Read Ngomba Ɛ́bɛlʉʉ 6 Bible Online

Ɛ́bɛlʉʉ 6 - Ngomba bible

Ɛ́bɛlʉʉ 6

¹Ɛ́ yúu mi ɛ́ ɡɛnɛ ɛ́ pɔ́ ḿbíkŋɛ ŋɡɔ kɔɔ pɛkŋɛ ɡɔ́ŋ tɑ́Ꞌ ŋkɑ́ nǔu mɛnduŋmbi mɛnu mi pɛkŋɛ kɑ zɛnɛ nǔu nɛjí nu-Kɛlístɔ. Pɛkŋɛ sɑ́Ꞌ tʉʉ ńzíꞋ mɛnu mɛ́ mi pɛ́ zíꞋnɛ pʉɔ pi pɔ́p tsʉklɛnɛ nǔu nu wɛ́, tɛ pɛkŋɛ pɔɔ lɑ́Ꞌ ńjúk ńnɔŋ pɔ cʉ́ ndɛꞋ pɔ́. Pɛ́ cú nɛpɛn ḿbɛn nǔu mɛnu pɑ́Ꞌ nɛtɛ́m ŋkwɛn nǔu mɛfɑꞋ mi ɛ́ ɡɑ́nɛ pɔ nɛvú, pɑ́Ꞌ nɛzɑ́p tʉ́m nǔu Sɛ́,

²pɑ́Ꞌ nɛzíꞋ nu nǔu nɛcẅɛ́ɛ ŋki, pɑ́Ꞌ nɛzíꞋ nu nǔu nɛzɑ́p mbɔ́ tú-pʉɔ, pɑ́Ꞌ nɛzíꞋ nu nǔu nɛzẅíimɛ nǔu nɛvú mbɑ nǔu pɑ́Ꞌ Sɛ́ ɡʉ ńdɑ́Ꞌ ŋ́ŋɑk mɛtsɑŋ ńdɔk ńdẅiklɛ.

³Pɛkŋɛ nɑ́ mɔnɛ mɛnu, ńdut ŋ́ɡʉ nɛ́ mbi, pɑ́Ꞌ Sɛ́ lɑɑ ḿbɛ́m.

⁴Pɛ́ ɡẅɛɛ nɛnɑ́ mbíꞋŋɡɔ pʉɔ pi Sɛ́ ɡɛnɛ, pɔ́p jʉ́ɔ zʉꞋ fúk, ŋ́ɡɛ ńtɛ́m ŋkwɛn mbɔ̌ Sɛ́, ɛ́ tɛn pɑ́Ꞌ ɛ́ lɑɑ ḿbɔ́ ŋu ɛ́sẅíi wɔ́p nɛ́ nu tɛ pɔ́p pɛn ḿbɛn mbɔ̌ Sɛ́. Pɛ́ cú pʉɔ pɑ́Ꞌ pi pɔ́p kɑ zẅíꞋnɛ yúu mi Sɛ́ fúnɛ tʉ́nɛ́pú ŋ́ɡɑ́ pɔ níinɛ. Sɛ́ ɡɑ́ Zẅikŋɛ Lɛ́ɛnɛ́nɛ mbɔ̌ pɔ́p, pɔ́p zẅíꞋ sẅiŋɛ-sɛ́ tɛ ńzúꞋ pɑ́Ꞌ ɛ́ pɔŋnɛ, ḿbɛn ńjí mbɑ pɑ́Ꞌ mɛtʉʉ mi ɛ́ ɡʉ ńdɑ́Ꞌ lɑ ńtɔ́ pɔ́nɛ. Pɔ́p lɑɑ ŋ́kʉɔ Sɛ́, mbɔ ɛ́ tɛn pɑ́Ꞌ ḿbɔ́ pɛ́ ɡɛ tɛ pɔ́p pɛn ḿbɛn mbɔ̌ Sɛ́, mbíꞋŋɡɔ pɔ́p lɔk nɛɡɛ pɔ́Ꞌɔ, ḿbɛn ŋ́kẅíi mɔ́ɔ-Sɛ́ nǔu tʉ́ mbɑ́ŋtɛ pɑ́ŋtɛ́nɛ, ńtsɔ́Ꞌ wɛ́ ńtík pɛ́ zɔɔtɛ wɛ́.

