Read Ngomba Filipɛ 3 Bible Online

Filipɛ 3 - Ngomba bible

Filipɛ 3

¹Ɛ́ nǔu ŋkɔ̂ɔnɛ, mbɑ̌ɑ pɔ́ɔpɛ́mɑ́ pɑ́ɑ, pʉʉ tsɑ́ɑtɛ tsɑ́ɑtɛ́nɛ ntɛ́ Tsɑpʉɔ. Ɛ́ lɑɑ ḿbɔ́ m bɔɔ kɑ́ɑ nɛŋwɑꞋnɛ ŋwɑꞋnɛ ŋ́ɡɑ́ mbɔ̌ pʉʉ nɛlɔk ŋ́kẅíitɛ wʉ́ʉ nɛ́ yúu mi ŋ kɑ zɛɛnɛ ńcú mbɔ̌ pʉʉ pɔ́. Ɛ́ ɡʉ ḿbyɛ́p wʉ́ʉ nɛvu nǔu ɡwɑk.

²Pʉʉ pɑ́ɑ pɑzíꞋ pʉɔ nɛ́ yúu mi ɛ́ kɑ́ pɔŋ! Pʉʉ pɑ́ɑ mɛnɑɑ ɛ̂mɑ́! Yɔ́p nu pɔ́ pɔ ŋɡɔ pɛ́ lɑɑ mbɔɔ ŋu púꞋ, Sɛ́ pɔɔ ɡɛ ɑ luk pɔ́.

³Pɛkŋɛ pɔ́nɛ pʉɔ pi pɛ́ kɑ tsuŋnɛ ḿbúꞋ wɔ́p. Zẅikŋɛ ɡɛnɛ pɛkŋɛ ɡúꞋlɛ Sɛ́. Pɛkŋɛ lɔk pɔ Yɛ́su Kɛlístɔ ńtsɑ́ɑtɛ, kɔɔ pɛkŋɛ zɑ́p tʉ́m pɔ nǔu yúu mi pɛkŋɛ ɡɛnɛ.

⁴Lɑ́ m bɔ́ ŋu ẅí n dɑ́Ꞌ ḿbɔ́ pɛ́Ꞌnɛ ŋkɔŋ, mbɔ ɛ́ lɑɑ ḿbɔ́ n dɔk yúu mi pɛ́ ɡɛnɛ mbíꞋ mɑt-lɑ́Ꞌ wɛk ńdɔk ńtsɑ́ɑtɛ. Tɛ ḿbɔ́ yi ŋu lɑɑ ɛ́sẅíi wɑ́ɑ ŋɡɔ ɑ jí nu nǔu, ɛ sẅíi wɛ́ ŋɡɔ n jí nu nǔu ńdɛɛ wɛ́.

⁵Pɛ́ kɑ pí wɑ́ɑ, ɛ́ lɛɛ lɛ́Ꞌ pɛ́nɛ́fɔ́m, pɛ́ púꞋ wɑ́ɑ. Mɔ ŋu nǔu njẅɛt-Pɑíslɑyɛ̂l, nǔu tsɛ́nndɑ́-Mbɛ̌zɑmɛn, ḿbɔ́ ŋu-Hɛbɛlʉ tɛ pɛtɑ́t pɑ́ɑ pɔ́ pɔ pɑ Ɛbɛlʉʉ, ŋ́ɡʉ nǔu nɛpʉ́ʉ-pɑyúdɑ, m bɔ́ ŋu nǔu nɔɔ-pɑfɑlísɑy.

⁶Ŋ kɑ pɔ́ ńníꞋ tʉʉ nǔu nɛpʉ́ʉ tɛꞋ, tɛ ńtsɔ́Ꞌ ku-pʉɔ-Kɛlístɔ kɛpɔŋ. NɛkúꞋlɛ nɛpʉ́ʉ-lɑ́Ꞌ kɑ pɔ́nɛ pɛ́Ꞌnɛ ḿbɔ́ ńdɛꞋlɛ ŋɡɔ ŋu fɑɑnɛ, mbɔ ɛ́ lɑɑ ḿbɔ́ ɛ sẅíi wʉ́ʉ ŋɡɔ mɔ ŋ́kɑɑ fɑɑnɛ.

⁷Lɑ́ mɔnɛ mɛnu mi ɛ́ kɑ pɔ́ mbɔ̌ mɔ ḿbɔ́ pɔ nɛmɑŋ, Kɛlístɔ kɑ ɡɛ n jʉ́ɔ, ɛ́ pɔ́ pɔ pɛ́.

