Read Ngomba 2 Tɛsɑlɔník 3 Bible Online

2 Tɛsɑlɔník 3 - Ngomba bible

2 Tɛsɑlɔník 3

¹Pɔ́ɔpɛ́mɑ́, nu yi pɛk ɡʉ ńdɔk ńdẅiklɛ, ɛ́ pɔ́ pɔ ŋɡɔ pʉʉ cɛꞋlɛ Sɛ́ nǔu tú yɛ́k, lɑ sẅiŋɛ-tsɑpʉɔ kẅiꞋ ɛ́sɑt zʉꞋ, ḿbɔ́ yúu-mɛkuꞋ pɑ́Ꞌ ɛ́ njɛ́Ꞌ pʉʉ ḿbɔ́ lɑ́.

²Pʉʉ pɛn ḿbúꞋ mbɔ́ mbɔ̌ Sɛ́ ŋɡɔ kɔɔ pɛk vu mbɔ̌ pʉɔ kɛpɔŋ, pi pɔ́p pɑlɔɔ mɛlɑ́Ꞌ. Pɔ́Ꞌɔ, mbíꞋŋɡɔ pʉɔ tsʉʉ kɑ́ nɛ pɛ́m nɛzɑ́p tʉ́m nǔu Sɛ́ pɔ́.

³Tsɑpʉɔ, ɑ kɛ́ ḿbɔɔ ŋ́kúpmɛ pɔ́. A ɡʉ ŋ́ɡɛ pʉʉ pɔɔ kɑ́ɑ, ḿbɛn mbɔɔ pɛ́m Sɑ́ttɑ zɑ́p pɔ́ nǔu pʉʉ pɔ́.

⁴Ɛ́ ɡʉ nǔu pʉʉ, mbɔ Tsɑpʉɔ sɛ́ ŋ́ɡɛ pɛk jí ŋɡɔ pʉʉ sɛ́ ŋ́ɡɛ yúu mi pɛk sɛ́ ńcú ŋɡɔ pʉʉ ɡɛ. Ḿbɔ́ yi pɛk lɑɑ ḿbɛn ńcú ŋɡɔ pʉʉ ɡɛ ŋɡɔ́ku ɔɔ, mbɔ pʉʉ ɡʉ ŋ́ɡɛ pɔ pɔ́Ꞌɔ.

⁵Pɛk sɛ́ ńdɔ́ɔ ŋɡɔ Tsɑpʉɔ zíꞋ wʉ́ʉ nɛkẅiꞋ ŋ́kɔŋ Sɛ́, mbɑ nɛsʉk ŋɡʉ̈ɔ́Ꞌ pɑ́Ꞌ jʉ́ Kɛlístɔ.

⁶Pɔ́ɔpɛ́mɑ́, pɛk lɔk lík-Tsɑpʉɔ Yɛ́su Kɛlístɔ, ńtsuŋ ńcú mbɔ̌ pʉʉ ŋɡɔ pʉʉ lʉ́ɔꞋ mbɑ wɛ́tɛ́ mɔ́ɔmɑ́ wʉʉ ẅi ɑ pɔ́k fɑꞋ pɔ́knɛ, ḿbɛn ŋ́kɛ́ ḿbɔɔ ḿbɔ́ ńnɛn nǔu ntɛ́ yi pɛk kɑ zíꞋnɛ wʉ́ʉ lɑ́ pɔ́.

⁷KwɑꞋ pʉʉ yʉ́ʉ sɛ́ ńjí pɑ́Ꞌ ɛ́ sɛ́ ḿbíkŋɛ ŋɡɔ pʉʉ ɡɛ pɔ́Ꞌɔ, ńdɔk ńnɛn nǔu mɛku mɛ́k, mbíꞋŋɡɔ pɛk kɑ pɔ́ tsɛtsɛt pʉʉ, ḿbɔɔ ḿbɔ́k fɑꞋ pɔ́.

⁸Pɛk ŋ́kɑɑ ńjʉ́ yúupɛjʉ́-ŋu níinɛ pɔ́, pɛk kɑ fɑꞋ tɛ ŋ́kíɛ ziꞋnɛ lɑ ńjʉ́ yúu, ɛ́fɑꞋ nɛtúꞋ mbɑ nɛnɛm ḿbɔ́k nɛtsʉ́Ꞌ pʉɔ pi pʉʉ ɡʉ ńjúk ńzẅík wɔ́p zẅíknɛ.

