Read Ngomba 2 Pyɛ̂ 1 Bible Online

2 Pyɛ̂ 1 - Ngomba bible

2 Pyɛ̂ 1

¹A mɔ Símɔ̂ŋ Pyɛ̂, ŋu ẅí ɑ fɑꞋnɛ fɑꞋ-Yɛ́su Kɛlístɔ, ḿbɛn ḿbɔ́ ŋɡɑŋntúu wɛ. Ŋ ɡɑ́ yɔ ŋwɑꞋnɛ mbɔ̌ pʉʉ pi pʉʉ kɑ zɑ́pnɛ tʉ́m yʉ́ʉ nǔu Yɛ́su Kɛlístɔ pɑ́Ꞌ pɛk yɛ́k. Nɛzɑ́p tʉ́m nǔu Yɛ́su Kɛlístɔ, ɛ́ yúu tʉʉndɛn mbɔ̌ pʉʉ mbɑ mbɔ̌ pɛk ɡúu. Yɛ́su Kɛlístɔ kwɑꞋ jʉ́ kɑ ɡɛnɛ pɔ́Ꞌɔ mbɔ̌ pɛkŋɛ, mbíꞋŋɡɔ ɑ ɡɛ yúu nǔu mbɑ wɔ̌ lɑ́ pɔ ndʉ́ŋndʉŋ. A Sɛ́ wɛkŋɛ, ḿbɔ́ ŋu ẅí ɑ ɡɛnɛ pɛkŋɛ luk.

²Sɛ́ pɔ́ nɛ́ pʉʉ, ḿbɔ́ ńníꞋ mɔ́fíitɛ tʉ́m pʉʉ sʉ́Ꞌnɛ, ɛ́fú nǔu pɑ́Ꞌ pʉʉ jínɛ wɛ́, ḿbɛn ńjí Tsɑpʉɔ wɛkŋɛ Yɛ́su.

³Sɛ́ kɑ lɔk mɔ́ mɛtʉʉ mɛ́, ŋ́ɡɑ́ wɛkŋɛ nɛ́ mbɑ kʉ̈ɔ́ lɑ́ yi ɛ́ sɛ́ ḿbíkŋɛ ŋɡɔ pɛkŋɛ ɡẅɛɛ lɑ ńdɔk ńnɑ́ŋ, ḿbɔ́ ńdɑt mbʉʉ yɛkŋɛ pɔ ndɑꞋ nǔu wɛ́. A kɑ zɛɛ ŋ́ɡɛ pɛkŋɛ jí jʉ́ Sɛ́ ẅi ɑ kɑ fúŋnɛ wɛkŋɛ pɑ́Ꞌ pɛkŋɛ pɛpɔ́p ɡʉ ńtɛmtɛ ḿbɔ́ tsɛt nɛɡúꞋ wɛ, ńjʉ́ pii pɔŋtʉ́m yɛ́.

⁴Ɛ́ kɑ fú pɔ́Ꞌɔ, ɑ ɡɑ́ mɛyúu tʉʉndɛn mbɔ̌ pɛkŋɛ, ɛ́ pɔ́ mi ɛ́ ńcẅɛ́lɛ́ wɛkŋɛ tɛꞋ, ḿbɔ́ yi ɑ kɑ kɑꞋnɛ, ŋ́ɡɑ́ pɔ́Ꞌɔ, nɛpɔ́ yi pɛkŋɛ ɡʉ ńdɛɛtɛ nǔu mîmɑ́ mɛyúu, ŋ́kuꞋ nɛkʉɔ mɛnu-ntsɛ́llɛ́ mi ɛ́ tsɛt yɔ mbí, ɛ́fú nǔu yúu mi mbʉʉ yɛkŋɛ tsʉ́ʉnɛ́nɛ wɛkŋɛ nɛɡɛ, kʉɔ pɔ́Ꞌɔ, ńtsʉ́Ꞌ ŋ́ɡẅɛɛ pɔ tsẅɛ́ wɛ jʉ́ Sɛ́.

⁵Pɔ́Ꞌɔ, pʉʉ sɑ́Ꞌ tʉʉ, ŋ́kẅiꞋ mɑt sʉ́Ꞌnɛ nǔu wʉʉ nɛzɑ́p tʉ́m nǔu Sɛ́, ḿbɛn ŋ́ɡʉ nǔu mɑt sʉ́Ꞌnɛ ŋ́kẅiꞋ nɛjí yúu mi Sɛ́ sɛ́ ŋ́kɔŋ,

⁶ŋ́ɡʉ nǔu nɛjí yúu mi Sɛ́ sɛ́ ŋ́kɔŋ, ŋ́kẅiꞋ pɑ́Ꞌ pʉʉ ɡʉ ŋ́ɡuutɛ mbʉʉ yʉʉ, ŋ́ɡʉ nǔu nɛɡuutɛ mbʉʉ ŋ́kẅiꞋ ńtɛntɛ tɛntɛnɛ, ŋ́ɡʉ nǔu nɛtɛntɛ tɛntɛnɛ, ŋ́kẅiꞋ nɛjí pɔ ndɑꞋ Sɛ́,

⁷ŋ́ɡʉ nǔu nɛjí pɔ ndɑꞋ Sɛ́, ŋ́kẅiꞋ pɑ́Ꞌ nu-pɔ́ɔpɛ́mɑ́ pʉ́ʉ ɡʉ ḿbɔŋ wʉ́ʉ, ŋ́ɡʉ nǔu pɑ́Ꞌ nu-pɔ́ɔpɛ́mɑ́ pʉ́ʉ sɛ́ ḿbɔŋ wʉ́ʉ, ŋ́kẅiꞋ ŋkɔŋɛ.

