Read Ngomba 1 Timɔtɛ́ɛ 6 Bible Online

1 Timɔtɛ́ɛ 6 - Ngomba bible

1 Timɔtɛ́ɛ 6

¹Ɛ́ ɡʉ nǔu pʉɔ pi pɔ́p ndɑ́-kwɑɑ, mbɔ ɛ́ sɛ́ ḿbíkŋɛ ŋɡɔ pɔ́p jí ŋɡɔ pɔ́p ɡẅɛɛ nɛɡɛ mɛkuꞋ pʉɔ pi pɔ́p ɡẅɛɛnɛ wɔ́p, ńjí ŋɡɔ pɛ́ kɛ́ ɡɛ ŋ́kẅíi lík-zẅikŋɛ kɛpɔŋ pɔ́, ŋ́kɛ́ mbɔɔ ɡwɑ́k nu yi pɛ́ zíꞋnɛ pʉɔ nǔu Yɛ́su Kɛlístɔ pɔ́.

²Ɛ́ ɡʉ nǔu pɛkwɑɑ pi pʉɔ pɔ́p ɡẅɛɛnɛ wɔ́p pʉɔ-Kɛlístɔ pɔ́p pɑ́ɑ nɛkwɑŋɛ ŋɡɔ pɑ́Ꞌ pɔ́p pɛpɔ́p pɔ́ɔpɛ́mɑ́ lɑ́ ŋ́ɡwɑ́k wɔ́p. Tɛ ńtsʉ́Ꞌ pɔ́Ꞌɔ, pɔ́p fɑꞋ fɑꞋ yɔ́p ɛ́ pɔŋ ńdɛɛ pɑ́Ꞌ pɔ́p kɑ zɛɛ ḿbɔ́ ɛ́fɑꞋ, mbíꞋŋɡɔ pʉɔ pi pɔ́p fɑꞋnɛ mbɔ̌ pɔ́p zɑ́p tʉ́m nǔu Kɛlístɔ Sɛ́ kɔŋ wɔ́p pɔ́p pɔ́ ńjʉ́ pii-fɑꞋ-pɛkwɑɑ pɔ́p. Yúu mi ɔ ɡʉ ḿbɔ́ ńzíꞋ pʉɔ, ɛ́ pɛn ḿbɔ́ ńníꞋ mɛtʉʉ mɔ́p nɛɡɛ pɔ́Ꞌɔ, pʉ́ɔ lɑɑ:

³Ŋu lɑɑ ńzíꞋ pʉɔ nɛ́ nu ndɛꞋ ńdɔk ḿmɛꞋ sẅiŋɛ nɛ́nẅín yi ɛ́ fúnɛ mbɔ̌ Tsɑpʉɔ wɛkŋɛ Yɛ́su Kɛlístɔ, mbɑ yúu mi pɛkŋɛ zíꞋnɛ pʉɔ pɔ́p fú nǔu ńzɑ́p tʉ́m nǔu wɛ́,

⁴mbɔ ŋɡɑŋ ŋɑ́Ꞌtɛ ŋɡɔ ɑ jí nu, lɑ́ ŋ́kɛ́ mbɔɔ ḿbɔ́ ńjí pɔ́. A jí yɛ́ pɔ nɛzɔŋ nu, ńjúk ɛ́fú yɛ́ pɔ nǔu nu yi pɛ́ cúnɛ, ńtsuꞋ tú-pʉɔ. Ɛ́ lɛɛ pɔ́Ꞌɔ, pʉɔ zɛ nɛɡẅɛɛ kɛ́ɡʉ̈ɔꞋ, ńzɛ nɛzɔŋ nu, ńzɛ nzɔɔmɛ, ńzɛ nɛkwɑŋɛ pɔ́ɔpɛ́mɑ́ pɔ́p nǔu nu kɛpɔŋ,

