Read Ngomba Jɑ̂k 2 Bible Online

Jɑ̂k 2 - Ngomba bible

Jɑ̂k 2

¹Pɔ́ɔpɛ́mɑ́ pɑ́ɑ kɔɔ pʉʉ pɔ́ ńzɑ́p tʉ́m nǔu Tsɑpʉɔ Yɛ́su Kɛlístɔ wɛkŋɛ ẅí ɑ ɡẅɛɛnɛ mɑ́mɑ́ nɛɡúꞋ, ḿbɛn ŋ́ɡẅɛɛ tɔŋ tsɛtsɛt pʉʉ.

²Pɛkŋɛ cú ŋɡɔ pʉɔ pɛpɑ́ kúu tsɛt ndɑ́-cúꞋlɛ yʉ́ʉ, tɑ́Ꞌ ŋu zẅík kwɑ́ŋ ẅi ɛ́ cɔ́k ŋkɑ́p, ḿmɑꞋ mɛndẅí ŋkɑ́p. Wɛcɔ́ mɑꞋ yɛ́ pɔ mɛcɑk-ndẅí.

³Pʉʉ tík mík nǔu ŋu ẅí ɑ mɑꞋnɛ mɛndẅí-ŋkɑ́p, ŋu wʉʉ cú mbɔ̌ wɛ ŋɡɔ zʉꞋ-pɛlʉ́m pʉ́ɔ, mbɑ̌ɑ! Tɔ́ ńnɑ́ŋ zɑ́Ꞌnɛ, ḿbɛn ńcú mbɔ̌ mbúŋ ŋɡɔ yú zʉꞋ nɛnɑ́ŋ ɡú pɔ́, ŋ́kɛ́ mbɔɔ pɔ́Ꞌɔ pɔ́ ɔ tɔ́ ńtɛ́m nzʉʉ yu sɛ́, mbʉʉ-yúu mi n tíknɛ mɛku mɑ́ɑ nǔu lɑɑ.

⁴Pʉʉ lɑɑ ŋ́ɡɛ pɔ́Ꞌɔ, pʉʉ pɔɔ ńdɔk ŋ́ɡẅɛɛ tɔŋ tsɛtsɛt pʉʉ pɔ́ ɔɔ? Pʉʉ pɔɔ ńdɔk pɔ kwɑŋɛ kɛpɔŋ ńdíŋɛ pʉɔ pɔ́ ɔɔ?

⁵Pɔ́ɔpɛ́mɑ́ pɑ́ɑ pɛ tʉʉndɛn, pʉʉ zúꞋ sʉ́Ꞌnɛ: Sɛ́ kɑ tsɔ́Ꞌ pʉɔ pí pɛ́ fúŋnɛ ndǔmbí ŋɡɔ pɛpúŋ, ńdɔk ŋ́ɡɛ pɑzɑ́p tʉ́m nǔu wɛ́ tɛꞋ, pɔ́p ɡẅɛɛ yɔ́p zʉꞋ tsɛt nu-nɛfɔɔ ni ɑ kɑ kɑꞋnɛ mbɔ̌ pʉɔ pí pɔ́p kɔŋnɛ wɛ́.

⁶Lɑ́ ŋ́ɡʉ nǔu pʉʉ, mbɔ pʉʉ kɑ cɔŋ ndɛn-pɛpúŋ. Lɑ́ pɛɡɑŋyúu kɑ́ pɔ́nɛ ɛ́fíɛt wʉ́ʉ pɔ́ ɔɔ? Pɔ́p kɑ́ pɔ́nɛ ńdɔk wʉ́ʉ ńnɛn mɛndɑ́tsɑ́ŋ pɔ́ ɔɔ?

⁷Pɔ́p kɑ́ nɛ́ sẅiŋɛ kɛpɔŋ nǔu Yɛ́su Kɛlístɔ ẅi Sɛ́ kɑ ɡɑ́nɛ lík yɛ́ mbɔ̌ pʉʉ pɔ́ ɔɔ?

⁸Ɛ́ tsʉ́Ꞌ yi pʉʉ ɡɛ pɔ́Ꞌɔ, mbɔ pʉʉ ńnɛn nǔu pɑ́Ꞌ nɛpʉ́ʉ nɛ ɡwɛ́ nǔu nu-nɛfɔɔ-Sɛ́ cúnɛ tsɛt ŋwɑꞋnɛ-Sɛ́, ɛ́ cú ŋɡɔ: «Kɔŋ mɔ́ɔmɑ́ wu ŋumɛsɔŋ pɑ́Ꞌ ɔ kɔŋ túmbʉʉ yú. Pʉʉ lɔk pɔ́Ꞌɔ, ŋ́ɡɛ sʉ́Ꞌnɛ.»

⁹Lɑ́ pʉʉ kɛ ŋ́ɡẅɛɛ tɔŋ tsɛtsɛt pʉʉ, mbɔ pʉʉ ɡɛ nu kɛpɔŋ. Nɛpʉ́ʉ-Sɛ́ ɡẅɛɛ wʉ́ʉ mbíꞋŋɡɔ pʉʉ fɑɑnɛ nɛpʉ́ʉ.

