Read Ngomba Ɛ́bɛlʉʉ 12 Bible Online

Ɛ́bɛlʉʉ 12 - Ngomba bible

Ɛ́bɛlʉʉ 12

¹Ɛ́ ɡʉ nǔu pɛkŋɛ, pʉɔ ɛ̂pɑ́ pɛtsʉʉ tʉ̈ɔ́Ꞌlɛ wɛkŋɛ ńníꞋ sɔŋ, ḿbɔ́ ńnyɛt wɛkŋɛ nɛ́ sɛ̂ndúŋ. Pɔ́Ꞌɔ lɑ́, pɛkŋɛ ńtsʉ́ʉ mbɑ kʉ̈ɔ́ lɑ́ yi ɛ́ sɛ́ ńtɑɑtɛ wɛkŋɛ ḿmɛꞋ, kɛ́ likŋɛ mɛnu kɛpɔŋ mí ɛ́ ɡẅɛɛnɛ wɛkŋɛ tɛ ńtsɑ ńtsʉ́Ꞌ mɑt. Pɛkŋɛ mɛꞋ, ńtɑ́ɑmɛ yɛkŋɛ ndʉ́ɔlɛ́ yi Sɛ́ cúnɛ ŋɡɔ mbɔ pɛkŋɛ tɑ́ɑmɛ. Pɛkŋɛ pɔ́ tɛ ḿbɔ́ ŋ́kʉɔ kɔɔ pɛkŋɛ kɑ́ɑ.

²Pɛkŋɛ pɔ́ ńtík mík pɔ nǔu Yɛ́su ẅi ɑ kɑ zíꞋnɛ wɛkŋɛ nɛzɑ́p tʉ́m nǔu Sɛ́, jʉ́ pɔ́nɛ ŋu ẅi ɑ ɡʉ ńdɑ́Ꞌ ńníꞋ wɛkŋɛ nǔu mbɔ́ Sɛ́ pɔ tɑ́Ꞌ ŋkɑ́. A kɑ nɑ́ tsɑ́ɑtɛ yi ɛ́ kɑ pɔ́nɛ yɛ́, pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ ɑ sʉk sʉknɛ, ɑ pɔɔ lɔk sʉ́ʉ ẅi ɛ́ nǔu nɛpfú pɔ́Ꞌɔ ɛ́fúŋ yɛcɔ́ nu pɔ́. A ŋkɔ̂ɔnɛ ńnɑ́ŋ mbʉʉ kɔꞋ-nɛfɔɔ-Sɛ́, nǔu ɡúŋ pɔ́ yɛ́ yi tʉʉ.

³Pʉʉ zɛɛ ńnɑ́ŋ ŋ́kwɑŋɛ pɔ Yɛ́su, ɡɑŋmɛfɑɑnɛ kɑ pɔ́ ḿbɑɑ wɛ́, ŋ́ɡɑ́ɑnɛ wɛ́, ɑ kɛ́ ɛ́sʉk sʉknɛ. Pʉʉ ɡɛ pɔ́Ꞌɔ ńjí ŋɡɔ tʉ́m yʉ́ʉ kɛ́ pɔ́t pʉʉ kɑ́ɑ pɔ́.

⁴Pʉʉ zɛɛ ḿbɛ́t pɔ kɛ́ lɔk pɑ́Ꞌ pʉʉ sɛ́ ńdʉꞋ nu kɛpɔŋ, ḿbyɛ́p ntsɔ tɛ pɛ́ tswɛt mɛci mʉ́ʉ.

⁵Pʉʉ likŋɛ pɑ́Ꞌ Sɛ́ sɛ́ ńníꞋ mɛtʉʉ mʉ́ʉ pɑ́Ꞌ ŋu níꞋnɛ mɛtʉʉ-mbɔ́ŋkʉ̈ɔ́ pɛ́? A tsɛt ŋwɑꞋnɛ-Sɛ́ ɛ̂wɑ́ ńcú ŋɡɔ: «Mɔ́ɔ wɑɑ, Tsɑpʉɔ lɑɑ ḿbɔ́ ŋ́kɑkŋɛ wú, Ɔ pɑ́ɑ nɛɡwɑ́k nu nǔu, A lɑɑ ńcʉ̈ɔ́k wú ɔ pɑ́ɑ nɛcitɛ mbʉʉ

⁶mbíꞋŋɡɔ Tsɑpʉɔ sɑ́Ꞌ pɔ ŋu ẅi ɑ sɛ́ ŋ́kɔŋ wɛ́.» A lɔk kɛm yúu ńtswɑ́ɑ mbɑ wɔ̌ lɑ́ ẅi jʉ́ Sɛ́ jínɛ ŋɡɔ ɑ mɔ́ɔ nɛ.

