Read Ngomba Ɛ́bɛlʉʉ 2 Bible Online

Ɛ́bɛlʉʉ 2 - Ngomba bible

Ɛ́bɛlʉʉ 2

¹Pɔ́Ꞌɔ lɑ́, pɛkŋɛ tsuŋ ŋ́ɡẅɛɛ nɛ́ kɛ́ ŋ́kúꞋlɛ pɔ nu yí pɛkŋɛ kɑ zúꞋnɛ, ŋ́ɡẅɛɛ tɛ mbɔɔ pɔ́Ꞌɔ pɔ́, mbɔ pɛkŋɛ ɡʉ ɛ́fɑɑnɛ sɛ̂ndúŋ, ŋ́kúu pɛ́,

²pɛkŋɛ sɛ́ ńjí ŋɡɔ, nu yi cʉ̈ɔ́Ꞌ-Sɛ́ kɑ lɔknɛ ńtɔ́ ŋkɑ́mbi, ɛ́ ŋkɑɑ mɔ́ncɛꞋ nu pɔ́. Mbɑ wɔ̌ lɑ́ ẅi ɑ kɑ pɔ́ ɛ́fɑɑnɛ yîyɑ́ nu, ńtʉʉ tú nǔu, Sɛ́ kɑ pɔ́ ńníꞋ ŋɡʉ̈ɔ́Ꞌ nǔu wɛ́ pɔ pɑ́Ꞌ ɛ́ sɛ́ ḿbíkŋɛ.

³Pɑ́Ꞌ ɛ́ kɑ pɔ́ pɔ́Ꞌɔ lɑ́, pɛkŋɛ lɑɑ ŋ́ɡwɑ́k nu nǔu mɑ́mɑ́ nu yi Sɛ́ kɑ ɡɛnɛ pɛkŋɛ luk, mbɔ Sɛ́ ŋ́ɡɛ pɑ́Ꞌ tɛ ńnɑ́ wɛkŋɛ? Tsɑpʉɔ Yɛ́su nɛ́ túmbʉʉ yɛ́ kɑ piitɛ ńzɛ nɛcú nu ɛ̂yɑ́. Pʉɔ pi pɔ́p kɑ zúꞋnɛ ntsu wɛ́, ɡʉ ńtsuŋ ɛ́sẅíi wɛkŋɛ ŋɡɔ ɛ́ kwɑꞋ mɑ́mɑ́ nu.

⁴Sɛ́ pɛn ńtɔ́ɔtɛ wɔ́p nǔu nu yi pɔ́p sɛ́ ńcú, ńdɛɛ nǔu mɛlii, pɔ́p mɛnu mɑ̌ɑmɑɑnɛ, pɔ́p mɛndɑɑkɑ́jʉɔ́ mɛntɛ́ mɛntɛ́, ḿbɛn ńdɛɛ nǔu mɛfɑꞋ mi ɑ zɑ́pnɛ nǔu wɛ́ nɛkɔŋtɛ ŋɡɔ Zẅikŋɛ Lɛ́ɛnɛ́nɛ ɡʉ ŋ́ɡɑ́ fuꞋ níinɛ-pʉɔ pɔ́p kuꞋ nɛfɑꞋ.

⁵Sɛ́ kɑ zɛɛ mbɔɔ ɡɛ ŋɡɔ pɛcʉ̈ɔ́Ꞌ pɛ́ ɡẅɛɛ nu nǔu nɛsɑ́Ꞌ ŋɡɔŋ ẅí ɛ́ sɛ́ ńtɔ́ pɔ́, ŋɡɔŋ ẅí pɛkŋɛ sɛ́ ńcú nu nǔu.

⁶Wɛcɔ́ ŋu kɑ zɛɛ ŋ́ŋwɑꞋnɛ yúu nǔu yɔ nu tsɛt yɛcɔ́ zʉꞋ-ŋwɑꞋnɛ-Sɛ́ ŋɡɔ: «Sɛ́, ŋumɛsɔŋ pɑ́Ꞌɑ ḿbɔ́ kʉ̈ɔ́ tɛ ɔ nɑ́ŋ ŋ́kwɑŋɛ wɛ́? Mɔ́ɔ ẅí ŋumɛsɔŋ pínɛ ɑ pɔ́ kʉ̈ɔ́ tɛ ɔ nɑ́ŋ ńtík wɛ́?»