⁹Pɛk kɑ zɛɛ ńtsuŋ ŋ́ɡẅɛɛ nɛcú ŋɡɔ pʉʉ ńzẅík wɛ́k, lɑ́ ŋ́ɡɔ ŋ́ɡɛ pɔ́Ꞌɔ, ḿbɔ́ ńtsɑ́ɑ pɔ ŋɡɔ pʉʉ pɛ́ɛ fʉꞋ nǔu pɛk.

¹⁰Ɛ́ kɑ pɔ́ ŋkɑ́ yi pɛk kɑ zɛɛnɛ ḿbɔ́ tsɛtsɛt pʉʉ, pɛk pɔ́ ńtsuŋ ńcú mbɔ̌ pʉʉ ŋɡɔ: «Ŋu lɑɑ ḿbɔ́ yi ɑ kɛ́ fɑꞋ fɑꞋ pɔ́, kɔɔ ɑ kɛ́ ńjʉ́ yúupɛjʉ́.»

¹¹Pɛk pɛn ḿbɔ́ ńzúꞋ, pɛ́ cú ŋɡɔ pɛcɔ́ pʉɔ tsɛtsɛt pʉʉ ḿbɔ́k fɑꞋ pɔ́knɛ, ńjúk ɛ́sẅíi pɔ mɛnu mi ɛ́ kɑ́ pɔ́ ńdíŋɛ wɔ́p pɔ́.

¹²Pɛk lɔk lík-Tsɑpʉɔ Yɛ́su Kɛlístɔ ńcú mbɔ̌ pîpɑ́ pʉɔ tɛ ńdɔk ńtík wɔ́p tíknɛ ŋɡɔ pɔ́p pɔ́tnɛ ɛ́fɑ́Ꞌ fɑꞋ, ńjʉ́ yúu pɛjʉ́ pi pɔ́p fɑꞋnɛ.

¹³Ŋ́ɡʉ nǔu pʉʉ, pɔ́ɔpɛ́mɑ́, kɔɔ pʉʉ kɑ́ɑ nɛɡɛ pɔ mɛnu mi ɛ́ pɔŋnɛ.

¹⁴Ŋu lʉꞋ nɛzúꞋ nu yi pɛk cúnɛ tsɛt yɔ ŋwɑꞋnɛ lɑɑ, pʉʉ líŋɛ wɛ́ sʉ́Ꞌnɛ. Kɔɔ pʉʉ pɛpɔ́p pɛn ńtɛm nu, ńjí ŋɡɔ sʉ́ʉ ɡʉ ŋ́kɔ́ wɛ́.

¹⁵Lɑ́, ḿbɑ́ɑ wʉ́ʉ nɛlɔk wɛ́ ŋ́ɡɛ ŋɡɑŋmbuu wʉʉ. Pʉʉ kɑkŋɛ wɛ́ pɔ pɑ́Ꞌ ɛ́ lɑɑ ḿbɔ́ ŋu kɑkŋɛ mɔ́ɔmɑ́ wɛ.

¹⁶Tsɑpʉɔ ẅí ɑ níꞋnɛ mɔ́fíitɛ tʉ́m-pʉɔ, kwɑꞋ jʉ́ nɛ́ túmbʉʉ yɛ́ sɛ́ nɛ ńníꞋ mɔ́fíitɛ tʉ́m pʉʉ ŋkɑ́ tsʉʉ, nǔu mɛshʉ́ tsʉʉ. Tsɑpʉɔ pɔ́ ḿbɔ́ nɛ́ pʉʉ pɛtsʉʉ.

¹⁷KwɑꞋ mɔ Pɔ̂l, n cɛꞋlɛ wʉ́ʉ. N dɔk pɔ kwɑꞋ pɔ́ yɑ́ɑ, ŋ́ŋwɑꞋnɛ yɔ cɛꞋlɛ. Ɛ́ pɑ́Ꞌ mɔ ńzɛɛ ŋ́ŋwɑꞋnɛ nǔu yɛ́tɛ́ ŋwɑꞋnɛ lɑ́ yi mɔ ńtúu. Pʉʉ ɡʉ ńdii pɔ́-ŋwɑꞋnɛ yɑ́ɑ.

¹⁸Mbɔ́tnɛ-Tsɑpʉɔ wɛkŋɛ Yɛ́su Kɛlístɔ pɔ́ ḿbɔ́ nɛ́ pʉʉ pɛtsʉʉ.