Read Ngomba Filipɛ 4 Bible Online

Filipɛ 4 - Ngomba bible

Filipɛ 4

¹Pɔ́ɔpɛ́mɑ́ pɑ́ɑ pɛtʉʉndɛn, ɛ́ yɛ́tɛ́ lɑ́ n cú mbɔ̌ pʉʉ ŋɡɔ, pʉʉ lɔk wʉʉ nɛnɑ́ŋ ńnyɛt ŋɡɔ pʉʉ kúꞋlɛ nu-Tsɑpʉɔ tɛ ɛ́ tɛn. Mɔ sɛ́ ńtsɑ́ɑ nɛpɛn ńjʉ́ɔ wʉ́ʉ. Pʉʉ pɔ́ɔpɛ́mɑ́ pɑ́ɑ pɛtʉʉndɛn. Pʉʉ pi pʉʉ yɑ́ɑ tsɑ́ɑtɛ, ḿbɔ́ yɑ́ɑ ŋɡúꞋ.

²M búꞋ mbɔ́ mbɔ̌ Ɛvɔdí pɔ́p Sɛŋtish ŋɡɔ pɔ́p pɔ́ tɑ́Ꞌ ntsu mbíꞋŋɡɔ pɔ́p pɛ́tsʉʉ pɔ́ pɔ pʉɔ-Tsɑpʉɔ.

³Ḿbɛn ŋ́ɡʉ nǔu ɡu, kwɑꞋ súu wɑɑ tsɛt fɑꞋ, mɔ sɛ́ ḿbúꞋ mbɔ́ mbɔ̌ ɡu ŋɡɔ ɔ cẅɛ́lɛ́ wɔ́p, pɑŋɡɛ́ ɛ̂pɑ́ pɛkŋɛ pɛpɔ́p nɛ́ Kɛlɛmɑ̂ŋ kɑ tɛmtɛ́nɛ ńdʉ̈ɔ́Ꞌ ntsɔ nǔu nu-Ŋkʉʉ Sʉ́Ꞌnɛ, ŋ́ɡɛ pɛcɔ́ pʉɔ pi pɛk pɔ́p kɑ pɔ́ ɛ́fɑꞋ tɛ mɛlík mɔ́p tsɛt ŋwɑꞋnɛ yi ɛ́ mbɔ̌ Sɛ́.

⁴Ŋ ɡʉ ńcú mbɔ̌ pʉʉ ŋɡɔ tʉ́m yʉ́ʉ nɑ́ŋ ńtsɑ́ɑtɛ tsɑ́ɑtɛ́nɛ, mbíꞋŋɡɔ pʉʉ pʉɔ-Tsɑpʉɔ. M bɛn ńzɛ́plɛ ńcú mbɔ̌ pʉʉ ŋɡɔ, tʉ́m yʉ́ʉ nɑ́ŋ ńtsɑ́ɑtɛ tsɑ́ɑtɛ́nɛ.

⁵Pʉʉ pɔ́ pʉɔ pi pɛ́ jí ŋɡɔ pʉʉ pɔ́tnɛ pɔ́tnɛ́nɛ. Pʉʉ kẅíitɛ ŋɡɔ ŋkɑ́ yi Tsɑpʉɔ ɡʉ ńtɔ́ kɑ́ sɑk.

⁶Kɔɔ pʉʉ púꞋ mbʉʉ yʉʉ nǔu yɛcɔ́ nu. Lɑ́, kʉ̈ɔ́ lɑ́ lɑɑnɛ ńtʉ́ʉ sɛ́ ɔɔ, pʉʉ púꞋ mbɔ́ mbɔ̌ Sɛ́, ɛ́sẅíi wɛ́ nɛ́ yúu mi pʉʉ sɛ́ ńtsɑ́ɑ, ḿbúꞋ mbɔ́ mbɔ̌ wɛ́, ḿbɛn ŋ́ɡɑ́ pɑ́Ꞌlɑ́ mbɔ̌ wɛ́.

⁷Pʉʉ ɡʉ ŋ́ɡɛ pɔ́Ꞌɔ, Sɛ́ ɡɑ́ mɔ́fíitɛ ẅi ŋumɛsɔŋ kɑ́ jí pɑ́Ꞌ ɛ́ pɔ́nɛ pɔ́ mbɔ̌ pʉʉ. Ẅîwɑ́ mɔ́fíitɛ pyɛ́pnɛ mɛtʉ́m mʉ́ʉ, kwɑŋɛ yʉ́ʉ tʉ́ʉ pɔ nǔu Yɛ́su Kɛlístɔ.

