Read Ngomba Kɔlɔsíyɛ̂ŋ 4 Bible Online

Kɔlɔsíyɛ̂ŋ 4 - Ngomba bible

Kɔlɔsíyɛ̂ŋ 4

¹Pʉʉ pɛtɑ́t-puꞋ, pʉʉ pɔ́ ndʉ́ŋndʉŋ mbi pɛkwɑɑ pʉ́ʉ, ḿbɛn ŋ́ɡɛ pɔ yúu mi ɛ́ píkŋɛ́nɛ ŋɡɔ pɛ́ ɡɛ, ḿbɔ́ ŋ́kẅíitɛ ŋɡɔ pʉʉ yʉ́ʉ ɡẅɛɛ wʉ́ʉ Tɑ́fɑꞋ tʉ́nɛ́pú.

²Pʉʉ kɛ́ ḿbɔ́ ḿbúꞋ mbɔ́ mbɔ̌ Sɛ́ cɛꞋlɛ́nɛ, kɔɔ pʉʉ lɛ́, pʉʉ pɔ́ ŋ́ɡɛ pɔ́Ꞌɔ, ḿbɔ́ ŋ́ɡɑ́ pɑ́Ꞌlɑ́ mbɔ̌ Sɛ́,

³ḿbɛn ḿbɔ́ ḿbúꞋ mbɔ́ mbɔ̌ Sɛ́ nǔu yɛ́k tú, nǔu ntɛ́ yi pɛk ńdɔk ɛ́sẅíi nu yɛ́. Ɛ́ fu pɔ́Ꞌɔ, ŋ kyɛ́Ꞌtɛ nu-Kɛlístɔ yi ɛ́ kɑ zɛɛ ńdʉ̈ɔmɛ mík-pʉɔ lʉɔmɛ́nɛ, mɔ ndɑ́tsɑ́ŋ pɑ́Ꞌɑ mbíꞋ pɔ yɛ́tɛ́.

⁴Pʉʉ tsuŋ ḿbúꞋ mbɔ́ mbɔ̌ Sɛ́ ńjí ŋɡɔ ŋ ɡʉ ɛ́sɑ́ɑnɛ sɑ́ɑnɛ́nɛ ńcú nu yɛ́ pɑ́Ꞌ ɛ́ sɛ́ ḿbíkŋɛ ŋɡɔ n cú.

⁵Ɛ́ ɡʉ nǔu pʉɔ pi pɔ́p kɑ́ pɔ́ pʉɔ-Kɛlístɔ pɔ́, pʉʉ jí ntɛ́ yi pʉʉ ɡʉ ńdɔk ńnɑ́ŋ tsɛtsɛt pɔ́p. Sɛ́ ɡɑ́ ndúŋ nɛcẅi Ŋkʉʉ Sʉ́Ꞌnɛ mbɔ̌ pɔ́p, kɔɔ pʉʉ pɛ́m yîyɑ́ ŋkɑ́ lɛɛ.

⁶Pʉʉ pɔ́ ŋkɑ́ tsʉʉ ŋ́ɡẅɛɛ pɔ ntsu-ŋɡwɑ́ŋ, ńcú pɔ nu yi ɛ́ ɡʉ ńcẅɛ́lɛ́, ńtsɔ́Ꞌ nu mbɔ̌ ŋu pɔ pɑ́Ꞌ ɛ́ zɛɛ ḿbɔŋ ŋɡɔ pɛ́ tsɔ́Ꞌ.

⁷Tʉʉndɛn mɔ́ɔmɑ́ wɛkŋɛ Tishik, ẅí pɛkŋɛ pɛpɔ́p tɛmtɛnɛ ɛ́fɑꞋ mbɔ̌ Tsɑpʉɔ ɡʉ ńtɔ́ ɛ́sẅíi wʉ́ʉ pɑ́Ꞌ mɔ zɑꞋnɛ ńnɑ́ŋ pɔ́Ꞌɔ. A ŋɡɑŋfɑꞋ tɛꞋ, ɑ jí pɔ nu-Tsɑpʉɔ.

⁸N tsuŋ ńtúu wɛ́ ŋɡɔ ɑ tɔ́ ɛ́sẅíi wʉ́ʉ pɑ́Ꞌ pɛk lɔknɛ ńnɑ́ŋ zɑꞋnɛ pɔ́Ꞌɔ, ḿbɛn ńtɔ́ ńníꞋ mɛtʉʉ mʉ́ʉ.

⁹Tishik pɔ́p Ɔnɛzim ɡʉ ŋ́ɡɛ ńtɔ́. Ɔnɛzim ɑ wɛcɔ́ tɑ́Ꞌ ŋu wʉʉ, ḿbɔ́ tʉʉndɛn mɔ́ɔmɑ́ wɛkŋɛ, ńjí yɛ́ pɔ ndɑꞋ nu-Tsɑpʉɔ. Pɔ́p ɡʉ ńtɔ́, ɛ́sẅíi wʉ́ʉ mbɑ kʉ̈ɔ́ lɑ́ yi ɛ́ sɛ́ ńdɛɛtɛ zɑꞋnɛ.

