Read Ngomba Ɛ́bɛlʉʉ 8 Bible Online

Ɛ́bɛlʉʉ 8 - Ngomba bible

Ɛ́bɛlʉʉ 8

¹KwɑꞋ nu yi pɛk sɛ́ ńdɔɔ nɛsẅíi wʉ́ʉ ɛ́ pʉ́ɔ ḿbɔ́ ŋɡɔ pɛkŋɛ tsuŋ ŋ́ɡẅɛɛ yɔ ntɛ́ NɔŋpɔꞋ wɛ ɡwɛ́. A kɑ kɛ́mɔ́ ńnɑ́ŋ nǔu kɔꞋ-nɛfɔɔ, nǔu ɡúŋ pɔ́-Sɛ́ yi tʉʉ, ɑ jʉ́ ẅi ɑ tsuŋnɛ ŋ́ɡúꞋ ńdɛɛ mbɑ wɔ̌ lɑ́.

²A sɛ́ ɛ́fɑꞋ fɑꞋ-NɔŋpɔꞋ wɛ ɡwɛ́ kwɑꞋ zʉꞋ yi Sɛ́ zúꞋu, tsɛt kwɑꞋ ntɑp-[4]Sɛ́. Ẅîwɑ́ ntɑp pɔ́ ẅi Tsɑpʉɔ kɑ lɔknɛ kwɑꞋ mbɔ mɛ́ ńnʉk tɛ ŋumɛsɔŋ pɔɔnɛ nʉk.

³Pɛ́ zɛɛ ńzɑ́p NɔŋpɔꞋ wɛ ɡwɛ́ pɔ nɛpɔ́ yi ɑ ɡʉ ńdɔk yúu ńtɔ́ mbi Sɛ́ ńnyɛt wɛ́ mbɑ pɑ́Ꞌ ɑ ɡʉ ńnɔŋ pɔꞋ mbi Sɛ́. Ɛ́ yúu mi ɛ́ ɡɛnɛ ɛ́ pɔ́ ḿbíkŋɛ ŋɡɔ wɛkŋɛ NɔŋpɔꞋ wɛ ɡwɛ́ pɛn ŋ́ɡẅɛɛ yɛ́ yúu mi ɑ ɡʉ ŋ́ɡɑ́ mbɔ̌ Sɛ́.

⁴Kɛlístɔ kɑ pɔ́ pɛ́Ꞌnɛ ḿbɔ́ ndǔ tsɛ́tsɑ́Ꞌ, mbɔ ɑ zɛɛ mbɔɔ nɔŋpɔꞋ pɔ́, mbíꞋŋɡɔ pɑnɔŋpɔꞋ nǔu pɑ́Ꞌ nɛpʉ́ʉ-Mɔ̌sɛ̂ɛ sɛ́ ḿbíkŋɛ, kɑ lɑ́Ꞌ mɔ́ ḿbɔ́ ɡú.

⁵FɑꞋ yi pîpɑ́ pɑnɔŋpɔꞋ fɑꞋnɛ, ɛ́ lɔk ḿbɔ́ pɔ fʉꞋ, ńdɔk ḿbɔ́ pɔ jʉ́jʉ́ŋ nǔu kwɑꞋ nu yi ɛ́ tʉ́nɛ́pú. Ɛ́ lɔk pɔ́Ꞌɔ, ḿbɔ́ pɑ́Ꞌ Sɛ́ kɑ nyɛtnɛ Mɔ̌sɛ̂ɛ pɑ́Ꞌ ɑ ɡʉ ŋ́ɡɛ ŋkɑ́ yi ɑ kɑ pɔ́ ŋ́ɡʉ nʉk ntɑp-Sɛ́, Sɛ́ kɑ cú mbɔ̌ wɛ́ ŋɡɔ: «Lʉŋtɛ pɔ nǔu yi ŋ kɑ nyɛtnɛ wú ndǔ nɛŋkɔ́Ꞌ lɑ́».

⁶Lɑ́ ɛ́ ŋkɔ̂ɔnɛ, mbɔ Kɛlístɔ kɑ kɛ́mɔ́ ŋ́ɡẅɛɛ yɛ́ fɑꞋ ɛ́ lɛɛ yɛ́ pɑnɔŋpɔꞋ ɛ̂pɑ́ tɛꞋ, mbíꞋŋɡɔ ɑ zɛɛ ḿbɔ́ nɛnkɛ́m nǔu nu-kɑɑ yi ɛ́ pɔŋnɛ ńdɛɛ yi ŋkɑ́mbi, Sɛ́ kɑ pɔ́ ŋ́ɡwɑt yɔ kɑɑ, ŋ́kɑꞋ mɛnu mbɔ̌ pɛkŋɛ, ɛ́ pɔŋ tɛ ńdɛɛ.

