Read Ngomba Jɑ̂k 1 Bible Online

Jɑ̂k 1 - Ngomba bible

Jɑ̂k 1

¹A mɔ Jɑ̂k, mɔ ŋɡɑŋfɑꞋ-Sɛ́, mbɑ wɛ Tsɑpʉɔ Yɛ́su Kɛlístɔ. Ŋ ɡɑ́ yɔ ŋwɑꞋnɛ mbɔ̌ pʉʉ pɔ́ɔ-Sɛ́ pi pɔ́p nǔu mɛnjẅɛtndɑ́-pʉɔ-Islɑɛ̂l ntsɔ̌ppɑ́ nɛ́ nɛɡɛ́m, mbɔ pɔ́p kɑ sɑt mɔ́ zʉꞋ tsʉʉ ndǔmbí. N cɛꞋlɛ wʉ́ʉ.

²Pɔ́ɔpɛ́mɑ́ pɑ́ɑ, ŋɡʉ̈ɔ́Ꞌ mɛntɛ́ mɛntɛ́ lɑɑ ḿbɔ́ ŋ́kúu wʉ́ʉ, pʉʉ lɔk pɔ kwɑꞋ tsɑ́ɑtɛ ńcẅɛ́ɛ.

³Pʉʉ ɡɛ pɔ́Ꞌɔ, mbíꞋŋɡɔ pʉʉ sɛ́ ńjí ŋɡɔ, pʉʉ lɑɑ ɛ́sʉk ŋɡʉ̈ɔ́Ꞌ yi ɛ́ sɛ́ ŋ́kúu wʉ́ʉ, ḿbɛn ḿbɔ́ ŋ́kẅiꞋ ńzɑ́p tʉ́m yʉ́ʉ nǔu Sɛ́, mbɔ pʉʉ ɡʉ ḿbɔ́ ńtɛntɛ tɛntɛnɛ.

⁴Lɑ́, ɛ́ pɔŋ ŋɡɔ nɛtɛntɛ ɛ̂wɑ́ fɑꞋ yɛ́ fɑꞋ tɛ ḿmɛkŋɛ, ńjí ŋɡɔ pʉʉ ɡʉ ńtsʉ́Ꞌ pɛlʉ́m, ŋ́kẅiꞋ ŋ́ɡẅɛɛ mɛtʉʉ, yɛcɔ́ yúu pɔɔ jɑ́k nǔu pʉʉ pɔ́.

⁵Ŋu lɑɑ ḿbɔ́ tsɛtsɛt pʉʉ, ńtʉ́ʉ nǔu nu, jínu jɑ́k wɛ́, ɑ lɔ́ɔ mbɔ̌ Sɛ́, mbɔ Sɛ́ ɡʉ ŋ́ɡɑ́. Ɛ́ mbíꞋŋɡɔ Sɛ́ zɛɛ ńdɔk pɔ tʉ́m sʉ́Ꞌnɛ ŋ́ɡɑ́ yúu mbɔ̌ mbɑ wɔ̌ lɑ́ kɛ́ lɛmtɛ.

⁶Lɑ́ ŋɡɑŋ kɛ ńtsʉ́Ꞌ nɛlɔ́ɔ, ńzɑ́p tʉ́m yɛ́ nǔu Sɛ́ kɛ́ pɔ́ ḿmʉ́Ꞌtɛ, mbíꞋŋɡɔ ŋu ẅí ɑ mʉꞋlɛ́nɛ, ɑ pɔ́ pɔ pɑ́Ꞌ kɑnúꞋ ẅi ɛ́ tʉ́ʉnɛ ndǔ ŋki, fɛfʉ̈ɔt pɔ́ ńdɔk ḿbʉʉ, ńdɔk ńcúŋ lɑ́.

⁷Kɔɔ ntɛ́ ŋu pɔ́Ꞌɔ, kwɑŋɛ ŋɡɔ Tsɑpʉɔ ɡʉ ŋ́ɡɑ́ yɛcɔ́ mɔ́yúu mbɔ̌ wɛ́,

⁸mbíꞋŋɡɔ ŋu pɔ́Ꞌɔ, kɑ́ cú yɛcɔ́ nu tɛ ńtík ku nǔu pɔ́. A kwɑŋɛ nɛpʉʉ, ḿbɛn ŋ́kwɑŋɛ nɛcúŋ pɔ ŋkɑ́ ɛ̂yɑ́.

⁹Ɛ́ pɔŋ ŋɡɔ mɔ́ɔmɑ́ wɛkŋɛ ẅí ɑ mbúŋ tsɑ́ɑtɛ, mbíꞋŋɡɔ Sɛ́ ŋ́ŋɑ́Ꞌ ndɛn wɛ́.

