ, pʉʉ pɛn ńtsʉ́Ꞌ ḿbɔ́ ŋkɔ̂ɔnɛ ḿbɔ́ ńdɔɔ nɛlɔk pɔ mʉ́ʉ mɛtʉʉ lɑ ḿmɛkŋɛ?

⁴Pʉʉ kwɑŋɛ ŋɡɔ mɛnu mi pʉʉ kɑ pɔ́ ńjʉ́ɔ, pʉʉ kɑ pɔ́ ńjʉ́ɔ pɔ níinɛ kîi?

⁵Pɔ́Ꞌɔ lɑ́, ɛ́ pɔŋ ŋɡɔ pʉʉ pɛn ńjʉ́ɔ ŋɡɔ Sɛ́ sɛ́ ŋ́ɡɑ́ Zẅikŋɛ yɛ́ mbɔ̌ pʉʉ, ḿbɛn ḿbɔ́ ŋ́ɡɛ mɛnu mɑ̌ɑmɑɑnɛ tsɛtsɛt pʉʉ. Pʉʉ kwɑŋɛ ŋɡɔ ɑ ɡɛ pɔ́Ꞌɔ, mbíꞋŋɡɔ pʉʉ sɛ́ ŋ́ɡɛ yúu mi nɛpʉ́ʉ sɛ́ ḿbíkŋɛ kîi? Ŋɡɑ́ŋ, ɑ ɡɛ mbíꞋ pɔ ŋɡɔ pʉʉ kɑ zúꞋ Ŋkʉʉ Sʉ́Ꞌnɛ ńzɑ́p tʉ́m wʉ́ʉ nǔu.

⁶ŊwɑꞋnɛ-Sɛ́ zɛɛ ńcú ŋɡɔ Ábɛlɛhɑ̂m kɑ lɔk yɛ́ pɔ nɛzɑ́p tʉ́m nǔu Sɛ́, lɑ Sɛ́ fú nǔu pɑ́Ꞌ ɑ zɑ́pnɛ tʉ́m yɛ́ nǔu wɛ́ pɔ́Ꞌɔ, ḿbɛ́m wɛ́ pɑ́Ꞌ ŋu ẅí ɑ mbi yɛ́ ḿbɔ́ ndʉ́ŋndʉŋ.

⁷Pɔ́Ꞌɔ lɑ́, pʉʉ jí ŋɡɔ pʉɔ pi pɔ́p zɑ́pnɛ tʉ́m yɔ́p nǔu Sɛ́ pɔ́nɛ kwɑꞋ njẅɛt yi Sɛ́ kɑ kɑꞋnɛ mbɔ̌ Ábɛlɛhɑ̂m.

⁸ŊwɑꞋnɛ-Sɛ́ kɑ zɛɛ ńzɑ́Ꞌ njí ńnyɛt ŋɡɔ: Sɛ́ ɡʉ ńdɑ́Ꞌ ɛ́fú nǔu pɑ́Ꞌ pʉɔ pi pɔ́p kɑ́ pɔ́ pɑyúdɑ pɔ́, ɡʉ ńdɑ́Ꞌ ńzɑ́p tʉ́m nǔu wɛ́ ɑ pɛ́m wɔ́p pɑ́Ꞌ pʉɔ pi pɔ́p mbi yɛ́ ḿbɔ́ ndʉ́ŋndʉŋ. Ɛ́ yɛ́tɛ́ lɑ ŋwɑꞋnɛ-Sɛ́ kɑ zɑ́Ꞌ njí ńcẅi wɔ Ŋkʉʉ Sʉ́Ꞌnɛ mbɔ̌ Ábɛlɛhɑ̂m ŋɡɔ: Sɛ́ ɡʉ ńdɑ́Ꞌ ńdɛɛ nǔu ɡu ńníꞋ mbɔ́tnɛ nǔu mɛlɑ́Ꞌ tsʉʉ mi ɛ́ ndǔ tsɛ́tsɑ́Ꞌ.

