Read Ngomba 1 Pyɛ̂ 2 Bible Online

1 Pyɛ̂ 2 - Ngomba bible

1 Pyɛ̂ 2

¹Pɔ́Ꞌɔ lɑ́, pʉʉ mɛꞋ mɛnu kɛpɔŋ tsʉʉ, kɔɔ pʉʉ pɛn ɛ́fúklɛ pʉɔ, kɔɔ pʉʉ pɛn ḿbɔ́ pɛŋkɔŋmík, kɔɔ pʉʉ pɛn ŋ́ɡẅɛɛ kɛ́ɡʉ̈ɔꞋ nǔu yúu-pʉɔ, kɔɔ pʉʉ pɛn sẅíitɛ nǔu pʉɔ.

²Pʉʉ pɔ́ pɔ pɑ́Ꞌ pɔ́ɔmbɔ́t pi pɔ́p tsɑ́ɑnɛ nɛpʉ́ʉ, sẅiŋɛ-sɛ́ nɛpʉ́ʉ kɛ́ lɔ́Ꞌ, pʉʉ pɔ́ ńnɔ́ŋ, ńjí ŋɡɔ pʉʉ ɡʉ ŋ́ɡúꞋ, Sɛ́ ɡɛ pʉʉ luk.

³ŊwɑꞋnɛ-Sɛ́ zɛɛ ńcú ŋɡɔ: Pʉʉ zẅíꞋ mɔ́ tɛ ńzúꞋ pɑ́Ꞌ Tsɑpʉɔ pɔŋnɛ pɔ́Ꞌɔ.

⁴Pʉʉ kẅɛ́Ꞌlɛ mbʉʉ yʉʉ ńtɔ́ nɛ́ nɛjɔ́ŋ wɛ́, jʉ́ ɡɑ́nɛ kwɑꞋ luk. A ŋɡɔꞋ yi ŋwɑꞋnɛ-Sɛ́ cúnɛ ŋɡɔ pʉɔmɛsɔŋ kɑ mɛꞋnɛ, lɑ Sɛ́ kɑŋ wɛ́, ɛ́ pɔ́ yúu tʉʉndɛn mbɔ̌ wɛ́.

⁵Ɛ́ pɔŋ ŋɡɔ pʉʉ ɡúu pi pʉʉ ɡẅɛɛnɛ kwɑꞋ luk, pʉʉ pɛ́m, Sɛ́ lɔk wʉ́ʉ ŋ́ɡɛ mɛŋɡɔꞋ, ńdɔk ŋ́kút ndɑ́-Zẅikŋɛ Lɛ́ɛnɛ́nɛ. Pʉʉ pɔ́ tsɛtú ḿbɔ́ pɑnɔŋpɔꞋ pi Sɛ́ kɑ tsɔ́Ꞌnɛ, pi pɔ́p ɡʉ ńdɛɛtɛ nzʉʉ Yɛ́su Kɛlístɔ, ńnɔŋ pɔꞋ ẅí ɛ́ pɔŋnɛ Sɛ́.

⁶Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Pʉʉ jʉ́ɔ, n tíi ŋɡɔꞋ-nɛlẅí-ndɑ́, ńnɔŋ tʉ́sɔŋ-Siɔŋ, ɛ́ pɔ́ ŋɡɔꞋ ŋ́ɡẅɛɛ shʉ́ ḿbɛn ḿbɔ́ tʉʉndɛn ḿbɔ́ yi ŋu lɑɑ ńzɑ́p tʉ́m nǔu wɛ́, sʉ́ʉ pɔɔ lɑ́Ꞌ ŋ́kɔ́ ŋɡɑŋ pɔ́.

⁷Ɛ́ mbɔ̌ pʉʉ pɑzɑ́p tʉ́m nǔu wɛ́, ḿbɔ́ yúu mɛkuꞋ. Lɑ́ ŋ́ɡʉ nǔu pʉɔ pi pɔ́p kɑ́ pɔ́ ńzɑ́p tʉ́m nǔu yîyɑ́ ŋɡɔꞋ pɔ́, mbɔ pɛ́ kɑ ŋwɑꞋnɛ ŋɡɔ: «ŊɡɔꞋ yi pɑpɔ́ɔndɑ́ kɑ mɛꞋnɛ kɑ tsʉ́Ꞌ mɔ́ ŋɡɔꞋ-nɛlẅí-ndɑ́.

