Read Ngomba Ɛ́fɛ̂zɛ 5 Bible Online

Ɛ́fɛ̂zɛ 5 - Ngomba bible

Ɛ́fɛ̂zɛ 5

¹Pʉʉ pɔ́ɔ-Sɛ́, Sɛ́ kɔŋ wʉ́ʉ tɛꞋ, pɔ́Ꞌɔ lɑ́ pʉʉ pɛ́ɛ fʉꞋ nǔu wɛ́.

²Pʉʉ ɡɔ́ ŋ́ɡɛ yʉ́ʉ mbɑ kʉ̈ɔ́ lɑ́, ńdɔk pɔ ŋkɔŋɛ ndʉ́ŋndʉŋ pɑ́Ꞌ Kɛlístɔ kɑ kɔŋnɛ wɛkŋɛ tɛ ŋ́ɡɑ́ tú yɛ́ ńdɔk ńnɔŋ pɔꞋ mbi Sɛ́ ntɛ́ wɛkŋɛ lɑ́. PɔꞋ ɛ̂wɑ́ ẅí jɑ́k yɛ́ pɔŋnɛ mbɔ̌ Sɛ́.

³Pɑ́Ꞌ pʉʉ ŋkɔ̂ɔnɛ ḿbɔ́ pʉɔ-Sɛ́ lɑ́, yɛcɔ́ yúu mi ɛ́ kɑ́ píkŋɛ ŋɡɔ ŋu wʉʉ ɡɛ pɔ́, ḿbɛn mbɔɔ píkŋɛ ŋɡɔ pɛ́ zɛɛ ŋ́kẅíi mbɑ kẅíinɛ tsɛtsɛt pʉʉ pɔ́, pɛ́ cú nu pɑ́Ꞌ mbɛ́ɛnɛ nɛfúŋ pɑŋɡɛ́, pɑŋɡɛ́ nɛlɔɔ mbɛ́ɛnɛ, yúu pɑ́Ꞌ mɛnu ntsɛ́llɛ́ mbɑ nu kɛ́ɡʉ̈ɔꞋ.

⁴Ɛ́ kɑ́ pɔ́ ḿbíkŋɛ ŋɡɔ pʉʉ sẅiŋɛ ḿmɛk mɛknɛ pɔ́, tɛ mbɑ nɛmɑꞋ kwɑŋɛ nǔu yɛcɔ́ ntɛ́, pɔ́p nɛɡɛ yɛcɔ́ ntɛ́ mɛɡɑɑ. Ɛ́ pɔŋ ŋɡɔ sẅiŋɛ ɡɔ́ ńcẅɛt ntsu pʉʉ, pʉʉ lɔk ŋ́ɡɛ́mtɛ pɔ Sɛ́ nǔu yúu mi ɑ ɡɛnɛ mbɔ̌ pʉʉ.

⁵Pʉʉ jí ŋɡɔ, ŋu mbɛ́ɛnɛ ẅí ɑ fúŋnɛ pɑŋɡɛ́, kɛ mɑŋɡɛ́ ẅí ɑ lɔɔnɛ mbɛ́ɛnɛ ɔɔ, mbɑ ŋu ẅí ɑ ɡɛnɛ mɛnu-ndǔmbí, tɛ mbɑ ŋu ẅí ɑ zɑ́pnɛ tʉ́m yɛ́ nǔu yúu-pʉɔ, wɛcɔ́ wɔp kɛ́ ḿbɔɔ ŋ́ɡẅɛɛ yɛ́ zʉꞋ tsɛt nu-nɛfɔɔ-Kɛlístɔ pɔ́p Sɛ́ pɔ́. Nɛzɑ́p tʉ́m nǔu yúu-pʉɔ, ɛ́ pɔ́ pɔ yɛcɔ́ ntɛ́ nɛɡúꞋlɛ yúu ńdɔk ńcú ŋɡɔ ɛ́ Sɛ́.

⁶Kɔɔ ŋu lɔk pǔu sẅiŋɛ ɛ́fú wʉ́ʉ. Mɛnu mi pɛ́ tʉ́ʉnɛ lɑɑ zɛɛ ŋ́ɡɛ, Sɛ́ zɑ́ŋ pɔ́ lɔ́ŋ mbíꞋ pʉɔ pi pɔ́p kɑ́ pɔ́ ŋ́ɡɛ yúu mi ɑ sɛ́ ŋ́kɔŋ pɔ́.

