Read Ngomba Kɔlɔsíyɛ̂ŋ 1 Bible Online

Kɔlɔsíyɛ̂ŋ 1 - Ngomba bible

Kɔlɔsíyɛ̂ŋ 1

¹Yɔ ŋwɑꞋnɛ fú mbɔ̌ mɔ Pɔ̂l, Sɛ́ kɑ kɔŋ ŋɡɔ m bɔ́ ŋɡɑŋntúu-Yɛ́su Kɛlístɔ. Pɛk mɔ́ɔmɑ́ wɛkŋɛ Timɔtɛ̂ɛ ɡɑ́nɛ

²mbɔ̌ pʉʉ pʉɔ-Sɛ́ pi pʉʉ nɑ́ŋnɛ Kɔlɔs. Pʉʉ tɛmtɛ ḿbɔ́ pɔ́ɔpɛ́mɑ́ nǔu nu-Kɛlístɔ, pʉʉ kɛ́ ńjí pɔ ndɑꞋ yɛ́tɛ́. Tɑ́t wɛkŋɛ Sɛ́ pɔ́ mbɔ̌ nɛ́ pʉʉ, ḿbɔ́ ńníꞋ mbɔ́tnɛ pɔ́p mɔ́fíitɛ tʉ́m pʉʉ.

³Pɛk ŋkɑ́ tsʉʉ ŋ́ɡɔ́ ḿbɔ́ ŋ́ɡɑ́ pɑ́Ꞌlɑ́ mbɔ̌ Sɛ́ nǔu tú yʉ́ʉ, ḿbɔ́ ŋ́ɡɛ́mtɛ wɛ́ ɡɛ́mtɛnɛ. Pɛk ɡɛ́mtɛ wɛ́ ẅí ɑ Tɑ́t pɛ́ Tsɑpʉɔ wɛkŋɛ Yɛ́su Kɛlístɔ,

⁴mbíꞋŋɡɔ pɛ́ kɑ sẅíi wɛ́k nɛ́ ntɛ́ yi pʉʉ sɛ́ ńdɔk ńzɑ́p tʉ́m nǔu Yɛ́su Kɛlístɔ mbɑ ntɛ́ yi pʉʉ sɛ́ ńdɔk ŋ́kɔŋ pʉɔ-Sɛ́ pɛtsʉʉ.

⁵Pʉʉ ɡɛ pɔ́Ꞌɔ, mbíꞋŋɡɔ pʉʉ sɛ́ ńzẅíꞋlɛ yúu mi Sɛ́ kɑ niitɛ́nɛ ńzɑ́p tʉ́nɛ́pú mbíꞋ wʉ́ʉ. Pʉʉ kɑ ɡɔ́ ńjí yîyɑ́ yúu, ɛ́fú nǔu nu nɛ́nẅín yi pɛ́ kɑ sẅíinɛ wʉ́ʉ, yîyɑ́ nu nɛ́nẅín fú nǔu Ŋkʉʉ Sʉ́Ꞌnɛ.

⁶Ŋkʉʉ Sʉ́Ꞌnɛ sɛ́ ɛ́sɑt zʉꞋ ndǔmbí kɛ́ vuꞋ yɛcɔ́, ḿbɔ́ pɑ́Ꞌ tʉ́ yi ɛ́ sɛ́ ńzɛ́m ntɑ́ɑ, ḿbɛn ḿbɔ́ ŋ́ɡúꞋ lɑ́, ɛ́ tsɛtsɛt pʉʉ, ḿbɛn ḿbɔ́ ŋ́ɡʉ nɛ́ mbi pɔ pɔ́Ꞌɔ, tɛ ɛ́fú nduŋmbi lɛ́Ꞌ yi pʉʉ kɑ zúꞋnɛ pɛ́ zɛ nɛkẅíi pɑ́Ꞌ Sɛ́ lɔk mɛnu sʉ́Ꞌnɛ mɛ́ ŋ́ɡɑ́ fuꞋ-pʉɔ, yi ɛ́ tsuŋ ḿbɔ́ nɛ́nẅín.

⁷Pɛk sɛ́ ńjí ŋɡɔ Ɛpɑfɑlɑs kɑ zíꞋnɛ wʉ́ʉ nɛ yîyɑ́ nu. A mɔ́ɔmɑ́ wɛk wɛ tʉʉndɛn, pɛkŋɛ pɛpɔ́p fɑꞋnɛ. Pʉʉ jí ŋɡɔ, jʉ́ ẅí ɑ nɛjɔ́ŋ pʉʉ lɑ́, ɑ jí pɔ ndɑꞋ nu-Kɛlístɔ.

⁸A kɑ sẅíi wɛ́k nɛ́ ntɛ́ ŋkɔŋɛ yi Zẅikŋɛ Lɛ́ɛnɛ́nɛ kɑ níꞋnɛ tʉ́m pʉʉ.