¹⁰Alistɑk ẅí pɛknɛ tɛmtɛ́nɛ ḿbɔ́ ndɑ́tsɑ́ŋ cɛꞋlɛ wʉ́ʉ. Mɑ́lɛ́kúshi ẅí ɑ mɔ́ɔmɑ́-Pɑnɛpɑ́ɑshi pɛn ḿbúꞋ mbɔ́ mbɔ̌ pʉʉ ɡúu. Ŋ kɑ zɛɛ ŋ́kẅíi wɛ́ mbɔ̌ pʉʉ. A lɑɑ ŋ́kúu zɑ́Ꞌɑ, pʉʉ kúkŋɛ wɛ́ sʉ́Ꞌnɛ.

¹¹Yɛ́su ẅí pɛ́ pɛnnɛ ɛ́fúŋ wɛ́ ŋɡɔ Jẅistẅis cɛꞋlɛ wʉ́ʉ ɡúu. Ɛ́ ɡʉ tsɛtsɛt pɑyúdɑ pi pɔ́p kɑ pɛ́mnɛ nu-Kɛlístɔ, ɑ ndɑꞋ pɔ́p pɔnɛ pɛtɑ́t pi pɛk pɛpɔ́p zɑꞋnɛ, ɛ́fɑꞋ mbíꞋ nu-nɛfɔɔ-Sɛ́. Pɔ́p kɑ pɔ́ ńníꞋ tʉ́m yɑ́ɑ.

¹²Ɛpɑfɑlɑs ẅí ɑ ŋu lɑ́Ꞌ wʉʉ, cɛꞋlɛ wʉ́ʉ. Yɔ ŋu ẅí ɑ fɑꞋnɛ fɑꞋ-Yɛ́su Kɛlístɔ, ńnɑ́ŋ ŋɡɔŋ ŋkɑ́ tsʉʉ ḿbɔ́ ńdɔk nɛcɛꞋlɛ Sɛ́, ḿmɑꞋ ntsɔ nǔu tú yʉ́ʉ. A ɡɛ pɔ́Ꞌɔ, nɛpɔ́ yi pʉʉ ɡʉ tɛntɛ nǔu nu-Yɛ́su, yɛcɔ́ yúu pɔɔ pɛn ńjɑ́k nǔu pʉʉ pɔ́, pʉʉ ńnɑ́ŋ ŋɡɔŋ ŋkɑ́ tsʉʉ, ḿbɛ́m pɔ nɛɡɛ yúu mi Sɛ́ sɛ́ ŋ́kɔŋ ŋɡɔ pʉʉ ɡɛ.

¹³N dɔk mík mɑ́ɑ ńjʉ́ɔ pɑ́Ꞌ ɑ jʉ́ɔnɛ ŋɡʉ̈ɔ́Ꞌ, ɛ́fɑꞋ mbíꞋ wʉ́ʉ, ɛ́fɑꞋ mbíꞋ mbɑ pʉɔ-Sɛ́ pi pɔ́p Lɑɔdisɛ́ mbɑ pi pɔ́p Hiyɛlɑpɔlîs.

¹⁴Súu wɛkŋɛ Lúkɑ́shi, ndɔ́ktɑ ɡwɛ́, mbɑ Ndɛmɑs cɛꞋlɛ wʉ́ʉ.

¹⁵Pʉʉ cɛꞋlɛ pɔ́ɔpɛ́mɑ́ pi pɔ́p tʉ́sɔŋ-Lɑwɔdisɛ̂, ńcɛꞋlɛ Nimfɑ mbɑ cúꞋlɛ-pʉɔ-Kɛlístɔ yi ɛ́ ndɑ́ yɛ́.

¹⁶Pʉʉ ɡʉ ɛ́fúŋ yɔ ŋwɑꞋnɛ tɛ ɛ́ mɛ, ńdɔɔ shʉ́ ńtúu ŋ́ɡɑ́ mbɔ̌ pʉɔ-Kɛlístɔ pi pɔ́p Lɑɔdisɛ́, pɔ́p fúŋ yɔ́p. Yi ŋwɑꞋnɛ n túunɛ, pɔ́p ŋ́ɡɑ́ pʉʉ pɛn ɛ́fúŋ yʉ́ʉ.

¹⁷Pʉʉ cú mbɔ̌ Alɛshipɛ ŋɡɔ, kɔɔ ɑ lɔk fɑꞋ yi Tsɑpʉɔ kɑ ɡɑ́nɛ mbɔ̌ wɛ́ ŋ́ɡɛ mɛɡɑɑ, ŋɡɔ ɑ fɑꞋ sʉ́Ꞌnɛ.

¹⁸Pʉʉ jʉ́ɔ cɛꞋlɛ yi mɔ Pɔ̂l, n dɔknɛ kwɑꞋ pɔ́ yɑ́ɑ ŋ́ŋwɑꞋnɛ. Kɔɔ pʉʉ likŋɛ ŋɡɔ mɔ ndɑ́tsɑ́ŋ. Mbɔtnɛ-Sɛ́ pɔ́ nɛ́ pʉʉ pɛtsʉʉ!