Read Ngomba Kɔlɔsíyɛ̂ŋ 2 Bible Online

Kɔlɔsíyɛ̂ŋ 2 - Ngomba bible

Kɔlɔsíyɛ̂ŋ 2

¹Mɔ sɛ́ ŋ́kɔŋ ŋɡɔ pʉʉ jí ŋɡɔ ntsɔ ẅí mɔ sɛ́ ḿmɑꞋ ɛ́ tɛn. M mɑꞋ ẅîwɑ́ ntsɔ nǔu tú yʉ́ʉ, mbɑ nǔu tú-pʉɔ-Kɛlístɔ pi pɔ́p Lɑɔdisɛ́, mbɑ nǔu tú pɛcɔ́ pʉɔ-Kɛlístɔ tɛ ńzɑ́ɑ pi pɔ́p ŋ́kɑɑ mɔ́ wɑ́ɑ jʉ́ɔ.

²Mɔ ŋ́ɡɛ pɔ́Ꞌɔ, nɛlɔk ńníꞋ tʉ́m yɔ́p, ŋkɔŋɛ tɛmtɛ wɔ́p, mbɑ pɑ́Ꞌ pɔ́p ɡʉ niitɛ ńjí nu yi ɛ́ nǔu Kɛlístɔ, ɛ́fú nǔu ńjí ntsɛm-Sɛ́, yîyɑ́ ntsɛm pɔ́ pɔ kwɑꞋ jʉ́ Kɛlístɔ.

³FuꞋ-jínu tsʉʉ, mbɑ yi kwɑŋɛ nu tsʉʉ tɛmtɛ ńcúꞋlɛ ńdʉɔmɛ pɔ nǔu Kɛlístɔ.

⁴Ɛ sẅíi wʉ́ʉ nɛ́ mɔnɛ mɛnu ḿbɔ́k wɛcɔ́ ŋu nɛtɔ́ ńdɔk sẅiŋɛ yi pɛ́ nɑ́ŋnɛ sɛ́ ńniitɛ, ɛ́shɔt tú yʉ́ʉ.

⁵N zɛɛ ḿbɔ́ pɔ ŋɡɑ sɛsɑ, lɑ́ kwɑŋɛ yɑ́ɑ tʉ́ʉ pɔ nǔu pʉʉ. Mɔ sɛ́ ńtsɑ́ɑtɛ mbíꞋŋɡɔ n jí ŋɡɔ pʉʉ sɛ́ ńniitɛ mɛnu mʉ́ʉ sʉ́Ꞌnɛ, ḿbɛn ŋ́kúꞋlɛ nu-Kɛlístɔ tɛ ɛ́ tɛn.

⁶Pɑ́Ꞌ pʉʉ kɑ pɛ́m mɔ́ ŋɡɔ Yɛ́su Kɛlístɔ Tsɑpʉɔ wʉ́ʉ lɑ́, ɛ́ sɛ́ ḿbíkŋɛ ŋɡɔ wʉ́ʉ nɛnɑ́ŋ pɔ́ pɑ́Ꞌ ɑ sɛ́ ŋ́kɔŋ.

⁷Pʉʉ niitɛ ńdɑt nɛŋɑŋ nʉ́ʉ pɔ nǔu wɛ́, ńtík yʉ́ʉ luk pɔ nǔu wɛ́ pɑ́Ꞌ pɛ́ tíknɛ ndɑ́ nǔu cʉ́ lɑ́, ḿbɔ́ ŋ́kẅiꞋ ńzɑ́p tʉ́m nǔu wɛ́ sʉ́Ꞌnɛ, pɔ pɑ́Ꞌ pɛ́ kɑ zíꞋnɛ wʉ́ʉ. Pʉʉ pɔ́ ŋ́ɡɑ́ pɑ́Ꞌlɑ́ mbɔ̌ Sɛ́ kwɑꞋ sʉ́Ꞌnɛ.

