Read Ngomba Ŋɡɑlɑ̂t 4 Bible Online

Ŋɡɑlɑ̂t 4 - Ngomba bible

Ŋɡɑlɑ̂t 4

¹Pʉʉ zúꞋ nu yi n dɔɔnɛ nɛcú. Ŋu ẅí pɛ́ kɑ nɑ́nɛ yúu mbɔ̌ wɛ́, ɑ pɛ́t pɔ́ mɔ́ɔ, ɑ lɑɑ ńdɑ́Ꞌ ḿbɛ́t kɛ́ pɔ́ ndʉ́m, mbɔ ɑ pɔ́ pɔ pɑ́Ꞌ ŋkwɑɑ lɑ́, tɛ mbɑ pɑ́Ꞌ yúu mi pɛ́ kɑ nɑ́nɛ, pɔ́ pɔ yɛ́.

²A lɑɑ ḿbɛ́t ḿbɔ́ pɔ mɔ́yúu mɔ́ɔ, mbɔ ɑ ɡẅɛɛ nɛzúꞋ ntsu-pʉɔ pi pɔ́p tɔ́ɔtɛ́nɛ wɛ́ mbɑ wɛ pʉɔ pi pɔ́p líŋɛ́nɛ yúu pɛ́ tɛ ńdɑ́Ꞌ ŋ́kúu ŋɡuꞋ yi tɑ́t wɛ kɑ zɑ́pnɛ.

³Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ ɛ́ kɑ pɔ́nɛ ŋkɑ́ yi pɛkŋɛ kɑ pɛ́tnɛ ḿbɔ́ pɑ́Ꞌ pɔ́ɔmbɔ́ŋkʉ̈ɔ́ lɑ́, pɛkŋɛ pɔ́ pɛkwɑɑ mbíꞋ nɛnɛn ẅí pɛkŋɛ nɛnnɛ nǔu tsɛt yɔ ndǔmbí.

⁴Lɑ́ ŋkɑ́ yi Sɛ́ kɑ zɑ́pnɛ kɑ pɔ́ tɛ ŋ́kuꞋ, ɑ túu Mɔ́ɔ nɛ. A ɡɔ́ ńtɔ́ mɑŋɡɛ́ pí wɛ́. A pɔ́ ńnɑ́ŋ nǔu pɑ́Ꞌ nɛpʉ́ʉ Mɔ̌sɛ̂ɛ píkŋɛ́nɛ.

⁵A kɑ tɔ́ pɔ́Ꞌɔ, nɛcú pʉɔ pi nɛpʉ́ʉ Mɔ̌sɛ̂ɛ kɑ pɔ́ ńdɔk wɔ́p ŋ́ɡɛ pɛkwɑɑ, mbɑ pɑ́Ꞌ ɑ ɡʉ ŋ́ɡɛ pɛkŋɛ pɛtsʉʉ tsʉ́Ꞌ pɔ́ɔ-Sɛ́.

⁶Ɛ́ nɛ́nẅín pʉʉ tsuŋ ḿbɔ́ kwɑꞋ pɔ́ɔ-Sɛ́. Lii pɑ́Ꞌ Sɛ́ kɑ níꞋnɛ Zẅikŋɛ-Mɔ́ɔ nɛ tsɛt mɛtʉ́m mɛkŋɛ, Zẅikŋɛ yi ɛ́ ɡɛnɛ pɛkŋɛ fúŋ Sɛ́ ŋɡɔ Ábɑ. Ńdɔk ńcú ŋɡɔ Tɑ̌ɑ.

⁷Pɔ́Ꞌɔ, ɔ pɔɔ pɛ́t ŋkwɑɑ pɔ́. Ɔ tsʉ́Ꞌ ḿbɔ́ pɔ Mɔ́ɔ pí wɛ. Pɑ́Ꞌ ɔ tsʉ́Ꞌ ḿbɔ́ pɔ Mɔ́ɔ nɛ lɑ́, Sɛ́ ɡʉ ŋ́ɡɛ ŋ́ɡɑ́ pú yúu pi ɑ kɑ lẅɛꞋnɛ nɛɡɑ́ mbɔ̌ pɔ́ɔ-pɛ́. Pɔ̂l sɛ́ ḿbɔ́k ŋɡɔ pʉɔ-Ŋɡɑlɑ̂t ɡʉ ḿbɛn ḿbɔ́ pɛkwɑɑ mɛcɔ́ mɛnu.

⁸Pʉʉ kɑ pɔ́ yɛcɔ́ ŋkɑ́ mbɔɔ njí Sɛ́ pɔ́, ḿbɔ́ pɛkwɑɑ yúu pi pɛ́ kwɑŋɛ́nɛ ŋɡɔ ɛ́ mɛsɛ́, lɑ́ ɛ́ pɔɔ Sɛ́ pɔ́.