⁹Mɔnɛ mɛnu mi ɛ́ ɡɛnɛ lɑ pɛk ŋ́kɑɑ mɔ́ lɑ́Ꞌ ńcɛꞋlɛ Sɛ́ nǔu tú yʉ́ʉ tɛ ɛ́fú lɛ́Ꞌ yi pɛ́ kɑ sẅíinɛ wɛ́k nɛ́ ntɛ́ yi pʉʉ lɔknɛ ŋ́kúꞋlɛ nu-Sɛ́ pɔ́Ꞌɔ pɔ́. Pɛk sɛ́ ńdɔ́ɔ mbɔ̌ Sɛ́ ŋɡɔ ɑ ɡɛ pʉʉ tsuŋ ńjí yúu mi ɑ kɔŋnɛ, ńdɛɛ nǔu jínu mbɑ nɛsɑ́ŋ nu yi Zẅikŋɛ Lɛ́ɛnɛ́nɛ ɡɑ́nɛ mbɔ̌ pʉʉ.

¹⁰Pɔ́Ꞌɔ, pʉʉ kuꞋ nɛnɑ́ŋ nǔu ntɛ́ yi Tsɑpʉɔ sɛ́ ŋ́kɔŋ, ḿbɔ́ ŋ́ɡɛ pɔ yúu mi ɛ́ pɔŋnɛ wɛ́, ɛ́fɑꞋ mɛfɑꞋ sʉ́Ꞌnɛ mɛntɛ́ mɛntɛ́, ŋ́kẅiꞋ ńjí jʉ́ Sɛ́.

¹¹Pɛk pɛn ḿbɔ́ ńdɔ́ɔ mbɔ̌ Sɛ́ ŋɡɔ ɑ lɔk pɑ́Ꞌ mɛtʉʉ pɔ́p nɛɡúꞋ pɔ́ pɔ mɛ́ lɑ́, ŋ́ɡɛ pʉʉ tsuŋ ńtɛntɛ lɑ ŋ́kuꞋ nɛsʉk mɛnu tsʉʉ kɛ́ citɛ mbʉʉ.

¹²Pʉʉ lɔk tsɑ́ɑtɛ ŋ́ɡɛ́mtɛ Sɛ́ ẅí ɑ Tɑ́t wɛkŋɛ, jʉ́ ẅí ɑ kɑ ɡɛnɛ pʉʉ kuꞋ nɛɡẅɛɛ yʉ́ʉ yúu nǔu ntʉ̈ɔt ẅí ɑ kɑ kɑꞋnɛ mbɔ̌ pʉɔ pɛ́. Ẅîwɑ́ ntʉ̈ɔt nǔu zʉꞋ kyɛꞌ.

¹³A kɑ sɑꞋ wɛkŋɛ mbɔ̌ mɛtʉʉ-nzɛnzʉ́ʉ, ńcɑklɛ wɛkŋɛ ńníꞋ tsɛt nu-nɛfɔɔ-Mɔ́ɔ nɛ, ɑ kɔŋ Mɔ́ɔ nɛ ɛ̂wɑ́ tɛꞋ.

¹⁴Jʉ́ mɔ́ɔ nɛ ɛ̂wɑ́ kɑ ɡɛnɛ Sɛ́ fú tsɛt nu kɛpɔŋ ńtsúꞋ wɛkŋɛ, ńdikŋɛ mɛfɑɑnɛ mɛkŋɛ, ŋ́ɡɑ́ mbɔ̌ pɛkŋɛ.

¹⁵Pɛ́ ŋ́kɑɑ mɔ́ jʉ́ɔ Sɛ́ pɔ́, lɑ́ Mɔ́ɔ nɛ ẅí pɛ́ kɑ jʉ́ɔnɛ wɛ́ ɑ pɔ́ pɔ Sɛ́ tɛ ḿmɛ. Jʉ́ tʉ́ʉnɛ túmbi nǔu mbɑ kʉ̈ɔ́ lɑ́ yi Sɛ́ kɑ pɔ́ɔnɛ.

¹⁶Sɛ́ kɑ zɛɛ ŋ́ɡɛ mbɑ kʉ̈ɔ́ lɑ́ lɛɛ nǔu mbɔ́-Mɔ́ɔ nɛ lɑ jʉ́ Sɛ́ pɔ́ɔ. Pɛ́ lɑ́Ꞌ yúu tsʉʉ yi ɛ́ tʉ́nɛ́pú, mbɑ yi ɛ́ ndǔ tsɛ́tsɑ́Ꞌ, mɛyúu mi pɛ́ jʉ́ɔnɛ mbɑ mi pɛ́ kɑ́ pɔ́ ńjʉ́ɔ pɔ́, mbɑ kʉ̈ɔ́ lɑ́ yi ɛ́ ndǔmbí ɡẅɛɛnɛ mɛtʉʉ nǔu pʉɔ, ɛ́sɑ́Ꞌ pɛcɔ́. Sɛ́ kɑ ɡɛ mîmɑ́ mɛyúu lɛɛ nǔu mbɔ́-Mɔ́ɔ nɛ lɑ pɛ́ pɔ́ɔ, ḿbɛn ḿbɔ́ɔ ɛ́ pɔ́ pɔ yɛ́ Mɔ́ɔ nɛ.