¹⁰Ŋu lɑɑ ńzɛɛ ŋ́ɡẅɛɛ nɛpʉ́ʉ-Sɛ́ tsʉʉ, lɑ́ ŋ́ɡʉ nǔu ɛ́fɑɑnɛ pɔ ndɑꞋ tɑ́Ꞌ, mbɔ ɑ fɑɑnɛ pɔ nɛpʉ́ʉ tsʉʉ.

¹¹MbíꞋŋɡɔ Sɛ́ ẅi ɑ kɑ cúnɛ ŋɡɔ: «Kɔɔ ɡɛ ɡɑp, ɑ kɑ pɛn ńcú ŋɡɔ: Kɔɔ jẅí ŋu.» Lɑ́ ḿbɔ́ yi ɔ lɑɑ mbɔɔ ɡɑp ɡɛ, ḿbɛn ńjẅí ŋu, mbɔ ɔ fɑɑnɛ nɛpʉ́ʉ nɛ́ fɑɑnɛ́nɛ.

¹²Pʉʉ ɡɔ́ ḿbɔ́ ńcú nu, ḿbɔ́ ŋ́ɡɛ pɑ́Ꞌ pʉɔ pí pɛ́ ɡʉ ńdɑ́Ꞌ ńdɔk nɛpʉ́ʉ ni ɛ́ ɡɛ pɛ́ tsʉ́Ꞌ pɛlúunút ńdɔk ŋ́ŋɑk wɔ́p.

¹³Sɛ́ ɡʉ ńdɑ́Ꞌ ḿbɔ́ ńzɑ́Ꞌ mɛntsɑŋ, mbɔɔ tsɑ́ɑ mɛjʉ́ŋ kɛ́tsɑ́ɑmɛjʉ́ŋ pʉɔ pɔ́, lɑ́ ḿbɔ́ yi ŋu kɑ tsɑ́ɑ mɛjʉ́ŋ, mbɔ ɑ ɡʉ ńdɑ́Ꞌ ńdɔk pɔ́Ꞌɔ, Sɛ́ pɔɔ wɛ́ ŋɑk.

¹⁴Pɔ́ɔpɛ́mɑ́ pɑ́ɑ, ŋu lɑɑ ŋɡɔ ɑ zɑ́p tʉ́m yɛ́ nǔu Sɛ́, ḿbɔɔ ɛ́fɑꞋ mɛfɑꞋ ńdɔk ńnyɛt pɔ́, mbɔ ɛ́ ɡʉ ńcẅɛ́lɛ́ wɛ́ nǔu kʉ̈ɔ́? Tɛ mbɔ yîyɑ́ ntɛ́ nɛzɑ́p tʉ́m nǔu Sɛ́ ɡɛ ŋu luk?

¹⁵Pɛkŋɛ cú ŋɡɔ wɛcɔ́ mɔ́ɔmɑ́ wɛkŋɛ wɛ mbɛ́ɛnɛ mbɑ wɛ mɑŋɡɛ́, pɔ́ kɛ́ mɑꞋ ndẅí, ḿbɛn ḿbɔ́ ńjɑ́k yúu mi pɔ́p ɡʉ ŋ́kwɛ́t nǔu lɛ́Ꞌlɑ́Ꞌ,

¹⁶wɛcɔ́ ŋu nǔu pʉʉ pɛn ńcú mbɔ̌ pɔ́p ŋɡɔ: «Pʉʉ nɛn nɛ́ ku yʉ́ʉ yi sʉ́Ꞌnɛ. Mbʉʉ yʉ́ʉ tɔɔnɛ. Pʉʉ kwɛ́t ńzwɛ́t,» ńcú pɔ́Ꞌɔ, ŋ́kɛ́ ḿbɔɔ ŋ́ɡɑ́ yɛcɔ́ yúu mi ɛ́ ɡʉ ńcẅɛ́lɛ́ wɔ́p pɔ́, mbɔ ẅîwɑ́ nɛcú ɡʉ ńcẅɛ́lɛ́ wɔ́p nǔu kʉ̈ɔ́?

¹⁷Ɛ́ pɛn ḿbɔ́ pɔ ndʉ́ŋndʉŋ pɔ́Ꞌɔ, nǔu ŋu ẅí ɑ sɛ́ ŋɡɔ ɑ zɑ́p tʉ́m yɛ́ nǔu Sɛ́. Pɛ́ lɑɑ ḿbɔɔ ḿbɔ́ ńjʉ́ɔ mɛfɑꞋ mɛ́ pɔ́, mbɔ yîyɑ́ nɛzɑ́p tʉ́m nǔu Sɛ́ fɛ̌ɛ.