⁷Pʉʉ lɑɑ ḿbɔ́ ńjʉ́ɔ ŋɡʉ̈ɔ́Ꞌ pʉʉ sʉk sʉknɛ, mbíꞋŋɡɔ Sɛ́ lɔk ŋ́kɑkŋɛ wʉ́ʉ kɑkŋɛ́nɛ ntɛ́ pɑ́Ꞌ pʉʉ mbɔ́ŋkʉ̈ɔ́ pɛ́, ḿbɔ́ pɛ́ jʉ́ɔ mɔ́ɔ ẅínɛ tɑ́t wɛ ŋkɑɑ kɑkŋɛ wɛ́ pɔ́ ɡɔ́?

⁸Sɛ́ lɑɑ mbɔɔ kɑkŋɛ wʉ́ʉ pɑ́Ꞌ ɑ kɑkŋɛ mbɔ́ŋkʉ̈ɔ́ pɛ́ pɔ́, mbɔ pʉʉ lɔk ḿbɔ́ pɔ pɔ́ɔɡɑ́ɑ, mbɔɔ pɔ́ kwɑꞋ pʉɔ pɛ́ pɔ́.

⁹Pɑ́Ꞌ pɛtɑ́t pɛkŋɛ pɛ́ ndǔ tsɛ́tsɑ́Ꞌ kɑ pɔ́ ŋ́kɑkŋɛ wɛkŋɛ, pɛkŋɛ zúꞋ ntsu wɔ́p lɑ́, tɛ ŋkɑ́ yɛsʉ́Ꞌ pɑ́Ꞌ pɛkŋɛ ɡʉ ńnɔɔ sɛ́ mbi Tɑ́t wɛkŋɛ ẅi ɑ tʉ́nɛ́pú, ɑ ɡɑ́ luk zúꞋu mbɔ̌ pɛkŋɛ?

¹⁰Pɛtɑ́t pɛkŋɛ pɛ́ ndǔ tsɛ́tsɑ́Ꞌ kɑ pɔ́ ńzɛɛ ŋ́kɑkŋɛ wɛkŋɛ nǔu yɔp ntɛ́, ɛ́ kɑ kɛ́ ḿbɔ́ pɔ nǔu mɔ́ɔ mɔ́ŋkɑ́. Lɑ́ ŋ́ɡʉ nǔu Sɛ́, mbɔ ɑ kɑkŋɛ wɛkŋɛ, ńdɔk ŋ́ɡɛ pɔ kwɑꞋ nu sʉ́Ꞌnɛ nǔu pɛkŋɛ, nɛpɔ́ yi pɛkŋɛ ɡʉ ḿbɔ́ kɛ́ lɔ́Ꞌ pɑ́Ꞌ jʉ́.

¹¹Ɛ́ nɛ́nẅín ŋɡɔ ɛ́ ɡʉ ŋkɑ́ yi pɛ́ sɛ́ ŋ́kɑkŋɛ ŋu, nu pɔɔ ŋɡɑŋ ŋkɑ́ ɛ̂yɑ́ pɔŋ, nu pʉ́k wɛ́ pʉ́knɛ. Lɑ́ yɛcɔ́ ŋkɑ́ ŋ́ɡɛ ḿbɔ́, pʉɔ pi pɔ́p kɑ fúnɛ nǔu ńzíꞋ yúu, ɡɛ yúu mi ɛ́ ndʉ́ŋndʉŋ mbi Sɛ́, ḿbɛn ńnɑ́ŋ nɛ́ mbɔ́tnɛ.

¹²Pɔ́Ꞌɔ lɑ́, pʉʉ sɛn mbɔ́ mʉ́ʉ mi ɛ́ kɑ́ɑnɛ, ɛ́sɛn mɛkẅíꞋlɛ mʉ́ʉ mi ɛ́ sɛ́ ńzɔ́ŋɛ́.

