Read Ngomba 2 Tɛsɑlɔník 1 Bible Online

2 Tɛsɑlɔník 1 - Ngomba bible

2 Tɛsɑlɔník 1

¹Mɔ Pɔ̂l, ŋ ŋwɑꞋnɛ yɔ ŋwɑꞋnɛ nǔu lík yɛ́k pɛ Silɑ́s mbɑ Timɔtɛ̂ɛ, ŋ́ɡɑ́ mbɔ̌ pʉɔ-cúꞋlɛ-Kɛlístɔ, pi pɔ́p Tɛsɑlɔnik, ḿbɔ́ pʉɔ-tɑ̌ɑ Sɛ́ Lɑ́, ḿbɛn ḿbɔ́ pʉɔ-Ndɛ Yɛ́su Kɛlístɔ.

²Sɛ́ pɔ́ ḿbɔ́ nɛ́ pʉʉ, ḿbɔ́ ŋ́ɡɑ́ fuꞋ níinɛ ḿbɛn ḿbɔ́ ńníꞋ mɔ́fíitɛ tʉ́m pʉʉ.

³Pɔ́ɔpɛ́mɑ́, pɛk ɡẅɛɛ nɛɡɑ́ pɑ́Ꞌlɑ́ mbɔ̌ Sɛ́ nǔu tú yʉ́ʉ ŋɡɔŋ ŋkɑ́ tsʉʉ. Ɛ́ pɔŋ ŋɡɔ pɛ́ ɡɛ pɔ́Ꞌɔ, mbíꞋŋɡɔ pʉʉ kɑ́ pɔ́ ŋ́kɑ́ɑ nɛzɑ́p tʉ́m nǔu wɛ́ pɔ́, ḿbɛn ḿbɔ́ ŋ́ɡẅɛɛ ŋkɔŋɛ tsɛtsɛt pʉʉ ńdɔk ŋ́ɡʉ pɔ nɛ́ mbi.

⁴Ɛ́ lɛɛ pɔ́Ꞌɔ, lɑ pɛk ɡɔ́ ŋ́kẅíi lík yʉ́ʉ tsɛt mɛcɔ́ mɛcúꞋlɛ-pʉɔ-Sɛ́, ŋ́kẅíi pɔ nɛ́ kɑꞋmɛ, mbíꞋŋɡɔ pʉɔ sɛ́ ńnyɛt wʉ́ʉ nɛ́ ŋɡʉ̈ɔ́Ꞌ, ḿbɔ́ ŋ́kʉ́ʉnɛ wʉ́ʉ, pʉʉ kɛ́ mbɔɔ cúꞋlɛ kʉ̈ɔ́, pʉʉ kɛ́ ɛ́sʉk sʉknɛ, ḿbɔ́ ńzɑ́p tʉ́m yʉ́ʉ pɔ nǔu Yɛ́su Kɛlístɔ.

⁵Ɛ́ lɔk ńnyɛt ŋɡɔ Sɛ́ ŋɑk ntsɑŋ pɔ ndʉ́ŋndʉŋ. MbíꞋŋɡɔ ŋɡʉ̈ɔ́Ꞌ yi pʉʉ sɛ́ ńjʉ́ɔ ŋkɔ̂ɔnɛ, ɛ́ ɡɛ ŋɡɔ pʉʉ kuꞋ pʉɔ pi pʉʉ ɡʉ ńdɑ́Ꞌ ŋ́kúu tsɛt nɛfɔɔ-Sɛ́. Pʉʉ jʉ́ɔ ŋɡʉ̈ɔ́Ꞌ ntɛ́ pɔ pɔ́Ꞌɔ.

⁶Pʉʉ jí sʉ́Ꞌnɛ ŋɡɔ Sɛ́ ɡʉ ńdɑ́Ꞌ ŋ́ŋɑk ntsɑŋ pɔ pɑ́Ꞌ ɛ́ sɛ́ ḿbíkŋɛ, ŋ́ɡɑ́ ŋɡʉ̈ɔ́Ꞌ mbɔ̌ pʉɔ pi pɔ́p nyɛtnɛ wʉ́ʉ nɛ́ ŋɡʉ̈ɔ́Ꞌ ŋkɔ̂ɔnɛ lɑɑ,

⁷ŋ́ɡɑ́ mɔ́fíitɛ mbɔ̌ pʉʉ pi pʉʉ sɛ́ ńjʉ́ɔ ŋɡʉ̈ɔ́Ꞌ ŋkɔ̂ɔnɛ lɑɑ, ḿbɛn ŋ́ɡɑ́ mbɑ mbɔ̌ pɛk ɡúu. Mɔnɛ mɛnu ɡʉ ńdɑ́Ꞌ ńdɛɛtɛ ŋkɑ́ yi Tsɑpʉɔ wɛkŋɛ Yɛ́su Kɛlístɔ ɡʉ ńdɑ́Ꞌ ɛ́fú tʉ́nɛ́pú ńcẅɛt, ńnyɛt mbʉʉ yɛ. Pɔ́p pɛcʉ̈ɔ́Ꞌ pɛ́ pi pɔ́p ɡẅɛɛnɛ mɛtʉʉ tɛꞋ pɔ́nɛ.