⁷Yúu kɑ pɔ́ pɛ́Ꞌnɛ ńzɛɛ mbɔɔ jɑ́k nǔu nduŋmbi kɑɑ pɔ́, mbɔ pɛ́ ŋ́kɑɑ pɛn ŋ́ɡɛ yɛcɔ́ kɑɑ ńdɔk ŋ́kúpmɛ yîyɑ́ pɔ́.

⁸Pɛ́ kɑ ɡẅɛɛ nɛkúpmɛ, mbíꞋŋɡɔ Sɛ́ kɑ sɑ́Ꞌ pʉɔ pɛ́ ńcú ŋɡɔ: «Ɛ́ kɛ́ lɑɑ ḿbɔ́, yɛcɔ́ ŋkɑ́ sɛ́ ńtɔ́, mɔ Tsɑpʉɔ cúnɛ ḿbɔ́ ŋkɑ́ yi mɔ ŋ́ɡɛ ŋ́ɡwɑt kɑɑ fí tsɛtsɛt pɛkŋɛ pɛ́ pʉɔ-Íslɑyɛ̂l pɔ́p pʉɔ-Jẅídɑ.»

⁹Ɛ́ kɑ́ pɔ́ ŋ́ɡʉ ḿbɔ́ pɑ́Ꞌ kɑɑ yi ŋ kɑ ɡwɑtnɛ tsɛtsɛt pɛkŋɛ pɛmɑ̂ɑŋɡɑpnjẅɛt pɔ́p, nǔu lɛ́Ꞌ yi ŋ kɑ ɡẅɛɛnɛ pɔ́ yɔ́p, ŋ́ɡɛ pɔ́p fú tsɛt ŋɡɔŋ-Ɛ́ɡíptɔ ńcẅɛt pɔ́. Pɔ́p kɑ́ kɛ́ ńjí pɔ ndɑꞋ nɛpʉ́ʉ-kɑɑ ni ŋ kɑ ɡwɑtnɛ tsɛtsɛt pɛkŋɛ pɛpɔ́p pɔ́. Mɔ yɑ́ɑ, mɔ ŋ́kɑɑ kɛ́ ḿbɛn ɛ́sɑ́ŋ wɔ́p nǔu yɛcɔ́ nu pɔ́, mɔ Tsɑpʉɔ cúnɛ.

¹⁰Lɑ́ kɑɑ yi mɔ ŋ́ɡwɑt tsɛtsɛt pɛkŋɛ pɛ pʉɔ-Íslɑyɛ̂l pʉ́ɔ. Yîyɑ́ ŋkɑ́ ɡʉ ŋ́ɡɛ ḿbɔ́ tɛ ńdɛɛ, mɔ Tsɑpʉɔ cúnɛ Mɔ ŋ́ɡɛ jínu yɔ́p nɑ́ŋ ńtʉ́ʉ pɔ nǔu mɛnɛpʉ́ʉ mɑ́ɑ mbɑ tʉ́m yɔ́p tʉ́ʉ pɔ nǔu. M bɔ́ Sɛ́ yɔp pɔ́p pɔ́ pʉɔ pɑ́ɑ.

¹¹Ɛ́ pɔ́ ŋkɑ́ ɛ̂yɑ́, wɛcɔ́ ŋu pɔɔ pɛn ńzíꞋ ŋu-lɑ́Ꞌ wɔp nɛ́ yúu zíꞋnɛ pɔ́, ŋu kɛ́ ḿbɔɔ pɛn ńzíꞋ mɔ́ɔmɑ́ wɛ zíꞋnɛ ŋɡɔ: Jí yú nu-Tsɑpʉɔ pɔ́. MbíꞋŋɡɔ pʉɔtsʉʉ ɡʉ ńdɑ́Ꞌ ḿbɔ́ ŋkɑ́ ɛ̂yɑ́ ḿbɔ́ ńjí wɑ́ɑ. Nɛfú nǔu mɔ́yúu mɔ́ɔ ẅi ɑ tsɛtsɛt pɔ́p, ŋ́ɡʉ ŋ́kúu nǔu ndwɛn ndʉ́m.

¹²Mɔ ńzɛɛ ŋ́ɡɛ ńdikŋɛ mɛfɑɑnɛ mɔ́p ŋ́ɡɑ́ mbɔ̌ pɔ́p. Ŋ kɑ́ pɔ́ ŋ́ɡʉ ḿbɛn ŋ́kẅíitɛ mɛnu kɛpɔŋ mɔ́p pɔ́.

¹³Sɛ́ kɑ lɔk pɑ́Ꞌ ɑ fúŋnɛ yɔ kɑɑ ŋɡɔ kɑɑ fí, ńdɔk ńdɛꞋlɛ ŋɡɔ nduŋmbi kɑɑ lwɛn mɔ́. Pɛkŋɛ pɛn ńjí ŋɡɔ yúu mi ɛ́ lwɛn mɔ́, tɛ ḿbɔ́ ŋ́kúnɛ tsʉ́Ꞌ ŋ́ɡʉ pɔ nɛmɛ.