⁸Ḿbɛn ḿbɔ́ ŋɡɔꞋ yi ɛ́ ɡʉ ŋ́ɡɛ pɛ́ vu sɛ́, ɛ́ mɑ́mɑ́ ŋɡɔꞋ yi pɛ́ ɡʉ kɔɔtɛ nǔu.» Pɔ́p ŋ́kɔɔtɛ nǔu, mbíꞋŋɡɔ pɔ́p lʉꞋ nɛzúꞋ sẅiŋɛ-sɛ́. Ɛ́ kɛ́ ḿbɔ́ pɔ pɑ́Ꞌ Sɛ́ kɑ zɑ́pnɛ ŋɡɔ ɛ́ ɡʉ ńdɑ́Ꞌ ḿbɔ́ pɔ pɔ́Ꞌɔ nǔu pɔ́p.

⁹Lɑ́ ŋ́ɡʉ nǔu pʉʉ, mbɔ pʉʉ njẅɛt-pʉɔ pi Sɛ́ kɑ kɑŋnɛ, ḿbɔ́ pɑnɔŋpɔꞋ-fɔɔ wɛ ɡwɛ́, ḿbɔ́ lɑ́Ꞌ yi ɛ́ yɛ́, ḿbɔ́ pʉɔ pi ɑ kɑ tsúꞋnɛ wɔ́p pɔ́p pɔ́ pɛ́, pɑ́Ꞌ pɔ́p ŋ́ɡɛ ŋ́ɡʉ ɛ́sẅíi mɛmɑ́ mɛnu mi ɑ kɑ ɡɛnɛ, jʉ́ ẅí ɑ kɑ fúnɛ tsɛt nzɛ́nzʉ́ʉ ńcẅɛɛtɛ wʉ́ʉ, ńníꞋ wʉ́ʉ nǔu zʉꞋ fúknɛ yi kyɛꞌ sʉ́Ꞌnɛ yɛ́ zúꞋu.

¹⁰Pʉʉ pi pʉʉ kɑ pɔ́ yɛcɔ́ ŋkɑ́, ḿbɔɔ pʉɔ-Sɛ́ pɔ́, pʉʉ kɑ tsʉ́Ꞌ mɔ́ pʉɔ pɛ́. Pʉʉ pinɛ pʉʉ ŋ́kɑɑ kɛ́ ńtsɑ́ɑ mɛjʉ́ŋ-Sɛ́ pɔ́ Sɛ́ kɑ kɛ́ mɔ́ ńtsɑ́ɑ mɛjʉ́ŋ mʉ́ʉ.

¹¹Pɛsúu pɑ́ɑ pɛ́ tʉʉndɛn, pʉʉ ndǔ tsɛ́tsɑ́Ꞌ zɑ́Ꞌnɛ ḿbɔ́ pɔ pɑlɛɛndúŋ, ḿbɛn ḿbɔ́ pɔ pɛɡʉʉ. Yúu mi ɛ́ ɡɛnɛ m bɔ́ ɛ́sẅíi wʉ́ʉ ŋɡɔ kɔɔ pʉʉ nɑ́ tɛ mbʉʉ yʉʉ tsʉ́ʉnɛ wʉ́ʉ nɛɡɛ yúu mi ɛ́ ŋ́kɔŋnɛ, mbíꞋŋɡɔ ɛ́ pɔ́Ꞌɔ, ḿbɔ́ ńdʉ̈ɔꞋ tʉ́m yʉ́ʉ nɛ́ ntsɔ.

¹²Pʉʉ ɡẅɛɛ tsẅɛ́ sʉ́Ꞌnɛ tsɛtsɛt pɑkɛ́jí nu-Sɛ́, tɛ ḿbɔ́ yi pɔ́p lɑɑ ḿbɔ́ ɛ́sẅíitɛ kɛpɔŋ nǔu lík yʉ́ʉ, pɔ́p jʉ́ɔ mɛnu sʉ́Ꞌnɛ mi pʉʉ sɛ́ ŋ́ɡɛ, ŋ́ɡúꞋlɛ lík-Sɛ́ ŋkɑ́ yi Sɛ́ ɡʉ ŋ́ɡɛ ńtɔ́ ńcú nu mbɔ̌ pɔ́p.

