Read Ngomba Filɛmɔ̂ŋ 1 Bible Online

Filɛmɔ̂ŋ 1 - Ngomba bible

Filɛmɔ̂ŋ 1

¹Yɔ ŋwɑꞋnɛ fú mbɔ̌ mɔ Pɔ̂l, ŋɡɑŋtsɑ́ŋ mbíꞋ nu-Yɛ́su Kɛlístɔ. Pɛk Timɔtɛ̂ɛ ẅí ɑ mɔ́ɔmɑ́ mɔ nzʉʉ Yɛ́su Kɛlístɔ ɡɑ́nɛ yɔ ŋwɑꞋnɛ mbɔ̌ ɡu Filɛmɔ̂ŋ. Ɔ mɔ́ɔmɑ́ wɛk wɛ tʉʉndɛn, pɛkŋɛ pɛtsʉʉ tɛmtɛ ɛ́fɑꞋ nǔu nu-Yɛ́su Kɛlístɔ.

²Ɛ́ yú, ḿbɛn ḿbɔ́ yɛ́ Apíyɑ, mɔ́ɔmɑ́ wɛk wɛ mɑŋɡɛ́, mbɑ yɛ́ Alɛshipɛ, ŋɡɑŋku wɛkŋɛ tsɛt ntsɔ, ŋ́ɡɛ cúꞋlɛ-pʉɔ-Kɛlístɔ yi ɛ́ kúunɛ ndɑ́ ɡu.

³Tɑ̌ɑ wɛkŋɛ Sɛ́, mbɑ Tsɑpʉɔ Yɛ́su Kɛlístɔ pɔ́ ḿbɔ́ nɛ́ pʉʉ, ḿbɔ́ ńníꞋ mɔ́fíitɛ tʉ́m pʉʉ.

⁴Mɔ́ɔmɑ́ mɔ Filɛmɔ̂ŋ, mɔ sɛ́ ŋ́ɡɑ́ pɑ́Ꞌlɑ́ mbɔ̌ Sɛ́ ŋkɑ́ tsʉʉ, ŋkɑ́ yi n cɛꞋlɛ́nɛ Sɛ́ n cɛꞋlɛ nǔu yú tú.

⁵Ŋ ɡɑ́ pɑ́Ꞌlɑ́ mbɔ̌ wɛ́ mbíꞋŋɡɔ mɔ sɛ́ ńzúꞋ pɛ́ lɛꞋlɛ ntɛ́ ŋkɔŋɛ yí ɔ ɡẅɛɛnɛ nzʉʉ pʉɔ-Sɛ́ mbɑ ntɛ́ yi ɔ lɔknɛ ńzɑ́p tʉ́m yú nǔu Tsɑpʉɔ Yɛ́su Kɛlístɔ.

⁶Mɔ sɛ́ ḿbúꞋ mbɔ́ mbɔ̌ Sɛ́ ŋɡɔ ɑ lɔk pɑ́Ꞌ pɛkŋɛ tɛmtɛnɛ, ɛ́ fú nǔu nɛzɑ́p tʉ́m nǔu wɛ́ lɑ́, ŋ́ɡɛ ŋɡɔ ɔ tsuŋ ńjí mɛnu sʉ́Ꞌnɛ mi ɛ́ píkŋɛnɛ ŋɡɔ pûu ɡɛ lɑ ńdɔk ɛ́fɑꞋ mbɔ̌ Kɛlístɔ.

⁷N cú mbíꞋŋɡɔ, ŋkɔŋɛ yi ɔ ɡẅɛɛnɛ kɑ ɡɛ n tsɑ́ɑtɛ tɛꞋ. Mɔ́ɔmɑ́ mɔ, tʉ́m yɑ́ɑ pɔ́tnɛ, ɛ́ fú nǔu pɑ́Ꞌ ɔ kɑ kuutɛ́nɛ pʉɔ-Sɛ́.

