Read Ngomba 1 Timɔtɛ́ɛ 3 Bible Online

1 Timɔtɛ́ɛ 3 - Ngomba bible

1 Timɔtɛ́ɛ 3

¹Nu yi ŋ ɡʉ ńcú ɛ́ nɛ́nẅín. Ŋu lɑɑ ḿbɔ́ ńtsɑ́ɑ nɛpɔ́ ńdíŋɛ cúꞋlɛ-pʉɔ-Kɛlístɔ, mbɔ ɑ tsɑ́ɑ fɑꞋ yi ɛ́ ɡẅɛɛnɛ mɛkuꞋ.

²Ɛ́ píkŋɛ ŋɡɔ ŋu ẅí ɑ líŋɛ́nɛ cúꞋlɛ-pʉɔ-Kɛlístɔ pɔ́ ŋu ẅí pɛ́ kɑ́ kẅíi lík yɛ́ kɛpɔŋ pɔ́. Ɛ́ píkŋɛ ŋɡɔ ɑ ɡẅɛɛ pɔ tɑ́Ꞌ mɑŋɡɛ́ wɛ́mɔ́Ꞌ, kɔɔ ɑ ɡɛ yɛcɔ́ yúu tɛ ɛ́ lɛɛ. A pɔ́ ŋu ẅí ɑ sɑ́ŋ nu lɑ ŋ́ɡɛ, ḿbɔ́ ŋu ẅí ɑ kúkŋɛ pɛɡʉʉ sʉ́Ꞌnɛ, ŋ́kuꞋ nɛzíꞋ pʉɔ nɛ́ yúu.

³Ɛ́ kɑ́ píkŋɛ ŋɡɔ ɑ pɔ́ ŋu ẅí ɑ mɑꞋnɛ mbʉʉ yɛ nǔu mɛluꞋ pɔ́, ŋɡɔ ɑ sɑ́Ꞌ mbʉꞋ pɔ́. Ɛ́ píkŋɛ ŋɡɔ ɑ pɔ́ ŋu ẅí ɑ pɔ́tnɛnɛ, ŋu ẅí ɑ kɑ́ lɔɔ fɛꞋ pɔ́. Kɔɔ ɑ pɔ́ ŋu ẅí ɑ zɑ́pnɛ tʉ́m yɛ́ nǔu ŋkɑ́p.

⁴A pɔ́ ŋu ẅí ɑ líŋɛ́nɛ njɛ́Ꞌ yɛ́ sʉ́Ꞌnɛ, ḿbɔ́ ŋu ẅí ɑ ɡẅɛɛnɛ mbɔ́ŋkʉ̈ɔ́ pɛ́ nǔu ntɛ́ yi pɔ́p ɡʉ ńzúꞋ ntsu wɛ́, ŋ́ɡɛ mɛkuꞋ mɛ́.

⁵Ŋu lɑɑ ńzɛɛ mbɔɔ jí nɛlíŋɛ njɛ́Ꞌ yɛ pɔ́, ɑ líŋɛ cúꞋlɛ-pʉɔ-Sɛ́ ŋɡɔ́ku?

⁶Ɛ́ kɑ́ pɔ́ ḿbíkŋɛ ŋɡɔ ŋu ẅí ɑ líŋɛ́nɛ cúꞋlɛ pɔ́ ŋu ẅí ɑ kɑ pɛ́t lɑ ḿbɔ́ ŋu-Kɛlístɔ pɔ́, mbɔ ḿbɔ́ ɑ tɔ́ nɛŋɑ́Ꞌlɛ mbʉʉ, ɛ́fɑɑnɛ nu, ḿvu ntsɑŋ pɑ́Ꞌ Sɑ́ttɑ.

⁷Ɛ́ pɛn ḿbɔ́ ḿbíkŋɛ ŋɡɔ ɑ pɔ́ ŋu ẅí pʉɔ pi pɔ́p kɑ́ pɔ́ pʉɔ-Kɛlístɔ pɔ́, pɔ́ kẅíi lík yɛ́ pɔ sʉ́Ꞌnɛ. Pɔ́Ꞌɔ, mɛcɔ́ mɛnu mɛ́ mi ḿbɔ́ pɛ́ kɛm sʉ́ʉ kɔ́ wɛ́ pɔɔ ɡú pɔ́, Sɑ́ttɑ pɔɔ kuꞋ nɛlʉꞋ ŋkʉ tɛ ńdɔk ŋ́ɡẅɛɛ wɛ́ pɔ́.

⁸Ɛ́ pɛn ḿbíkŋɛ ŋɡɔ pɑfɑꞋ mɛfɑꞋ tsɛt cúꞋlɛ-pʉɔ-Kɛlístɔ pɔ́ yɔ́p pʉɔ pi pɔ́p ɡẅɛɛnɛ mɛkuꞋ, ḿbɔ́ pɑsẅíi nu nɛ́nẅín, ḿbɔ́ pʉɔ pi pɔ́p kɛ́ mɑꞋ mbʉʉ yɔp nǔu mɛluꞋ pɔ́, ŋ́kɛ́ ḿbɔɔ pʉɔ pi pɔ́p kɔŋnɛ ŋkɑ́p ɡɑ́tɛ́ ɡɑ́tɛ́nɛ pɔ́.