⁸Pʉʉ pɑ́ɑ ŋu nɛlɔk jínu-pʉɔmɛsɔŋ yi ɛ́ pɔ́ pɔ fɑ́k fɛ̌ɛ, ɛ́fúklɛ wʉ́ʉ, pʉʉ vu nǔu ɡwɑk yɛ́. Yîyɑ́ pɔ́ pɔ cɔtnu yi ɛ́ jʉ́ɔꞋnɛ nǔu nɔŋ-pʉɔmɛsɔŋ, ḿbɛn ńjʉ́ɔꞋnɛ nǔu mɛtʉʉ mɛntɛ́ mɛntɛ́ mi ɛ́ ndǔmbí, ɛ́ kɑ́ jʉ́ɔꞋnɛ nǔu Kɛlístɔ pɔ́.

⁹MbíꞋŋɡɔ kʉ̈ɔ́ lɑ́ yi ɛ́ nǔu Sɛ́ ɔɔ, pɛ́ jʉ́ɔ nǔu Kɛlístɔ.

¹⁰Pʉʉ pɛ́ Kɛlístɔ tɛmtɛ, Sɛ́ fú nǔu ŋ́ɡɑ́ yʉ́ʉ fuꞋ ntɛ́ nɛ́ ntɛ́. Kɛlístɔ ɛ̂wɑ́ lɛɛ mbɑ kʉ̈ɔ́ lɑ́ yi ɛ́ ɡẅɛɛnɛ tʉʉ, ḿbɛn ḿbɔ́ ɛ́sɑ́Ꞌ mbí.

¹¹Pʉʉ pɛ Kɛlístɔ kɑ pɔ́ tɛ ńtɛmtɛ, Sɛ́ ɡɛ lii nǔu pʉʉ. Ɛ́ pɔ́ yi ɛ́ nyɛtnɛ ŋɡɔ pʉʉ pʉɔ pɛ́. A kɑ pɔ́ yɛcɔ́ ŋkɑ́ ńcú mbɔ̌ pɑyúdɑ ŋɡɔ pɔ́p ɡɛ pɛ́ púꞋ[1] wɔ́p, ɛ́ pɔ́ lii, lɑ́ ɛ́ kɛ́ ŋ́ɡʉ nǔu pʉʉ, mbɔ lii yi ɑ ɡɛnɛ nǔu pʉʉ, ɛ́ kɑ́ pɔ́ ɛ́fú mbɔ̌ pʉɔmɛsɔŋ pɔ́, ɛ́ fú pɔ mbɔ̌ Kɛlístɔ. Ńdɔk ńcẅɛɛtɛ nu kɛpɔŋ yi ɛ́ ḿbɔ́nɛ mbʉʉ pʉʉ.

¹²Ɛ́ kɑ pɔ́ ŋkɑ́ yi pɛ́ kɑ nuꞋnɛ wʉ́ʉ tsɛt ŋki, pɛ́ kɑ pɔ́ pɔ́Ꞌɔ, ńdɔk ńtɛmtɛ wʉ́ʉ pɛ́ Kɛlístɔ ńníꞋ tsɛt nɛshi, pʉʉ pɛ́ pɔ́p pɛn ńtɛmtɛ ńzẅíimɛ nǔu nɛvú, mbíꞋŋɡɔ pʉʉ pɛ́mnɛ ŋɡɔ Sɛ́ ẅí ɑ kɑ zẅíimɛ́nɛ Yɛ́su nǔu nɛvú, ɑ ɡẅɛɛ tʉʉ nɛlɔk ŋ́ɡɛ pʉʉ ńzẅíimɛ yʉ́ʉ ɡúu.