⁸A ɡʉ ńdɑ́Ꞌ ŋ́ɡɔ ńtɔ́ pɛkŋɛ jʉ́ɔ múk tʉ̈ɔ́Ꞌlɛ wɛ́ ńníꞋ sɔŋ, ɑ ɡɛ pʉɔ pi pɔ́p kɑ jí Sɛ́ pɔ́ ḿbɛn ńdʉꞋ Ŋkʉʉ Sʉ́ꞌnɛ wɛ́ jʉ́ɔ ŋɡʉ̈ɔ́Ꞌ.

⁹Ŋɡʉ̈ɔ́Ꞌ yi pɔ́p ɡʉ ńdɑ́Ꞌ jʉ́ɔ ɛ́ pɔ́ pɔ pɑ́Ꞌ pɔ́p ɡʉ ńdɑ́kŋɛ tɑ́Ꞌ ŋkɑ́, Tsɑpʉɔ wɛkŋɛ tsɛ́t ndúŋ mbɔ̌ pɔ́p tɛ pɔ́p pɔɔ sɔp lík nǔu wɛ́ pɔ́, ŋ́kɛ́ mbɔɔ jʉ́ɔ mɑ́mɑ́ nɛŋwɑ́ŋɛ wɛ pɔ́.

¹⁰Ɛ́ ɡʉ ńdɑ́Ꞌ ḿbɔ́ pɔ́Ꞌɔ, nǔu lɛ́Ꞌ yi Tsɑpʉɔ ɡʉ ńdɑ́Ꞌ ńtɔ́, ɛ́ pɔ́ nǔu yîyɑ́ lɛ́Ꞌ ɡwɛ́, pʉɔ pɛ́ pɔ́ ŋ́ɡɑ́ mɛkuꞋ mɛ́, pʉɔ pi pɔ́p zɑ́pnɛ tʉ́m nǔu wɛ́ tsʉʉ pɔ́ ŋ́ɡúꞋlɛ wɛ́. Pʉʉ pɔ́ yʉ́ʉ tsɛtsɛt pɔ́p, mbíꞋŋɡɔ pʉʉ kɑ pɛ́m nu yɛ́ yi pɛk kɑ sẅíinɛ wʉ́ʉ.

¹¹Ɛ́ yúu mi ɛ́ ɡɛnɛ lɑ pɛk pɔ́ ḿbúꞋ mbɔ́ mbɔ̌ Sɛ́ ŋkɑ́ tsʉʉ nǔu tú yʉ́ʉ, ŋɡɔ ɑ ɡɛ pʉʉ pɔ́ pʉɔ pi pʉʉ kuꞋ nɛluk pɑ́Ꞌ ɑ kɑ kɑꞋnɛ mbɔ̌ pʉʉ. Pɛk pɛn ḿbɔ́ ḿbúꞋ mbɔ́ mbɔ̌ wɛ́, ŋɡɔ ɑ lɔk mɛtʉʉ mɛ́ ńcẅɛ́lɛ wʉ́ʉ pʉʉ ɡɛ mbɑ kʉ̈ɔ́ lɑ́ nu sʉ́Ꞌnɛ pɔ́ yi pʉʉ sɛ́ ŋ́kɔŋ nɛɡɛ, mbɑ fɑꞋ yi pʉʉ sɛ́ ŋ́ɡɛ ntɛ́ pɑ́Ꞌ pʉʉ zɑ́pnɛ tʉ́m nǔu wɛ́.

¹²Ɛ́ lɛɛ pɔ́Ꞌɔ, pʉɔmɛsɔŋ ɡúꞋlɛ lík-Tsɑpʉɔ wɛkŋɛ Yɛ́su, ńdɛɛ nǔu mɑt wʉ́ʉ. Pʉɔmɛ́sɔŋ ɡúꞋlɛ wʉ́ʉ ńdɛɛ nǔu wɛ́ ɡúu. Ɛ́ ɡʉ ńdɑ́Ꞌ ḿbɔ́ pɔ́Ꞌɔ, mbíꞋŋɡɔ Sɛ́ wɛkŋɛ mbɑ Yɛ́su Kɛlístɔ sɛ́ ńdɔk pɑ́Ꞌ pɔ́p kɔŋnɛ wɛkŋɛ, ŋ́ɡɑ́ fuꞋ fɛ̌ɛ.