Read Ngomba Tîtɛ 2 Bible Online

Tîtɛ 2 - Ngomba bible

Tîtɛ 2

¹Lɑ́ ŋ́ɡʉ nǔu ɡu, kɛ́ ḿbɔ́ ńzíꞋ pʉɔ pɔ nɛ́ yúu mi ɛ́ puutɛ́nɛ pɔ nǔu nu nɛ́nẅín yi pɛ́ zíꞋnɛ pʉɔ nǔu Yɛ́su Kɛlístɔ.

²ZíꞋ mbɔ̌ pɛlʉ́m mbɛ́ɛnɛ ŋɡɔ kɔɔ pɔ́p ɡɛ yɛcɔ́ yúu tɛ ɛ́ lɛɛ, ŋɡɔ pɔ́p pɔ́ pʉɔ-mɛkuꞋ, ŋɡɔ pɔ́p pɔ́ pʉɔ pi pɔ́p sɑ́ŋnɛ nu lɑ ŋ́ɡɛ. Pɔ́p pɛn ńzɑ́p tʉ́m nǔu Sɛ́ tɛ ńzɑ́p, ńnɑ́ŋ ŋ́kɔŋ pʉɔ tɛ ŋ́kɔŋ, ɛ́sʉk mɛnu tɛ ɛ́sʉk.

³Ɛ́ ndʉ́ŋndʉŋ pɑ́Ꞌ ɔ ɡʉ ńzíꞋ mbɔ̌ pɛlʉ́m pɑŋɡɛ́ ŋɡɔ pɔ́p ɡẅɛɛ mɑt ẅi ɛ́ pɔŋnɛ Sɛ́, ŋɡɔ kɔɔ pɔ́p sẅíitɛ nǔu mɛlík-pʉɔ, ŋɡɔ kɔɔ pɔ́p mɑꞋ mbʉʉ yɔp nǔu mɛluꞋ. Ɛ́ píkŋɛ ŋɡɔ pɔ́p zíꞋ pʉɔ nɛ́ mɑt sʉ́Ꞌnɛ,

⁴ńjí ŋɡɔ pɔ́p ɡʉ ńzíꞋ pɑŋɡɛ́ pi pɔ́p pɛ́t ńzɔ́Ꞌ pɑ́Ꞌ mbɑ wɛ́t lɑ́ ɡʉ ŋ́kɔŋ ndúu mɛ mbɑ mbɔ́ŋkʉ̈ɔ́ pɛ́,

⁵ḿbɔ́ mɑŋɡɛ́ ẅí ɑ sɑ́ŋnɛ nu lɑ ŋ́ɡɛ, ḿbɔ́ mɑŋɡɛ́ ẅí ɑ jínɛ pɔ ndɑꞋ ndúu mɛ, ɛ́fɑꞋ mɛfɑꞋ-ndɑ́ mɛ́ sʉ́Ꞌnɛ, ɑ pɔ́ mɑŋɡɛ́ ẅi pɛ́ kɔŋ nu yɛ́, ɑ pɔ́ mɑŋɡɛ́ ẅi ɑ zúꞋnɛ ntsu-ndúu mɛ. Pɔ́p lɑɑ ŋ́ɡɛ pɔ́Ꞌɔ, ŋu pɔɔ sẅiŋɛ kɛpɔŋ nǔu nu-Sɛ́ pɔ́.

⁶Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ ɔ ɡʉ ńzíꞋ pɔ́ɔsuu nɛsɑ́ŋ nu lɑ ŋ́ɡɛ,

⁷mbɑ nǔu kʉ̈ɔ́ lɑ́. KwɑꞋ ɡu tʉ́ʉ nǔu kʉ̈ɔ́ lɑ́, ńnyɛt pɔ fʉꞋ-yúu sʉ́Ꞌnɛ. Ɔ lɑɑ ḿbɔ́ ńzíꞋ pʉɔ nɛ́ yúu, ɔ zíꞋ wɔ́p pɔ ndɑꞋ nɛ́ nu yi Sɛ́ kɔŋnɛ, ḿbɛn ńzíꞋ tɛ ńjí yúu mi ɔ zíꞋnɛ yɛ́tɛ́.

⁸Cú nu ɛ́ tʉ́ʉ ndʉ́ŋndʉŋ, yi ɛ́ lɑɑ ḿbɔ́ pɛ́ pɔɔ zɔŋ, ńjí ŋɡɔ pʉɔ pi pɔ́p lʉꞋnɛ nu-Sɛ́, ɡʉ ńjɑ́k nu kɛpɔŋ yi pɔ́p ɡʉ ńcú nǔu pɛkŋɛ, sʉ́ʉ kɔ́ wɔ́p.