¹³Pʉʉ kɑ pɔ́ yɛcɔ́ ŋkɑ́ ḿbɔ́ mbɔ̌ Sɛ́, ḿbɔ́ pɔ pɛpfú, mbíꞋ mɛnu kɛpɔŋ mʉ́ʉ, mbɑ pɑ́Ꞌ pʉʉ kɑ pɔ́ pʉɔ pi pɛ́ kɑ púꞋnɛ wɔ́p nɛlɔk wɔ́p ŋ́ɡɛ pʉɔ-Sɛ́ lɑ́. Ɛ́ kɛ́ ḿbɔ́ nǔu ŋkɔ̂ɔnɛ, mbɔ Sɛ́ tɛmtɛ njẅɛt-Kɛlístɔ ńzẅíimɛ nǔu nɛvú. A likŋɛ mɛnu kɛpɔŋ mɛkŋɛ tsʉʉ, ŋ́ɡɑ́ mbɔ̌ pɛkŋɛ.

¹⁴A kɑ ɡwɛ́tnɛ ŋwɑꞋnɛ-nzɔ́ yɛkŋɛ pɛpɔ́p, mbɔ nɛpʉ́ʉ kɑ pɔ́ tsɛt yîyɑ́ ŋwɑꞋnɛ ḿbɔ́ ɛ́fɛn wɛkŋɛ nǔu mɛnu mi pɛkŋɛ fɑɑnɛ́nɛ, ḿbɔ́ pɛ́ cú ŋɡɔ ɑ kɑ tɛmtɛ wɔ́p Yɛ́su ŋ́kẅii nǔu tʉ́ mbɑ́ŋtɛ pɑ́ŋtɛ́nɛ, ńdɔk pɔ́Ꞌɔ, ḿbʉ́ʉpɛ ŋwɑꞋnɛ.

¹⁵Sɛ́ kɑ pɔ́ ńdɔk pɔ́Ꞌɔ, ŋ́ɡẅɛɛ mɛzẅikŋɛ kɛpɔŋ, mi ɛ́ ɡẅɛɛnɛ tʉʉ, ḿbɔ́ ɛ́sɑ́Ꞌ ndǔmbí yɔ, ńcẅɛɛtɛ mɛtʉʉ mɔ́p ḿmɛꞋ, ńtɛ́m sʉ́ʉ tú pɔ́p mbi lɑ́Ꞌ. Ɛ́ pɔ́ pɑ́Ꞌ ɑ kɑ lɔknɛ wɔ́p ŋ́ɡɛ puꞋ-ntsɔ, Kɛlístɔ lɔk wɔ́p ŋ́kɑ́t ńnɛn ńdɔk ńdɛꞋlɛ ŋɡɔ ɑ jʉ́ ntsɔ.

¹⁶N dɔk pɑ́Ꞌɑ ńcú ŋɡɔ kɔɔ pʉʉ pɛ́m ŋu ŋɑk wʉ́ʉ nǔu nu yúu kwɛ́tnɛ kɛ yi nɔ́nɛ ɔɔ, kɛ nǔu ndíinɑ-sɑŋ fí ɔɔ, kɛ nǔu mɛlɛ́Ꞌnji-Sɛ́[2] ɔɔ.

¹⁷Mîmɑ́ mɛyúu lɔk ḿbɔ́ pɔ jʉ́jʉ́ŋ-yúu mi ɛ́ sɛ́ ńtɔ́. KwɑꞋ nɛ́nẅín ɑ Kɛlístɔ.

