Read Ngomba 1 Pyɛ̂ 5 Bible Online

1 Pyɛ̂ 5 - Ngomba bible

1 Pyɛ̂ 5

¹N cú yɔ nu ŋkɔ̂ɔnɛ nɛlɔk ńtík pɑcẅɛ́ɛmbi pi pɔ́p tsɛt cúꞋlɛ yʉ́ʉ, mɔ yɑ́ɑ ńcẅɛ́ɛmbi pɑ́Ꞌ pɔ́p, mbɔ Kɛlístɔ kɑ ɡɔ́ ḿbɔ́ ńjʉ́ɔ ŋɡʉ̈ɔ́Ꞌ, n tʉ́ʉ zúꞋu. Mɔ ŋ́ɡɛ ŋ́ɡẅɛɛ yɑ́ɑ zʉꞋ tsɛt nɛɡúꞋ ẅi Sɛ́ ɡʉ ŋ́ɡɛ ŋ́ɡɛ ɛ́ cẅɛt.

²N cú mbɔ̌ pʉʉ pɑcẅɛ́ɛmbi ŋɡɔ pʉʉ tsiinɛ nɔɔ-njinjɔ-Sɛ́ yi ɑ kɑ ɡɑ́nɛ mbɔ̌ pʉʉ, kɔɔ pʉʉ tsiinɛ pɔ pɑ́Ꞌ ŋkɑ́ yi pɛ́ ɡẅɛɛ wʉ́ʉ ɡẅɛɛnɛ lɑ́, pʉʉ tsiinɛ nɛ́ tʉ́m sʉ́Ꞌnɛ, pɑ́Ꞌ Sɛ́ sɛ́ ŋ́kɔŋ. Kɔɔ pʉʉ ɡɛ pɑ́Ꞌ ŋkɑ́ yi pʉʉ lɔɔ ŋkɑ́p lɑ́, pʉʉ lɔk pɔ ŋkɔŋɛ.

³Kɔɔ pʉʉ lɔk mɛtʉʉ ɛ́sɑ́Ꞌ pʉɔ pi Sɛ́ kɑ ɡɑ́nɛ mbɔ̌ pʉʉ, pʉʉ nɛn pɔ nǔu ntɛ́ yi pɔ́p ɡʉ ḿbɛ́ɛ fʉꞋ nǔu pʉʉ.

⁴Pʉʉ lɑɑ ŋ́ɡɛ pɔ́Ꞌɔ, mbɔ ɛ́ ɡʉ ńdɑ́Ꞌ lɛ́Ꞌ yi mbyɛ́pmbí wɛ ɡwɛ́ ńtɔ́, ɑ tɔꞋ ŋɡúꞋ tú pʉʉ, yi ndɛn wɛ kɛ́ lɑ́Ꞌ ḿmɛ pɔ́.

⁵Ɛ́ ɡʉ nǔu pʉʉ ɡúu pɔ́ɔsuu, pʉʉ ɡɑ́ mbʉʉ yʉʉ sɛ́ mbi pɑcẅɛ́ɛmbi tsɛt cúꞋlɛ, ŋ́ɡʉ nǔu pʉɔ tsʉʉ, kɔɔ pʉʉ pɔ́ ŋ́ɡɛ yɛcɔ́ yúu, tɛ ŋu wʉʉ kwɑŋɛ ŋɡɔ ɑ lɛɛ wɛcɔ́. MbíꞋŋɡɔ ŋwɑꞋnɛ-Sɛ́ cú ŋɡɔ: Sɛ́ lʉꞋ pɑŋɑꞋtɛ mbʉʉ lʉꞋnɛ, ŋ́kɛ́ ńdɔk pɔŋtʉ́m ńdíŋɛ pʉɔ pi pɔ́p kɔknɛ mbʉʉ yɔp ŋ́ɡɑ́ sɛ́.

⁶Pɔ́Ꞌɔ lɑ́ pʉʉ ɡɑ́ mbʉʉ yʉʉ sɛ́ mbi Sɛ́ ẅi ɑ ɡẅɛɛnɛ mɛtʉʉ, ɛ́ lɛɛ pɔ́Ꞌɔ, ɑ ɡɛ ḿbʉꞋ wʉ́ʉ nǔu ŋkɑ́ yi ɑ kɑ zɑ́pnɛ.

⁷Pʉʉ níꞋ mbɑ kʉ̈ɔ́ lɑ́ yi ɛ́ sɛ́ ńdɛɛ wʉ́ʉ, tsɛt mbɔ́-Sɛ́, mbíꞋŋɡɔ ɑ sɛ́ ńdíŋɛ wʉ́ʉ.

