Read Ngomba 2 Timɔtɛ́ɛ 3 Bible Online

2 Timɔtɛ́ɛ 3 - Ngomba bible

2 Timɔtɛ́ɛ 3

¹Timɔtɛ̂ɛ Jí ŋɡɔ, ɛ́ ɡʉ ńdɑ́Ꞌ ḿbɔ́ nǔu mɛndẅiknzʉʉ mɛlɛ́Ꞌlɑ́Ꞌ, zʉꞋ tɛn tɛꞋ.

²N cú mbíꞋŋɡɔ, pʉɔmɛsɔŋ ɡʉ ŋ́ɡɛ ḿbɔ́ ɡɑŋŋyɛ́p, ŋ́kɔŋ pɔ ŋkɑ́p, ḿbɔ́ ɡɑŋnyɛt mbʉʉ, ḿbɔ́ ɡɑŋŋɑ́Ꞌtɛ, ḿbɔ́ ńzɔɔtɛ Sɛ́ zɔɔtɛnɛ, ńtʉʉ tú mbɔ̌ pɛtɑ́t pɔ́p, ḿbɔ́ pɑjʉ́ntukntsu, pɔ́p kɑ́ pɛn ńdɔk yúu mi ɛ́ yɛ́ Sɛ́ ńdɔk ɛ́fúŋ yɛcɔ́ yúu pɔ́.

³Tʉ́m yɔ́p ŋ́ɡɛ ńtɛn pɑ́Ꞌ ŋɡɔꞋ lɑ́, pɔ́p pɔ́ pɑkɛ́tsɑ́ɑ mɛjʉ́ŋ, ńcɔt nu nǔu pʉɔ, ḿbɔ́ pʉɔ ɡɑ́Ꞌlɛ́nɛ. Ḿbɔ́ pɛfút, ḿbɔ́ ɡɑŋmbuu-nu sʉ́Ꞌnɛ,

⁴ḿbɔ́ ɡɑŋmɛnɑŋ, ŋ́ɡɛ nu kɛ́ sɑ́ŋ, ḿbɔ́ ɡɑŋŋɑ́Ꞌtɛ tɛꞋ, ńtsʉ́Ꞌ yi pɔ́p kɔŋ Sɛ́, pɔ́p kɔŋ pɔ yúu mi mbʉʉ yɔp tsʉ́ʉnɛ́nɛ wɔ́p nɛɡɛ,

⁵ḿbɔ́ pʉɔ-Sɛ́ pɔ nzɛmpíi, ńdʉꞋ mɛtʉʉ-Sɛ́. Timɔtɛ̂ɛ lʉ́ɔꞋ ntɛ́ pʉɔ ɛ̂pɑ́!

⁶Pɛcɔ́ pʉɔ tsɛtsɛt pɔ́p, ńjúk sɔ́ ŋ́kúu mɛndɑ́-pʉɔ, ɛ́shɔt mík-pɑŋɡɛ́ pi pɔ́p pɛ́mpɛ́mnɛ, ḿbɔ́ pi pɔ́p ɡɛnɛ mɛnu kɛpɔŋ tɛꞋ, mbʉʉ yɔp tsʉ́ʉnɛ wɔ́p nɛɡɛ yúu ntɛ́ nɛ́ ntɛ́.

⁷Ŋkɑ́ yi pɛ́ zíꞋnɛ yîyɑ́ ntɛ́ pɑŋɡɛ́ nɛ́ nu, pɔ́p zẅíꞋlɛ zẅíꞋlɛ́nɛ lɑ́ ŋ́kɛ́ mbɔɔ kuꞋ nɛjí nu nɛ́nẅín pɔ́.

⁸Ndʉ́ŋndʉŋ pɑ́Ꞌ ɛ́ kɑ pɔ́ yɛcɔ́ ŋkɑ́, Jɑnɛ̂s pɔ́p Jɑ́mbɛlɛs lʉꞋ nu yi Mɔ̌sɛ̂ɛ ḿbɔ́ ńzíꞋ lɑ́, pîpɑ́ pʉɔ pɛn ḿbɔ́ ńdʉꞋ nu yi ɛ́ nɛ́nẅín, pɔ́p pʉɔ pi kwɑŋɛ yɔ́p kɑ́ pɔŋ, pɔ́p ŋkɑɑ zɑ́p tʉ́m nǔu Sɛ́ tɛ ɛ́sẅíi nu pɔ́.

⁹Lɑ́ ḿbɔ́ pɔ́p pɔɔ lɔk yîyɑ́ ntɛ́ fɑꞋ ŋ́kẅiꞋ ŋ́ɡʉ tɛ ŋɡɑ sɑk pɔ́, mbíꞋŋɡɔ pʉɔ tsʉʉ ɡʉ ńjʉ́ɔ ŋɡɔ pɔ́p kɑ́ jí yɛcɔ́ nu pɔ́, ndʉ́ŋndʉŋ pɑ́Ꞌ ɛ́ kɑ cẅɛtnɛ pɔ́Ꞌɔ nǔu Jɑnɛ̂s pɔ́p Jɑ́mbɛlɛs lɑ́.