⁸Ɛ́ kɑ́ pɔ́ pɔ ndɑꞋ pɔ́Ꞌɔ pɔ́, nɛjí Yɛ́su Kɛlístɔ, Tsɑpʉɔ wɑɑ tsʉ́Ꞌnɛ ńdɛɛ nu tsʉʉ. Mbɑ kʉ̈ɔ́ lɑ́ tsʉ́Ꞌ ḿbɔ́ pɔ pɛ́. Mbɔ ŋ kɑ lʉꞋ yúu tsʉʉ mbíꞋ pɔ wɛ́. N tsʉ́Ꞌ ńdíŋɛ mîmɑ́ mɛyúu tsʉʉ ɛ́ pɔ́ pɔ kyɑŋɛ. Kɛlístɔ tsʉ́Ꞌnɛ yɑ́ɑ pii,

⁹nɛpɔ́ yi ŋ ɡʉ tsʉ́Ꞌ ḿbɔ́ pɔ nǔu mbɔ́ mɛ́, ḿbɔ́ m bɔɔ pɛn ńcú ŋɡɔ mɔ kɛ́fɑɑnɛ mbi Sɛ́, mbíꞋŋɡɔ n jí nɛpʉ́ʉ-pɑyúdɑ pɔ́. Mɔ mbi yɛ́ ḿbɔ́ kɛ́fɑɑnɛ mbíꞋ pɔ nu yi n zɑ́pnɛ tʉ́m yɑ́ɑ nǔu Kɛlístɔ, Sɛ́ ɡɛnɛ ŋɡɔ m bɔ́ ŋu nɛ́nẅín pɑ́Ꞌ wɛ́tɛ́ ŋu ẅí ɑ zɑ́pnɛ tʉ́m yɛ́ nǔu Kɛlístɔ lɑ́.

¹⁰Mɔ sɛ́ ńtsɑ́ɑ pɔ tɑ́Ꞌ nu wɛ́mɔ́Ꞌ. Ɛ́ pɔ́ ŋɡɔ n jí Kɛlístɔ, ńjí mɛtʉʉ mi ɛ́ kɑ ɡɛnɛ ɑ zẅíimɛ nǔu nɛvú, ńjʉ́ɔ ŋɡʉ̈ɔ́Ꞌ pɑ́Ꞌ ɑ kɑ jʉ́ɔnɛ yɛ́, ḿbɛ́m nɛɡɑ́ tú yɑ́ɑ ḿpfú pɑ́Ꞌ ɑ kɑ ɡɑ́nɛ yɛ́,

¹¹nɛpɔ́ yi, ɛ́ lɑɑ ḿbɔɔ pɔ́ pɔ kʉ̈ɔ́ pɔ́, Sɛ́ lɑ́Ꞌ ŋ́ɡɛ n zẅíimɛ yɑ́ɑ nǔu nɛvú pɑ́Ꞌ Kɛlístɔ.

¹²Ḿbɔ́ m bɔɔ cú ŋɡɔ ŋ ɡʉ mɔ́ tɛ ŋ́kúu pɔ́. Ḿbɔ́ m bɔɔ cú ŋɡɔ mɔ ndʉ́ŋndʉŋ pɔ́. M bɛ́t sɛ̂ndúŋ, ŋ́kʉɔ ndʉ́ɔlɛ́, ńtsɑ́ɑ nɛjʉ́ ndʉ́ɔlɛ́ ɛ̂yɑ́, mbíꞋŋɡɔ Yɛ́su Kɛlístɔ kɑ kɛ́mɔ́ ńtík pɔ́ nǔu mɔ.

¹³Pɔ́ɔpɛ́mɑ́ pɑ́ɑ, mbɔ m bɔɔ cú ŋɡɔ ŋ ɡʉ tɛ ŋ́kúu pɔ́, mɔ sɛ́ ŋ́ɡɛ pɔ tɑ́Ꞌ yúu, ɛ́ pɔ́ nɛɡɔ́ ŋ́ɡɛ yúu, ńdikŋɛ Mbɑ kʉ̈ɔ́ lɑ́ yi ŋ kɑ ɡɛnɛ, ńtsʉ́Ꞌ ńdíŋɛ pɔ yi ɛ́ mbi.

¹⁴Mɔ sɛ̂ndúŋ ŋ́kʉɔ pɔ ndʉ́ɔlɛ́ nɛkúu zʉꞋ yi ŋ ɡʉnɛ zúꞋu ńcẅɛ́ɛ tsɔ́ꞋfɑꞋ yi Sɛ́ kɑ kɑꞋnɛ nɛɡɑ́ mbɔ̌ pɛkŋɛ tʉ́nɛ́pú. Yîyɑ́ tsɔ́ꞋfɑꞋ pɔ́ nɛpɔ́ nɛjɔ́ŋ Yɛ́su tʉ́nɛ́pú.