⁵ḿbɔ́ ŋkɑ́ tsʉʉ ńzɔŋ nu tsɛtsɛt pɔ́p zɔŋnɛ, ŋ́kwɑŋɛ yɔ́p fu wɔ́p, mbíꞋŋɡɔ pɔ́p kɑ́ pɛ́t ńjí nu nɛ́nẅín pɔ́, ŋɡɔ ŋu lɑɑ ńzɑ́p tʉ́m yɛ́ nǔu Sɛ́, mbɔ ɛ́ sɛ̂ndúŋ ẅí ɑ ɡʉ ɛ́fú nǔu ŋ́ɡẅɛɛ ŋkɑ́p.

⁶Ɛ́ kɛ́ ńzɛɛ ḿbɔ́ nɛ́nẅín ŋɡɔ ŋu lɑɑ ńzɑ́p tʉ́m yɛ́ nǔu Sɛ́, mbɔ ɑ pɔ́ttú pɑ́Ꞌ nu lɑɑ ḿbɔŋ wɛ́ nǔu yúu mi Sɛ́ ɡɑ́nɛ mbɔ̌ wɛ́.

⁷Pɛkŋɛ ŋ́kɑɑ zɛɛ ŋ́kɛ́ ńdɔk yɛcɔ́ yúu ńtɔ́ ndǔ mbí yɔ pɔ́, pɛkŋɛ kɛ́ lɑ́Ꞌ ńdɔk yɛcɔ́ ɛ́fú zúꞋu ŋ́ɡʉ pɔ́.

⁸Pɔ́Ꞌɔ lɑ́, ḿbɔ́ yi pɛkŋɛ lɑɑ ŋ́ɡẅɛɛ yúupɛjʉ́ mbɑ ndẅí mɑꞋnɛ, mbɔ ẅîwɑ́ ndɛn kɑ́ kʉ̈ɔ́k.

⁹Lɑ́ ɛ́ ŋ́kɛ́ ŋ́ɡʉ nǔu pʉɔ pi pɔ́p kɔŋ nɛɡẅɛɛ yúu tɛ ɛ́ zɑ́ɑ zɑ́ɑnɛ, ɡʉ ḿvu tsɛt ŋkwɑꞋnɛ. Mɛyúu kɛpɔŋ mi pɔ́p tsɑ́ɑnɛ, ɛ́ minɛ ɛ́ pʉ́ʉpɛ ŋu pʉ́ʉpɛ́nɛ, ɛ́ ɡẅɛɛ wɔ́p pɑ́Ꞌ ɡwɑk lɑ́. Mîmɑ́ mɛyúu tsʉ́ʉnɛ́nɛ pʉɔmɛsɔŋ pɔ́p vu sɛ́, ŋ́kúu pɛ́.

¹⁰MbíꞋŋɡɔ nɛtsɑ́ɑ pɔ nɛɡẅɛɛ ŋkɑ́p, ɛ́ lɔk mɛnu ntɛ́ nɛ́ ntɛ́ ńtɔ́. Pɛcɔ́ pʉɔ tsɛtsɛt pɔ́p kɑ ḿmɛꞋ mɔ́ mbʉʉ yɔp nǔu nu-ŋkɑ́p, ɛ́fɑɑnɛ sɛ̂ndúŋ, mbɔɔ pɛn ńzɑ́p tʉ́m nǔu Sɛ́ pɔ́, ńdɔk ɛ́fúŋ ŋɡʉ̈ɔ́Ꞌ zɑ́ɑnɛ ńníꞋ nǔu pɔ́p.

