Read Ngomba 1 Tɛsɑlɔník 5 Bible Online

1 Tɛsɑlɔník 5 - Ngomba bible

1 Tɛsɑlɔník 5

¹Pɔ́ɔpɛ́mɑ́, yɛcɔ́ nu yi pɛk ɡʉ ḿbɛn ŋ́ŋwɑꞋnɛ mbɔ̌ pʉʉ nɛlɔk ɛ́sẅíi wʉ́ʉ nɛ́ lɛ́Ꞌ kɛ pɔ ŋkɑ́Ꞌ yi mɔnɛ mɛnu ɡʉ ńdɑ́Ꞌ ńdɛɛtɛ kɑ́ pɔ́ ɡú pɔ́,

²ɛ́ mbíꞋŋɡɔ pʉʉ sɛ́ ńtsuŋ ńjí yʉ́ʉ ŋɡɔ lɛ́Ꞌlɑ́Ꞌ-Tsɑpʉɔ ɡʉ ńdɑ́Ꞌ ḿvukŋɛ vukŋɛ́nɛ ńtɔ́ pɑ́Ꞌ ntsɔ́ŋ ẅi ɑ tɔ́nɛ nɛtúꞋ lɑ́.

³Pʉɔmɛ́sɔŋ ɡʉ ńdɑ́Ꞌ ḿbɔ́ tɛ ḿbɔ́ ńcú ŋɡɔ: Mbɔ́tnɛ tsɛt lɑ́Ꞌ, pɔ́p pɔɔ pɛn ḿbɔ́ ńcʉ̈ɔꞋ pɔ́, lɑ́ mɑ́mɑ́ ŋɡʉ̈ɔ́Ꞌ ɡɔ́ɔ ŋ́kɛ́ ńtɔ́ nǔu pɔ́p pɑ́Ꞌ mɔ́ɔ nɑŋnɛ tɛ ńnɛ́m mɑŋɡɛ́ shǔutɛ lɑ́. Ŋu wɔp pɔɔ lʉ́ɔꞋlɛ tɛ ńduk pɔ́.

⁴Lɑ́ ŋ́ɡʉ nǔu pʉʉ pɔ́ɔpɛ́mɑ́, mbɔ pʉʉ kɑ́ pɛ́t ḿbɔ́ pɔ tsɛt nzɛ́nzʉ́ʉ pɔ́, nǔu ntɛ́ yi yîyɑ́ lɛ́Ꞌlɑ́Ꞌ ɡʉ ńtɔ́ nǔu pʉʉ pɔ pɑ́Ꞌ ntsɔ́ŋ pɔ́.

⁵Pʉʉ pɛtsʉʉ zɛɛ ḿbɔ́ pɔ pʉɔ pi pɔ́p nɛnnɛ nǔu zʉꞋ yi ɛ́ yi kyɛꞋnɛ, ḿbɔ́ pʉɔ pi pɔ́p nɛnnɛ pɔ nɛnɛm. Pɛkŋɛ kɑ́ pɔ́ pʉɔ pi pɔ́p nɛnnɛ nɛtúꞋ pɔ́, ŋ́kɛ́ ḿbɔɔ pɔ́ pʉɔ pi pɔ́p nɛnnɛ nɛ́ nzɛ́nzʉ́ʉ pɔ́.

⁶Pɔ́Ꞌɔ lɑ́, kɔɔ pɛkŋɛ lɛ́ pɑ́Ꞌ pɛcɔ́ pʉɔ. Lɑ́ pɛkŋɛ ɡuutɛ mbʉʉ yɛkŋɛ ńtík mɛtúutɛ́.

⁷Pɑlɛ́ fɛlɔ́k lɛ́ nɛtúꞋ, Pɑnɔ́ mɛluꞋ tɛ ḿbɑ́ nɔ́ pɔ nɛtúꞋ.