¹³Pʉʉ lɛɛ nǔu lík-Tsɑpʉɔ ńzúꞋ ntsu-pɑsɑ́Ꞌlɑ́Ꞌ pɛtsʉʉ. Pʉʉ zúꞋ ntsu-Kɑ́sɑ ẅí ɑ tʉ́ʉnɛ mbí pɑsɑ́Ꞌ lɑ́Ꞌ pɛtsʉʉ,

¹⁴ḿbɛn ńzúꞋ ntsu-pɛŋútlɑ́Ꞌ pɛ́. MbíꞋŋɡɔ fɔɔ túunɛ wɔ́p nɛɡʉ ńnyɛt pɑɡɛ mɛnu kɛpɔŋ nɛ́ ŋɡʉ̈ɔ́Ꞌ, ḿbɛn ŋ́ɡɑ́ tsɔ́Ꞌfɑ́Ꞌ-pʉɔ pi pɔ́p sɛ́ ŋ́ɡɛ nu sʉ́Ꞌnɛ.

¹⁵Ɛ́ yúu mi Sɛ́ kɔŋnɛ ŋɡɔ pʉʉ ɡɛ, ńjí ŋɡɔ pʉʉ ɡʉ ńdɔk nɛɡɛ nu sʉ́Ꞌnɛ, ńjʉ́ɔꞋ ntsu-pɛɡɛɡʉʉ pi pɔ́p lʉꞋnɛ nu-Sɛ́, pɔ́p pɔɔ pɛn ɛ́sẅíitɛ nǔu pʉʉ pɔ́.

¹⁶Pʉʉ lɔk mɑt wʉʉ ḿbɔ́ pɑ́Ꞌ pʉɔ pi pɛ́ kɑ cẅɛɛtɛ́nɛ wɔ́p ndɑ́-kwɑɑ. Lɑ́, kɔɔ ẅîwɑ́ nɛpɔ́ kɛ́ ńtsʉ́Ꞌ mbɔ̌ pʉʉ ḿbɔ́ ŋkwɑ́ yi pʉʉ ɡʉ ńdɔk ńdʉɔ mɛnu kɛpɔŋ. Pʉʉ lɔk mɑt wʉʉ ḿbɔ́ pɔ pɛkwɑɑ-Sɛ́.

¹⁷Pʉʉ ɡɑ́ mɛkuꞋ pʉɔtsʉʉ, ŋ́kɔŋ pɔ́ɔpɛ́mɑ́ pʉʉ pʉɔ-Kɛlístɔ, ḿbɔ́k Sɛ́, ŋ́ɡɑ́ mɛkuꞋ-fɔɔ.

¹⁸Pʉʉ pi pʉʉ fɑꞋnɛ mbɔ̌ pʉɔ, ḿbɔ́ mbɔ́ŋkʉ̈ɔ́ pɔ́p, pʉʉ kɔk mbʉʉ yʉʉ ŋ́ɡɑ́ sɛ́ mbi pɛtɑ́t pʉʉ nǔu mbɑ kʉ̈ɔ́ lɑ́, pʉʉ pɔɔ kɔk pɔ ndɑꞋ mbi pi pɔ́p ɡẅɛɛnɛ pɔŋtʉ́m, ḿbɛn ḿbɔ́tnɛ pɔ́tnɛ́nɛ pɔ́, pʉʉ pɛn ŋ́kɔk mbɑ mbi pi pɔ́p cʉ́ɔk cʉ́ɔknɛ.

¹⁹Pʉʉ jí ŋɡɔ pʉʉ lɑɑ ńdɔk pɑ́Ꞌ pʉʉ sɛ́ ŋ́kɔŋ nɛ kɛ́ ńjí pɔ Sɛ́ ndɑꞋ, ɛ́sʉk ŋɡʉ̈ɔ́Ꞌ yi ɛ́ kúunɛ wʉ́ʉ mbíꞋ yúu mi pʉʉ ŋ́kɑɑ ɡɛ, mbɔ ɛ́ nu sʉ́Ꞌnɛ.