¹⁸Líkcɔ́ mbɔ ŋu cú ŋɡɔ: «wɛcɔ́ ŋu sɛ́ ńzɑ́p tʉ́m yɛ́ nǔu Sɛ́, wɛcɔ́ pɔ́ fɑꞋ mɛfɑꞋ. Mbɔ ŋ ɡʉ ńcú yɑ́ɑ mbɔ̌ wɛ́ ŋɡɔ: Nyɛt wɑ́ɑ pɑ́Ꞌ ɛ́ lɑɑ ḿbɔ́ ɔ zɑ́p tʉ́m nǔu Sɛ́ kɛ́ pɔ́ ɛ́fɑꞋ mɛfɑꞋ, n dɔk mɛfɑꞋ mɑ́ɑ ńnyɛt wú ŋɡɔ n zɑ́p tʉ́m nǔu Sɛ́.»

¹⁹Ɔ sɛ́ ḿbɛ́m ŋɡɔ Sɛ́, wɛ́mɔ́Ꞌ, ɔ́ɔŋ ɛ́ pɔŋ, mɛzẅikŋɛ kɛpɔŋ pɛn ḿbɔ́ ḿbɛ́m yɔ́p pɔ pɔ́Ꞌɔ, lɑ́ ḿbɛn ḿbɔ́ ŋ́ɡwɛt.

²⁰Gɛɡʉʉ yɑ́ɑ, ɔ kɔŋ kʉ̈ɔ́? Mɔ, ŋ ɡʉ ńnyɛt wú ŋɡɔ nɛzɑ́p tʉ́m nǔu Sɛ́ yi ɛ́ kɑ́ ɡẅɛɛ mɛfɑꞋ pɔ́ fɛ̌ɛ.

²¹Sɛ́ kɑ ɡɔ́ ńcú ŋɡɔ Tɑ̌ɑ wɛkŋɛ Ábɛlɛhɑ̂m ndʉ́ŋndʉŋ mbi yɛ́, ɛ́ lɛɛ pɔ nǔu mɛfɑꞋ mɛ́ ḿbɛn ŋ́ɡɛ pɑ́Ꞌ ɑ kɑ lɔknɛ mɔ́ɔ nɛ Ɛ́sɑk ńnɔŋ pɔꞋ zʉꞋ yi pɛ́ nɔɔnɛ pɔꞋ zúꞋu.

²²Ɔ lɔk ńjʉ́ɔ ŋɡɔ wɛ nɛzɑ́p tʉ́m nǔu Sɛ́ pɔ́p mɛfɑꞋ mɛ́ kɑ tɛmtɛ ńnɛn tɑ́Ꞌ ku. Ɛ́ kɑ fú nǔu mɛfɑꞋ mɛ́ wɛ nɛzɑ́p tʉ́m nǔu Sɛ́ pɔ́ ɡú tɛ ŋ́kuꞋ.

²³Nu yi pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ntɛ́ wɛ́ fú pɔ́Ꞌɔ, ḿbuutɛ, pɛ́ kɑ ŋwɑꞋnɛ ŋɡɔ: «Ábɛlɛhɑ̂m kɑ zɑ́p tʉ́m yɛ́ nǔu Sɛ́, Sɛ́ fú nǔu, ńtsʉ́Ꞌ ńdíŋɛ wɛ́ ɑ pɔ́ mbi yɛ́, ḿbɔ́ pɔ ndʉ́ŋndʉŋ,» ɑ fúŋ wɛ́ ŋɡɔ súu nɛ.

²⁴Pʉʉ lɔk ńjʉ́ɔ ŋɡɔ ɛ́ lɛɛ pɔ nǔu mɛfɑꞋ mi ŋu sɛ́ ɛ́fɑꞋ, lɑ Sɛ́ cú ŋɡɔ ŋɡɑŋ ndʉ́ŋndʉŋ mbi yɛ́, lɑ́ ɛ́ pɔɔ pɔ́ pɔ ndɑꞋ pɑ́Ꞌ ŋɡɑŋ zɑ́pnɛ tʉ́m yɛ́ nǔu Sɛ́ pɔ́.

²⁵Ɛ́ kɑ pɛn ḿbɔ́ pɔ pɔ́Ꞌɔ, nǔu Lɑɑp, ŋɡɑŋɡɑ́ɑ mɑŋɡɛ́, Sɛ́ kɑ ɡɔ́ ńcú ŋɡɔ ɑ ndʉ́ŋndʉŋ mbi yɛ́, ńdɛɛ pɔ nǔu mɛfɑꞋ mɛ́. Pɑ́Ꞌ ɑ kɑ ɡɑ́nɛ zʉꞋ nɛlʉɔmɛ mbɔ̌ pʉɔ-Íslɑɛ̂l pí pɛ́ kɑ túunɛ, ḿbɛn ńnyɛt wɔ́p nɛ́ ndúŋ yi pɔ́p ɡʉ ńdɛɛ nǔu ŋ́ɡʉ.

²⁶Ndʉ́ŋndʉŋ pɑ́Ꞌ zẅikŋɛ lɑɑ mbɔɔ nǔu mbɑp-mbʉʉ pɔ́, mbɔ ɛ́ pfú lɑ́, nɛzɑ́p tʉ́m nǔu Sɛ́, nɛzɑ́p ẅi pɛ́ kɑ́ pɔ́ ńjʉ́ɔ mɛfɑꞋ pɔ́, mbɔ yîyɑ́ nɛzɑ́p fɛ̌ɛ.