¹⁰Ẅi ɑ ŋɡɑŋyúu tsɑ́ɑtɛ yɛ́ mbíꞋŋɡɔ Sɛ́ kɑ kɔk ndɛn wɛ́, lɑ ɑ jí ŋɡɔ ɑ ɡʉ ńdɑ́Ꞌ ḿmɛ yɛ́ pɔ pɑ́Ꞌ tɔ̌ɔtɔ̌ɔ mɛ nǔu nɛɡíi lɑ́.

¹¹Mɔ́nɛm tɑ́ tɛꞋ ńtɔɔ nɛɡíi ɛ́ zúu, tɔ̌ɔtɔ̌ɔ vu, wɛ nɛpɔŋ lɔk ḿmɛ, ɛ́ ndʉ́ŋndʉŋ pɑ́Ꞌ ŋɡɑŋyúu ɡʉ ŋ́ɡɛ ḿmɛ mɛfɑꞋ mɛ́ pfú.

¹²Pɔ́ttú, ŋu ẅí ŋɡʉ̈ɔ́Ꞌ kúunɛ wɛ́ ɑ tɛntɛ tɛntɛ́nɛ, mbíꞋ pɑ́Ꞌ ŋɡʉ̈ɔ́Ꞌ kúunɛ wɛ́ ɑ tɛntɛ tɛntɛnɛ lɑ́, Sɛ́ ɡʉ ńtɔꞋ ŋɡúꞋ tú yɛ́. Ɛ́ lɔk ḿbɔ́ luk kɛ́ mɛ yí ɑ kɑ kɑꞋnɛ mbɔ̌ mbɑ wɔ̌ lɑ́ ẅi ɑ ŋ́kɔŋnɛ yɛ́ Sɛ́.

¹³ŊkwɑꞋnɛ lɑɑ ŋ́kɛ́ ńtɔ́ nǔu ŋɡɑŋ, kɔɔ ɑ cú ŋɡɔ ŋkwɑꞋnɛ yɔ fú mbɔ̌ Sɛ́, mbíꞋŋɡɔ ɛ́ lɑɑ ḿbɔ́ Sɛ́ pɔɔ ɡẅɛɛ kwɑŋɛ nɛɡɛ nu kɛpɔŋ pɔ́, kwɑꞋ jʉ́ kɛ́ mbɔɔ tsʉ́ʉnɛ ŋu ŋɡɔ ɑ ɡɛ nu kɛpɔŋ pɔ́.

¹⁴Yɛ́ ntɛ́ nɛtsɑ́ɑ yúu tsʉ́ʉnɛ́nɛ wɛ́, ɑ vu nǔu ɡwɑk.

¹⁵Nɛtsɑ́ɑ yúu ɛ̂yɑ́ pɔ́ tɛ ŋ́ɡɑ́Ꞌ, ńcẅɛt nu kɛpɔŋ, nu kɛpɔŋ ɡɑ́Ꞌ ńtsʉ́Ꞌ nɛvú.

¹⁶Pɔ́ɔpɛ́mɑ́ pɑ́ɑ pɛ́ tʉʉndɛn, kɔɔ kwɑŋɛ yʉ́ʉ fúklɛ wʉ́ʉ.

¹⁷Yúu mi ɛ́ pɔŋnɛ tɛꞋ, mbɑ tsɔ́ꞋfɑꞋ sʉ́Ꞌnɛ fú pɔ tʉ́nɛ́pú, mbɔ̌ Sɛ́ ẅi ɑ kɑ niitɛ́nɛ mɔ́nɛm pɔ́p pɛcʉ̈ɔ́Ꞌ-sɑŋ nɛfɑŋ. A kɑ́ kúpmɛ, ŋ́kɛ́ mbɔɔ nzɛ́nzʉ́ʉ ɡẅɛɛ.

¹⁸Jʉ́ kɑ kɔŋnɛ, ńdɔk sẅiŋɛ yi ɛ́ nɛ́nẅín, ŋ́ɡɛ pɛkŋɛ luk, nɛpɔ́ yi pɛkŋɛ ɡʉ ḿbɔ́ mbɔ̌ wɛ́, ḿbɔ́ ntú-nu nǔu ŋɡɔŋ kʉ̈ɔ́ lɑ́ yi ɑ kɑ ɡɛnɛ.

