Read Ngomba 1 Tɛsɑlɔník 1 Bible Online

1 Tɛsɑlɔník 1 - Ngomba bible

1 Tɛsɑlɔník 1

¹Mɔ Pɔ̂l, ŋ ŋwɑꞋnɛ yɔ ŋwɑꞋnɛ nǔu lík yɛ́k pɛ Silɑ́s mbɑ Timɔtɛ̂ɛ, ŋ́ɡɑ́ mbɔ̌ pʉɔ-cúꞋlɛ-Kɛlístɔ, pi pɔ́p Tɛsɑlɔnik, ḿbɔ́ pʉɔ-tɑ̌ɑ Sɛ́ Lɑ́, ḿbɛn ḿbɔ́ pʉɔ-Ndɛ Yɛ́su Kɛlístɔ. Sɛ́ pɔ́ ḿbɔ́ nɛ́ pʉʉ, ḿbɔ́ ŋ́ɡɑ́ fuꞋ níinɛ ḿbɛn ḿbɔ́ ńníꞋ mɔ́fíitɛ tʉ́m pʉʉ.

²Pɛk sɛ́ ŋ́ɡɑ́ pɑ́Ꞌlɑ́ mbɔ̌ Sɛ́ ŋkɑ́ tsʉʉ ntɛ́ wʉ́ʉ, ḿbɛn ḿbɔ́ ḿbúꞋ mbɔ́ mbɔ̌ Sɛ́ ŋkɑ́ kʉ̈ɔ́ lɑ́, ŋ́kwɑŋɛ wʉ́ʉ kwɑŋɛ́nɛ.

³Pɛk sɛ́ ḿbúꞋ mbɔ́ mbɔ̌ Tɑ̌ɑ wɛkŋɛ Sɛ́ ŋkɑ́ kʉ̈ɔ́ lɑ́, ŋ́kẅíitɛ pɑ́Ꞌ pʉʉ lɔknɛ pɑ́Ꞌ pʉʉ zɑ́pnɛ tʉ́m nǔu Yɛ́su ɛ́fɑꞋ mɛfɑꞋ, ŋ́kẅíitɛ ntɛ́ fɑꞋ yi pʉʉ lɔknɛ ŋkɔŋɛ ɛ́fɑꞋ, ḿbɛn ŋ́kẅíitɛ pɑ́Ꞌ pʉʉ sɛ́ ńzẅíꞋlɛ Tsɑpʉɔ Yɛ́su Kɛlístɔ kɛ́ kɑ́ɑ.

⁴Pɔ́ɔpɛ́mɑ́ pɛ́k, pɛk sɛ́ ńjí ŋɡɔ Sɛ́ kɔŋ wʉ́ʉ, mbɔ ɑ kɑ tsɔ́Ꞌ wʉ́ʉ ńdɔk ŋ́ɡɛ pʉɔ pɛ́.

⁵MbíꞋŋɡɔ pɛk ŋ́kɑɑ lɔk pɔ sẅiŋɛ ndɑꞋ ńcẅi Ŋkʉʉ Sʉ́Ꞌnɛ lɑ́Ꞌ pʉʉ pɔ́, pɛk kɑ lɔk pɔ mɛtʉʉ-Zẅikŋɛ Lɛ́ɛnɛ́nɛ, ḿbɛn ḿbɔ́ ńtsuŋ ńjí ŋɡɔ Ŋkʉʉ ẅi pɛk ḿbɔ́ ńcẅi kɑ pɔ́ nɛ́nẅín, pʉʉ sɛ́ ńjí yúu mi pɛk kɑ ɡɛnɛ ŋkɑ́ yi pɛk kɑ pɔ́nɛ tsɛtsɛt pʉʉ, ɛ́ kɑ pɔ́ pɔ nɛlɔk ńcẅɛ́lɛ wʉ́ʉ.

⁶Pʉʉ kɑ pɛ́ɛ fʉꞋ nǔu pɛk, mbɑ nǔu Tsɑpʉɔ. Pɛ́ zɛɛ ḿbɔ́ ńnyɛt wʉ́ʉ nɛ́ ŋɡʉ̈ɔ́Ꞌ tɛꞋ lɑ́, pʉʉ lɔk tsɑ́ɑtɛ yí ɛ́ fúnɛ mbɔ̌ Zẅikŋɛ Lɛ́ɛnɛ́nɛ, ḿbɛ́m sẅiŋɛ-tsɑpʉɔ.

⁷Pɔ́Ꞌɔ, pɑpɛ́m sẅiŋɛ-sɛ́ pi pɔ́p Mɑsɛndwɑn mbɑ Akɑ̂y pɛ́ɛ fʉꞋ nǔu pʉʉ.

⁸Sẅiŋɛ-tsɑpʉɔ kɑ zɛɛ ɛ́fú pɔ tsɛtsɛt pʉʉ, ńjʉ́ pɑk-ŋɡɔŋ-Mɑsɛndwɑn mbɑ yɛ́ Akɑ̂y. Lɑ́ pɛ́ kɛ́ ḿbɔ́ zʉꞋ tsʉʉ ńjí ntɛ́ yi pʉʉ lɔknɛ ńzɑ́p tʉ́m nǔu Sɛ́, tɛ ḿbɔ́ pɛk pɔɔ pɛn ɛ́sẅíi ŋu sẅíinɛ pɔ́.

⁹Pɛ́ nɑ́ŋ ɛ́sẅíi ntɛ́ yi pʉʉ kɑ lɔknɛ ńcẅɛ́ɛ wɛ́k, ŋkɑ́ yi pɛk kɑ tɔ́nɛ tsɛtsɛt pʉʉ, mbɑ ntɛ́ yi pʉʉ kɑ lɔknɛ ńtɛ́m ŋkwɛn nǔu yúu mi pɛ́ ɡúꞋlɛnɛ ŋɡɔ ɛ́ mɛsɛ́, ɛ́shɔtnɛ ńdíŋɛ Sɛ́ kɛ́ kúp sẅiŋɛ, ńtsʉ́Ꞌ ɛ́fɑꞋ pɔ mbɔ̌ wɛ́ ẅi ɑ ntʉʉ.

¹⁰Pɔ́Ꞌɔ, ńtsʉ́Ꞌ ńzẅíꞋlɛ pɔ ŋɡɔ Mɔ́ɔ nɛ fú tʉ́nɛ́pú ńtɔ́, Mɔ́ɔ nɛ ɛ̂wɑ́ Yɛ́su, mbɔ Sɛ́ kɑ zẅíimɛ wɛ́ nǔu nɛvú. Jʉ́ sɛ́ nɛ mbɑ́ɑ wɛkŋɛ nǔu zɑ́ŋlɔ́ŋ-Sɛ́ yi ɛ́ sɛ́ ńtɔ́.