¹¹Ɛ́ kɛ́ ŋ́ɡʉ nǔu ɡu ẅí ɔ ŋu-Sɛ́, pɔ́ ŋ́kʉɔ mîmɑ́ mɛnu kɛpɔŋ, ḿbɔ́ ɛ́sɑ́Ꞌ tʉʉ ŋ́ɡɛ pɔ mɛnu mi ɛ́ tʉ́ʉnɛ ndʉ́ŋndʉŋ, ḿbɛn ḿbɔ́ yúu mi ɛ́ pɔŋnɛ Sɛ́, ḿbɔ́ ńzɑ́p tʉ́m yú pɔ nǔu wɛ́, ḿbɔ́ ŋ́kɔŋ ŋumɛsɔŋ, ḿbɔ́ ńtɛntɛ tɛntɛnɛ nzʉʉ Sɛ́, ńtʉ́ʉ nǔu yɛ́tɛ́ nu ɔɔ, ḿbɔ́tnɛ pɔ́tnɛ́nɛ.

¹²Kɛ́ ḿbɔ́ ḿmɑꞋ yú pɔ ntsɔ sʉ́Ꞌnɛ wɛ́ pɑzɑ́ptʉ́m nǔu Sɛ́. KúꞋlɛ luk kɛ́mɛ sʉ́Ꞌnɛ, mbíꞋŋɡɔ Sɛ́ kɑ fúŋ wú, ntɛ́ pɔ wɛ́tɛ́. Ɔ kɑ pɛn ńtʉ́ʉ mbi pʉɔ tɛ ńzɑ́ɑ ḿbɛ́m nu sʉ́Ꞌnɛ yi ɔ zɑ́pnɛ tʉ́m yú nǔu.

¹³Mɔ sɛ́ ńcú yɔ nu mbɔ̌ wú, ńtʉ́ʉ mbi Sɛ́ ẅí ɑ ɡɛnɛ yúu tsʉʉ pɔ́ ɡú, mbɑ mbi Yɛ́su Kɛlístɔ ẅí ɑ kɑ tʉ́ʉnɛ mbi Pɔ́ŋtí Pilɑ́tɔ ńcú nu nɛ́nẅín yi ɑ jínɛ:

¹⁴Mɔ sɛ́ ńcú mbɔ̌ ɡu ŋɡɔ ɔ ɡɛ yúu mi Sɛ́ cúnɛ mbɔ̌ ɡu. Kɔɔ ɡʉ nǔu ḿmɛꞋ yɛcɔ́. Kɔɔ ɡɛ pɛ́ tɔ́ lɔ́Ꞌ nǔu, kɛ́ ḿbɔ́ ŋ́ɡɛ pɔ pɔ́Ꞌɔ, tɛ ŋ́kúu lɛ́Ꞌ yi Tsɑpʉɔ wɛkŋɛ Yɛ́su Kɛlístɔ ɡʉ ŋ́ɡɛ ḿbɛn ńtɔ́.

¹⁵A ɡʉ ŋ́ɡɛ ńtɔ́ nǔu ŋkɑ́ yi Sɛ́ kɑ zɑ́pnɛ. Jʉ́ Sɛ́ ẅí ɑ ɡẅɛɛnɛ mɛtʉʉ tsʉʉ. Jʉ́ pɔ́nɛ ndɑꞋ Sɛ́, ńnɑ́ŋ pɔ tsɛt tsɑ́ɑtɛ, ḿbɔ́ Fɔɔ ńdɛɛ pɛfɔɔ, ḿbɔ́ Tsɑpʉɔ pɛtsɑpʉɔ,

¹⁶A ndɑꞋ jʉ́ zɛ́nɛjʉ́ ẅi ɑ kɛpfú. A ńnɑ́ŋ nǔu zʉꞋ yi ɛ́ ŋwɑŋɛ́nɛ tɛ ḿbɔ́ ŋumɛsɔŋ pɔɔ kẅɛ́Ꞌlɛ tɛ ḿbɑ́ɑtɛ zúꞋu pɔ́. Ŋu ŋkɑɑ mɔ́ zɛɛ ńjʉ́ɔ wɛ́ pɔ́, ḿbɔ́ ŋu pɔɔ kuꞋ nɛjʉ́ɔ wɛ́ pɔ́. Ɛ́ pɔŋ ŋɡɔ mɛkuꞋ mɛ́ mbɑ nɛfɔɔ nɛ́ lɑ́Ꞌ ḿbɔ́ pɔ ɡú. Ɛ́ pɔ́Ꞌɔ.