⁷Pɔ́Ꞌɔ lɑ́, kɔɔ pʉʉ pɛ́ yîyɑ́ ntɛ́ pʉɔ tɛmtɛ yɛcɔ́ nu.

⁸Pʉʉ kɑ pɔ́ yɛcɔ́ ŋkɑ́ ḿbɔ́ pɔ tsɛt nzɛ́nzʉ́ʉ. Ɛ́ lɛɛ nǔu pɑ́Ꞌ pʉʉ lɑtnɛ mbʉʉ yʉʉ nǔu Tsɑpʉɔ, pʉʉ tsʉ́Ꞌ ḿbɔ́ ŋkɔ̂ɔnɛ ḿbɔ́ pɔ zʉꞋ fúknɛ. Pɔ́Ꞌɔ lɑ́, pʉʉ ɡɔ́ ŋ́ɡɛ mbɑ kʉ̈ɔ́ lɑ́ yʉ́ʉ, ŋ́ɡɛ pɑ́Ꞌ pʉɔ pi pɔ́p nǔu zʉꞋ fúknɛ.

⁹N cú pɔ́Ꞌɔ, mbíꞋŋɡɔ, pii nɛpɔ́ zʉꞋ fúknɛ ɛ́ nɛɡɛ mɛnu sʉ́Ꞌnɛ, ŋ́ɡɛ mɛnu mi ɛ́ mbi Sɛ́ ḿbɔ́ ndʉ́ŋndʉŋ, ńnɑ́ŋ tsɛt nu nɛ́nẅín.

¹⁰Pʉʉ ɡɔ́ ŋ́ɡɛ mbɑ kʉ̈ɔ́ lɑ́, ńtɑꞋ mɛnu, nɛjí mi ɛ́ pɔŋnɛ Tsɑpʉɔ.

¹¹Kɔɔ pʉʉ kúu tsɛtsɛt pʉɔ pi pɔ́p fɑꞋ pɔ mɛfɑꞋ mi ɛ́ kɑ́ pɔ́ ńcẅɛ́lɛ́ pɔ́, mɛfɑꞋ-nzɛnzʉ́ʉ. Pʉʉ sɑ́ɑnɛ sɑ́ɑnɛ́nɛ ŋ́kyɛ́Ꞌ ntsɛm yɔp kíɛꞋnɛ.

¹²Mɛnu mi pʉɔ ɛ̂pɑ́ ɡɛnɛ tsɛt nzɛ́nzʉ́ʉ, ɛ́ mɛnu sʉ́ʉ, ńzɛɛ ḿbɔɔ mi mbɔ ŋu kẅíi mbɑ kẅíinɛ pɔ́.

¹³Pʉʉ lɑɑ ɛ́sɑ́ɑnɛ sɑ́ɑnɛ́nɛ ŋ́kyɛ́Ꞌ mîmɑ́ mɛnu tsʉʉ, mbɔ ɛ́ ɡʉ ɛ́fúk.

¹⁴Ɛ́ zɛɛ mbɔɔ pɔ́ pɔ ndɑꞋ pɔ́Ꞌɔ pɔ́, yúu piitɛ tɛ ńcẅɛt zʉꞋ fúknɛ, ŋ́kúpmɛ, ńtsʉ́Ꞌ ŋ́kyɛꞋ pɔ zʉꞋ. Ɛ́ pɔ́Ꞌɔ lɑ́ pɛ́ cú ŋɡɔ: Gu ẅí ɔ sɛ́ ńdɛ́, jʉɔmɛ, fú tsɛtsɛt pɛpfú ńdɔ sɛ́, Pɔ́Ꞌɔ, Kɛlístɔ níꞋ kyɛꞌ yɛ́ nǔu ɡu.