¹³Pʉʉ nɛn nǔu sɛ̂ndúŋ ẅí ɛ́ tʉ́ʉ ndʉ́ŋndʉŋ, nɛpɔ́ yi nɛlʉ̈ɔꞋ-ku-ŋu yí ɛ́ sɛ́ ŋ́ŋíꞋnɛ kɛ́ mɛkŋɛ mbʉ̈ɔ́Ꞌnɛ pɔ́, tɛ ńtsʉ́Ꞌ pɔ́Ꞌɔ, ɛ́ fíitɛ fíitɛ́nɛ.

¹⁴Pʉʉ lɔɔ pɑ́Ꞌ pʉʉ pɛ́ pʉɔ tsʉʉ ɡʉ ńnɑ́ŋ nɛ́ mbɔ́tnɛ. Pʉʉ lɔɔ mbɑ pɑ́Ꞌ pʉʉ ɡʉ ŋ́ɡɛ yúu mi Sɛ́ kɛ́ jʉ́ɔ lɔ́Ꞌ nǔu pɔ́. MbíꞋŋɡɔ ŋu lɑɑ ŋ́ɡɛ yúu mi Sɛ́ ɡʉ jʉ́ɔ lɔ́Ꞌ nǔu, mbɔ ŋɡɑŋ ńdɑ́Ꞌ ńjʉ́ɔ Tsɑpʉɔ pɔ́.

¹⁵Pʉʉ pɑ́ɑ pɑ́Ꞌ ḿbɔ́ ŋu tɛ́m ŋkwɛn mbɔ̌ Sɛ́ ẅí ɑ sɛ́ ńdɔk nɛkɔŋ wɛkŋɛ ŋ́ɡɑ́ fuꞋ níinɛ yɛkŋɛ, ḿbɑ́ɑ ŋu wʉ́ʉ nɛshɔtnɛ, tɛ ŋ́ɡɛ mɛnu mɛ́, ńtsʉ́Ꞌ ŋɡẅɛnɛlɑŋ kɛpɔŋ, mbɔ ɑ ɡʉ ńnɔ́k pɛcɔ́ pʉɔ tsɛt cúꞋlɛ yʉ́ʉ, pʉɔ tɛ ńzɑ́ɑ ɡɛ pɑ́Ꞌ jʉ́.

¹⁶Pʉʉ pɑ́ɑ pɑ́Ꞌ ḿbɔ́ ŋu wʉ́ʉ puutɛ mbɑ wɔ̌ lɑ́ pɔ́p nɛ́ nɔɔ nɔɔnɛ, ḿbɑ́ɑ pɑ́Ꞌ ḿbɔ́ ŋu nɑ́ kɛ́ ɡɑ́ mɛkuꞋ nǔu yúu mi ɛ́ yɛ́ Sɛ́, ndʉ́ŋndʉŋ pɑ́Ꞌ Ɛzɑẅi ẅi ɑ kɑ fɛnnɛ nu-ndʉ́m ẅi ɑ kɑ pɔ́ wɛ́tɛ́, pɛ́ lɔk tɑ́Ꞌ kɑ́ŋ yúupɛjʉ́ ńzúu.

¹⁷Pʉʉ tsuŋ ḿbɔ́ ńjí ŋɡɔ ŋkɑ́ yi tɑ́t wɛ kɑ pɔ́ ŋ́ɡʉ ńníꞋ mbɔ́tnɛ nǔu wɛ́ kɑ ɡɛ ŋ́kuꞋ, tɑ́t wɛ tsʉ́Ꞌ ḿbɑꞋnɛ wɛ́ pɑꞋnɛnɛ. A lɔk nɛkíi, ńdɔɔ shʉ́ pɑ́Ꞌ tɑ́t wɛ ɡʉ ŋ́kúp kwɑŋɛ yɛ́, ḿbɔɔ nǔu kuꞋ.