¹⁷Ndǔmbí kɑ pɛ́t pɔ kɛ́ pɔ́ ɡú, Kɛlístɔ pɔ́ pɔ ɡú, kʉ̈ɔ́ lɑ́ pɛn ńdɛɛtɛ pɔ nǔu wɛ́ lɑ ḿbɔ́ ɡú.

¹⁸Jʉ́ pɔ́nɛ tú nǔu mbɑp-mbʉʉ yi ɛ́ cúꞋlɛ pʉɔ pɛ́. A nzɛnɛ, ḿbɔ́ nduŋmbi ŋu ẅí ɑ kɑ pfúnɛ ḿbɛn ńzẅíimɛ. Pɔ́Ꞌɔ lɑ́, ḿbɔ́ nduŋmbi nǔu mbɑ kʉ̈ɔ́ lɑ́.

¹⁹Ɛ́ nɛ́nẅín, mbɔ Sɛ́ kɑ kɔŋnɛ ŋɡɔ kɔɔ yɛcɔ́ yúu mi ɛ́ nǔu wɛ́ jɑ́k nǔu Mɔ́ɔ nɛ,

²⁰ḿbɛn ŋ́kɔŋ ŋɡɔ ɑ ɡʉ ɛ́fú pɔ nǔu wɛ́, ɛ́shuŋ mbɑ kʉ̈ɔ́ lɑ́, ḿbɛn tík nɛjɔ́ŋ wɛ́, kɛ ɛ́ pɔ yúu mi ɛ́ ndǔ tsɛ́tsɑ́Ꞌ ɔɔ, kɛ tʉ́nɛ́pú ɔɔ, ɛ́ lɔk pɑ́Ꞌ Mɔ́ɔ nɛ kɑ tswɛtnɛ mɛci mɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́, ḿmik mbuu yi ɛ́ kɑ pɔ́nɛ tsɛtsɛt jʉ́ pɔ́p pʉɔmɛsɔŋ.

²¹Pʉʉ yʉ́ʉ, pʉʉ kɑ pɔ́ yɛcɔ́ ŋkɑ́ ḿbɔɔ nɛjɔ́ŋ Sɛ́ pɔ́, ḿbɔ́ pɔ ŋɡɑ sɛsɑ, ḿbɔ́ pɛɡɑŋmbuu-Sɛ́, mbíꞋŋɡɔ pʉʉ kɑ pɔ́ ŋ́kwɑŋɛ nu kɛpɔŋ, ŋ́ɡɛ pɔ yɛ́tɛ́.

²²Lɑ́ ɛ́ kɛ́ ḿbɛn ḿbɔ́ ŋkɔ̂ɔnɛ, mbɔ ɛ́ kɑ fú nǔu pɑ́Ꞌ Mɔ́ɔ nɛ kɑ tsʉ́Ꞌnɛ ŋumɛsɔŋ, ḿpfú, ɛ́shuŋ wʉ́ʉ ḿbɛn ńtík nɛjɔ́ŋ wɛ́, ɛ́shuŋ wʉ́ʉ pɔ́Ꞌɔ, nɛpɔ́ yi pʉʉ ɡʉ ḿbɔ́ Ndɛ́ɛnɛ Lɛ́ɛnɛ́nɛ, ḿbɔ́ pɑkɛ́fɑɑnnɛ, ḿbɔ́ pɛkɛ́lɔ́Ꞌ.

²³Lɑ́, ɛ́ kɛ́ ḿbɔ́ ḿbíkŋɛ ŋɡɔ pʉʉ zɑ́p tʉ́m nǔu jʉ́ Yɛ́su ńjí ŋɡɔ pʉʉ ɡʉ tʉ́ʉ kɛ́ zɔŋɛ, kwɑŋɛ yʉ́ʉ kɛ́ ńtʉ́ʉ pɔ nǔu yúu mi pʉʉ sɛ́ ńzẅíꞋlɛ mbɔ̌ Sɛ́, mbɔ pʉʉ kɑ zúꞋ yîyɑ́ yúu ŋkɑ́ yi pɛ́ kɑ pɔ́ ńcẅii Ŋkʉʉ Sʉ́Ꞌnɛ mbɔ̌ pʉʉ, ɛ́ pɔ́ pɔ wɛ́tɛ́ ẅí pɛ́ cẅinɛ mbɔ̌ ŋumɛsɔŋ tsʉʉ ndǔ ŋɡɔŋ. Mɔ Pɔ̂l yɑ́ɑ fɑꞋ nɛcẅi ẅîwɑ́ Ŋkʉʉ.