¹⁰Ɛ́ ɡʉ nǔu ɡu, ɔ kɑ tsuŋ ńtík ku nǔu yúu mɔ ḿbɔ́ ńzíꞋ, ɔ sɛ́ ńjí wɑɑ nɛtsẅɛ́, ḿbɔ́ ńjí yúu mi mɔ sɛ́ ŋ́ɡɔ ɛ́fɑꞋ ḿbɔ́ ńtsɑ́ɑ, ḿbɔ́ ńjí pɑ́Ꞌ n zɑ́pnɛ tʉ́m yɑ́ɑ nǔu Sɛ́, ńjí pɑ́Ꞌ ŋ ɡẅɛɛnɛ sʉktʉ́m pɔ́Ꞌɔ, pɑ́Ꞌ ŋ kɔŋnɛ pʉɔmɛsɔŋ pɔ́Ꞌɔ, ḿbɛn ńjí pɑ́Ꞌ ɛ sɑ́Ꞌnɛ tʉʉ kɛ́ kɑ́ɑ pɔ́Ꞌɔ.

¹¹Ɔ sɛ́ ńjí pɑ́Ꞌ pʉɔ kɑ tsɔ́Ꞌnɛ ku yɑ́ɑ kɛpɔŋ, ńjí pɑ́Ꞌ ŋ kɑ jʉ́ɔnɛ ŋɡʉ̈ɔ́Ꞌ pɔ́Ꞌɔ tʉ́sɔŋ-Antíyɔshɛ mbɑ Ikɔnyɔm mbɑ Listɛlɛ. Pɔ́p ŋkɑɑ tsɔ́Ꞌ ku yɑ́ɑ kɛpɔŋ nɛ́ yɛ́tɛ́ ntɛ́ pɔ́. Lɑ́ Tsɑpʉɔ kɛ ɛ́fú tsɛtú ńcẅɛɛtɛ wɑ́ɑ cẅɛɛtɛ́nɛ,

¹²ḿbɔ́ ŋu zɛɛ ḿbɔɔ lɑt mbʉʉ yɛ nǔu Yɛ́su Kɛlístɔ, ḿbɔ́ ŋ́kɔŋ nɛnɑ́ŋ pɑ́Ꞌ Sɛ́ kɔŋnɛ, pɛ́ nɑ́ kɛ́ tsɔ́Ꞌ ku yɛ́ kɛpɔŋ pɔ́.

¹³Ŋ́ɡʉ nǔu pʉɔ kɛpɔŋ pɔ́p ɡɑŋfúklɛ ɡʉ ŋ́ɡɛ ńdɔk nu kɛpɔŋ ŋ́kẅiꞋ ŋ́ɡʉ pɔ nɛ́ mbi, ḿbɔ́ ɛ́fúklɛ pʉɔ, pɛ́ pɛn ḿbɔ́ ɛ́fúklɛ wɔ́p ɡúu.

¹⁴Ɛ́ ɡʉ nǔu ɡu, mbɔ ɛ́ píkŋɛ ŋɡɔ ɔ kúꞋlɛ pɔ yúu mi pɛk kɑ zíꞋnɛ wú ɔ pɛ́m ŋɡɔ ɛ́ zúꞋu ḿbɔ́ pɔ́Ꞌɔ. Ɔ kɑ́ pɔ́ ḿmuŋɛ pʉɔ pí pɔ́p kɑ zíꞋnɛ wú pɔ́.

¹⁵Ɔ kɑ ɡɔ́ ńdɔ sɛ́ ḿbɔ́ ńjí yúu mi ŋwɑꞋnɛ-Sɛ́ yɛ́tɛ́, ḿbɔ́ yɛ́tɛ́ ɡɑ́nɛ wú nɛ́ jínu nɛlɔk ńzɑ́p tʉ́m nǔu Yɛ́su Kɛlístɔ, Sɛ́ ɡɛ ɔ luk.

¹⁶Mbɑ kʉ̈ɔ́ lɑ́ pɛ́ ŋwɑꞋnɛ́nɛ tsɛt ŋwɑꞋnɛ-Sɛ́, ɛ́ fú pɔ ntsu-Sɛ́. Ŋ́kuꞋ nɛlɔk ńzíꞋ nu nɛ́nẅín mbɔ̌ pʉɔ, ŋ́kuꞋ nɛlɔk ńdʉꞋ nu yi ɛ́ kɑ́ pɔ́ nu pɔ́, ŋ́kuꞋ nɛlɔk ńcẅɛ́lɛ pʉɔ nɛcẅɛt tsɛt lɔ́Ꞌ yɔ́p, ḿbɛn ŋ́kuꞋ nɛlɔk ńtík pʉɔ pɑ́Ꞌ ḿbɔ́ pɔ́p ɡɛ yúu mi ɛ́ ndʉ́ŋndʉŋ mbi Sɛ́.

¹⁷Ɛ́ lɛɛ pɔ́Ꞌɔ, ŋu ɑ fɑꞋnɛ fɑꞋ-Sɛ́ niitɛ mbʉʉ yɛ kwɑꞋ sʉ́Ꞌnɛ, ŋ́kuꞋ nɛɡẅɛɛ kʉ̈ɔ́ lɑ́ yi mbɔ ɑ lɔk ŋ́ɡɛ nu tsʉʉ yi ɛ́ pɔŋnɛ.