¹⁸Ɛ́ ɡʉ nǔu yʉʉ ntɛ́ nɛlɔk kẅɛ́Ꞌlɛ mbɑɑtɛ Sɛ́, mbɔ ɛ́ kɑ́ pɔ́ pɑ́Ꞌ yɛ́ pɑíslɑyɛ̂l mbʉʉ nɛŋkɔ́Ꞌ-Sinɑyi yi ɛ́ pɔ́ pɔ yɛ́ ndǔ tsɛ́tsɑ́Ꞌ pɔ́. Pɔ́p kɑ jʉ́ɔ múk pɑ́Ꞌ ɛ́ kʉ́nɛ, ńjʉ́ɔ zʉꞋ sʉ́ʉ, nzɛ́nzʉ́ʉ vu, ńzúꞋ fɛ́m tsʉ́Ꞌnɛ,

¹⁹ńzúꞋ pɛ́ tɔ́ŋ ntɑŋ, ńzúꞋ yɛcɔ́ mɑ́mɑ́ ŋɡi pɔ́ ńcú nu, ńzɔt tɛ pʉɔ pi pɔ kɑ pɔ́ ńzúꞋ, pɔɔ pɛn ŋ́kɔŋ ŋɡɔ ɛ́ pɛn ŋ́kẅiꞋ ńcú yɛcɔ́ nu mbɔ̌ pɔ́p pɔ́,

²⁰mbíꞋŋɡɔ pɔ́p kɑ zúꞋ pɛ́ zɑ́p ŋɡɔ: Ŋumɛsɔŋ kɛ pɔ nɑɑ ɔɔ lɑɑ ŋ́kuu nɛŋkɔ́Ꞌ ɛ̂nɑ́ pɛ́ lɔk mɛŋɡɔꞋ ńtɛ́mtɛ wɛ́ ńjẅí, pɔ́p zúꞋ ɛ́ ɡɑ́ɑnɛ wɔ́p tɛꞋ.

²¹Yúu mi pɛ́ kɑ pɔ́ ńjʉ́ɔ, ḿvukŋɛ vukŋɛnɛ, lɑ́ Mɔ̌sɛ̂ɛ cú ŋɡɔ ɑ sɛ́ ńcʉ̈ɔꞋ cʉɔꞋnɛ tɛ ńtsʉ́Ꞌ ŋ́ɡwɛt ɡwɛtnɛ.

²²Lɑ́ ɛ́ kɛ́ ŋ́ɡʉ nǔu pʉʉ, mbɔ pʉʉ kɑ kẅɛ́Ꞌlɛ ńtɔ́ nɛŋkɔ́Ꞌ-Siyɔŋ, ɛ́ lɔk ḿbɔ́ tʉ́sɔŋ-Sɛ́ ẅi ɑ lɔ ḿbɔ́ pɔ ɡú, Yɛlúsɑlɛm ẅi ɛ́ tʉ́nɛ́pú, zʉꞋ yi pɛcʉ̈ɔ́Ꞌ-Sɛ́ kɑ́ sɑ́ŋ tɛ ńjí ndɛn mɛcúꞋlɛ mí ɛ́ zúꞋu tsɛt tsɑ́ɑtɛ pɔ́.

²³Pʉʉ kɑ kẅɛ́Ꞌlɛ mbʉʉ ńtɔ́ tsɛt cúꞋlɛ-pʉɔ pí Sɛ́ kɑ lɔknɛ wɔ́p ŋ́ɡɛ pʉɔ-pɛ́ pi pɔ́p túmbi, pɔ́p pɔ́ tsɛt tsɑ́ɑtɛ, mɛlík mɔ́p pɔ́ mɛ́ ŋwɑꞋnɛ́nɛ tʉ́nɛ́pú. Pʉʉ kɑ kẅɛ́Ꞌlɛ mbʉʉ ńtɔ́ nɛ́ kwɑꞋ nɛjɔ́ŋ Sɛ́, ɑ ndɑꞋ jʉ́, ḿbɔ́ ŋɑk pʉɔmɛsɔŋ pɛ́tsʉʉ. Pʉʉ kɑ tɔ́ nɛ́ zʉꞋ yí mɛzẅikŋɛ-pʉɔmɛsɔŋ pi pɔ́p ndʉ́ŋndʉŋ mbi Sɛ́ zúꞋu. Pɔ́p ŋkɔ̂ɔnɛ ḿbɔ́ pʉɔ-Sɛ́ pɔ tɑ́Ꞌ ŋkɑ́.

²⁴Pʉʉ kɑ kẅɛ́Ꞌlɛ mbʉʉ yʉʉ ńtɔ́ nɛ́ nɛjɔ́ŋ Yɛ́su ẅí ɑ kɑ tswɛt mɛci mɛ́ nɛlɔk ɛ́suk lɔ́Ꞌ nǔu pɛkŋɛ, ɑ nɛnkɛ́m nǔu kɑɑ yi ɛ́ yi fí, mɛci mɛ́ ɡẅɛɛ nu yi ɛ́ cú mbɔ̌ pɛkŋɛ, ɛ́ cúnɛ ńdɛɛ nu yi mɛci Ábɛɛ cúnɛ.

