Read Ngomba Ŋɡɑlɑ̂t 6 Bible Online

Ŋɡɑlɑ̂t 6 - Ngomba bible

Ŋɡɑlɑ̂t 6

¹Pɔ́ɔpɛ́mɑ́, pʉʉ lɑɑ ŋ́kɛm ŋu ɑ pɔ́ ɛ́fɑɑnɛ nu, pʉʉ lɔk pɑ́Ꞌ pʉʉ sɛ́ ńzúꞋ mbɔ̌ Zẅikŋɛ-Sɛ́ lɑ ŋ́ɡɛ ŋɡɑŋ pɛn nǔu sɛ̂ndúŋ ẅí ɛ́ ndʉ́ŋndʉŋ. Lɑ́ ńtsʉ́Ꞌ nɛɡɛ ńdɔk pɔ mbɔ́tnɛ. Mbɑ wɔ̌ lɑ́ nǔu pʉʉ pɛn ḿbɑ́ɑ tú yɛ́ ḿbɔ́k pɑ́Ꞌ ɑ ɡʉ ḿvu yɛ́ tsɛt ŋkwɑꞋnɛ.

²Pʉʉ tíi mɛnu mʉ́ʉ ḿbiꞋ ńcẅɛ́nɛ. Pʉʉ lɑɑ ŋ́ɡɛ pɔ́Ꞌɔ, mbɔ pʉʉ ɡɛ yúu mi nɛpʉ́ʉ-Kɛlístɔ sɛ́ ḿbíkŋɛ.

³Ŋu lɑɑ ŋ́kwɑŋɛ ŋɡɔ ɑ yúu, kɛ́ pɔ́ yɛ́tɛ́, mbɔ ɑ shɔtnɛ ɛ́fúklɛ túmbʉʉ yɛ́.

⁴Mbɑ wɔ̌ lɑ́ tsuŋ ńtsɑꞋ kwɑꞋ mɛ́ mɛfɑꞋ. A lɑɑ ńtsɑꞋ, ńjʉ́ɔ ŋɡɔ ḿbɔ́ nu pɔŋ wɛ́ nǔu, mbɔ ɛ́ píkŋɛ ŋɡɔ nu ɡɔ́ ḿbɔŋ wɛ́ mbíꞋ pɔ ŋɡɔ ɛ́ kwɑꞋ mɛfɑꞋ mɛ́. Tɛ ɛ́ pɔɔ pɔ́ ŋ́ɡɔ́ ḿbɔŋ wɛ́ mbíꞋ pɔ pɑ́Ꞌ ɑ lʉŋtɛ mîmɑ́ mɛfɑꞋ nǔu mɛ́ pɛcɔ́ pʉɔ pɔ́,

⁵mbíꞋŋɡɔ mbɑ wɔ̌ lɑ́ ɡẅɛɛ nɛfɑꞋ mɛ́ mɛfɑꞋ mi Sɛ́ kɑ ɡɑ́nɛ mbɔ̌ wɛ́.

⁶Ɛ́ pɔ́ŋ ŋɡɔ ŋu ẅí pɛ́ sɛ́ ńzíꞋ wɛ́ nɛ nu-Sɛ́ ɡɑp yúu pɛ́ ŋ́ɡɑ́ yɛ ŋu ẅí ɑ sɛ́ ńzíꞋ wɛ́.

⁷Kɔɔ ŋu shɔtnɛ ɛ́fúklɛ túmbʉʉ yɛ́, pɛ́ lɔɔ ŋ́ɡwɑ́k Sɛ́ pɔ́. Ŋu lɑɑ ḿbi kʉ̈ɔ́lɑ́, mbɔ ɑ ɡʉ ńdɑ́Ꞌ ŋ́kɑ́p pɔ yɛ́tɛ́.

⁸A lɑɑ ḿbi yúu mi ɛ́ pɔ́ŋ pɔ mbʉʉ yɛ́, mbɔ yúu ɛ̂pɑ́ ɡʉ ńdɑ́Ꞌ ŋ́ɡɛ ɑ ḿpfú ḿbɛ́. Lɑ́ ḿbɔ́ yi ɑ lɑɑ ḿbi yúu mi ɛ́ pɔŋnɛ Zẅikŋɛ Lɛ́ɛnɛ́nɛ, mbɔ Zẅikŋɛ Lɛ́ɛnɛ́nɛ ɡʉ ńdɑ́Ꞌ ŋ́ɡɛ ɑ ɡẅɛɛ luk kɛ́mɛ.

⁹Kɔɔ pɛkŋɛ kɛ ŋ́kɑ́ɑ nɛɡɛ nu sʉ́Ꞌnɛ, mbíꞋŋɡɔ pɛkŋɛ lɑɑ ŋ́ɡɛ nu sʉ́Ꞌnɛ ńdɔk ŋ́ɡʉ pɔ nɛ́ mbi, mbɔ ŋkɑ́ ɡʉ ńdɑ́Ꞌ ŋ́kuꞋ, Sɛ́ ɡɛ pɛkŋɛ lɑk yúu tɛꞋ.

