Read Ngomba 1 Timɔtɛ́ɛ 5 Bible Online

1 Timɔtɛ́ɛ 5 - Ngomba bible

1 Timɔtɛ́ɛ 5

¹Ɔ lɑɑ ḿbɔ́ ɛ́sẅíi ndɛn ndʉ́m nɛ nu, kɔɔ cʉ́ɔk wɛ́ cʉ́ɔknɛ. Cú nu mbɔ̌ wɛ́ pɑ́Ꞌ ɔ cú mbɔ̌ tɑ́t wu. Líŋɛ pɔ́ɔsuu pɑ́Ꞌ pɔ́ɔpɛ́mɑ́ pú pɛ́ mbɛ́ɛnɛ,

²ńdíŋɛ pɛlɛn pɑŋɡɛ́ pɑ́Ꞌ pɛmɑ́ pú, ńdíŋɛ ŋɡwɑŋɡɔɔ pɑ́Ꞌ pɔ́ɔpɛ́mɑ́ pú pɛ́ pɑŋɡɛ́, kɛ́ ɡẅɛɛ yɛcɔ́ kwɑŋɛ ndɛꞋ tʉ́m ɡu.

³Lɔk mɛkuꞋ ńcẅɛ́lɛ pɛpfúk pi ŋu kɑ́ pɔ́ nzʉʉ pɔ́p pɔ́.

⁴Mpfúk mɑŋɡɛ́ lɑɑ ŋ́ɡẅɛɛ mbɔ́ŋkʉ̈ɔ́, kɛ pɔ́ɔ-pɔ́ɔ pɛ́ ɔɔ, mbɔ ɛ́ sɛ́ ḿbíkŋɛ ŋɡɔ pɔ́p cẅɛ́lɛ́ wɛ́ lɑ ńdíŋɛ sɛ̂ndúŋ. Pɔ́p ɡẅɛɛ nɛfú nǔu yɔp njɛ́Ꞌ, ńzíꞋ nɛɡɛ yúu mi ɛ́ pɔŋnɛ Sɛ́, ńdíŋɛ pɛtɑ́t pɔ́p pɑ́Ꞌ pɔ́p kɑ zɛɛnɛ ńdíŋɛ wɔ́p ɡúu. MbíꞋŋɡɔ yîyɑ́ nu pɔŋ mbi Sɛ́.

⁵Mpfúk ẅí ŋu kɑ́ pɔ́ nzʉʉ wɛ́ pɔ́, pɔ́ pɔ zɛ́nɛ jʉ́, ɑ nɑ́ŋ yɛ́ ńdíŋɛ sɛ̂ndúŋ ńzẅíꞋlɛ pɔ Sɛ́, ḿbɔ́ ḿbúꞋ mbɔ́ mbɔ̌ wɛ́ nɛnɛm, nɛtúꞋ kɛ́ kɑ́ɑ, ŋɡɔ ɑ cẅɛ́lɛ́ wɛ́.

⁶Lɑ́ ŋ́ɡʉ nǔu mpfúk ẅí ɑ kɑ́tnɛ ńjʉ́ mbyɑŋtɛ, mbɔ pɛ́ líŋɛ wɛ́ tɛ ḿbɔ́ ńcú ŋɡɔ mɑŋɡɛ́ pʉ́ɔ lɑ́, lɑ́ ɑ pɔ́ mbɔ̌ Sɛ́ ḿbɔ́ pɔ mpfú.

⁷Yɔ lɔk ḿbɔ́ yúu mi ɔ ɡẅɛɛ nɛcú nu mbɔ̌ pɔ́p, ńjí ŋɡɔ pɛ́ kɛ́ kẅíi lík yɔ́p kɛpɔŋ pɔ́.

⁸Ɛ́ ɡʉ nǔu mbɔ́ŋkʉ̈ɔ́, mbɔ ŋu wɔp lɑɑ ḿmɛꞋ pʉɔ tsɛ́nndɑ́ yɔ́p, pɛ́ lɑ́Ꞌ pʉɔ pi pɔ́p pɛpɔ́p tsẅɛ́nɛ, mbɔ ɑ lɔk pɔ́Ꞌɔ, ńdʉꞋ nu-Yɛ́su yi pɛkŋɛ pɛ́mnɛ. Ŋɡɑŋ lɔk pɔ́Ꞌɔ, ḿbʉ́k ńdɛɛ ŋu ẅí ɑ kɑ́ zɑ́p tʉ́m yɛ́ nǔu Yɛ́su pɔ́.

⁹Mpfúk ẅi mbɔ ɔ ŋwɑꞋnɛ lík yɛ́ nǔu mɛlík-pɛpfúk pi cúꞋlɛ ɡʉ ḿbɔ́ cẅɛ́lɛ́ wɔ́p, ɛ́ sɛ́ ḿbíkŋɛ ŋɡɔ ɑ pɔ́ ẅí ɑ lɛɛ mɔ́ ŋɡuꞋ mɛɡɛ́mɛ́nɛ́ntúkú, ḿbɔ́ ẅí ɑ kɑ jí pɔ ndɑꞋ ndúu mɛ[2].