²⁰Pʉʉ zɛɛ ńtsʉ́Ꞌ nɛsʉk ŋɡʉ̈ɔ́Ꞌ, ɛ́sʉk yi ɛ́ kúunɛ wʉ́ʉ mbíꞋ nu kɛpɔŋ yi pʉʉ ɡɛnɛ, mbɔ pɛ́ ɡʉ ŋ́ɡɑ́ mɛkuꞋ mʉ́ʉ nǔu kʉ̈ɔ́? Lɑ́ pʉʉ kɛ́ ŋ́ɡɛ nu sʉ́Ꞌnɛ, pɛ́ ɡɑ́ wʉ́ʉ nɛ́ ŋɡʉ̈ɔ́Ꞌ, pʉʉ sʉk, mbɔ ẅîwɑ́ nɛsʉk mbi Sɛ́ ḿbɔ́ nu sʉ́Ꞌnɛ.

²¹Sɛ́ kɑ ɡɔ́ ɛ́fúŋ wʉ́ʉ, ḿbɔ́ ńdɔɔ ŋɡɔ pʉʉ ɡɛ pɔ pɔ́Ꞌɔ. Kɛlístɔ kɑ jʉ́ɔ yɛ́ ŋɡʉ̈ɔ́Ꞌ mbíꞋ wʉ́ʉ, ńdɔk ŋ́ɡɑ́ wʉ́ʉ nɛ́ fʉꞋ, ŋɡɔ pʉʉ nɛn pɑ́Ꞌ jʉ́.

²²Jʉ́ Kɛlístɔ ŋ́kɑɑ kɛ́ ŋ́ɡɛ yɛcɔ́ nu kɛpɔŋ pɔ́, ŋ́kɛ́ mbɔɔ sẅíi cɔtnu pɔ́.

²³Pɛ́ kɑ zɔɔtɛ wɛ́, ɑ kɛ́ ḿbɔɔ tsɔ́Ꞌ. A kɑ pɔ́ ńjʉ́ɔ ŋɡʉ̈ɔ́Ꞌ, ŋ́kɛ́ mbɔɔ ŋu vukŋɛ, ńnɑ́ yɛ́ nu tsʉʉ pɔ nǔu mbɔ́-ŋu ẅí ɑ zɑ́Ꞌnɛ ntsɑŋ ndʉ́ŋndʉŋ.

²⁴KwɑꞋ jʉ́ Kɛlístɔ kɑ tíi mɛnu kɛpɔŋ mɛkŋɛ ńníꞋ sɔŋ-mbʉʉ yɛ́, ɛ́ ŋkɑ́ yi pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ. A kɑ ɡɛ pɔ́Ꞌɔ, nɛpɔ́ yi pɛkŋɛ ɡʉ ńtsʉ́Ꞌ pɔ mbɔ̌ nu kɛpɔŋ, ḿbɔ́ pɔ pɛpfú, ŋ́kuꞋ nɛɡɛ yúu mi ɛ́ ndʉ́ŋndʉŋ mbi Sɛ́. Pʉʉ kɑ lúꞋnɛ pɔ mɛfʉ́ŋ mɛ́ lɑ ɛ́fíitɛ.

²⁵Ɛ́ pɔ́ ŋɡɔ pʉʉ kɑ pɔ́ yɛcɔ́ ŋkɑ́ mbɔ́ ŋ́kɑ́t ḿbúunɛ pɑ́Ꞌ mɛnjinjɔ mi ɛ́ fɑɑnɛ sɛ̂ndúŋ. Lɑ́ pʉʉ kɑ kɛ́mɔ́ ḿbɛn nzʉʉ, ńcʉ́ɔ nzʉʉ-ŋu ẅí ɑ sɛ́ ńdíŋɛ wʉ́ʉ, jʉ́ sɛ́nɛ́ ḿbyɛ́p wʉ́ʉ.