¹⁵Pɔ́Ꞌɔ lɑ́ pʉʉ ɡɔ́ ŋ́ɡɛ yʉ́ʉ mbɑ kʉ̈ɔ́ lɑ́, ńdɑk tú yʉ́ʉ sʉ́Ꞌnɛ. Pʉʉ pɑ́ɑ nɛnɑ́ŋ wɛ pɛɡʉɡʉʉ, pʉʉ ńnɑ́ŋ pɑ́Ꞌ ɡɑŋfɑ-jínu

¹⁶pi pɔ́p jí nɛlúꞋnɛ mɛlɛ́Ꞌlɑ́Ꞌ mi Sɛ́ ɡɑ́nɛ mbɔ̌ pɔ́p, ɛ́fɑꞋ mɛfɑꞋ sʉ́Ꞌnɛ, mbíꞋŋɡɔ fʉꞋ njí yɔ kɑ́ pɔŋ.

¹⁷Pɔ́Ꞌɔ, kɔɔ pʉʉ pɔ́ pɛɡʉɡʉʉ. Pʉʉ tɑ́Ꞌ mɛnu nɛjí mi ɛ́ pɔŋnɛ mbi Tsɑpʉɔ.

¹⁸Kɔɔ pʉʉ nɔ́ mɛluꞋ tɛ ɛ́ jʉ́ wʉ́ʉ. Nɛɡɛ pɔ́Ꞌɔ, ɛ́ nɛcʉ́ɔ nǔu sɛ̂ndúŋ kɛpɔŋ. Zẅikŋɛ Lɛ́ɛnɛ́nɛ jʉ́nɛ wʉ́ʉ.

¹⁹Pɔ́Ꞌɔ lɑ́, pʉʉ pɔ́ ńzɔp mɛzɔpŋki mi ɛ́ tsɛt ŋwɑꞋnɛ ńdɔk ńníꞋ mɛtʉʉ-mɛmbʉʉ mʉ́ʉ, ńzɔp mɛzɔp-pʉɔ-Kɛlístɔ, ńzɔp mɛzɔp mi Zẅikŋɛ-Sɛ́ níꞋnɛ tʉ́m pʉʉ. Pʉʉ zɔp ŋ́ɡúꞋlɛ Tsɑpʉɔ nɛ́ ŋɡɔŋ tʉ́m yʉ́ʉ tsʉʉ.

²⁰Pʉʉ lɔk lík-Tsɑpʉɔ wɛkŋɛ Yɛ́su Kɛlístɔ ḿbɔ́ ŋ́ɡɛ́mtɛ Sɛ́ Tɑ́t ŋkɑ́ tsʉʉ, nǔu yúu tsʉʉ.

²¹Pʉʉ lɔk pɑ́Ꞌ pʉʉ ɡɑ́nɛ mbʉʉ yʉʉ sɛ́ mbi Kɛlístɔ, mbɑ wɔ̌ lɑ́ ɡɑ́ mbʉʉ yɛ sɛ́ mbi mɔ́ɔmɑ́ wɛ.

²²Ɛ́ ɡʉ nǔu pʉʉ pɑŋɡɛ́, mbɑ wɔ̌ lɑ́ ɡɑ́ mbʉʉ yɛ sɛ́ mbi ndúu mɛ pɑ́Ꞌ ɑ ɡɑ́nɛ mbʉʉ yɛ́ sɛ́ mbi Tsɑpʉɔ lɑ́.

²³MbíꞋŋɡɔ ndúu-mɑŋɡɛ́ pɔ́nɛ túmbi, mɑŋɡɛ́ pɔ́ mbɑp-mbʉʉ. Kɛlístɔ pɔ́ tú, cúꞋlɛ-pʉɔ pɛ́ pɔ́ mbɑp-mbʉʉ yɛ. Jʉ́ ɡɛnɛ lɑ cúꞋlɛ-pʉɔ pɛ́ ɡẅɛɛ luk kɛ́mɛ.

²⁴Ndʉ́ŋndʉŋ pɑ́Ꞌ cúꞋlɛ-pʉɔ-Kɛlístɔ sɛ́ ŋ́ɡɑ́ mbʉʉ yɛ sɛ́ mbi Kɛlístɔ lɑ́, ɛ́ píkŋɛ ŋɡɔ mbɑ wɔ̌ lɑ́ nǔu pʉʉ pɑŋɡɛ́, ɡɑ́ mbʉʉ yɛ sɛ́ mbi ndúu mɛ pɔ́ pɔ́Ꞌɔ.