⁸Mɔ ŋɡɑŋntúu-Kɛlístɔ, n zɛɛ ŋ́kuꞋ nɛsẅíi wú nɛ́ yúu mi ɛ́ píkŋɛnɛ ŋɡɔ ɔ ɡɛ lɑ́, ɛ́ fú nǔu yúu mi ɔ sɛ́ ŋ́ɡɛ,

⁹n jʉ́ɔ ŋɡɔ ŋ ɡʉ ńdɛɛ nǔu ŋkɔŋɛ yúu, ḿbúꞋ mbɔ́ mbɔ̌ ɡu púꞋnɛ. Tɛ mbɑ pɑ́Ꞌ mɔ Pɔ̂l, n tsʉ́Ꞌ pɔ ndwɛn ndʉ́m, ḿbɛn ŋ́ɡɔ́ ḿbɔ́ ŋkɔ̂ɔnɛ, ḿbɔ́ ndɑ́tsɑ́ŋ ntɛ́ Yɛ́su Kɛlístɔ lɑɑ.

¹⁰Mɔ sɛ́ ḿbúꞋ mbɔ́ mbɔ̌ ɡu nǔu tú-Ɔnɛsimɛ, ɑ tsʉ́Ꞌ mɔ́ɔ wɑɑ nǔu nu-Yɛ́su ndɑ́tsɑ́ŋ.

¹¹Ɛ́ kɑ pɔ́ yɛcɔ́ ŋkɑ́ ɔ pɔɔ ŋ́ɡʉ̈ɔꞋ wɛ́ pɔ́ lɑ́, ɛ́ kɛ ḿbɔ́ ŋkɔ̂ɔnɛ ɔ ɡɔ́ ḿbɔ́ ŋ́ɡʉ̈ɔꞋ wɛ́, m bɔ́ ŋ́ɡʉ̈ɔꞋ wɛ́ ɡúu.

¹²N túu wɛ́ ŋɡɔ ɑ pɛn nzʉʉ ńtsɛ́t wú. A pɑ́Ꞌɑ ḿbɔ́ tʉ́m yɑ́ɑ.

¹³N jʉ́ɔ ŋɡɔ ɛ́ ḿbɔ́ ḿbɔŋ ŋɡɔ ɑ pɔ́ pɔ nɛjɔ́ŋ mɔ, ḿbɔ́ ɛ́fɑꞋ fɑꞋ yi ɔ pɛ́Ꞌnɛ ḿbɔ́ zɑ́Ꞌnɛ, mbɔ ɔ fɑꞋ, nǔu ŋkɔ̂ɔnɛ yi mɔ nǔu mɛŋkʉ ntɛ́ Ŋkʉʉ sʉ́Ꞌnɛ lɑɑ.

¹⁴Lɑ́, mɔ ŋ́kɑ́ɑ ŋ́kɔŋ nɛɡɛ yɛcɔ́ yúu tɛ ɔ zúꞋ zúꞋnɛ pɔ́. Ŋ kɑ́ pɔ́ ŋ́kɔŋ nɛtsʉ́ʉnɛ wú tsʉ́ʉnɛ́nɛ lɑ ɔ ɡɛ nu sʉ́Ꞌnɛ nǔu mɔ pɔ́. Mɔ sɛ́ ńtsɑ́ɑ ŋɡɔ ɔ ɡɛ pɔ yúu mi ɔ kɔŋnɛ.

¹⁵Lɛ́Ꞌcɔ́, mbɔ ɑ kɑ nɑ́Ꞌ ɛ́fú nɛjɔ́ŋ ɡu ŋ́ɡʉ nɛpɔ́ yi ɔ ɡʉ ŋ́ɡɛ ḿbɛn ŋ́ɡɔ́ jʉ́ɔ wɛ́, ɛ́ pɔ́ pɑ́Ꞌ pʉʉ nɛ́ ɡʉ tsʉ́Ꞌ ńnɑ́ŋ pɔ ŋkɑ́ tsʉʉ.

¹⁶A pɔɔ pɛn ḿbɔ́ pɔ ŋkwɑɑ pɔ́. A lɛɛ ŋkwɑɑ, ńtsʉ́Ꞌ ḿbɔ́ pɔ mɔ́ɔmɑ́ wu ẅí ɔ ɡʉ ŋ́kɔŋ tɛꞋ. A mbɔ̌ mɔ, ḿbɔ́ tʉʉndɛn tɛ ŋkɑ́ yɛ́sʉ́Ꞌ pɑ́Ꞌ ɑ ɡʉ ḿbɔ́ mbɔ̌ ɡu? MbíꞋŋɡɔ ɑ kwɑꞋ ŋumɛsɔŋ, ḿbɛn ḿbɔ́ mɔ́ɔmɑ́ wu nzʉʉ Yɛ́su Kɛlístɔ.