⁷Ɔ kɑ ɡʉ nǔu pɑ́Ꞌ pɛcʉ̈ɔ́Ꞌ-Sɛ́ pɔ́nɛ, ŋ́kɔk wɛ́ ŋ́ɡɑ́ sɛ́ pɔ mɔ́zʉꞋ[1] ŋ́ɡɑ́ fuꞋ níinɛ yɛ́, ńtɔꞋ cɔꞋ-nɛfɔɔ tú yɛ́, yɛ́tɛ́ ɡɛnɛ ɑ ɡẅɛɛ nɛɡúꞋ.

⁸Ɔ kɑ lɔk wɛ́ ŋ́ɡɛ ŋu ẅí ɑ sɑ́Ꞌnɛ mɛyúu tsʉʉ mi ɔ kɑ niitɛ́nɛ, ŋ́ɡɛ ŋɡɔ mbɑ kʉ̈ɔ́lɑ́ zúꞋ ntsu wɛ́. Sɛ́ kɑ ɡɔ́ ńcú ŋɡɔ mbɑ kʉ̈ɔ́lɑ́ zúꞋ ntsu-ŋumɛsɔŋ pɑ́Ꞌɑ, ŋ́kɛ́ ḿbɔɔ ńcú tɛ ḿbɑꞋnɛ yɛcɔ́ yi ɛ́ ɡʉ ńnɑ́ kɛ́ zúꞋ ntsu wɛ́ pɔ́. Ɛ́ kɛ́ ḿbɔ́ ŋkɔ̂ɔnɛ pɑ́Ꞌɑ, pɛkŋɛ kɑ́ pɔ́ ńjʉ́ɔ ŋɡɔ yúu tsʉʉ sɛ́ ńzúꞋ ntsu-ŋumɛsɔŋ ɛ̂wɑ́ pɔ́.

⁹Lɑ́, yúu mi pɛkŋɛ sɛ́ ńjʉ́ɔ ŋkɔ̂ɔnɛ pɔ́ pɔ ŋɡɔ Yɛ́su ẅí Sɛ́ kɑ kɔknɛ wɛ́ ŋ́ɡɑ́ sɛ́ tɛ pɛcʉ̈ɔ́Ꞌ-Sɛ́ lɛɛ wɛ́ mɔ́zʉꞋ, Sɛ́ kɑ kɛ́ tɔꞋ cɔꞋ-nɛfɔɔ tú yɛ́, yɛ́tɛ́ ɡɛnɛ ɑ ɡẅɛɛ nɛɡúꞋ, ḿbɛn ńníꞋ mɛkuꞋ mɛ́, mbíꞋŋɡɔ ɑ kɑ pɛ́m nɛjʉ́ɔ ŋɡʉ̈ɔ́Ꞌ lɑ ḿpfú. Yɛ́su lɑɑ ḿpfú nǔu tú-pʉɔmɛsɔŋ tsʉʉ, mbɔ ɛ́ fú pɔ nǔu pɑ́Ꞌ Sɛ́ tsɑ́ɑnɛ mɛjʉ́ŋ pʉɔ tɛꞋ.

¹⁰Sɛ́ kɑ ɡɛ yúu tsʉʉ yi ɛ́ ndǔmbí ɛ́ pɔ́ ɡú, ḿbɔ́ pɔ yúu pɛ́. Pɑ́Ꞌ ɑ kɑ pɛn ḿbɔ́ ŋ́kɔŋ ŋɡɔ pʉɔ tɛ ńzɑ́ɑ ɡʉ ńtsʉ́Ꞌ pʉɔ pɛ́, ɛ́ pɔ́ tsɛt nɛɡúꞋ wɛ lɑ́, Yɛ́su pɛn ŋ́ɡẅɛɛ nɛɡɛ pɔ́p luk lɑ́, ɛ́ kɑ pɔ́ ḿbíkŋɛ ŋɡɔ ɑ ɡɛ Yɛ́su fú nǔu ŋɡʉ̈ɔ́Ꞌ yi ɑ jʉ́ɔnɛ, ŋ́kuꞋ ŋu ẅí ɑ ɡʉ ŋ́ɡɛ pɔ́p luk.

¹¹Yɛ́su ẅí ɑ zɛɛnɛ ŋ́ɡɛ pʉɔ kuꞋ pʉɔ-Sɛ́ mbɑ pʉɔ pi ɑ ɡɛ mɔ́ pɔ́p kuꞋ, pɔ́p pɛpɔ́p tɛmtɛ ḿbɔ́ pɔ pʉɔ tɑ́Ꞌ ŋu. Ɛ́ yúu mi ɛ́ ɡɛnɛ sʉ́ʉ pɔɔ kɔ́ wɛ́ nɛfúŋ wɔ́p ŋɡɔ pɔ́ɔpɛ́mɑ́ pɛ́ pɔ́.