⁷Pɛkŋɛ zɛɛ ńjí ŋɡɔ, mbʉŋ lɑɑ ńdɔ́ nǔu tsɛ́tsɑ́Ꞌ kwɑꞋ sʉ́Ꞌnɛ, yúu mi ɛ́ ɡʉ cẅɛ́lɛ́ pʉɔ pi pɔ́p ɡɛnɛ pɛ́ zʉ́Ꞌ yîyɑ́ tsɛ́tsɑ́Ꞌ ɛ́ kɔ́Ꞌ, ɛ́ pɑ́Ꞌ Sɛ́ ɡʉ níꞋ mbɔ́tnɛ nǔu yîyɑ́ zʉꞋ tsɛ́tsɑ́Ꞌ.

⁸Lɑ́ ḿbɔ́ yi cẅɛ́ɛnɑŋndɔ́ŋ pɔ́p mɛsɔpnzɔ́ŋ lɑɑnɛ ŋ́kɔ́Ꞌ nǔu yîyɑ́ zʉꞋ-tsɛ́tsɑ́Ꞌ, mbɔ ɛ́ kɛ́ cẅɛ́lɛ́ nǔu yɛcɔ́ yúu pɔ́, mbɔ Sɛ́ ɡʉ ńníꞋ ndɔɔ nǔu pɛ́ mɛꞋ, ŋ́ɡɛ ńtsʉ́Ꞌ ńtɔɔ tɔɔnɛ.

⁹Pɔ́ɔpɛ́mɑ́ pɛk pɛ́ tʉʉndɛn, pɛk kɛ́ ńcú pɑ́Ꞌɑ ḿbɔ́ ńjí kwɑꞋ sʉ́Ꞌnɛ ŋɡɔ pʉʉ nǔu sɛ̂ndúŋ wɛ sʉ́Ꞌnɛ ɛ́ pɔ́ ẅí pɛ́ lɛɛnɛ nǔu ńduk.

¹⁰Sɛ́ lɔɔ ŋ́ɡɛ nu yi ɛ́ kɑ́ tʉ́ʉ ndʉ́ŋndʉŋ pɔ́ pɔ́. Mbɔ́ ɑ pɔɔ likŋɛ yúu mi pʉʉ kɑ ɡɛnɛ pɔ́, pɑ́Ꞌ pʉʉ kɑ cẅɛ́lɛ́nɛ pɔ́ɔpɛ́mɑ́ pʉʉ pʉɔ-Kɛlístɔ, pʉʉ zɛɛ ḿbɛ́t ńcẅɛ́lɛ wɔ́p cẅɛ́lɛ́nɛ, ɛ́ lɔk ńnyɛt ŋɡɔ pʉʉ kɔŋ Sɛ́.

¹¹Yúu mi pɛk kɛ́ ḿbɔ́ ńtsɑ́ɑ pɔ́ pɔ ŋɡɔ mbɑ wɔ̌ lɑ́ tsɛtsɛt pʉʉ, kɛ́ ḿbɔ́ ɛ́sɑ́Ꞌ tʉʉ pɔ pɔ́Ꞌɔ, ńdɔk ŋ́ɡʉ nɛ́ mbi, tɛ ńdɑ́Ꞌ ŋ́kúu ndẅiklɛ nɛpɔ́ ẅi mbɑ kʉ̈ɔ́ lɑ́ yi ɑ sɛ́ ńzẅíꞋlɛ mbɔ̌ Sɛ́ ɡʉ ŋ́ɡɛ ḿbuutɛ.

¹²Kɔɔ pʉʉ tsʉ́Ꞌ pɛlɔ́ŋ. Tɛ ńtsʉ́Ꞌ pɔ́Ꞌɔ, pʉʉ pɛ́ɛ fʉꞋ nǔu pʉɔ pi pɔ́p lɔk nɛzɑ́p tʉ́m nǔu Sɛ́ mbɑ nɛzẅíꞋlɛ kɛ́ kɑ́ɑ, ńcẅɛ́ɛ yúu mi Sɛ́ kɑ kɑꞋnɛ nɛɡɑ́ mbɔ̌ pɔ́p.

