Read Ngomba Jɑ̂k 4 Bible Online

Jɑ̂k 4 - Ngomba bible

Jɑ̂k 4

¹Mɛntsu mɛntsu pɑ́Ꞌɑ ɛ́fú ɡɔ́ tsɛtsɛt pʉʉ? Mɛlɑ́Ꞌ ɛ́fú ɡɔ́ tsɛtsɛt pʉʉ? Ŋ kwɑŋɛ ŋɡɔ ɛ́ fú nǔu yʉʉ ntɛ́ nɛtsɑ́ɑ yúu mi ɛ́ tsɛt tʉ́m yʉ́ʉ tsʉ́ʉnɛ́nɛ wʉ́ʉ.

²Pʉʉ tsɑ́ɑ yúu tɛꞋ lɑ́ ŋ́kɛ́ mbɔɔ kuꞋ nɛɡẅɛɛ pɔ́, ŋ́ɡɔ́ɔ ŋ́kɛ́ ńtsʉ́Ꞌ ńtʉ́ʉ pɔ nɛjẅí ŋu. Pʉʉ jʉ́ɔ yúu ńtík tʉ́m yʉ́ʉ nǔu, lɑ́ wɛcɔ́ nɛɡẅɛɛ pɔɔ ɡú pɔ́. Pʉʉ ɡɑɑbɛ tsɛtsɛt ḿbɔ́ mɛntsu mɛntsu, ńtɑ́k mɛlɑ́Ꞌ. Pʉʉ kɑ́ pɔ́ ŋ́ɡẅɛɛ yúu mi pʉʉ sɛ́ ŋ́kɔŋ pɔ́, mbíꞋŋɡɔ pʉʉ kɑ́ lɔ́ɔ mbɔ̌ Sɛ́ pɔ́.

³Pʉʉ zɛɛ ńdɔ́ɔ, Sɛ́ pɔɔ ɡɑ́, mbɔ ɛ́ mbíꞋŋɡɔ pʉʉ kɑ́ jí nɛlɔ́ɔ pɔ́. Pʉʉ zɛɛ ńdɔ́ɔ pɔ nɛlɔk ŋ́ɡʉ ŋ́ɡɛ yúu mi ɛ́ sɛ́ ḿbɔŋ pɔ wʉ́ʉ.

⁴Pʉʉ pɑlɑŋ nzʉʉ-pʉɔ. Pʉʉ kɑ́ pɔ́ ńjí ŋɡɔ ŋu ẅí ɑ súu-yúu-ndǔmbí, tsʉ́Ꞌ ḿbɔ́ pɔ ŋɡɑŋmbuu-Sɛ́ pɔ́ kɛ? Ŋu ẅí ɑ kɔŋnɛ yúu-ndǔmbí tsʉ́Ꞌ ḿbɔ́ pɔ ŋɡɑŋmbuu-Sɛ́.

⁵Pʉʉ kwɑŋɛ ŋɡɔ ŋwɑꞋnɛ-Sɛ́ cú ŋɡɔ: Sɛ́ kɑ́ pɛ́m ŋɡɔ pɛkŋɛ nɑ́ wɛcɔ́ ŋu jʉ́ zʉꞋ-zẅikŋɛ yi ɑ kɑ níꞋnɛ nǔu pɛkŋɛ pɔ́[1] pɛ́Ꞌɛ, ḿmɛɛ, mɛɛnɛ ńcú kii?

⁶Lɑ́, Sɛ́ kɑ lɑ́Ꞌ mɔ́ ŋ́ɡɑ́ fuꞋ níinɛ yʉkŋɛ, pɔŋtʉ́m yɛ́ nzʉʉ pɛkŋɛ ɡúꞋ ńdɛɛ kʉ̈ɔ́ lɑ́. ŊwɑꞋnɛ-Sɛ́ zɛɛ ńcú ŋɡɔ: «Sɛ́ lʉꞋ pɑŋɑ́Ꞌlɛ mbʉʉ lʉꞋnɛ, ŋ́kɛ́ ńdɔk pɔŋtʉ́m ńdíŋɛ pʉɔ pí pɔ́p kɔknɛ mbʉʉ yɔp ŋ́ɡɑ́ sɛ́.»

⁷Pɔ́Ꞌɔ lɑ́! Pʉʉ nɔɔ sɛ́ mbi Sɛ́, ńdʉꞋ Sɑttɑ, ɑ fú nɛjɔ́ŋ pʉʉ kʉ̈ɔ́.

⁸Pʉʉ kẅɛ́Ꞌlɛ mbʉʉ yʉʉ ŋ́ɡɑ́ nɛ́ nɛjɔ́ŋ Sɛ́, ɑ kẅɛ́Ꞌlɛ yɛ́ mbʉʉ ŋ́ɡɑ́ nɛjɔ́ŋ pʉʉ. Pʉʉ ɡɑŋmɛfɑɑnɛ, pʉʉ suk mbɔ́ mʉ́ʉ, pɛŋkɔŋmík, pʉʉ cẅɛɛtɛ ntsɛ́llɛ́ tsɛt mɛtʉ́m mʉ́ʉ.