⁹Ɛ́ pɛn ŋ́ɡʉ nǔu ŋkɔ̂ɔnɛ pʉʉ sɛ́ ńjí Sɛ́ tɛ n dɑ́Ꞌ ńzɛɛ ḿbɔ́ ŋ́ɡʉ ńcú pɔ ŋɡɔ Sɛ́ sɛ́ ńjí wʉ́ʉ. Ɛ́ pɛn ŋ́ɡɛ pɑ́Ꞌɑ lɑ pʉʉ pɛn ḿbɛn nzʉʉ, tsɛt mîmɑ́ mɛyúu mi ɛ́ kɑ́ ɡẅɛɛ mɛtʉʉ pɔ́, ŋ́kɛ́ mbɔɔ yɛcɔ́ yúu ɡẅɛɛ? Pʉʉ kɔŋ nɛpɛn ḿbɛn nzʉʉ ḿbɛ́m pɛkwɑɑ mbɔ̌ pɔ́p kɛkʉ̈ɔ́?

¹⁰Pʉʉ kɑꞋ ndɛn mɛcɔ́ mɛlɛ́Ꞌ nji, ŋ́kɑꞋ mɛ pɛcɔ́ pɛsɑŋ, ŋ́kɑꞋ wɛ mɛcɔ́ mɛfʉꞋ nɛ mɛ́ mɛcɔ́ mɛŋɡuꞋ tɛꞋ.

¹¹M bɔ́k yúu mi pʉʉ sɛ́ ŋ́ɡɛ lɑ́, ḿbɔ́ mɛfɑꞋ mi ŋ kɑ fɑꞋnɛ tsɛtsɛt pʉʉ lɛɛ níinɛ.

¹²Pɔ́ɔpɛ́mɑ́ pɑ́ɑ, m búꞋ mbɔ́ mbɔ̌ pʉʉ tɛꞋ, ŋɡɔ pʉʉ ɡʉ nǔu mɛnu nɛpʉ́ʉ ḿbɛ́ɛ fʉꞋ nǔu mɔ. Ɛ́ ɡʉ nǔu, mbɔ ŋ kɑ tsʉ́Ꞌ pɑ́Ꞌ pʉʉ kɑ pɔ́nɛ. Ɛ́ kɑ pɔ́ ŋkɑ́ yi ŋ kɑ pɔ́nɛ tsɛtsɛt pʉʉ ḿbɔ́ ɛ́sẅíi wʉ́ʉ nɛ́ nu Sɛ́, pʉʉ kɛ mbɔɔ ɡɛ nu kɛpɔŋ nǔu mɔ pɔ́.

¹³Pʉʉ kẅíitɛ ŋɡɔ yúu mi ɛ́ kɑ ɡɛnɛ n cẅi Ŋkʉʉ Sʉ́Ꞌnɛ mbɔ̌ pʉʉ nduŋmbi ŋkɑ́ yi ŋ kɑ tɔ́nɛ njɛ́Ꞌ pʉʉ kɑ pɔ́ pɑ́Ꞌ ŋ kɑ pɔ́ ŋ́ɡɔɔ.

¹⁴Ɛ́ kɑ pɔ́ ŋkɑ́ ɛ̂yɑ́, mbɔ ɡɔɔ tswɑ́ɑ wɑ́ɑ tɛꞋ tɛ m bʉ́k. Lɑ́ pʉʉ kɛ́ mbɔɔ wɑ́ɑ níŋɛ, ŋ́kɛ́ mbɔɔ wɑ́ɑ mɛꞋ. Tɛ ńtsʉ́Ꞌ pɔ́Ꞌɔ, mbɔ pʉʉ kɑ kúkŋɛ wɑ́ɑ pɔ pɑ́Ꞌ Cʉ̈ɔꞋ-Sɛ́, kɛ pɔ pɑ́Ꞌ Yɛ́su Kɛlístɔ lɑ́.

¹⁵Tsɑ́ɑtɛ yi ɛ́ kɑ pɔ́nɛ tʉ́m pʉʉ, lɛɛ nɛɡɔ́? Ŋ kuꞋ nɛcú ŋɡɔ ɛ́ kɑ pɔ́ pɛ́Ꞌnɛ ḿbɔ́ yi ḿbɔ́ pʉʉ tsɔ́Ꞌ mík mʉ́ʉ ńdɔk ŋ́kúpmɛ mɑ́ɑ, mbɔ pʉʉ tsɔ́Ꞌ ńdɔk ŋ́kúpmɛ ŋkɔ̂ɔnɛ.