⁸Lɑ́ ŋ́ɡʉ nǔu pɛkŋɛ pi pɛkŋɛ nɛnnɛ nɛnɛm, mbɔ ɛ́ sɛ́ ḿbíkŋɛ ŋɡɔ pɛkŋɛ ɡuutɛ mbʉʉ yɛkŋɛ, ŋkɔŋɛ mbɑ nɛzɑ́p tʉ́m nǔu Sɛ́ pɔ́ yɛkŋɛ ndẅí-ntsɔ yi pɛ́ lɔknɛ tʉ́n ńniitɛ. NɛzẅíꞋlɛ lɛ́Ꞌ yi Sɛ́ ɡʉ ŋ́ɡɛ pɛkŋɛ luk, ɛ́ pɔ́ yɛkŋɛ cɔꞋ-ntsɔ yi pɛ́ lɔknɛ tʉ́n ńniitɛ.

⁹Sɛ́ ŋkɑɑ zɛɛ ńtsɔ́Ꞌ wɛkŋɛ pɔ nɛzɑ́ŋ lɔ́ŋ nǔu pɛkŋɛ, pɛkŋɛ jʉ́ɔ ŋɡʉ̈ɔ́Ꞌ pɔ́, ɑ kɑ tsɔ́Ꞌ wɛkŋɛ pɔ nɛɡɛ pɛkŋɛ lɛɛ nzʉʉ Tsɑpʉɔ wɛkŋɛ Yɛ́su Kɛlístɔ ŋ́ɡẅɛɛ luk.

¹⁰A kɑ pfú nǔu tú yɛ́kŋɛ, nɛpɔ́ yi pɛkŋɛ lɑɑ ńzɛɛ ḿpfú mbɑ pfúnɛ, kɛ ḿbɛ́t pɔ ntʉʉ ɔɔ, mbɔ pɛkŋɛ pɛ́pɔ́p zɛɛnɛ ḿbɔ́.

¹¹Pɔ́Ꞌɔ lɑ́, pʉʉ níꞋ mɛtʉʉ mʉ́ʉ pʉʉ nɛ́ pʉʉ, ŋu tɔ́ɔtɛ ŋu, ŋu tɔ́ɔtɛ ŋu, pɑ́Ꞌ pʉʉ sɛ́ ŋ́ɡɛ lɑ́.

¹²Pɔ́ɔpɛ́mɑ́, pɛk púꞋ mbɔ́ mbɔ̌ pʉʉ ŋɡɔ pʉʉ ɡɑ́ mɛkuꞋ mbɔ̌ pʉɔ pi pɔ́p fɑꞋnɛ fɑꞋ-Sɛ́ tsɛtsɛt pʉʉ, mbɔ̌ pʉɔ pi Tsɑpʉɔ kɑ tíknɛ wɔ́p mbi pʉʉ ŋɡɔ pɔ́p tʉ̈ɔ́Ꞌlɛ wʉ́ʉ.

¹³Pʉʉ ɡɛ mɛkuꞋ mɔ́p sʉ́Ꞌnɛ, ŋ́kɔŋ wɔ́p tɛꞋ, ntɛ́ túfɑꞋ yi pɔ́p nǔu, ḿbɑ́ɑ cʉ́ɔk tsɛtsɛt pʉʉ.

¹⁴Pɔ́ɔpɛ́mɑ́, pɛk sɛ́ ḿbúꞋ mbɔ́ mbɔ̌ pʉʉ ŋɡɔ pʉʉ ɡɑ́ ntík mbɔ̌ pɛlɔ́ŋ, ńní mɛtʉʉ-pʉɔ pi pɔ́p kɑ́ ɡẅɛɛ mbɔŋyúu pɔ́, ńtɔ́ɔtɛ pʉɔ pi pɔ́p pɛ́t pɔ kɛ́ tɛntɛ, ŋ́ɡẅɛɛ pɔ kɔkmbʉʉ nzʉʉ mbɑ wɔ̌ lɑ́.

¹⁵Pʉʉ pɑ́ɑ nɛlɔk nu kɛpɔŋ ḿbɑꞋ nu kɛpɔŋ. Pʉʉ ɡɛ pɔ nu sʉ́Ꞌnɛ tsɛtsɛt pʉʉ kɛ́ tɔŋ.