⁹Pʉʉ jí ŋɡɔ pʉʉ ɡɑŋŋɡʉ̈ɔ́Ꞌ, ńdúŋ nɛvú ńdɑɑ. Ɛ́ sɛ́ ḿbíkŋɛ ŋɡɔ wʉʉ nɛɡwɛ shɔtnɛ ńtsʉ́Ꞌ nɛlɑɑ, yʉ́ʉ tsɑ́ɑtɛ shɔtnɛ ńtsʉ́Ꞌ nɛmʉk.

¹⁰Pʉʉ kɔk mbʉʉ yʉʉ ŋ́ɡɑ́ sɛ́ mbi Tsɑpʉɔ, ɑ pʉꞋ wʉ́ʉ.

¹¹Pɔ́ɔpɛ́mɑ́ pɑ́ɑ, kɔɔ sẅíitɛ pɔ́ tsɛtsɛt pʉʉ. Ŋu lɑɑ ɛ́sẅíitɛ nǔu mɔ́ɔmɑ́ wɛ, kɛ ńtɔ́ pɔ lɔ́Ꞌ yɛ́ ɔɔ, mbɔ ɑ sẅíitɛ pɔ nǔu nɛpʉ́ʉ, ḿbɛn ńtɔ́ pɔ lɔ́Ꞌ[2]-nɛpʉ́ʉ. Ŋu lɑɑ ŋ́kɛ́ ńtɔ́ lɔ́Ꞌ nɛpʉ́ʉ, mbɔ ɑ kɑ́ pɛn ḿbɔ́ ŋu ẅí ɑ ɡẅɛɛnɛ nɛpʉ́ʉ pɔ́, ɑ tsʉ́Ꞌ ńtɔ́ lɔ́Ꞌ nɛpʉ́ʉ tɔ́nɛ.

¹²Sɛ́ zɛ́nɛ jʉ́ zɑ́pnɛ nɛpʉ́ʉ, ḿbɛn ńzɑ́Ꞌ ntsɑŋ-pʉɔ, jʉ́ zɛ́nɛ jʉ́ kuꞋnɛ nɛɡɛ ŋu luk kɛ nɛɡɛ ɑ ḿpfú ɔɔ. Ɔ kwɑŋɛ yú ŋɡɔ ɔ wɔ̌ tɛ ńzɑ́Ꞌ tsɑŋ-mɔ́ɔmɑ́ wu?

¹³Pʉʉ zẅíꞋlɛ ńzúꞋ. Pʉʉ pí pʉʉ sɛ́ ŋ́kɑꞋ ŋɡɔ: Pɛk ɡʉ ńdɔk lɔ́Ꞌnɛ kɛ zɔ́n ɔɔ, ŋ́ɡʉ tsɛt tʉ́sɔŋ yi kɛkɛ, ńnɑ́ŋ zúꞋu tɑ́Ꞌ ŋɡuꞋ ńtɑ́ŋ mɛntɑ́ɑ ŋ́ɡẅɛɛ ŋkɑ́p.

¹⁴Pʉʉ pɔɔ jí pɑ́Ꞌ lɛ́Ꞌlɑ́Ꞌ zɔ́n ɡʉ ḿbɔ́ pɔ́Ꞌɔ, mbɔ̌ pʉʉ pɔ́, pʉʉ jí ŋɡɔ pʉʉ pɑ́Ꞌ zwɛ́t-nɛkʉŋ ní ɛ́ cẅɛtnɛ, ńtɔ́ nɛnɑ́ŋ ɛ́fɛ́.

¹⁵Pʉʉ ḿbɔ́ ŋ́ɡʉ ńcú pɔ ŋɡɔ, Tsɑpʉɔ lɑɑ ḿbɛ́m, mbɔ pɛk ɡʉ ḿbɔ́ sʉ́Ꞌnɛ, ŋ́ɡɛ yɔ, ŋ́ɡɛ yi.

¹⁶Lɑ́ pʉʉ tsɛm pɔ nzɔꞋ yʉʉ, ńcú pɔ mɛnu mí pʉʉ ɡʉ ŋ́ɡɛ ŋ́ɡɛ. Yîyɑ́ ntɛ́ nɛŋɑ́Ꞌlɛ kɑ́ pɔŋ.

¹⁷Pɔ́Ꞌɔ lɑ́, ŋu ẅí ɑ jí nɛɡɛ nu yí ɛ́ pɔŋnɛ, ḿbɛn ŋ́kɛ́ mbɔɔ ɡɛ, ɑ lɔk ŋ́ɡɛ nu kɛpɔŋ.