²⁵Pɔ́Ꞌɔ lɑ́, pʉʉ pɑ́ɑ nɛlʉꞋ nɛzẅíꞋlɛ nu yi ɛ́ cẅɛtnɛ ntsu-ŋu ẅí ɑ sɛ́ ńcú nu mbɔ̌ pʉʉ, mbíꞋŋɡɔ ḿbɔ́ yi pɛ́ kɑ níꞋ ntsɑŋ tú-pʉɔ pi pɔ́p kɑ lʉꞋnɛ nɛzúꞋ nu yi Mɔ̌sɛ̂ɛ kɑ pɔ́ ndǔ tsɛ́tsɑ́Ꞌ ḿbɔ́ ŋ́kɑ́k nɛtúutɛ nɔ́p nǔu, mbɔ pɛkŋɛ lɑɑ tɛ́m ŋkwɛn mbɔ̌ Sɛ́ ẅí ɑ tʉ́nɛ́pú, ḿbɔ́ ɛ́sẅíi wɛkŋɛ nɛ nu, mbɔ ɛ́ ŋ́ɡɛ pɑ́Ꞌ lɑ́ pɛkŋɛ pɔɔ kúu pɔ ŋɡʉ̈ɔ́Ꞌ yi ɛ́ lɛɛ yîyɑ́ pɔ́.

²⁶Sɛ́ ẅi ɑ kɑ lɑ́Ꞌ ḿbɔ́ yɛcɔ́ ŋkɑ́ ńcú nu, ŋɡi yɛ́ ɡɛ tsɛ́tsɑ́Ꞌ tsʉ́Ꞌnɛ lɑ́, ɛ́ nǔu lɔ́Ꞌnɛ, mbɔ ɑ kɑ kɑꞋ mbɔ̌ pɛkŋɛ ŋɡɔ: A ɡʉ ńdɑ́Ꞌ ḿbɛn ḿbɔ́ yɛcɔ́ ŋkɑ́, ḿbɔɔ ɡɛ ndɑꞋ tsɛ́tsɑ́Ꞌ tsʉꞋnɛ́nɛ pɔ́, mbɑ tʉ́nɛ́pú tsʉ́Ꞌnɛ yɛ́.

²⁷Yɔ nu lɔk ńcú ŋɡɔ: Ɛ́ ɡʉ ńdɑ́Ꞌ yɛcɔ́ ŋkɑ́ pɛ́ pɑꞋnɛ yúu pi ɑ kɑ pɔ́ ńnʉꞋnɛ ɛ́ zɔŋɛ, ŋ́ɡɑ́ nzʉʉ ɛ́ ḿmɛ, mbíꞋŋɡɔ ɛ́ yúu pi pɛ́ kɑ niitɛ niitɛ́nɛ, ɛ́ ŋ́ɡɛ pɔ́Ꞌɔ, ńjí ŋɡɔ yúu mi pɛ́ ńnʉꞋnɛ́nɛ kɛ́ zɔŋŋɛ, ɛ́ ɡʉ ńtsʉ́Ꞌ ḿbɔ́ pɔ ɡú.

²⁸Pɑ́Ꞌ pɛkŋɛ ɡʉ ńdɑ́Ꞌ ḿbɔ́ tsɛt nu nɛfɔɔ ni yɛcɔ́ yúu kɛ́ ńnʉꞋnɛ ńzɔŋɛ pɔ́ lɑ, pɛkŋɛ ɡɛ́mtɛ Sɛ́, ɛ́fɑ́Ꞌ mbɔ̌ wɛ́ nǔu ntɛ́ yi ɑ sɛ́ ŋ́kɔŋ, ŋ́ɡɑ́ mbʉʉ sɛ́, ḿbɔ́k wɛ́.

²⁹MbíꞋŋɡɔ Sɛ́ wɛkŋɛ, ɛ́ múk ẅi ɛ́ tɔɔnɛ yúu tsʉʉ yi ɛ́ mbɔ̌ wɛ́ ḿbɔ́ yɛ kɛpɔŋ.