¹⁶Ɛ́ ŋkɔ̂ɔnɛ, mbɔ n tsʉ́Ꞌ ŋɡɑŋmbuu wʉ́ʉ mbíꞋŋɡɔ n dɑ́Ꞌ ḿbɔ́ ɛ́sẅíi wʉ́ʉ pɔ nɛ nu nɛ́nẅín kíi?

¹⁷Pʉʉ sɛ́ ńjʉ́ɔ ŋɡɔ pɑzíꞋ wʉ́ʉ nɛ mɛnu ɛ̂mɑ́ sɛ́ ŋ́kɔŋ wʉ́ʉ tɛꞋ, lɑ́ kwɑŋɛ ẅí pɔ́p ɡẅɛɛnɛ nǔu pʉʉ ɛ́ kɑ́ pɔ́ wɛ sʉ́Ꞌnɛ pɔ́. Pɔ́p lɔɔ pɔ nɛfú nzʉʉ mɔ ńcẅɛɛtɛ wʉ́ʉ pʉʉ tsʉ́Ꞌ ŋ́kɔŋ pɔ wɔ́p.

¹⁸Lɑ́ ɛ́ ɡʉ nǔu mɔ, ŋ kɔŋ wʉ́ʉ, tɛ ḿbɔ́ pʉʉ jʉ́ pii yɑ́ɑ ŋɡɔŋ ŋkɑ́Ꞌ tsʉʉ, tɛ ɛ́ pɔɔ pɔ́ pɔ ŋkɑ́ yi mɔ tsɛtsɛt pʉʉ pɔ́.

¹⁹Mbɔ́ŋkʉ̈ɔ́ pɑ́ɑ, m bɛn ḿbɔ́ ńjʉ́ɔ ŋɡʉ̈ɔ́Ꞌ fí nɛfí nǔu pʉʉ pɔ pɑ́Ꞌ mɑŋɡɛ́ ẅí ɑ sɛ́ ńnɛ́mɛ ḿbɔ́ ŋ́ɡʉ ḿbí lɑ́. Mɔ ŋ́kɛ́ ńjʉ́ɔ ŋɡʉ̈ɔ́Ꞌ pɔ pɔ́Ꞌɔ, tɛ ŋ́kúu ŋkɑ́ yi pʉʉ tsʉ́Ꞌ kwɑꞋ pʉɔ-Kɛlístɔ.

²⁰Ɛ́ ŋkɔ̂ɔnɛ pɑ́Ꞌɑ m bɔ́ ńtsɑ́ɑ tɛꞋ nɛpɔ́ tsɛtsɛt pʉʉ, lɑ ńjí ntɛ́ yi ḿbɔ́ n dɔk ɛ́sẅíi wʉ́ʉ nɛ nu pɔ́Ꞌɔ. MbíꞋŋɡɔ mɔ sɛ́ ŋ́kwɑŋɛ mɛnu mʉ́ʉ ńtsʉ́Ꞌ ḿbɔ́k pɔ́knɛ.

²¹Pʉʉ pi pʉʉ sɛ́ ŋ́kɔŋ ŋɡɔ nɛpʉ́ʉ ɛ́sɑ́Ꞌ wʉ́ʉ, pʉʉ ɛ́sẅíi wɑ́ɑ: Pʉʉ kɑ́ pɔ́ ńzúꞋ yúu mi nɛpʉ́ʉ ɛ̂nɑ́ cúnɛ pɔ́ kíi?

²²Pɛ́ kɑ ŋwɑꞋnɛ tsɛt ŋwɑꞋnɛ-nɛpʉ́ʉ ɛ̂nɑ́ ŋɡɔ: Ábɛlɛhɑ̂m kɑ ɡẅɛɛ mbɔ́ŋkʉ̈ɔ́ pɛ́pɑ́, tɑ́Ꞌ pɔ́ ẅí ɑ kɑ pínɛ nǔu mɑŋɡɛ́ ẅí ɑ kɑ pɔ́ ŋkwɑɑ, wɛcɔ́ pɔ́ ẅí ɑ kɑ pínɛ nǔu mɑŋɡɛ́ ẅí ɑ kɑ tɑ́tnɛ.

²³Mɔ́ɔ-ŋkwɑɑ kɑ pɔ́ ẅí pʉɔmɛsɔŋ kɑ kɔŋ kɔŋnɛ ḿbí wɛ́. Mɔ́ɔ mɑŋɡɛ́ ẅí ɑ kɑ tɑ́tnɛ pɔ́ ẅí pɛ́ kɑ ɡɔ́ mbí wɛ́ ɛ́ pɔ́ pɔ nu yi Sɛ́ kɑ kɑꞋnɛ.