⁹Ɛ́ píkŋɛ ŋɡɔ pɔ́p kúꞋlɛ nu nɛ́nẅín yi ɛ́ kɑ pɔ́ yi lʉɔmɛ́nɛ, Sɛ́ nyɛt wɛkŋɛ, ŋ́kúꞋlɛ nǔu ntɛ́ yi mbʉʉ yɔp kɛ́ tswɑ́ɑ wɔ́p pɔ́.

¹⁰Ɛ́ píkŋɛ ŋɡɔ pɛ́ zɛɛ ḿbiitɛ ńtsɑꞋ wɔ́p sʉ́Ꞌnɛ, ḿbɔ́ yi pɛ́ lɑɑ ḿbɔɔ lɔ́Ꞌ yɔ́p jʉ́ɔ, pɛ́ lɔk wɔ́p ŋ́ɡɛ pɑfɑꞋ tsɛt cúꞋlɛ-pʉɔ-Kɛlístɔ.

¹¹Ɛ́ pɛn ḿbíkŋɛ ŋɡɔ pɛzwɛ́ pɔ́p[1] pɛn ŋ́ɡẅɛɛ mɛkuꞋ, kɔɔ pɔ́p pɔ́ pɑzɑ́p sɔ́ɔ, kɔɔ pɔ́p ɡɛ yɛcɔ́ yúu tɛ ɛ́ lɛɛ, ḿbɔ́ pʉɔ pi ɛ́ lɑɑ ḿbɔ́ pɔ́p ɡɛ mbɑ kʉ̈ɔ́ lɑ́ yi pɛ́ níꞋnɛ mbɔ̌ pɔ́p tɛ pɛ́ pɔɔ lɔ́Ꞌ nǔu jʉ́ɔ.

¹²Ɛ́ píkŋɛ ŋɡɔ pɑfɑꞋ mɛfɑꞋ tsɛt cúꞋlɛ-pʉɔ-Kɛlístɔ ɡẅɛɛ pɔ tɑ́Ꞌ tɑ́Ꞌ mɑŋɡɛ́, ńdíŋɛ mɛnjɛ́Ꞌ mɔ́p sʉ́Ꞌnɛ, tɛ mbɑ mbɔ́ŋkʉ̈ɔ́ pɔ́p.

¹³PɑfɑꞋ mɛfɑꞋ tsɛt cúꞋlɛ-pʉɔ-Kɛlístɔ lɑɑ ɛ́fɑꞋ fɑꞋ sʉ́Ꞌnɛ, mbɔ pɛ́ ɡʉ ŋ́ɡɑ́ mɛkuꞋ mɔ́p, pɔ́p kuꞋ nɛcú nu yi pɔ́p zɑ́pnɛ tʉ́m nǔu Yɛ́su mbíꞋ yɛ́tɛ́ tɛ pɔ́p pɔɔ pɔ́k.

¹⁴Timɔtɛ̂ɛ, mɔ sɛ́ ŋ́kwɑŋɛ ŋɡɔ ŋ kɛ́ lɑ́ɑtɛ lɑ ńtɔ́ ńjʉ́ɔ wú pɔ́. Ŋ kɛ́ ŋ́ŋwɑꞋnɛ yɔ ŋwɑꞋnɛ, ŋ́ɡɑ́ mbɔ̌ ɡu pɑ́Ꞌɑ,

¹⁵nɛpɔ́ yi n dɑɑ mbɔɔ fɛ́Ꞌnɛ ńtɔ́ pɔ́, ɔ fúŋ yɔ ŋwɑꞋnɛ, ńzúꞋ pɑ́Ꞌ pʉɔ-Sɛ́ ɡẅɛɛnɛ nɛnɛn pɔ́Ꞌɔ, tsɛt cúꞋlɛ-pɔ́ɔ-Sɛ́. Yîyɑ́ cúꞋlɛ pɔ́ yi pʉɔ-Sɛ́ ẅi ɑ ntʉʉ. CúꞋlɛ ɛ̂yɑ́ tík ntɔ́ɔ nǔu nu nɛ́nẅín pɑ́Ꞌ ntɔ́ɔ-ndɑ́.

¹⁶Ɛ́ sẅíi nu ŋɡɔ nu nɛ́nẅín yi Sɛ́ kɑ ɡɛnɛ pɛkŋɛ jí, ɛ́ pɛn nyɛt wɛkŋɛ pɑ́Ꞌ ḿbɔ́ pɛkŋɛ nɛn nǔu sɛ̂ndúŋ-Sɛ́, ɛ́ ɡúꞋ tɛꞋ. Ɛ́ ŋɡɔ: Jʉ́ ẅí ɑ kɑ shɔtnɛ ńtsʉ́Ꞌ ŋumɛsɔŋ, Zẅikŋɛ Lɛ́ɛnɛ́nɛ kɑ nyɛt ŋɡɔ ɑ kɛ́ lɔ́Ꞌ. Pɛcʉ̈ɔ́Ꞌ-Sɛ́ kɑ jʉ́ɔ wɛ́. Pʉɔ kɑ ɛ́sɑ́Ꞌ nu yɛ́ tsɛtsɛt pʉɔ pi pɔ́p kɑ́ pɔ́ pɑyúdɑ pɔ́, pɛ́ zɑ́p tʉ́m nǔu wɛ́ zʉꞋ tsʉʉ ndǔmbí. Sɛ́ kɑ sɑꞋ wɛ́, ńdɔk ŋ́ɡʉ nɛ tʉ́nɛ́pú zʉꞋ-nɛɡúꞋ.