⁸Pɔ́ɔpɛ́mɑ́ pɑ́ɑ, nu yi m bɔ́ ńdɔk ńcɔ́kŋɛ ɛ́ ŋɡɔ, kwɑŋɛ yʉ́ʉ ńnɑ́ŋ ńtʉ́ʉ pɔ nǔu mɛnu sʉ́Ꞌnɛ mi pʉɔ tɛ ńzɑ́ɑ ɡʉ̈ɔꞋtɛ́nɛ, ńtʉ́ʉ nǔu nu nɛ́nẅín, nǔu nu yi ɛ́ tʉ́ʉnɛ ndʉ́ŋndʉŋ, nǔu nu kɛ́ lɔ́Ꞌ, nǔu mɛnu mi ɛ́ mɛ́ mɛkuꞋ, nǔu mɛnu mi pɛ́ ɡɛ pʉɔ ɡɑ́ pɑ́Ꞌlɑ́, mɛnu mi ɛ́ cẅɛ́lɛ́nɛ, nǔu mɛnu mi pɛ́ sɛntɛ ŋu nǔu.

⁹Kʉ̈ɔ́ lɑ́ yi ŋ kɑ zíꞋnɛ wʉ́ʉ, kʉ̈ɔ́ lɑ́ yi pʉʉ kɑ zúꞋnɛ ntsu mɔ, kʉ̈ɔ́ lɑ́ yi pʉʉ kɑ jʉ́ɔnɛ ŋ ɡɛ, pʉʉ ɡɛ pɔ́Ꞌɔ pɛ́ jʉ́ɔ. Sɛ́ ẅí ɑ ɡɑ́nɛ mɔ́fíitɛ pɔ́ mbɔ̌ pʉʉ.

¹⁰Tsɑpʉɔ sɛ́ ŋ́ɡɛ n tsɑ́ɑtɛ tɛꞋ, mbíꞋŋɡɔ pʉʉ pɛn ŋ́ɡẅɛɛ shʉ́ nɛnyɛt ŋɡɔ pʉʉ sɛ́ ŋ́kẅíitɛ wɑ́ɑ. Pʉʉ kɑ zɛɛ ḿbɔ́ ŋ́kẅíitɛ wɑ́ɑ kẅíitɛ́nɛ lɑ́ ńjɑ́k sɛ̂ndúŋ nɛlɔk ńcẅɛ́lɛ́ wɑ́ɑ.

¹¹Ŋ kɑ́ pɔ́ ńcú pɔ́Ꞌɔ, mbíꞋŋɡɔ yɛcɔ́ yúu sɛ́ ńjɑ́k mbɔ̌ mɔ pɔ́. Ŋ kɑ zíꞋ nɛpɔ́ yi n dɑɑ ńjɑ́k yúu ɔɔ, kɛ ŋ́ɡẅɛɛ mbɑ ɡẅɛɛnɛ ɔɔ, m bɔ́ ńtsɑ́ɑtɛ tsɑ́ɑtɛ́nɛ.

¹²Ŋ kɑ zíꞋ mɔ́ nɛsʉk púŋ, ḿbɛn ńzíꞋ nɛnɑ́ŋ tsɛt fuꞋ. Ŋ kɑ zíꞋ mɔ́ nɛpɔ́ yi n dɑɑ ńtʉ́ʉ pɔ ɡɔ́ lɑ́, kʉ̈ɔ́ lɑ́ pɔ́nɛ sɛ́ ɔ́ɔ, ɛ́ pɔ́ pɔ nɛsʉk nji, ɛ sʉk sʉknɛ, ḿbɔ́ pɔ nɛkwɛ́t tɛ ńzwɛ́t ŋ kwɛ́t, ḿbɔ́ yi ɛ́ lɑɑ ḿbɔ́ pɔ ŋkɑ́-cʉ́, kɛ ŋkɑ́-yúu pɛjʉ́ ɔɔ, m bɔɔ pɔ́k yɛcɔ́ yúu pɔ́.

¹³Kɛlístɔ ɡɑ́nɛ wɑ́ɑ nɛ́ mɛtʉʉ, lɑ ŋ kuꞋ nɛɡɛ pɔ́Ꞌɔ.

¹⁴Tɛ mbɑ pɔ́Ꞌɔ, pʉʉ kɑ ɡɛ sʉ́Ꞌnɛ nɛcẅɛ́lɛ́ wɑ́ɑ nǔu ŋkɔ̂ɔnɛ yi mɔ sɛ́ ńjʉ́ɔ ŋɡʉ̈ɔ́Ꞌ lɑɑ.