⁹Ábɛlɛhɑ̂m kɑ zɑ́pnɛ tʉ́m nǔu Sɛ́, Sɛ́ níꞋ mbɔ́tnɛ nǔu wɛ́. Pɔ́Ꞌɔ lɑ́, pʉɔ pi pɔ́p zɑ́pnɛ tʉ́m nǔu Sɛ́ pɑ́Ꞌ Ábɛlɛhɑ̂m lɑ́, Sɛ́ ŋ́ɡɛ ńníꞋ mbɔ́tnɛ nǔu pɔ́p ɡúu.

¹⁰Sɛ́ zɛɛ ńníꞋ pɔ ndɔɔ tú-pʉɔ pi pɔ́p lɔknɛ nɛcú ŋɡɔ pɔ́p ɡẅɛɛnɛ nɛpʉ́ʉ ńdɔk ŋ́ɡɛ yɔ́p mbɑ kʉ̈ɔ́lɑ́, mbíꞋŋɡɔ ŋwɑꞋnɛ-Sɛ́ cú ŋɡɔ: Ŋu lɑɑ mbɔɔ kúꞋlɛ nɛpʉ́ʉ pɔ tsʉʉ pɔ́, ḿbɔ́ ŋɡɔŋ ŋkɑ́ tsʉʉ ḿbɔɔ ŋ́ɡɛ pɔ yúu mi ɛ́ tsɛt ŋwɑꞋnɛ-nɛpʉ́ʉ pɔ́, mbɔ ŋɡɑŋ tíi ndɔɔ.

¹¹Pɛ́ pɛn ńniitɛ ńnyɛt tsɛt ŋwɑꞋnɛ-Sɛ́ ŋɡɔ mbɔ ŋu pɔɔ lɔk pɑ́Ꞌ ɑ cúnɛ ŋɡɔ ɑ kúꞋlɛ nɛpʉ́ʉ ńdɔk ŋ́kuꞋ ŋu ẅí ɑ mbi Sɛ́ ḿbɔ́ ndʉ́ŋndʉŋ pɔ́, mbíꞋŋɡɔ pɛ́ kɑ ŋwɑꞋnɛ ŋɡɔ: Ŋu ẅí ɑ kuꞋ nɛpɔ́ mbi Sɛ́ ḿbɔ́ ndʉ́ŋndʉŋ mbíꞋŋɡɔ ɑ zɑ́p tʉ́m yɛ́ nǔu wɛ́, pɔ́nɛ ŋu ẅí ɑ ɡʉ ńdɑ́Ꞌ ńduk.

¹²Ɛ́ zɛɛ ŋ́ɡɔ ḿbɔ́, nɛkúꞋlɛ nɛpʉ́ʉ lɑ ḿbɔ́ ɡú, kɑ́ puutɛ nǔu nɛzɑ́p tʉ́m nǔu Sɛ́ pɔ́. Ɛ́ ɡʉ nǔu nu-nɛpʉ́ʉ, mbɔ pɛ́ kɑ ŋwɑꞋnɛ ŋɡɔ: Ŋu ẅí ɑ ɡʉ ńdɑ́Ꞌ ŋ́kúꞋlɛ mbʉ́ʉ ɛ̂mɑ́ tsʉʉ ɡʉnɛ ńdɑ́Ꞌ ńduk.

¹³Lɑ́, pɑ́Ꞌ sɛ̂ndúŋ-nɛpʉ́ʉ ɡɛ pɛkŋɛ tíi pɔ ndɔɔ lɑ́, Kɛlístɔ kɑ tɔ́ ŋ́ɡɛ pɛkŋɛ luk ndɔɔ ɛ̂yɑ́. A kɑ jɛ́p ńtíi ḿbiꞋ, ńtsʉ́Ꞌ ŋɡɑŋ ndɔɔ mbíꞋ wɛkŋɛ. Pɛ́ cú mbíꞋŋɡɔ pɛ́ kɑ ŋwɑꞋnɛ ŋɡɔ: Ndɔɔ tú-ŋu ẅí pɛ́ kẅiinɛ wɛ́ nǔu tʉ́.