¹⁰Pɔ́Ꞌɔ lɑ́, pɛkŋɛ lɑɑ ḿbɛ́t ŋ́ɡẅɛɛ shʉ́, pɛkŋɛ ɡɛ nu sʉ́Ꞌnɛ mbɔ̌ pʉɔ tsʉʉ, ńtsuŋ ŋ́ɡɛ pɔ mbɔ̌ pɔ́ɔpɛ́mɑ́ pi pɛkŋɛ pɛpɔ́p zɑ́pnɛ tʉ́m nǔu Kɛlístɔ.

¹¹Pʉʉ jʉ́ɔ pɑ́Ꞌ mɔnɛ mík-ŋwɑꞋnɛ ɡʉ ŋ́ɡúꞋlɛ ɡúꞋlɛ́nɛ. KwɑꞋ mɔ Pɔ̂l lɔknɛ pɔ́ yɑ́ɑ ŋ́ŋwɑꞋnɛ yɔ zʉꞋ!

¹²Pʉɔ pi pɔ́p ɛ́fyɛ́t wʉ́ʉ fyɛ́tnɛ ŋɡɔ pʉʉ pɛ́m pɛ́ púꞋ wʉ́ʉ, ɛ́ pʉɔ pi pɔ́p lɔɔ pɔ nɛɡɛ yúu mi ɛ́ ɡʉ ḿbɔŋ pɑyúdɑ. Pɔ́p ɡɛ pɔ́Ꞌɔ, ńtsɑ́ɑ ŋɡɔ kɔɔ pɑyúdɑ kʉʉnɛ wɔ́p mbíꞋ ŋɡɔ pɔ́p tʉ́ʉ yɔ́p nǔu nu nɛvú-Kɛlístɔ nǔu tʉ́ mbɑ́ŋtɛ pɑ́ŋtɛ́nɛ.

¹³Pʉɔ pi pɔ́p fyɛ́tnɛ wʉ́ʉ pɔ́Ꞌɔ, kwɑꞋ pɔ́p yɔ́p zɛɛ mbɔɔ ŋ́kúꞋlɛ nɛpʉ́ʉ-pɑyúdɑ tsʉʉ pɔ́. Lɑ́ ŋ́kɛ́ ḿbɔ́ ŋ́kɔŋ pɔ ŋɡɔ pɛ́ púꞋ wʉ́ʉ púꞋnɛ. Pɔ́Ꞌɔ pɔ́p lɔk pɑ́Ꞌ pɔ́p ɡɛ tɛ pɛ́ púꞋ wʉ́ʉ, ńdɔk ŋ́ŋɑ́Ꞌtɛ mbi pɑyúdɑ,

¹⁴ŋ́ɡʉ nǔu mɔ, mbɔ yúu mi ɛ́ lɑɑ ḿbɔ́ n dɔk ŋ́ŋɑ́Ꞌtɛ, ɛ́ pɔ́ pɔ pɑ́Ꞌ Tsɑpʉɔ wɛkŋɛ Yɛ́su Kɛlístɔ kɑ pfú nǔu tʉ́ mbɑ́ŋtɛ pɑ́ŋtɛ́nɛ lɑ́. Pɑ́Ꞌ ɑ kɑ pfúnɛ nǔu tʉ́ mbɑ́ŋtɛ pɑ́ŋtɛ́nɛ lɑ́, yúu yɔ ndǔmbí ɛ́ tsʉ́Ꞌ nɛjɔ́ŋ mɔ ḿbɔ́ pɔ pfú-yúu, ɛ́ ɡʉ nǔu mɔ m bɔ́ mbɔ̌ pɔ́p, mbɔ ŋ kɑ pfú mɔ́.

¹⁵Ɛ́ mbɔ̌ Sɛ́ nɛpúꞋ ŋu, kɛ nɛnɑ́ ŋɡɑŋ kɛ́ púꞋ ɔɔ, pɔɔ cẅɛ́lɛ́. Nu yi ɛ́ cẅɛ́lɛ́nɛ pɔ́ pɔ pɑ́Ꞌ ŋu shɔtnɛ ńtsʉ́Ꞌ ŋu fí.

¹⁶Sɛ́ nyɛt ŋɡɔ tʉ́m yɛ́ pɔŋ, ḿbɛn ńníꞋ mɔ́fíitɛ tsɛt tʉ́m pʉɔ pɛtsʉʉ pi pɔ́p ɡʉ ńzúꞋ wɔ tík wɛ fí, ńtík ku nǔu, mbɑ mbɔ̌ pʉɔ-Sɛ́ tɛ ḿmɛ.

¹⁷Tɛ fú lɔ́Ꞌnɛ, ḿbɑ́ɑ ŋu nɛlɑ́Ꞌ ḿbɛn ńdɔk yɔ nu ŋ́ɡɑ́ɑnɛ wɑ́ɑ. Mɛcʉ́-fʉ́ŋ mi ŋ ɡẅɛɛnɛ lɛ́Ꞌlɛ́nɛ ŋɡɔ mɔ ŋu-Yɛ́su.

¹⁸Pɔ́ɔpɛ́mɑ́, Tsɑpʉɔ wɛkŋɛ Yɛ́su Kɛlístɔ pɔ́ mbɔ̌ nɛ́ pʉʉ tsɛt tʉ́m yʉ́ʉ pɛtsʉʉ. Ɛ́ pɔ́Ꞌɔ.