²⁵Ŋ́ɡʉ nǔu pʉʉ mbɛ́ɛnɛ, mbɑ wɔ̌ lɑ́ kɔŋ nzwɛ́ wɛ ndʉ́ŋndʉŋ pɑ́Ꞌ Kɛlístɔ kɔŋnɛ cúꞋlɛ-pʉɔ pɛ́ tɛ mbɔ ɑ kɑ ɡɑ́ tú yɛ́ mbíꞋ yɛ́tɛ́ lɑ́,

²⁶ŋ́ɡɛ pɔ́Ꞌɔ, ńdɔk ɛ́fɑk cúꞋlɛ yɛ́ ŋ́ɡɑ́ mbɔ̌ Sɛ́. Ɛ́ ɡɔ́ ḿbɔ́, mbɔ ɑ lɔk ŋki ɛ́suk wɔ́p, ḿbɛn ńdɔk sẅiŋɛ ńcẅɛɛtɛ lɔ́Ꞌ nǔu pɔ́p.

²⁷A kɑ pɔ́ ŋ́kɔŋ ŋɡɔ yîyɑ́ cúꞋlɛ, ɛ́ ɡɔ́ tʉ́ʉ mbi yɛ́, ńtsuŋ ḿbɔ́ ŋ́ŋwɑŋɛ, ḿbɔ́ kɛ́ ncʉ́, kɛ́ yɛcɔ́ zʉꞋ mbʉʉ yɛ́ ŋúꞋlɛ, kɛ́ yɛcɔ́ lɔ́Ꞌ, yɛcɔ́ yúu pɔɔ pɛ́t ńjɑ́k nǔu wɛ́ pɔ́.

²⁸Pɔ́Ꞌɔ, ɛ́ sɛ́ ḿbíkŋɛ ŋɡɔ ŋu mbɛ́ɛnɛ kɔŋ nzwɛ́ wɛ ɡúu pɑ́Ꞌ ɑ kɔŋnɛ túmbʉʉ yɛ́. Ŋu ẅí ɑ kɔŋnɛ nzwɛ́ wɛ lɑ́, ɑ kɔŋ pɔ túmbʉʉ yɛ́.

²⁹Wɛcɔ́ ŋu ŋkɑɑ mɔ́ zɛɛ ḿbɑɑ mbʉʉ yɛ́ pɔ́. Ŋu lɔ ńzẅík mbʉʉ yɛ́ zẅíknɛ ḿbɛn ńniitɛ. Ɛ́ ndʉ́ŋndʉŋ pɑ́Ꞌ Yɛ́su Kɛlístɔ ɡɛnɛ nǔu cúꞋlɛ-pʉɔ pɛ́ pɔ́Ꞌɔ,

³⁰mbíꞋŋɡɔ pɛkŋɛ pɔ́ pɔ mɛkɛm-mbʉʉ mɛ́.

³¹«Ɛ́ yúu mi ɛ́ ɡɛnɛ ŋu mbɛ́ɛnɛ nɑ́ŋ tɛ ɛ́fɑk mbʉʉ yɛ́ nǔu tɑ́t wɛ pɔ́p mɑ́ wɛ, ŋ́ɡʉ ńdɑt mbʉʉ yɛ nǔu mɑŋɡɛ́ pɔ́pnɛ́ tɛmtɛ ńtsʉ́Ꞌ tɑ́Ꞌ ŋu».

³²Yɔ ntsɛm ɡú tɛꞋ, n cú pɑ́Ꞌɑ nǔu Kɛlístɔ mbɑ nǔu cúꞋlɛ-pʉɔ pɛ́.

³³Lɑ́ ŋ kɛ́ ḿbɛn ńcú pɑ́Ꞌɑ mbɑ nǔu pʉʉ yʉ́ʉ. Ɛ́ sɛ́ ḿbíkŋɛ ŋɡɔ mbɑ wɛ́tɛ́ ŋu mbɛ́ɛnɛ pɔ́ ŋ́kɔŋ nzwɛ́ wɛ pɑ́Ꞌ ɑ kɔŋnɛ túmbʉʉ yɛ́, mbɑ wɛ́tɛ́ mɑŋɡɛ́ lɑ́ pɔ́ ŋ́ɡɛ mɛkuꞋ ndúu mɛ.