¹⁴Yɔ nu pɔ́ pɑ́Ꞌɑ nɛpɔ́ wi Sɛ́ ɡʉ ɛ́fú nǔu yúu mi Yɛ́su Kɛlístɔ, ẅí ɑ nǔu njẅɛt-Ábɛlɛhɑ̂m ɡɛnɛ, ńníꞋ mbɔ́tnɛ nǔu pʉɔ pi pɔ́p kɑ́ pɔ́ pɑyúdɑ pɔ́, ɛ́ lɛɛ nǔu Ábɛlɛhɑ̂m, mbɑ nɛpɔ́ yi pɛkŋɛ ɡʉ ńdɔk pɑ́Ꞌ pɛkŋɛ zɑ́pnɛ tʉ́m nǔu Kɛlístɔ ŋ́ɡẅɛɛ Zẅikŋɛ yi Sɛ́ kɑ kɑꞋnɛ mbɔ̌ pɛkŋɛ.

¹⁵Pɔ́ɔpɛ́mɑ́, ŋ ɡʉ ḿbɛ́ɛ fʉꞋ nǔu mɑt wɛkŋɛ pʉɔmɛsɔŋ, pɛkŋɛ jí ŋɡɔ ŋu pɔ́ tɛ ŋ́ŋwɑꞋnɛ yúu ńdɔk ńtík nɛvú nɛ́ nǔu ntɛ́ yi ɛ́ píkŋɛ́nɛ, ḿbɔ́ mbɔ wɛcɔ́ ŋu pɔɔ pɛn ńdut, ŋ́kɛ́ ḿbɔɔ pɛn ŋ́kẅiꞋ yɛcɔ́ yúu nǔu pɔ́.

¹⁶Ɛ́ mbɔ̌ Sɛ́ ḿbɛn ḿbɔ́ pɔ pɔ́Ꞌɔ. Sɛ́ kɑ kɑꞋ yúu mbɔ̌ Ábɛlɛhɑ̂m tɛ mbɑ mbɔ̌ ŋu ẅí Ábɛlɛhɑ̂m kɑ pɔ́ ŋ́ɡʉ ńdɑ́Ꞌ lɑ́ ḿbí wɛ́. ŊwɑꞋnɛ-Sɛ́ kɑ cú ŋɡɔ pɛ́ kɑ kɑꞋ mbɔ̌ pʉɔ pi ɑ kɑ pɔ́ ŋ́ɡʉ ŋ́ɡɛ lɑ ḿbí wɔ́p pɑ́Ꞌ ŋkɑ́ yi pʉɔ pi pɛ́ kɑ pɔ́ ŋ́kɑꞋ yîyɑ́ yúu ɛ́ pɔ́ yɔ́p ŋ́kɑɑ zɑ́ɑ zɑ́ɑnɛ pɔ́. Ŋɡɑ́ŋ ɛ́ kɑ pɔ́ pɔ nu tɑ́Ꞌ ŋu, mbíꞋŋɡɔ pɛ́ zɛɛ ɛ́fúŋ tsɛt ŋwɑꞋnɛ-Sɛ́ ŋɡɔ: Tɛ mbɑ mbɔ̌ ŋu ẅí ɔ ɡʉ ŋ́ɡɛ ḿbí wɛ́. Ẅîwɑ́ ŋu pɛn ḿbɔ́ Kɛlístɔ.

¹⁷Pʉʉ zúꞋ nu yi n dɔɔnɛ nɛcú. Sɛ́ kɑ ɡɔ́ ńzɛ ŋ́kɑꞋ nu mbɔ̌ Ábɛlɛhɑ̂m. Nɛpʉ́ʉ lɑ́Ꞌ ŋ́ɡɔ́ ńtɔ́, mbɔ ɛ́ lɛɛ mɔ́ ŋɡuꞋ ŋkʉ yɛ́nɛ́kwɑ nɛ́ mɛɡɛ́mɛ́ntɑ́t. Ɛ́ kɛ́ mbɔɔ ɡʉ nǔu kɑɑ yɔ́p Ábɛlɛhɑ̂m ḿbík yɛcɔ́ yúu pɔ́, ńdɔk pɔ́Ꞌɔ, ŋ́ɡɛ yúu mi ɑ kɑ kɑꞋnɛ mbɔ̌ wɛ́ pɔɔ lɛɛ níinɛ pɔ́.