¹⁷Ɛ́ lɑɑ ḿbɔ́ yi ɔ jí ŋɡɔ pûu nǔu tɑ́Ꞌ nu, ɔ kúkŋɛ wɛ́ pɑ́Ꞌ ɑ pɛ́Ꞌnɛ ḿbɔ́ mɔ, mbɔ ɔ kúkŋɛ wɑ́ɑ pɔ́Ꞌɔ,

¹⁸ḿbɔ́ yi ɑ kɑ pʉ́ʉpɛ yɛcɔ́ yúu mbɔ̌ ɡu, kɛ ɔ sɛ́ ŋ́kɑ́ pɔ yɛcɔ́ yúu mbɔ̌ wɛ́ ɔɔ, ɔ nɑ́ ŋ ɡɛ ńtú mbɔ̌ ɡu.

¹⁹KwɑꞋ mɔ Pɔ̂l n dɔknɛ pɔ́ yɑ́ɑ ŋ́ŋwɑꞋnɛ yɔ zʉꞋ, ŋɡɔ ŋ ɡʉ ŋ́ɡɛ ńtú mbɔ̌ ɡu. Lɑ́ jí ŋɡɔ ŋ ɡẅɛɛ yɛcɔ́ yúu mi ɛ́ lɑɑ ḿbɔ́ m bíkŋɛ ŋɡɔ ɔ tú mbɔ̌ mɔ. Ɛ́ pɔ́ pɑ́Ꞌ ɔ ɡɔ́ ŋ́ɡẅɛɛ nɛpɔ́ ẅi ɔ ɡẅɛɛnɛ ŋkɔ̂ɔnɛ tɛꞋ, ńtẅɛꞋ pɔ wɑ́ɑ.

²⁰Mɔ́ɔmɑ́ mɔ, sɛ́sẅíi lɔk lík-Tsɑpʉɔ ŋ́ɡɛ yúu mi mɔ sɛ́ ńdɔ́ɔ mbɔ̌ ɡu. Lɔk pɑ́Ꞌ pûu lɑtnɛ mbʉʉ nǔu Kɛlístɔ, ḿbɔ́tnɛ tʉ́m yɑ́ɑ.

²¹N dɔk pɔ pɑ́Ꞌ ɔ ŋu ńzúꞋ nu lɑ ŋ́ŋwɑꞋnɛ yɔ ŋwɑꞋnɛ. Mɔ sɛ́ ńjí ŋɡɔ ɔ ɡʉ ŋ́ɡɛ yúu mi mɔ sɛ́ ḿbíkŋɛ mbɔ̌ ɡu tɛ ńdɛɛ pɔ́Ꞌɔ.

²²Pɛn ńniitɛ lûmndɑ́, ńdɔk ńzẅíꞋlɛ wɑ́ɑ mbíꞋŋɡɔ mɔ sɛ́ ŋ́kwɑŋɛ ŋɡɔ Sɛ́ lɑɑ ńzúꞋ púꞋ mbɔ́ yʉ́ʉ, mbɔ pɛ́ ɡʉ ḿbɛn ḿbɑꞋ wɑ́ɑ mbɔ̌ pʉʉ.

²³Ɛpɑfɑlɑs, ẅi pɛknɛ́ ḿbɔ́nɛ ndɑ́tsɑ́ŋ ntɛ́ nu-Yɛ́su Kɛlístɔ cɛꞋlɛ wú.

²⁴Mbɑ Mɑ́lɛ́kúshi, mbɑ Alistɑk, mbɑ Ndɛmɑs pɔ́p Lúkɑ́shi ẅí pɛk pɛ́pɔ́p fɑꞋnɛ tɑ́Ꞌ fɑꞋ.

²⁵Tsɑpʉɔ Yɛ́su Kɛlístɔ pɔ́ ḿbɔ́ nɛ́ pʉʉ.