¹⁵Pʉʉ pʉɔ-Filipɛ, pʉʉ sɛ́ ńjí sʉ́Ꞌnɛ ŋɡɔ pʉʉ zɛ́nɛ pʉʉ kɑ kɛ́nɛ ńcẅɛ́lɛ wɑ́ɑ, ŋkɑ́ yi ŋ kɑ fúnɛ tsɛt ŋɡɔŋ wʉ́ʉ Mɑsɛndwɑn ŋ́ɡʉ, nɛjúk ńnɛn ńcẅi Ŋkʉʉ Sʉ́Ꞌnɛ. Ɛ́ kɑ pɔ́ ŋkɑ́ yi pɛ́ kɑ pɛ́t ńzɛ zɛnɛ nɛcẅi Ŋkʉʉ Sʉ́Ꞌnɛ, yɛcɔ́ cúꞋlɛ-pʉɔ-Kɛlístɔ ndɛꞋ ŋkɑɑ zɑ́p pɔ́ nǔu fɑꞋ yɑ́ɑ pɔ́, mbɔɔ jí yúu mi ɛ́ sɛ́ ńjɑ́k wɑ́ɑ pɔ́, ḿbɛn mbɔɔ jí yi fɑꞋ yɑ́ɑ sɛ́ ŋ́ɡɑ́ pɔ́.

¹⁶Ŋ kɑ pɔ́ tɛ ŋ́kúu Tɛsɑlɔnik, pʉʉ túu yúu mi ɛ́ kɑ pɔ́ ńjɑ́k mbɔ̌ mɔ. Pʉʉ kɑ túu mɛŋkɑ́ tɛ ńzɑ́ɑ.

¹⁷N cú pɑ́Ꞌɑ, ɛ́ pɔɔ pɔ́ pɔ ŋɡɔ mɔ sɛ́ ńdɔɔ pɔ yúu mi pɛ́ ɡʉ ńtúu ŋ́ɡɑ́ mbɔ̌ mɔ pɔ́. Mɔ sɛ́ ńtsɑ́ɑ pɔ ŋɡɔ Sɛ́ fú nǔu ńníꞋ mbɔ́tnɛ nǔu pʉʉ.

¹⁸Ɛ́ ɡʉ nǔu yúu mi pʉʉ kɑ túunɛ ŋ́ɡɑ́ mbɔ̌ mɔ, mbɔ ŋ kɑ jʉ́ɔ. Ŋ ɡẅɛɛ yúu ŋkɔ̂ɔnɛ tɛ ɛ́ zɑ́ɑ tɛꞋ. N jʉ́ɔ yúu ɛ̂mɑ́ yi Ɛpɑfɔlɔdit lɔknɛ ńtɔ́. Ŋ kɑ́ pɛn ḿbɔ́ ńjɑ́k yɛcɔ́ yúu pɔ́. Yúu ɛ̂mɑ́ pɔŋ wɑ́ɑ tɛꞋ, ḿbɔ́ pɔ pɑ́Ꞌ yúu-pɔꞋ yi pɛ́ lɑɑ ńnɔŋ mbi Sɛ́, ɛ́ pɔŋ wɛ́ tɛꞋ lɑ́.

¹⁹Sɛ́ wɑɑ ɡʉ ńdɔk ntɛ́ yi ɑ ɡẅɛɛnɛ yúu pɔ́Ꞌɔ, ńdɛɛtɛ nǔu Yɛ́su Kɛlístɔ, ŋ́ɡɑ́ mbɑ kʉ̈ɔ́ lɑ́ yi ɛ́ sɛ́ ńjɑ́k mbɔ̌ pʉʉ kɛ́ sɑ́ŋ.

²⁰Gúꞌlɛ pɔ́ mbɔ̌ Tɑ́t wɛkŋɛ Sɛ́ nǔu mɛŋɡuꞋ mɛŋɡuꞋ. Ɛ́ pɔ́Ꞌɔ.

²¹Pʉʉ ńcɛꞋlɛ pʉɔ pɛtsʉʉ pi pɔ́p kɑ lúꞋnɛ́nɛ Yɛ́su Kɛlístɔ ḿbɔ́ pʉɔ-Sɛ́. Pɔ́ɔpɛ́mɑ́ pi pɛk pɛpɔ́p zɑ́Ꞌnɛ cɛꞋlɛ wʉ́ʉ ɡúu.

²²Pʉɔ-Kɛlístɔ tsʉʉ cɛꞋlɛ wʉ́ʉ, n cú pɑ́Ꞌɑ kɛ́ likŋɛ cɛꞋlɛ yɛ́ pʉɔ-Kɛlístɔ pi pɔ́p ntɔ́Ꞌ-Kɑ́sɑ.

²³Tsɑpʉɔ Yɛ́su Kɛlístɔ pɔ́ ḿbɔ́ nɛ́ pʉʉ pɛtsʉʉ.