¹⁷Ɛ́ ɡʉ nǔu pʉɔ pinɛ pɔ́p ɡɑŋyúu ndǔ yɔ mbí, n cú mbɔ̌ pɔ́p ŋɡɔ pɔ́p pɑ́ɑ nɛŋɑ́Ꞌlɛ mbʉʉ, ŋɡɔ kɔɔ pɔ́p ńnɑ́ŋ ńzẅíꞋlɛ wɔp nɛpɔŋ pɔ nǔu yúu mi pɔ́p ɡẅɛɛnɛ, mbíꞋŋɡɔ ɛ́ pɔ́ pɔ fuꞋnjʉɔ. Cú mbɔ̌ pɔ́p ŋɡɔ pɔ́p zẅíꞋlɛ wɔp nɛpɔŋ pɔ mbɔ̌ Sɛ́ ẅi ɑ ɡɑ́nɛ wɛkŋɛ nɛ́ yúu tsʉʉ tɛ ɛ́ zɑ́ɑ zɑ́ɑnɛ ŋɡɔ pɛkŋɛ lɔk ńtsɑ́ɑtɛ.

¹⁸Cú mbɔ̌ pɔ́p ŋɡɔ pɔ́p ɡɛ nu sʉ́Ꞌnɛ. NɛfɑꞋ mɛfɑꞋ sʉ́Ꞌnɛ pɔ́ yɔ́p fuꞋ, ŋɡɔ pɔ́p zíꞋ nɛɡɑp pɔ́, ńdɔk yúu pɔ́p ńcẅɛ́lɛ́ pʉɔ.

¹⁹Pɔ́p lɑɑ ŋ́ɡɛ pɔ́Ꞌɔ, mbɔ pɔ́p lɔk ńcúꞋlɛ fuꞋ yɔ́p ńdẅɛꞋ nǔu zʉꞋ sʉ́Ꞌnɛ, zʉꞋ yi yîyɑ́ fuꞋ ɡʉ ńdɑ́Ꞌ ḿbɔ́ pɔ ɡú, ńdɔk pɔ́Ꞌɔ, ŋ́ɡẅɛɛ kwɑꞋ luk.

²⁰Timɔtɛ̂ɛ, pɑ́ɑ nɛlɔk nu yi Sɛ́ kɑ lẅɛꞋnɛ mbɔ̌ ɡu, ńdɔk ḿmɑꞋ kwɑŋɛ. Pɑ́ɑ sẅiŋɛ yi ɛ́ kɑ́ cẅɛ́lɛ́, mbíꞋŋɡɔ ɛ́ tɔꞋ pʉɔ tɔꞋnɛ nɛzɑ́p tʉ́m nǔu Sɛ́, sẅiŋɛ yi ɛ́ ɡɛnɛ pɛ́ zɔŋ nu tɛ ŋ́kwɑŋɛ pɔ ŋɡɔ pɛ́ lɔk ńjí nu.

²¹Pɛcɔ́ pʉɔ kɑ ɡɔ́ ɛ́fɑɑnɛ sɛ̂ndúŋ ńzɛɛ ńcú pɔ ŋɡɔ pɔ́p jí tɛꞋ, pɔ́p pɛn ḿbɔɔ ńzɑ́p tʉ́m nǔu Sɛ́ pɔ́. Mɔ tsʉ́Ꞌ nɛlẅiklɛ, ḿbúꞋ mbɔ́ mbɔ̌ Sɛ́ ŋɡɔ mbɔ́tnɛ yɛ́ pɔ́ nɛ́ pʉʉ pɛtsʉʉ.