⁹ZíꞋ mbɔ̌ pɛkwɑɑ ŋɡɔ: «Pɔ́p zúꞋ ntsu-pʉɔ pi pɔ́p ɡẅɛɛnɛ wɔ́p, tɛ mbɑ nǔu kʉ̈ɔ́ lɑ́, ŋɡɔ pɔ́p lɔɔ shʉ́ ŋ́ɡɛ yúu mi ɛ́ pɔŋnɛ pʉɔ pi pɔ́p ɡẅɛɛnɛ wɔ́p, ŋɡɔ kɔɔ pɔ́p zɔŋ nu ntsu pɔ́p,

¹⁰ŋɡɔ kɔɔ pɔ́p jʉ̈ɔ yúu-pʉɔ pi pɔ́p ɡẅɛɛnɛ wɔ́p. Tɛ ńtsʉ́Ꞌ pɔ́Ꞌɔ, pɔ́p nyɛt ŋɡɔ pɔ́p pʉɔ mbɔ pɛ́ nɑ́ nzʉʉ mbɔ̌ pɔ́p. Pɔ́p lɑɑ ŋ́ɡɛ pɑ́Ꞌɑ, mbɔ pʉɔ ɡʉ sẅiŋɛ sʉ́Ꞌnɛ nǔu mɛnu mi pɛkŋɛ zíꞋnɛ nǔu Sɛ́ ẅi ɑ ɡɑ́nɛ luk.»

¹¹Ɛ́ pɑ́Ꞌ pʉɔ-Kɛlístɔ ɡẅɛɛnɛ nɛɡɛ, mbíꞋŋɡɔ Sɛ́ kɑ tsuŋ ńnyɛt mbɔ̌ pʉɔ ŋɡɔ ɑ ŋu-pɔŋtʉ́m, ŋ́kuꞋ nɛɡɛ ŋɡɔ pʉɔ tsʉʉ luk.

¹²Yîyɑ́ ntɛ́ pɔŋtʉ́m sɛ́ ńzíꞋ wɛkŋɛ nɛmɛꞋ mɑt ẅí ɛ́ kɑ́ pɔŋ Sɛ́ pɔ́, mbɑ pɑ́Ꞌ pɛkŋɛ kɛ́ pɛn ŋ́ɡɛ yúu mi mbʉʉ yɛkŋɛ tsʉ́ʉnɛ́nɛ wɛkŋɛ ŋɡɔ pɛkŋɛ ɡɛ pɔ́. Pɛkŋɛ pɔ́ ndǔ yɔ mbí, ḿbɔ́ pʉɔ pí pɔ́p sɑ́ŋnɛ nu lɑ ŋ́ɡɛ, ŋ́ɡɛ pɔ mɛnu mi ɛ́ tʉ́ʉnɛ ndʉ́ŋndʉŋ, ḿbɛn ńzúꞋ pɔ ndɑꞋ ntsu-Sɛ́.

¹³Pɛkŋɛ nɑ́ŋ ḿbɔ́ ńzẅíꞋlɛ yúu sʉ́Ꞌnɛ yi pɛkŋɛ sɛ́ ńjí ŋɡɔ pɛkŋɛ ŋ́ɡɛ ŋ́ɡẅɛɛ. Mbɑ lɛ́Ꞌlɑ́Ꞌ yi Sɛ́ wɛkŋɛ wɛ́ ɡwɛ́, Ŋɡɑ́luk Yɛ́su Kɛlístɔ ɡʉ ńdɑ́Ꞌ ńnyɛt nɛɡúꞋ wɛ.

¹⁴KwɑꞋ jʉ́ kɑ ɡɑ́ tú yɛ́ ńdɔk ńzúu tú yɛkŋɛ, nɛlɔk ńtsúꞋ wɛkŋɛ nǔu mɛnu kɛpɔŋ mɛkŋɛ tsʉʉ. A kɑ niitɛ wɛkŋɛ, pɛkŋɛ tsʉ́Ꞌ pʉɔ pɛ́, ḿbɔ́ pʉɔ kɛ́ lɔ́Ꞌ, ńtsʉ́Ꞌ ńníꞋ tú ŋ́ɡɛ pɔ yúu mi ɛ́ pɔŋnɛ.

¹⁵Mɔnɛ mɛnu mi ɔ ɡẅɛɛ nɛ kɛ́ ńcú mbɔ̌ pʉɔ cúnɛ, ŋ́ɡɔ́ ńcú nɛlɔk nɛníꞋ mɛtʉʉ mɔ́p, nɛlɔk ńnyɛt ŋu nɛ́ yúu mi ɑ fɑɑnɛ́nɛ, ńdɔk pɔ mɛtʉʉ-Sɛ́. Kɔɔ ŋu ɡwɑ́k wú!