¹⁹Pɔ́ɔpɛ́mɑ́ pɑ́ɑ pɛtʉʉndɛn, pʉʉ jí ŋɡɔ ɛ́ pɔŋ mbɔ̌ ŋu nɛjí nɛzẅíꞋlɛ nu yi pɛ́ cúnɛ, ḿbɛn ńcú yɛ́ nu ɛ́ kuꞋ kuꞋnɛ, ŋ́kɛ́ mbɔɔ fɛ́Ꞌnɛ ńzɑ́ŋ lɔ́ŋ pɔ́,

²⁰mbíꞋŋɡɔ ŋu lɑɑ ńzɑ́ŋ lɔ́ŋ, mbɔ ɑ kɑ́ pɔ́ ńdɔk ŋ́ɡɛ yúu mi ɛ́ ndʉ́ŋndʉŋ mbi Sɛ́ pɔ́.

²¹Pɔ́Ꞌɔ lɑ́, pʉʉ mɛꞋ mɛnu-ndǔmbí tsʉʉ, ḿmɛꞋ mɑt ẅí ɛ́ fúnɛ nǔu shíshí tʉ́m. Pʉʉ nɔɔ sɛ́ mbi Sɛ́, ḿbɛ́m sẅiŋɛ yi ɑ kɑ pinɛ tsɛt tʉ́m pʉʉ. Ɛ́ mbíꞋŋɡɔ ɛ́ kuꞋ nɛɡɛ pʉʉ luk.

²²Kɔɔ pʉʉ pɔ́ pɑzúꞋ sẅíŋɛ-Sɛ́ zúꞋnɛ ndɑꞋ, pʉʉ ɡɛ yúu mi sẅiŋɛ ɛ̂yɑ́ cúnɛ ŋɡɔ pʉʉ ɡɛ. Tɛ ɛ́ pɔ́ɔ pɔ́Ꞌɔ pɔ́, mbɔ pʉʉ ɛ́shɔtnɛ fʉ́klɛ mɛmbʉʉ mʉ́ʉ.

²³MbíꞋŋɡɔ ŋu lɑɑ ńzúꞋ sẅíŋɛ-Sɛ́, ḿbɛn ŋ́kɛ́ mbɔɔ ɡɛ pɑ́Ꞌ ɛ́ sɛ́ ḿbíkŋɛ pɔ́, mbɔ ŋɡɑŋ pɔ́ pɔ pɑ́Ꞌ ŋu ẅí ɑ líŋɛ́nɛ shʉ́ wɛ́ tsɛt jʉ́ɔ shʉ́, ńjʉ́ɔ pɑ́Ꞌ ɑ pɔ́nɛ.

²⁴A líŋɛ tɛ ḿbɔ́tnɛ ńnɑ́ŋ, tɛ ɛ́fú zúꞋu ŋ́ɡʉ, ŋ́ɡɔ́ɔ ńdikŋɛ pɑ́Ꞌ ɑ pɔ́nɛ.

²⁵Lɑ́ ŋu ẅí ɑ niitɛ́nɛ ḿbɛ́m nu nǔu nɛpʉ́ʉ ni yɛcɔ́ yúu kɑ́ jɑ́k nǔu pɔ́, ni ɛ́ ɡɛnɛ ŋu pɔ́ ndẅíi. A lɑɑ ńzɑ́p tʉ́m yɛ́ nǔu kɛ́ kɑ́ɑ tɛ ɑ pɔɔ pɔ́ pɔ zúꞋndikŋɛ pɔ́, ḿbɔ́ zúꞋŋɡɛ, mbɔ ɑ ɡʉ ḿbɔ́ pɔ́ttú nǔu kʉ̈ɔ́ lɑ́ yi ɑ ɡɛnɛ.

²⁶Ŋu lɑɑ ḿbɔ́ ŋ́kwɑŋɛ ŋɡɔ ɑ nǔu nu-Sɛ́, ntsu wɛ́ pɛn mbɔɔ pɔŋ, mbɔ ɑ fʉ́klɛ túmbʉʉ yɛ́. Wɛ nɛpɔ́ nǔu nu-Sɛ́ pɔ́ pɔ fɛ̌ɛ.

²⁷Nɛɡɛ ŋɡɔ nu-Sɛ́ pɔ́ kɛ́ lɔ́Ꞌ, ɛ́ píkŋɛ ŋɡɔ ŋu líŋɛ pɔ́ɔ pɛcí mbɑ pɛpfúk tsɛt ŋɡʉ̈ɔ́Ꞌ yɔp, ḿbɔ́ ŋu ẅí ɑ pɑ́ɑ mbʉʉ yɛ, ḿbɔ́k ntsɛ́llɛ́ nɛpʉ́ʉpɛ wɛ́.