Read Ngomba Ɛ́bɛlʉʉ 1 Bible Online

Ɛ́bɛlʉʉ 1 - Ngomba bible

Ɛ́bɛlʉʉ 1

¹Ɛ́ kɑ pɔ́ yɛcɔ́ ŋkɑ́, Sɛ́ cú nu mbɔ̌ pɛmɑ̂ɑŋɡɑpnjẅɛt pɛkŋɛ, nǔu mɛku tɛ ńzɑ́ɑ, mbɑ nǔu mɛntɛ́ tɛ ńzɑ́ɑ. Pɔ́Ꞌɔ, ńdɛɛ nǔu pɑcẅiŋkʉʉ pɛ́.

²Ɛ́ kɛ́ ḿbɔ́ nǔu yɛkŋɛ kɛm-njí yɔ yí ɛ́ tsʉ́Ꞌ ḿbɔ́ pɔ yɛ́ lɔk ndẅiklɛ, ɑ cú nu mbɔ̌ pɛkŋɛ, ŋ́ɡɔ ńcú, ńdɛɛ pɔ nǔu Mɔ́ɔ nɛ. A pɔ́ jʉ́ ẅi ɑ kɑ lɛɛnɛ nǔu wɛ́, ńniitɛ ndǔmbí tsʉʉ, ḿbɛn ńzɑ́p wɛ́ pɑ́Ꞌ mbɑ kʉ̈ɔ́lɑ́ ɡʉ ńdɑ́Ꞌ ḿbɔ́ pɔ yɛ́.

³Pɛ́ fú pɔ nǔu mɔ́ɔ wɔ lɑ ńjʉ́ɔ pɑ́Ꞌ nɛɡúꞋ Sɛ́ kɛ́ ndẅiklɛ pɔ́Ꞌɔ. Ɛ́ lɑɑ ḿbɔ́ yi Sɛ́ ŋɡɔ́ku ɔɔ, mbɔ mɔ́ɔ nɛ pɛn ḿbɔ́ yɛ́ pɔ kwɑꞋ pɔ́Ꞌɔ. A jʉ́ ẅi ɑ lɔk pɔ mɛtʉʉ mi ɛ́ nǔu sẅiŋɛ yɛ́, ńtɔ́ɔtɛ mbɑ kʉ̈ɔ́lɑ́ yi ɛ́ ndǔmbí tsʉʉ. A kɑ pɔ́ tɛ ŋ́ɡɛ yúu mi Sɛ́ sɛ́ ɛ́fú nǔu ńdikŋɛ mɛnu kɛpɔŋ pʉɔmɛsɔŋ tɛ ɛ́ ḿmɛ, ŋ́ɡʉ nɛ́ tʉ́nɛ́pú, ńnɑ́ŋ nǔu ɡúŋ-pɔ́-Sɛ́ yi tʉʉ, jʉ́ Sɛ́ ẅí ɑ sɑ́Ꞌnɛ mbɑ kʉ̈ɔ́lɑ́.

⁴Ɛ́ kɑ lɛɛ pɔ́Ꞌɔ, Mɔ́ɔ lɛɛ pɛcʉ̈ɔ́Ꞌ-Sɛ́, lɑ́ Sɛ́ ɡɑ́ lík yɛ́, ɛ́ nyɛt ŋɡɔ ɑ ɡúꞋ ńdɛɛ wɔ́p.

⁵Sɛ́ ŋkɑɑ mɔ́ zɛɛ ńcú mbɔ̌ wɛcɔ́ cʉ̈ɔ́Ꞌ wɛ ŋɡɔ: «Ɔ mɔ́ɔ wɑ́ɑ tɛ fú lɔ́Ꞌnɛ m bɔ́ Tɑ́t wu pɔ́.» A ŋ́kɑɑmɔ́ zɛɛ ńcú mbɑ nǔu wɛcɔ́ ŋɡɔ: «Mɔ, ŋ ɡʉ ŋ́ɡɛ ḿbɔ́ mbɔ̌ wɛ́ ḿbɔ́ tɑ́t wɛ ɑ pɔ́ mbɔ̌ mɔ ḿbɔ́ mɔ́ɔ wɑ́ɑ pɔ́.»