⁸Kɔɔ pʉʉ mɛꞋ mbʉʉ yʉʉ, kɔɔ pʉʉ lɛ́. Ŋɡɑŋmbuu wʉʉ, Sɑ́ttɑ, ɑ sɛ́ ḿbɔ́ ŋ́kɑ́t ńzɛmɛ, ńdɔ́ɔ ŋu ẅí ɑ ɡʉ ŋ́ɡẅɛɛ wɛ́, pɑ́Ꞌ púꞋntʉʉ ẅí ɑ kíinɛ ḿbɔ́ ńdɔɔ yúu mi ɑ ɡʉ ŋ́kwɛ́t lɑ́.

⁹Pɔ́Ꞌɔ lɑ́, pʉʉ zɑ́p tʉ́m yʉ́ʉ nǔu Sɛ́, ŋ́kẅiꞋ ńtɛntɛ, ńdʉꞋ Sɑ́ttɑ, ḿbɔ́ ńjí ŋɡɔ pɔ́ɔpɛ́mɑ́ pʉʉ ndǔmbí ḿbɔ́ ńjʉ́ɔ pɔ ntɛ́ ŋɡʉ̈ɔ́Ꞌ yi pʉʉ jʉ́ɔnɛ.

¹⁰Ŋɡʉ̈ɔ́Ꞌ yʉʉ ɡʉ nɑꞋ ńnɑ́ŋ pɔ mɔ́zʉꞋ, Sɛ́ ẅi mbɑ yɛ́tɛ́ nu sʉ́Ꞌnɛ lɑ́ fú pɔ mbɔ̌ wɛ́, jʉ́ ẅí ɑ kɑ lɛɛnɛ nǔu Yɛ́su Kɛlístɔ ɛ́fúŋ wʉ́ʉ pɑ́Ꞌ pʉʉ ɡʉ ḿbɔ́ yʉ́ʉ tsɛt nɛɡúꞋ wɛ ẅí ndẅiklɛ kɑ́ pɔ́ ɡú pɔ́, ɡʉ ɛ́fú pɔ́Ꞌɔ, ŋ́ɡɛ yɛcɔ́ yúu pɔɔ pɛn ńjɑ́k nǔu pʉʉ pɔ́, ńtẅí fufuꞋ wʉʉ, pʉʉ tɛntɛ, pɛ́ pɔɔ pɛn ŋ́kuꞋ nɛtsʉ́ʉ wʉ́ʉ tɛ ḿmɑꞋ sɛ́ pɔ́.

¹¹Jʉ́ ɡẅɛɛnɛ nɛsɑ́Ꞌ mbí nǔu mɛŋɡuꞋ mɛŋɡuꞋ. Ɛ́ pɔ́Ꞌɔ.

¹²Sílɑs kɑ cẅɛ́lɛ́ wɑ́ɑ nɛŋwɑꞋnɛ wɔ mɔ́yúu ŋwɑꞋnɛ. A mbɔ̌ mɔ ḿbɔ́ mɔ́ɔmɑ́ ẅí ɑ jí yɛ́ pɔ ndɑꞋ nu-Yɛ́su. Ŋ ɡɑ́ yɔ ŋwɑꞋnɛ mbɔ̌ pʉʉ nɛlɔk ńníꞋ mɛtʉʉ mʉ́ʉ mbɑ nɛlɔk ńniitɛ ɛ́sẅíi wʉ́ʉ nɛ́ ntɛ́ yi Sɛ́ kɑ lɔknɛ mɛnu sʉ́Ꞌnɛ ŋ́ɡɑ́ fuꞋ níinɛ yɛkŋɛ, kwɑꞋ pɑ́Ꞌ ŋ ŋwɑꞋnɛnɛ lɑɑ. Pʉʉ tɛntɛ nǔu mɛnu ɛ̂mɑ́ sʉ́Ꞌnɛ.

¹³CúꞋlɛ-pʉɔ-Kɛlístɔ yi ɛ́ Mbɑbilɔ̂nɛ cɛꞋlɛ wʉ́ʉ. Sɛ́ kɑ tsɔ́Ꞌ wɔ́p ɡúu pɑ́Ꞌ pʉʉ. Mɔ́ɔ wɑɑ Mɑ́lɛ́kúshi cɛꞋlɛ wʉ́ʉ ɡúu.

¹⁴Pʉʉ cɛꞋlɛ mɛmbʉʉ mʉ́ʉ, ńtsʉ́Ꞌ nɛcɛꞋlɛ ɛ́sɛntɛ mɛmbʉʉ mʉ́ʉ nǔu ntɛ́ yɛ́ pɔ́ɔpɛ́mɑ́ pi ŋkɔŋɛ tsɛtsɛt pɔ́p. Mɔ́fíitɛ pɔ́ ḿbɔ́ tʉ́m pʉʉ pʉɔ-Kɛlístɔ pɛtsʉʉ.