²⁴Ɛ́ ŋkɔ̂ɔnɛ ŋɡʉ̈ɔ́Ꞌ yi mɔ sɛ́ ńjʉ́ɔ nǔu tú yʉ́ʉ ɡɛ n tsɑ́ɑtɛ tsɑ́ɑtɛ́nɛ. Pɑ́Ꞌ Kɛlístɔ kɑ jʉ́ɔnɛ ŋɡʉ̈ɔ́Ꞌ lɑ́, mɔ sɛ́ ńjʉ́ɔ ŋɡʉ̈ɔ́Ꞌ ntɛ́ cúꞋlɛ yi ɛ́ mbʉʉ yɛ. Ŋ ɡɛ pɔ́Ꞌɔ ńdɔk ḿmikŋɛ fɑꞋ yɛ́.

²⁵Ŋ kɑ ńtsʉ́Ꞌ mɔ́ ŋɡɑŋfɑꞋ-cúꞋlɛ-pʉɔ-Kɛlístɔ, pɔ́Ꞌɔ, ɛ́ nɛfɑꞋ fɑꞋ yi Sɛ́ kɑ ɡɑ́nɛ mbɔ̌ mɔ mbíꞋ wʉ́ʉ. Yîyɑ́ fɑꞋ pɔ́ nɛcú sẅiŋɛ-sɛ́ mbɔ̌ pʉʉ pɔ tsʉʉ:

²⁶Sẅiŋɛ ɛ̂yɑ́ ntsɛm yi ɑ kɑ lɑ́Ꞌnɛ ńdʉɔ mbɔ̌ pʉɔmɛsɔŋ mɛzuŋ mɛzuŋ tɛ fú ŋɡuꞋ. Ɛ́ kɛ́ ḿbɔ́ ŋkɔ̂ɔnɛ, mbɔ ɑ kíɛꞋ yîyɑ́ ntsɛm ńnyɛt mbɔ̌ pʉɔ pi pɔ́p pɛ́.

²⁷MbíꞋŋɡɔ Sɛ́ kɑ jʉ́ɔ ŋɡɔ ɑ ɡʉ ŋ́ɡɛ pʉɔ pɛ́ jí yúu mi ɛ́ kɑ zɛɛ ńdʉ̈ɔmɛ mík-pʉɔ lʉɔmɛ́nɛ, ḿbɔ́ yi ɑ kɑ kɑꞋnɛ nɛɡɛ nǔu mɛtúu mɛtúu, yîyɑ́ yúu ɡẅɛɛ fuꞋ, ḿbɛn ḿbɔŋ tɛꞋ. Yîyɑ́ ntsɛm pɔ́ ŋɡɔ pʉʉ jí ŋɡɔ Kɛlístɔ ɑ tsɛt tʉ́m pʉʉ, ḿbɔ́ ŋ́ɡɛ pʉʉ zẅíꞋlɛ ŋkɑ́ yi pʉʉ ɡʉ ńdɑ́Ꞌ kúu tsɛt nɛɡúꞋ-Sɛ́.

²⁸Ɛ́ yɛ́tɛ́ lɑ́ pɛk kɛ́ ḿbɔ́ ɛ́sẅíi nu-Kɛlístɔ mbɔ̌ pʉɔtsʉʉ sẅíinɛ, ńdɔk pɔ jínu yi Sɛ́ ɡɑ́nɛ mbɔ̌ pɛk, ńzíꞋ pʉɔ nɛ́ yúu, ɛ́shuŋ nɛtúutɛ mbɑ wɔ̌ lɑ́, nɛpɔ́ yi ɑ ɡʉ ŋ́kɛ́ ńdɑt mbʉʉ yɛ pɔ nǔu Kɛlístɔ ńdɔk ŋ́ɡʉ nɛ́ mbi, tɛ ńtsʉklɛ pɑ́Ꞌ pʉɔ-Sɛ́ ɡẅɛɛnɛ nɛpɔ́ pɔ́Ꞌɔ lɑ́.

²⁹Pʉʉ zúꞋ yúu mi m pfúnɛ nǔu. Ŋ kɛ́ ńdɔk pɔ mɛtʉʉ mi ɛ́ fúnɛ mbɔ̌ Kɛlístɔ lɑ ɛ́fɑꞋ yɔ fɑꞋ. Mîmɑ́ mɛtʉʉ tsuŋ ḿbɔ́ sɔŋ mbʉʉ mɔ ḿbɔ́ ɛ́fɑꞋ.