¹⁸MbíꞋŋɡɔ ntík ẅi ɛ́ fúnɛ mbɔ̌ Sɛ́ kɑ pɔ́ pɛ́Ꞌnɛ pɛ́ lɛɛtɛ pɔ nǔu nɛpʉ́ʉ lɑ ŋ́ɡẅɛɛ, ḿbɔ́ mbɔ ɛ́ pɔɔ pɛn ɛ́fú nǔu pɑ́Ꞌ Sɛ́ kɑ kɑꞋnɛ pɔ́. Sɛ́ kɑ zɛɛ ńnɑ́ŋ tɛ ŋkɑ́ kuꞋ ɑ lɔk yúu mi ɑ kɑ kɑꞋnɛ mbɔ̌ Ábɛlɛhɑ̂m ńdɔk ŋ́ɡɑ́ fuꞋ fɛ̌ɛ yɛ́ ɡɑ́nɛ.

¹⁹Mbɔ ŋu zúꞋ ḿbíkŋɛ ŋɡɔ tɛ Sɛ́ kɑ pɔ́ pɑ́Ꞌɑ ḿbɛn ńzɑ́p nɛpʉ́ʉ mbíꞋ pɔ kʉ̈ɔ́? A kɑ pɔ́ ńzɑ́p pɔ nɛlɔk ŋ́ɡɛ ŋu ɛ́fɑɑnɛ nu ńjí ŋɡɔ ɑ fɑɑnɛ. Nɛpʉ́ʉ kɑ fɑꞋ yɛ́ fɑꞋ tɛ ńdɑ́Ꞌ ŋ́kúu ŋkɑ́ yi ŋu-Ábɛlɛhɑ̂m ẅí Sɛ́ kɑ kɑꞋnɛ yúu ŋɡɔ ɛ́ yɛ́ ŋɡɑŋ kɑ lɑ́Ꞌnɛ ńtɔ́. Ɛ́ ɡʉ nǔu mîmɑ́ mbʉ́ʉ, mbɔ Sɛ́ kɑ túu pɛcʉ̈ɔ́Ꞌ pɛ́, pɔ́p ɡɑ́ mbɔ̌ nɛnkɛ́m.

²⁰Pɛ́ ɡɔ́ ŋ́kẅíi nɛnkɛ́m nǔu nu, ɛ́ lɔk ḿbɔ́ nu yi pɛɡɑŋ kɑ́ ɡẅɛɛ shʉ́ pɑ́Ꞌ nu ɡʉ ńcẅɛt ntsu-ŋu ŋ́kúu ntsu wɛcɔ́ pɔ́. Lɑ́ ɛ́ kɛ́ ŋ́ɡʉ nǔu nu yi Sɛ́ kɑ kɑꞋnɛ lɑ́, mbɔ kwɑꞋ jʉ́ kɑ tʉ́ʉnɛ ńcú.

²¹Pɑ́Ꞌ ɛ́ pɑ́Ꞌnɛ lɑɑ ɛ́ lɔk ḿbɔ́ ŋɡɔ nɛpʉ́ʉ-Sɛ́ kɑ pík yúu mi ɑ kɑ kɑꞋnɛ kíi? Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́. Ɛ́ kɑ pɔ́ pɛ́Ꞌnɛ ḿbɔ́ nu nǔu nɛcɔ́ nɛpʉ́ʉ ni mbɔ ɛ́ ɡɛ pʉɔmɛsɔŋ pɔ́ ɡú, mbɔ ɛ́ lɑɑ ḿbɔ́ ŋu lɔk pɑ́Ꞌ ɑ ɡẅɛɛnɛ nɛpʉ́ʉ, ŋ́kuꞋ ŋu ẅí ɑ mbi Sɛ́ ḿbɔ́ ndʉ́ŋndʉŋ.

²²Lɑ́ ŋwɑꞋnɛ-Sɛ́ nyɛt ŋɡɔ mbɑ wɛ́tɛ́ ŋu lɑ́ pɔ́ pɔ ŋkwɑɑ mbɔ̌ nu kɛpɔŋ. Ɛ́ pɔ́Ꞌɔ lɑ yúu mi Sɛ́ kɑ kɑꞋnɛ puutɛ nǔu pʉɔ pi pɔ́p lɛɛnɛ nǔu Yɛ́su Kɛlístɔ ńzɑ́p tʉ́m yɔ́p nǔu wɛ́.