¹⁶Pʉʉ pɔ́ ńtsɑ́ɑtɛ tsɑ́ɑtɛ́nɛ ŋkɑ́ tsʉʉ.

¹⁷Pʉʉ pɔ́ ḿbúꞋ mbɔ́ mbɔ̌ Sɛ́ ŋkɑ́ tsʉʉ,

¹⁸ḿbɔ́ ŋ́ɡɑ́ pɑ́Ꞌlɑ́ mbɔ̌ wɛ́ nǔu kʉ̈ɔ́ lɑ́. Ɛ́ yúu mi Sɛ́ kɔŋnɛ ŋɡɔ pʉʉ pi pʉʉ pɛ́ Yɛ́su Kɛlístɔ kɑ tsʉ́Ꞌ mɔ́ tɑ́Ꞌ ŋu lɑ́, pɔ́ ŋ́ɡɛ.

¹⁹Kɔɔ pʉʉ tɔꞋ Zẅikŋɛ-Sɛ́ nɛfɑꞋ fɑꞋ yɛ́.

²⁰Kɔɔ pʉʉ ɡwɑ́k sẅiŋɛ-pʉɔ pi pɔ́p nɑ́ŋnɛ ńcẅi Ŋkʉʉ ẅí ɛ́ fúnɛ mbɔ̌ Sɛ́,

²¹ŋ́ɡʉ nǔu kʉ̈ɔ́ lɑ́, ńtsɑꞋ ḿbɛ́ɛ pɔ yɛ sʉ́Ꞌnɛ,

²²mbuu ŋ́kʉɔ nu kɛpɔŋ tsʉʉ.

²³Pɛk sɛ́ ńdɔ́ɔ ŋɡɔ Sɛ́ nɛ́ tú yɛ́, ẅi ɑ Sɛ́-mbɔ́tnɛ, ɑ ɡɛ pʉʉ pɔ́ pʉɔ pɛ́ tɛ ńdẅiklɛ, ŋɡɔ ɑ pyɛ́p zẅikŋɛ yʉ́ʉ, ḿbyɛ́p tʉ́m yʉ́ʉ, ḿbyɛ́p mbʉʉ yʉʉ, ɛ́ ɡɛ ḿbɔ́ lɛ́Ꞌ yi Tsɑpʉɔ wɛkŋɛ Yɛ́su Kɛlístɔ ɡʉ ŋ́ɡɛ ńtɔ́, pʉʉ pɔ́ kɛ́ sɑ̌ɑ lɔ́Ꞌ nǔu pʉʉ.

²⁴Sɛ́ ẅi ɑ kɑ tsɔ́Ꞌnɛ wʉ́ʉ pʉʉ tsʉ́Ꞌ pʉɔ pɛ́ ɡʉ ŋ́ɡɛ ɛ́ pɔ́ pɔ́Ꞌɔ, mbíꞋŋɡɔ ɑ kɑ́ kúpmɛ.

²⁵Pɔ́ɔpɛ́mɑ́, pʉʉ púꞋ mbɔ́ mbɔ̌ Sɛ́ mbɑ nǔu yɛ́k tú.

²⁶Pʉʉ cɛꞋlɛ pɔ́ɔpɛ́mɑ́ tsʉʉ, ńtsʉ́Ꞌ nɛcɛꞋlɛ ḿmɑɑ mɛmbʉʉ mʉ́ʉ nǔu ntɛ́ yɛ́ pʉɔ-Sɛ́.

²⁷Nǔu lík-Tsɑpʉɔ, n cú mbɔ̌ pʉʉ ŋɡɔ pʉʉ fúŋ yɔ ŋwɑꞋnɛ mbi pʉɔ-Sɛ́ tsʉʉ.

²⁸Mbɔ́tnɛ-Tsɑpʉɔ wɛkŋɛ Yɛ́su Kɛlístɔ pɔ́ ḿbɔ́ nɛ́ pʉʉ.