¹²A kɑ zɛɛ ńcú mbɔ̌ Sɛ́ ŋɡɔ: «Mɔ ŋ́ɡɛ ɛ́sẅíi pɔ́ɔpɛ́mɑ́ pɑ́ɑ nɛ́ ŋu ẅí ɔ jʉ́. Mɔ ŋ́ɡɛ tʉ́ʉ tsɛt cúꞋlɛ ŋ́ɡúꞋlɛ wú.»

¹³Ḿbɛn ńcú ŋɡɔ: «Mɔ ŋ́ɡɛ ńzɑ́p tʉ́m yɑ́ɑ nǔu Sɛ́.» Ḿbɛn ńcú ŋɡɔ: M bʉ́ɔ lɑɑnɛ, mbɔ pɛk mbɔ́ŋkʉ̈ɔ́ pi Sɛ́ kɑ ɡɑ́nɛ wɔ́p mbɔ̌ mɔ tɔ́.

¹⁴Ńcú pɔ́Ꞌɔ, mbɔ́ŋkʉ̈ɔ́ ɛ̂pɑ́ pɔ́ pʉɔmɛsɔŋ. Pɔ́p pɛ́ pʉɔmɛsɔŋ pɔ́ pɔ tɑ́Ꞌ yúu, ŋ́ɡẅɛɛ mbɑp-mbʉʉ, ŋ́ɡẅɛɛ mɛci, jʉ́ nɛ́ túmbʉʉ yɛ́ kɑ pɛn ńtsʉ́Ꞌ yɛ́ ŋumɛsɔŋ pɑ́Ꞌ pɔ́p, nɛpɔ́ yi ɑ ɡʉ ńtɑ́ɑ ɛ́fú nǔu nɛvú nɛ́, ŋ́ɡẅɛɛ ŋu ẅí ɑ ɡɛnɛ pʉɔ pfútɛ, ńcẅɛ́ɛ mɛtʉʉ mɛ́. Pɛ́ fúŋ ŋɡɑŋ ŋɡɔ Sɑ́ttɑ.

¹⁵A kɑ ńtɑ́ɑ ḿpfú, nɛlɔk pɔ́Ꞌɔ, ɛ́fú tsɛt ndɑ́-ŋkwɑɑ, ńcẅɛɛtɛ pʉɔ tsʉʉ pi tɛ fúnɛ pɑ́Ꞌ pɛ́ kɑ pínɛ wɔ́p, pɔ́p ńjúk ḿbɔ́k nɛpfú tɛ mbɔ pɔ́p kɑ tsʉ́Ꞌmɔ́ ḿbɔ́ mbɔ̌ nɛvú ḿbɔ́ pɔ pɛkwɑɑ pɛ́.

¹⁶Ɛ́ zɛɛ ḿbɔ́, kwɑꞋ nɛ́nẅín, ŋɡɔ Yɛ́su ŋkɑɑ kɛ́ ńtɔ́ nɛcẅɛ́lɛ pɛcʉ̈ɔ́Ꞌ-Sɛ́ pɔ́, ɑ kɑ tɔ́ nɛcẅɛ́lɛ pʉɔ njẅɛtndɑ́-Ábɛlɛhɑ̂m.

¹⁷Ɛ́ kɑ pɔ́ pɔ́Ꞌɔ, ḿbɔ́ ḿbíkŋɛ ŋɡɔ ɑ ɡʉ nǔu mbɑ kʉ̈ɔ́ lɑ́ ḿbɔ́ pɑ́Ꞌ pɔ́ɔpɛ́mɑ́ pɛ́, ɛ́ lɛɛ pɔ́Ꞌɔ, ɑ pɔ́ nɔŋpɔꞋ wɛ ɡwɛ́ ẅí ɑ nɑ́ŋnɛ ńtsɑ́ɑ mɛjʉ́ŋ-pʉɔ, ńjí yɛ́ pɔ ndɑꞋ nɛfɑꞋ mbɔ̌ Sɛ́, nɛpɔ́ yi ɑ ɡʉ ŋ́ɡɛ Sɛ́ likŋɛ mɛfɑɑnɛ-pʉɔmɛsɔŋ.

¹⁸Ɛ́ zɛɛ fú nǔu pɑ́Ꞌ Yɛ́su nɛ́ túmbʉʉ yɛ́ kɑ jʉ́ɔnɛ ŋɡʉ̈ɔ́Ꞌ, ŋkwɑꞋnɛ pɛn ŋ́kúu wɛ́, ɑ kuꞋ nɛcẅɛ́lɛ pʉɔ pi ŋkwɑꞋnɛ sɛ́ ŋ́kúu wɔ́p ɡúu.