²³Kɛlístɔ kɑ ɡɔ́ ńtɔ́ tɛ pɛ́ zɑ́p tʉ́m nǔu wɛ́, pɛk pɑyúdɑ pɔ́ ńzúꞋ pɔ ntsu nɛpʉ́ʉ-Mɔ̌sɛ̂ɛ, ɛ́ pɔ́ ńcẅɛ́ɛ wɛ́k pɑ́Ꞌ pɛ́ cẅɛ́ɛnɛ ɡɑŋtsɑ́ŋ lɑ́, tɛ ŋ́kúu nǔu ŋkɑ́ yi Sɛ́ kɑ pɔ́ ŋ́ɡʉ ŋ́ɡɛ pɛ́ jí Yɛ́su Kɛlístɔ ńzɑ́p tʉ́m nǔu wɛ́.

²⁴Nɛpʉ́ʉ kɑ lɔk ḿbɔ́ pɑ́Ꞌ ŋu ẅí Sɛ́ kɑ túunɛ ɑ pɔ́ ńdíŋɛ wɛ́k tɛ ŋ́kúu ŋkɑ́ yi Kɛlístɔ kɑ tɔ́nɛ nɛpɔ́ yi pɛk ɡʉ ńzɑ́p tʉ́m nǔu wɛ́; Sɛ́ lɔk pɔ́Ꞌɔ, ńtsʉ́Ꞌ ńdíŋɛ wɛ́k pɔ pɑ́Ꞌ pʉɔ pi pɔ́p ndʉ́ŋndʉŋ mbi yɛ́ lɑ.

²⁵Lɑ́ ɛ́ ŋkɔ̂ɔnɛ yi Kɛlístɔ kɑ tɔ́nɛ, tɛ pɛ́ pɔ́ ńzɑ́p tʉ́m nǔu yɛ́ lɑɑ, ẅîwɑ́ ŋu ẅí ɑ kɑ pɔ́ ńdíŋɛ wɛ́k pɔɔ kíi ŋ́ɡẅɛɛ nu nǔu pɛk pɔ́.

²⁶Pʉʉ pɛtsʉʉ zɛɛ ńdɔk pɑ́Ꞌ pʉʉ zɑ́pnɛ tʉ́m nǔu Yɛ́su Kɛlístɔ ḿbɔ́ pʉɔ-Sɛ́.

²⁷Pʉʉ pɛtsʉʉ, pi pʉʉ kɑ cẅɛ́ɛnɛ ŋki ɛ́ pɔ́ nɛlɑt mbʉʉ nǔu Kɛlístɔ, mɑt-Kɛlístɔ kɑ kɛ́mɔ́ ńjʉ́ wʉ́ʉ.

²⁸Ɛ́ fú pɔ́Ꞌɔ, Sɛ́ pɔɔ pɛn ŋ́ɡɛ yɛcɔ́ tɔŋ nǔu pɑyúdɑ pɔ́p pʉɔ-Ŋɡɛlɛ́k pɔ́, ŋ́kɛ́ mbɔɔ pɛn ŋ́ɡɛ nǔu pɛkwɑɑ pɔ́p pɛndẅǐi pɔ́, ŋ́kɛ́ mbɔɔ pɛn ŋ́ɡɛ nǔu mbɛ́ɛnɛ pɔ́p pɑŋɡɛ́ pɔ́, mbíꞋŋɡɔ pʉʉ lɔk pɑ́Ꞌ pʉʉ lɑtnɛ mbʉʉ nǔu Yɛ́su Kɛlístɔ ńtsʉ́Ꞌ ḿbɔ́ pɔ tɑ́Ꞌ ntɛ́.

²⁹Pɑ́Ꞌ pʉʉ pʉɔ-Kɛlístɔ lɑ́, pʉʉ lɔk ḿbɔ́ njẅɛt-Ábɛlɛhɑ̂m, ḿbɔ́ pɑɡẅɛɛ yʉ́ʉ yúu nǔu yúu mi Sɛ́ kɑ kɑꞋnɛ.