¹⁵Pɛkŋɛ pi pɛkŋɛ tsʉ́Ꞌnɛ pɔ pɛlʉ́m nǔu nɛzúꞋ nu-Sɛ́ lɑɑ, ɛ́ pɔŋ ŋɡɔ yɛkŋɛ kwɑŋɛ pɔ́ pɔ pɑ́Ꞌɑ, ŋ́kɛ́ ḿbɔ́ yi pɛcɔ́ pʉɔ pʉ́ʉ ɡẅɛɛ yɛcɔ́ kwɑŋɛ tɛ ɛ́ pɔɔ yɑ́ɑ pɔ́, mbɔ Sɛ́ ɡʉ ɛ́sɑ́ɑnɛ sɑ́ɑnɛ́nɛ, ɛ́sẅíi wʉ́ʉ nɛ́ nu ɛ̂yɑ́.

¹⁶Nu ɡwɛ́ pɔ ŋɡɔ, zʉꞋ yi pɛkŋɛ ɡʉ tɛ ŋ́kúu zúꞋu lɑɑ, pɛkŋɛ tɛmtɛ kɛ́ ŋ́ɡʉ pɔ nɛ́ mbi.

¹⁷Pɔ́ɔpɛ́mɑ́ pɑ́ɑ, pʉʉ pɛtsʉʉ, pʉʉ pɛ́ɛ fʉꞋ nǔu mɔ. Pɛk kɑ nyɛt wʉ́ʉ pɑ́Ꞌ pʉʉ ɡʉ ńnɛn pɔ́Ꞌɔ. Pʉʉ líŋɛ pʉɔ pi pɔ́p sɛ́ ńnɛn pɔ́Ꞌɔ, ńnɛn yʉ́ʉ.

¹⁸Pʉɔ tɛ ńzɑ́ɑ zɛɛ ḿbɔ́ tsɛtsɛt pɛkŋɛ, mɑt wɔp fí pɔ wɛ pʉɔ pi pɔ́p ŋíŋɛ nɛvú Kɛlístɔ nǔu tʉ́ mbɑ́ŋtɛ pɑ́ŋtɛ́nɛ ŋíŋɛ́nɛ. Ŋ kɑ zɛ ɛ́sẅíi wʉ́ʉ, tɛ mbɑ lɔ́Ꞌnɛ, m bɛn ḿbɔ́ ńcú tɛ ńdɔk pɔ ŋki-mík ńcú.

¹⁹Mɔ́p mɛlɛ́Ꞌ ɡʉ ńdɑ́Ꞌ ḿmɛ ndǔmbí, pɔ́p ɡʉ nɛpʉ́-múk, mbíꞋŋɡɔ wɔp sɛ́ pɔ́ pɔ nɛpɛm nɔ́p. Pɔ́p tsɑ́ɑtɛ nǔu yúu mi sʉ́ʉ ɡʉ ŋ́kɔ́ wɔ́p nǔu, yɔ́p kwɑŋɛ pɛn ńtʉ́ʉ pɔ nǔu yúu-ndǔmbí.

²⁰Ɛ́ ɡʉ nǔu pɛkŋɛ, mbɔ wɛkŋɛ ŋɡɔŋ pɔ tʉ́nɛ́pú. Pɛkŋɛ sɛ́ ńzẅíꞋlɛ ŋɡɔ Tsɑpʉɔ Yɛ́su Kɛlístɔ fú zúꞋu ńtɔ́, ŋ́ɡɛ pɛkŋɛ luk.

²¹A ɡʉ ŋ́ɡɛ ńtɔ́ ɛ́shɔt yɔ mbɑp-mbʉʉ yi ɛ́ pɔ́t pɔ́tnɛ lɑɑ, ɛ́ tsʉ́Ꞌ pɑ́Ꞌ yɛ́ yi ɛ́ ɡẅɛɛnɛ nɛŋwɑ́ŋɛ. Ɛ́ pɔ́ pɔ́Ꞌɔ, ńdɔk mɛtʉʉ mi ɑ ɡẅɛɛnɛ nɛlɔk ŋ́ɡɛ mbɑ kʉ̈ɔ́ lɑ́ tsʉ́Ꞌ ńzúꞋ pɔ ntsu wɛ́.