¹⁰Ɛ́ píkŋɛ ŋɡɔ ɑ pɔ́ ẅí pʉɔ sɛ́ ḿbɛ́m wɛ́ mbíꞋ mɛfɑꞋ sʉ́Ꞌnɛ mɛ́, ɑ pɔ́ ẅi ɑ cúꞋlɛ́nɛ mbɔ́ŋkʉ̈ɔ́ pɛ́ sʉ́Ꞌnɛ, ḿbɔ́ ẅi ɑ ŋ́kúkŋɛ́nɛ pɛɡʉʉ njɛ́Ꞌ yɛ́, ẅí ɑ ɛ́suknɛ mɛku-pʉɔ-Kɛlístɔ[3], ḿbɔ́ ẅi ɑ ńcẅɛ́lɛ́nɛ pɛɡɑŋŋɡʉ̈ɔ́Ꞌ, ḿbɛn ḿbɔ́ ẅi ɑ ɡɛnɛ pɔ nu sʉ́Ꞌnɛ.

¹¹Kɔɔ kɛ́ ŋ́ŋwɑꞋnɛ mɛlík-pɛpfúk pi pɔ́p pɛ́t ḿbɔ́ pɔ mbɔ́ŋkʉ̈ɔ́ tsɛt ŋwɑꞋnɛ-pɛpfúk. Ɔ lɑɑ ŋ́ɡɛ pɔ́Ꞌɔ, mbɔ pɔ́p ɡʉ ńnɑ́ŋ tɛ nu-nɛzɔ́Ꞌ lɔ sɛ́ tú pɔ́p, pɔ́p ḿmɛ fɑꞋ yi pɔ́p kɑ́ pɔ́ ɛ́fɑꞋ nzʉʉ Kɛlístɔ, ŋ́ɡʉ ńzɔ́Ꞌ,

¹²ŋ́ɡɛ pɔ́Ꞌɔ, ńdɔk ɛ́fɑɑnɛ nu, mbíꞋŋɡɔ pɔ́p kúp nu yi pɔ́p kɑ kɑꞋnɛ, ɛ́ pɔ́ ŋɡɔ pɔ́p ɡʉ ńnɑ́ŋ kɛ́ zɔ́Ꞌ, ɛ́fɑꞋ mbɔ̌ Kɛlístɔ.

¹³Pɔ́p lɑɑ mbɔɔ ɡẅɛɛ yúu pɔ́p ŋ́ɡɛ pɔ́, pɔ́p tsʉ́Ꞌ pɛlɔ́ŋ, ḿbɔ́ ŋ́kɑ́t tsɛt mɛndɑ́, ɛ́ ɡɔ́ mɛkŋɛ ḿbʉ́k pɔ́p mɛꞋ ńtíi mɛlík-pʉɔ, ŋ́kɑ́t ŋ́kíɛꞋ mɛnu mi pɛ́ lɔɔ ŋ́kíɛꞋ pɔ́, ńcú nu nǔu mɛnu mi ɛ́ kɑ́ pɔ́ ńdíŋɛ wɔ́p pɔ́.

¹⁴Ɛ́ yúu mi ɛ́ ɡɛnɛ lɑ n jʉ́ɔ ŋɡɔ ɛ́ pɔŋ ŋɡɔ pɛpfúk pi pɔ́p pɛ́t mbɔ́ŋkʉ̈ɔ́ pɔ́p zɔ́Ꞌ, ḿbí mbɔ́ŋkʉ̈ɔ́, ńniitɛ mɛndɑ́ mɔ́p, ɛ́ lɛɛ pɔ́Ꞌɔ, pɛɡɑŋmbuu pɛkŋɛ pɔɔ ɡẅɛɛ shʉ́ nɛcú nu nǔu pɛkŋɛ pɔ́.

¹⁵N cú pɑ́Ꞌɑ mbíꞋŋɡɔ pɛcɔ́ nɛlʉ́m pɛpfúk mbɔ́ŋkʉ̈ɔ́ nɑ́ mɔ́ nu-Sɛ́, ńcʉ́ɔ nzʉʉ Sɑ́ttɑ.

¹⁶Mɑŋɡɛ́ lɑɑ ḿbɔ́ ŋu-Kɛlístɔ, pɛpfúk pɔ́ nǔu tsɛ́nndɑ́ yɔ́p, mbɔ ɛ́ sɛ́ ḿbíkŋɛ ŋɡɔ jʉ́ pɔ́nɛ ńcẅɛ́lɛ́ wɔ́p tɛ mbɔɔ ɡɑ́ yîyɑ́ piꞋ mbɔ̌ cúꞋlɛ-pʉɔ-Kɛlístɔ pɔ́, ńjí ŋɡɔ cúꞋlɛ-pʉɔ-Kɛlístɔ ɡʉ ńcẅɛ́lɛ́ pɔ pɛpfúk pi ŋu kɑ́ pɔ́ nzʉʉ pɔ́p pɔ́.