¹⁸Pʉʉ pɑ́ɑ pɑ́Ꞌ mbɔ pɛcɔ́ pʉɔ tɔ́ ɛ́fúklɛ wʉ́ʉ pʉʉ pɛ́ tsɔ́ꞋfɑꞋ-ntsɔ yi Kɛlístɔ kɑ jʉ́nɛ ŋ́ɡɑ́ mbɔ̌ pʉʉ. N dɑꞋ pʉɔ pi pɔ́p cúnɛ ŋɡɔ pɔ́p ɡɑ́ mbʉʉ yɔp sɛ́ tɛꞋ, ḿbɔ́ pʉɔ pi pɔ́p ɡúꞋlɛ́nɛ pɛcʉ̈ɔ́Ꞌ-Sɛ́. Pɔ́p pɛn ńdɔk yúu mi pɔ́p cúnɛ ŋɡɔ Sɛ́ níɛꞋ mík mɔ́p pɔ́p jʉ́ɔ ńdɔk ŋ́ŋɑ́Ꞌtɛ níinɛ. Pîpɑ́ pʉɔ ɡẅɛɛ pɔ kwɑŋɛ-pʉɔmɛsɔŋ, ŋ́ɡɛ pɔ́p pɛ́m pɔ mɛ́m.

¹⁹Pɔ́p kɑ́ pɔ́ ŋ́kẅiꞋ ńdɑt mbʉʉ nǔu Kɛlístɔ ẅí jʉ́ pɔ́nɛ tú pɔ́. Lɑ́ mbɔ tú ɡɑ́nɛ mbɑ kʉ̈ɔ́ lɑ́ yi ɛ́ ɡʉ ńcẅɛ́lɛ́ mbɑp-mbʉʉ. Tú ɡɛnɛ mɛzuŋ-mbʉʉ mbɑ mɛŋɑŋ-mbʉʉ cúꞋlɛ ŋ́kúꞋlɛ mbɑp-mbʉʉ, ɛ́ ɡúꞋ pɑ́Ꞌ Sɛ́ sɛ́ ŋ́kɔŋ.

²⁰Pʉʉ pɛ́ Kɛlístɔ kɑ tɛmtɛ ḿpfú, ɛ́ lɔk pɔ́Ꞌɔ, ńcẅɛ́ɛ wʉ́ʉ mbɔ̌ mɛtʉʉ-nzɛnzʉ́ʉ mi ɛ́ sɑ́Ꞌnɛ mbí. Mɛlɑ́Ꞌ kʉ̈ɔ́ pɛ́ pɛn ɛ́sẅíi wʉ́ʉ ŋɡɔ yɛcɔ́ yúu ɛ́ yúu mi nji nǔu tɛ pʉʉ zẅíꞋlɛ pɑ́Ꞌ ŋkɑ́ yi pʉʉ pɔ́ pɔ pʉɔ yɔ mbí?

²¹N cú pɑ́Ꞌ pɛ́ cúnɛ ŋɡɔ kɔɔ pʉʉ jʉ́ yɛcɔ́ yúu pɛjʉ́, kɔɔ pʉʉ zẅíꞋ mbɑ zẅíꞋnɛ, kɔɔ pʉʉ zɑ́p mbɑ pɔ́ nǔu.

²²Mɔnɛ mɛndúŋ kɛ́ ḿbɔ́ pɔ nǔu yúu mi pɛ́ jʉ́nɛ ɛ́ mɛ mɛnɛ, ḿbɔ́ pɔ mɛnu mi pʉɔmɛsɔŋ nɑ́ŋnɛ sɛ́ ŋ́kwɑŋɛ ńzɑ́p.

²³Ɛ́ nɛ́nẅín mɔ mɛnu fí njʉ̈ɔ̌ ɛ́ pɔŋ tɛꞋ lɑ́, mbíꞋŋɡɔ ɛ́ píkŋɛ nɛɡúꞋlɛ Sɛ́, ŋ́ɡɑ́ mbʉʉ sɛ́, ńnyɛt mbʉʉ nɛ́ ŋɡʉ̈ɔ́Ꞌ. Lɑ́ mîmɑ́ mɛyúu mbɔ ɛ́ pɔɔ cẅɛ́lɛ́ nǔu yɛcɔ́ yúu pɔ́. Ɛ́ cẅɛ́lɛ́ pɔ ndɑꞋ nɛɡɛ yúu mi ŋumɛsɔŋ kɔŋnɛ.