⁶Lɑ́ ɛ́ kɑ kɛ́ ŋ́ɡʉ ŋkɑ́ yi Sɛ́ kɑ pɔ́ ŋ́ɡʉ ŋ́ɡɛ Mɔ́ɔ nɛ ẅí jʉ́ pɔ́nɛ túmbi nǔu mbɑ kʉ̈ɔ́lɑ́ tɔ́ ndǔmbí, jʉ́ Sɛ́ cú ŋɡɔ: «Ɛ́ pɔŋ ŋɡɔ pɛcʉ̈ɔ́Ꞌ pɛ́ jʉ́ Sɛ́ pɛ́tsʉʉ ɡúꞋlɛ wɛ́,»

⁷ŋ́ɡʉ nǔu pɛcʉ̈ɔ́Ꞌ pɛ́ ńcú ŋɡɔ: «A ɡɛ pɛcʉ̈ɔ́Ꞌ pɛ́ pɔ́ pɔ pɑ́Ꞌ fɛfʉ̈ɔt lɑ́ ḿbɛn ŋ́ɡɛ ɡɑŋfɑꞋ pɛ́ ɛ̂pɑ́ pɔ́ pɑ́Ꞌ mɛlʉ́m-múk lɑ́.»

⁸Lɑ́ ŋ́kɛ́ ŋ́ɡʉ nǔu mɔ́ɔ nɛ, ɑ cú ŋɡɔ: «Gu Sɛ́, kɔꞋ-nɛfɔɔ nú ńdɑ́Ꞌ ḿbɔ́ pɔ ɡú.» Ḿbɛn ŋɡɔ: «Ntɛ́ yi ɔ sɛ́ ńdɔk ɛ́sɑ́Ꞌ lɑ́Ꞌ yú, ɛ́ ndʉ́ŋndʉŋ.

⁹Ɔ kɔŋ nu yi ɛ́ tʉ́ʉnɛ ndʉ́ŋndʉŋ, ḿbɑɑ yi ɛ́ kɑ́ tʉ́ʉ.» Ɛ́ yúu mi ɛ́ ɡɛnɛ pɛ́ jí, mɔ Sɛ́ wu kɑ zɔ́Ꞌnɛ wú ńdɔk wú ŋ́ɡɛ yúu, mbʉʉ yu pɔŋ nǔu tɛꞋ. Ŋ kɑ ɡɑ́ fuꞋ yú ńdɛɛ yɛ́ ɡɑŋku pú.

¹⁰Ḿbɛn ńcú ŋɡɔ: «A ɡu, Tsɑpʉɔ, ẅi ɔ kɑ pɔ́ nzɛnɛ ńniitɛ tsɛ́tsɑ́Ꞌ, mbɑ nɛpú kɛ ḿbɔ́ pɔ mɛfɑꞋ mú.

¹¹Mîmɑ́ mɛyúu ɡʉ ŋ́ɡɛ ḿmɛ, lɑ́ ŋ́ɡʉ nǔu ɡu, ɔ pɔ́ pɔ ɡú. Mîmɑ́ mɛyúu ɡʉ ŋ́ɡɛ ńdwɛn pɑ́Ꞌ ndẅí lɑ́.

¹²Ɔ ɡʉ ŋ́ɡɛ ŋ́kɑ́tɛ wɔ́p pɑ́Ꞌ pɛ́ kɑ́tɛ́nɛ ndẅí-fɑ́k lɑ́.» Pɛ́ ɡʉ ŋ́ɡɛ kúp wɔ́p pɑ́Ꞌ pɛ́ kúpmɛ ndẅí lɑ́. Lɑ́ ŋ́ɡʉ nǔu ɡu, mbɔ ɔ ɡʉ ńdɑ́Ꞌ mbɔ́ pɔ́ ɡú, yu luk kɛ́ lɑ́Ꞌ ḿmɛ pɔ́.

¹³Sɛ́ kɑ́ pɔ́ ńzɛɛ ńcú nɛ́ wɛcɔ́ cʉ̈ɔ́Ꞌ wɛ ŋɡɔ: «Tɔ́ ńnɑ́ŋ nǔu ɡúŋ-pɔ́ yɑ́ɑ yi tʉʉ ńzẅíꞋlɛ n dɔk ɡɑŋmbuu pú, ŋ́ɡɛ ntíknɛ-mɛku mú pɔ́.»

¹⁴Nu-pɛcʉ̈ɔ́Ꞌ-Sɛ́ zɛɛ pɑ́Ꞌɑ ḿbɔ́ kʉ̈ɔ́? Pɔ́p pɔ́ pɔ mɛzẅikŋɛ mi ɛ́ fɑꞋnɛ mbɔ̌ Sɛ́, ɑ sɛ́ ńtúu wɔ́p ŋɡɔ pɔ́p ɡʉ ɛ́fɑꞋ fɑꞋ yi ɛ́ ɡʉ cẅɛ́lɛ́ pʉɔ pi jʉ́ Sɛ́ ɡʉ ńtɑ́ɑ ŋ́ɡɛ pɔ́p luk.