¹⁷Ɛ́ ɡʉ nǔu pʉɔ pi pɔ́p cẅɛ́ɛnɛ mbi nǔu cúꞋlɛ-pʉɔ-Kɛlístɔ, ḿbɔ́ ɛ́fɑꞋ sʉ́Ꞌnɛ, pɛ́ ɡɛ mɛkuꞋ mɔ́p, ŋ́ɡɑ́ tsɔ́ꞋfɑꞋ yi ɛ́ píkŋɛ́nɛ mbɔ̌ pɔ́p, ńtsuŋ ŋ́ɡɛ mɛ́ pʉɔ pi pɔ́p sẅíinɛ nu-Sɛ́ ḿbɛn ńzíꞋ pʉɔ nɛ́ yúu.

¹⁸Sẅiŋɛ-sɛ́ zɛɛ ńcú ŋɡɔ: «Kɔɔ ŋu kút ntsu fɔŋ ẅí ɑ sʉ́Ꞌlɛ́nɛ mɛsɑ́ŋntsʉ́ʉ pɑ́Ꞌ pɛ́ ɡʉ ńtsʉ́ꞌ ɛ́fɑ́k fɑ́knɛ. Ɛ́ pɛn ńcú ŋɡɔ pɛ́ ɡɑ́ tsɔ́ꞋfɑꞋ mbɔ̌ ŋu ẅí ɑ fɑꞋnɛ fɑꞋ.»

¹⁹Pɛ́ lɑɑ ńtɔ́ ɛ́sẅíi wú nɛ́ nu nǔu ŋu ẅí ɑ cẅɛ́ɛnɛ mbi-cúꞋlɛ, ɔ pɛ́t kɛ́ zúꞋ ntsu-pʉɔ pɛ́pɑ́ kɛ pʉɔ pɛtɑ́t ɔɔ, kɔɔ lɔk ɛ́fúŋ nu.

²⁰Ɛ́ ɡʉ nǔu pʉɔ pi pɔ́p tsuŋnɛ ŋ́ɡɛ nu kɛpɔŋ, ɔ tʉ́ʉ pɔ tsɛt cúꞋlɛ ŋ́kɑkŋɛ wɔ́p, pɛcɔ́ pʉɔ jʉ́ɔ pɔ́Ꞌɔ, ḿbɔ́k nɛɡɛ nu kɛpɔŋ.

²¹Mɔ ńdɔk lík-Sɛ́, ńdɔk lík-Yɛ́su Kɛlístɔ mbɑ lík-pɛcʉ̈ɔ́Ꞌ-Sɛ́ pi Sɛ́ kɑ tsɔ́Ꞌnɛ ńcú mbɔ̌ ɡu ŋɡɔ: «Tsuŋ ńzúꞋ yúu mi mɔ ńcú. Pɑ́ɑ nɛlíŋɛ shʉ́-ŋu, kɛ ńdɔk pɔ tɔŋ ɔɔ ŋ́ɡɛ yúu nǔu ŋu.»

²²Kɔɔ ɡwɛtnɛ nɛzɑ́p mbɔ́ tú-ŋu, níꞋ fɑꞋ-cúꞋlɛ-pʉɔ-Kɛlístɔ mbɔ̌ wɛ́. Zɛɛ ḿbiitɛ ńtsɑꞋ wɛ́ sʉ́Ꞌnɛ, ḿbɔ́k ŋɡɑŋ nɛɡɛ nu kɛpɔŋ, ɛ́ tsʉ́Ꞌ yú. Pɑ́ɑ mbɑ kʉ̈ɔ́ lɑ́ yi mbɔ ɛ́ pʉ́ʉpɛ wú.

²³Kɔɔ pɛn ńnɔ́ pɔ ndɑꞋ ŋki. Nɔ́ mɔ́zʉꞋ mɛluꞋ, mbíꞋ nɛpɛm nú ni ɛ́ júknɛ ŋ́ɡɑ́ɑnɛ wú lɑ́.

²⁴Pɛcɔ́ pʉɔ ɡɛ nu kɛpɔŋ pɛ́ jʉ́ɔ pɔ nɛ́ mík lɑ ŋ́ŋɑk wɔ́p. Pɛcɔ́ pʉɔ fɑɑnɛ pɛ́ lɑ́Ꞌ lɑ ńjí.

²⁵Ɛ́ pɛn ḿbɔ́ pɔ ndʉ́ŋndʉŋ nǔu mɛfɑꞋ sʉ́Ꞌnɛ, ɛ́ zɛɛ ńcẅɛt pɔ mɑ́ntɑ́ɑ, tɛ mbɑ mi pɛ́ kɑ́ pɔ́ fɛ́Ꞌnɛ ńjʉ́ɔ pɔ́, pɛ́ ńdɑ́Ꞌ ŋ́kɛ́ ńjʉ́ɔ jʉ́ɔnɛ.