²⁴Yɔ nu ḿbɔ́ pɛ́ pɛn ńzúꞋ nǔu wɛcɔ́ shʉ́. Pɑŋɡɛ́ pɔnɛ pɛ́pɑ́ lɔk nyɛt kɑɑ yɛ́pɑ́. Nduŋmbi kɑɑ pɔ́ yi ɛ́ kɑ fúnɛ ndǔ nɛŋkɔ́Ꞌ-Sinɑyi. Yîyɑ́ kɑɑ ɡɛ, pɛ́ pí mbɔ́ŋkʉ̈ɔ́ pɔ́p pɔ́ pɔ pɛkwɑɑ. A lɔk ḿbɔ́ Aŋɡɑɑ.

²⁵Ɛ́ pɛn ḿbɔ́ ŋɡɔ lík-Aŋɡɑɑ cẅɛ́Ꞌnɛ nǔu yɛ sinɑyi, nɛŋkɔ́Ꞌ ni ɛ́ ŋɡɔŋ Alɑbîi. Aŋɡɑɑ lɔk pɑ́Ꞌɑ ḿbɔ́ tʉ́sɔŋ-Yɛlúsɑlɛm wɛ ŋkɔ̂ɔnɛ, ɛ́ yi pɔ́p pʉɔ pɛ́ pɛtsʉʉ pɔ́ pɔ pɛkwɑɑ-nɛpʉ́ʉ.

²⁶Lɑ́ Yɛlúsɑlɛm wɛ tʉ́nɛ́pú kɑ́ pɔ́ ŋkwɑɑ pɔ́, jʉ́ pɔ́nɛ mɑ́ wɛkŋɛ.

²⁷ŊwɑꞋnɛ-Sɛ́ zɛɛ ńcú ŋɡɔ: Nɑ́ŋ nɛ́ tsɑ́ɑtɛ, n dɑꞋ mbɔ̌ ɡu ẅí ɔ ŋkɛ́n! Tsɑ́ɑtɛ tɛ ŋɡi yú kɔ́Ꞌ tʉ́, n dɑꞋ mbɔ̌ ɡu ẅí ɔ kɑ́ jí pɑ́Ꞌ mɑŋɡɛ́ lɔ ńnɛ́mɛ pɔ́Ꞌɔ lɑ́ ḿbí pɔ́! MbíꞋŋɡɔ mbɔ́ŋkʉ̈ɔ́-mɑŋɡɛ́ ẅí pɛ́ kɑ mɛꞋnɛ wɛ́ ŋ́ɡɛ ńzɑ́ɑ ńdɛɛ pɛ́ mɑŋɡɛ́ ẅí ɑ ɡẅɛɛnɛ ndúu.

²⁸Pɔ́ɔpɛ́mɑ́ pɑ́ɑ, ɛ́ ɡʉ nǔu pʉʉ, mbɔ pʉʉ mbɔ́ŋkʉ̈ɔ́ pi pɛ́ kɑ pínɛ wɔ́p nǔu ntɛ́ yi Sɛ́ kɑ kɑꞋnɛ, ndʉ́ŋndʉŋ pɑ́Ꞌ Ɛ́sɑk lɑ́.

²⁹Lɑ́ pɑ́Ꞌ ɛ́ kɑ pɔ́ yɛcɔ́ ŋkɑ́, mɔ́ɔ ẅí pɛ́ kɑ kɔŋ kɔŋnɛ ḿbí pɔ́ ŋ́kʉ́ʉnɛ ẅí Zẅikŋɛ-Sɛ́ kɑ ɡɛnɛ lɑ pɛ́ pí wɛ́ lɑ́, ɛ́ pɛn ḿbɔ́ lɔ́Ꞌnɛ ḿbɔ́ pɔ pɔ́Ꞌɔ.

³⁰ŊwɑꞋnɛ-Sɛ́ zɛɛ ńcú ŋɡɔ kʉ̈ɔ́ lɑ́ɑ? Ɛ́ cú ŋɡɔ: Zuŋ mɑŋɡɛ́ ẅí ɑ ŋkwɑɑ pɔ́p mɔ́ɔ nɛ. MbíꞋŋɡɔ mɔ́ɔ-ŋkwɑɑ kɑ́ ɡẅɛɛ yɛcɔ́ nu nǔu tʉ̈ɔt-tɑ́t wɔp pɑ́Ꞌ mɔ́ɔ mɑŋɡɛ́ ẅí pɛ́ kɑ tɑ́tnɛ pɔ́.

³¹Pɔ́ɔpɛ́mɑ́ pɑ́ɑ, ɛ́ yúu mi ɛ́ ɡɛnɛ pɛkŋɛ pɔɔ mbɔ́ŋkʉ̈ɔ́ mɑŋɡɛ́ ẅí ɑ ŋkwɑɑ pɔ́, pɛkŋɛ pɔ́ pɔ mbɔ́ŋkʉ̈ɔ́-mɑŋɡɛ́ ẅí pɛ́ kɑ tɑ́tnɛ.