¹³Pʉʉ zɛɛ ńjí ŋɡɔ Sɛ́ kɑ kɑꞋ yúu mbɔ̌ Ábɛlɛhɑ̂m. Pɑ́Ꞌ wɛcɔ́ ŋu ẅí ɑ ɡúꞋnɛ ńdɛɛ jʉ́ Sɛ́, tɛ ḿbɔ́ ɑ lɔk wɛ́ ŋ́kɑɑ kɑ́ pɔ́ ɡú pɔ́ lɑ́, jʉ́ Sɛ́ lɔk kwɑꞋ túmbʉʉ yɛ́ ŋ́kɑɑ,

¹⁴ńcú ŋɡɔ: «N cú tɛ ɛ́sẅíi nu, mɔ ŋ́ɡɛ níꞋ mbɔ́tnɛ nǔu ɡu tɛꞋ, ŋ́ɡɛ njẅɛt yu tsuŋ ńzɑ́ɑ tɛꞋ».

¹⁵Ábɛlɛhɑ̂m zúꞋ, ńzẅíꞋlɛ kɛ́ kɑ́ɑ, ɛ́ lɛɛ pɔ́Ꞌɔ, ɑ lɑ́Ꞌ ŋ́ɡẅɛɛ yúu mi Sɛ́ kɑ kɑꞋnɛ mbɔ̌ wɛ́.

¹⁶Pʉɔmɛ́sɔŋ zɛɛ ńtsʉ́Ꞌ nɛkɑɑ nu, ńdɔk lík-ŋu ẅí ɑ ɡúꞋ ńdɛɛ wɔ́p ŋ́kɑɑ, ŋ́ɡɔ kɑɑ pɔ́Ꞌɔ, ńdɔk ńnyɛt ŋɡɔ ɛ́ nu, ḿbɛn ńdɔk ńjʉ́ɔꞋ ntsu-pɑzɔŋ yîyɑ́ nu.

¹⁷Ɛ́ yúu mi Sɛ́ kɑ ɡɛnɛ. A kɑ cú nu tɛ ŋ́kɑɑ, mbíꞋŋɡɔ ɑ kɑ pɔ́ ńdɔɔ nɛ́ tsuŋ ńnyɛt mbɔ̌ pʉɔ pi ɑ kɑ kɑꞋnɛ yúu mbɔ̌ pɔ́p ŋɡɔ, yúu mi ɑ kɑ zɑ́pnɛ yi ɑ kɛ́ lɑ́Ꞌ ŋ́kúpmɛ pɔ́.

¹⁸Pɔ́Ꞌɔ lɑ́, yúu ɡú yɛ́pɑ́ yi ḿbɔ́ ɛ́ pɔɔ kúpmɛ, pɑ́Ꞌ Sɛ́ kɑ kɑꞋnɛ nu mbɑ pɑ́Ꞌ ɑ kɑ kɑ́ɑnɛ, ɛ́ pɔ́ mɛnu mi ɛ́ tɛnnɛ tɛ Sɛ́ cú pɛ́ lɔɔ kɛ́kɑ́ŋ. Ẅîwɑ́ nɛpɔ́ níꞋ mɛtʉʉ mɛ́k tɛꞋ, pɛk pi pɛk kɑ nɑ́nɛ mbɑ kʉ̈ɔ́ lɑ́, kwɑŋɛ wɛ́k tsʉ́Ꞌ ńtʉ́ʉ pɔ nǔu yúu mi pɛk zẅíꞋlɛ́nɛ mbɔ̌ wɛ́.

¹⁹Nɛpɔ́ ẅi pɛkŋɛ sɛ́ ńzẅíꞋlɛ yúu pɔ mbɔ̌ Sɛ́ ɡɛ tʉ́m yɛkŋɛ pɔ́tnɛ ńnɑ́ŋ kɛ́ ɡwɛt. Pɛkŋɛ sɛ́ ńtsuŋ ńjí ŋɡɔ pɛkŋɛ ɡʉ ńdɑ́Ꞌ ɛ́sɔ́ nɛshẅɛ́lɛ́, ŋ́kúu zʉꞋ yi Sɛ́ zúꞋu.

²⁰MbíꞋŋɡɔ Yɛ́su kɑ piitɛ ŋ́kúu zúꞋu mbíꞋ wɛkŋɛ. A pɛn ḿbɔ́ zúꞋu ŋkɔ̂ɔnɛ, ḿbɔ́ NɔŋpɔꞋ wɛkŋɛ wɛ ɡwɛ́, nǔu mɛŋɡuꞋ mɛŋɡuꞋ, nǔu ntɛ́ yɛ́ Mɛlkisɛdɛk.