⁸MbíꞋŋɡɔ pʉʉ lɑɑ ḿbɔ́ ŋ́ɡɛ mɛnu mi pɛ́ kẅíinɛ lɑɑ, ḿbɔ́ ńdɔk ŋ́ɡʉ nɛ́ mbi, mbɔ ɛ́ ɡʉ ŋ́ɡɛ mbʉʉ yʉʉ zɑŋɛ nɛɡɛ yúu mi Sɛ́ kɔŋnɛ, ɛ́ pɛn ŋ́ɡɛ pʉʉ pɔ́ ŋ́kẅiꞋ ńjí ŋu ẅí Tsɑpʉɔ wɛkŋɛ Yɛ́su Kɛlístɔ jʉ́.

⁹Lɑ́ ḿbɔ́ yi ŋu lɑɑ ŋ́kɛ́ ḿbɔɔ ŋ́ɡɛ mɔnɛ mɛnu pɔ́, mbɔ ɑ kɑ́ pɔ́ ńjʉ́ɔ zʉꞋ sʉ́Ꞌnɛ pɔ́, ɑ pɔ́ pɔ pɑ́Ꞌ fʉmík lɑ́. Mbɔ ɑ likŋɛ ŋɡɔ pɛ́ kɑ suk yîyɑ́ ntɛ́ mɛnu kɛpɔŋ mi ɑ kɑ pɔ́ ŋ́ɡɛ.

¹⁰Pɔ́ɔpɛ́mɑ́ pɑ́ɑ, pɑ́Ꞌ ɛ́ pɔ́Ꞌɔ lɑ́, pʉʉ kẅiꞋ ɛ́sɑ́Ꞌ tʉʉ, nɛpɔ́ yi pʉʉ ɡʉ ŋ́ɡɛ pɛ́ jí sʉ́Ꞌnɛ ŋɡɔ Sɛ́ kɑ fúŋnɛ wʉ́ʉ, ńtsɔ́Ꞌ wʉ́ʉ. Pʉʉ lɑɑ ńnɑ́ŋ nǔu yîyɑ́ ntɛ́, mbɔ pʉʉ kɛ́ lɑ́Ꞌ ḿvu nǔu nu kɛpɔŋ pɔ́.

¹¹Ɛ́ pɔ́ pɔ́Ꞌɔ, pɛ́ lɑ́Ꞌ ɛ́sɑ́ɑnɛ sɑ́ɑnɛ́nɛ ńtsɔ́Ꞌ ndúŋ ẅi ɛ́ ɡʉnɛ ŋ́kúu tsɛt nɛfɔɔ kɛ́mɛ-Yɛ́su Kɛlístɔ, ŋ́ɡɑ́ mbɔ̌ pʉʉ. A Tsɑpʉɔ wɛkŋɛ, ḿbɔ́ ŋu ẅí ɑ ɡɛnɛ pɛkŋɛ luk.

¹²Ɛ́ yúu mi ɛ́ ɡɛnɛ ŋ ɡʉ ńdɑ́Ꞌ ńjúk kẅíitɛ wʉ́ʉ nɛ́ mɔnɛ mɛnu kẅíitɛ́nɛ tɛ mbɑ pɑ́Ꞌ pʉʉ sɛ́ ńjí, ḿbɛn ḿbɔ́ ńnɛn pɔ nǔu nu yi ɛ́ nɛ́nẅín yi pɛ́ kɑ sẅíinɛ wʉ́ʉ lɑ́.

¹³Lɑ́ ŋ kwɑŋɛ ŋɡɔ ŋkɑ́ yi m bɛ́t ntʉʉ lɑɑ, mɔ ŋ́kɛ́ ḿbɔ́ kẅíitɛ wʉ́ʉ nɛ́ mɔnɛ mɛnu kẅíitɛ́nɛ, ɛ́ lɔk jʉɔmɛ wʉ́ʉ.

¹⁴MbíꞋŋɡɔ n jí ŋɡɔ, ŋkɑ́ yi mɔ ḿpfú tsʉ́Ꞌ ŋ́kuꞋ kuꞋnɛ. Tsɑpʉɔ wɛkŋɛ Yɛ́su Kɛlístɔ kɑ ɡɛnɛ n jí.

¹⁵Ŋ kɛ́ ḿbɔ́ ńtsuŋ ńniitɛ nǔu ntɛ́ yi mɔ ḿbɔ́ tɛ ḿpfú, pʉʉ tʉ́ʉ mbɑ nǔu mbɑ yɛ́tɛ́ nu ɔɔ, ŋ́kẅíitɛ yúu mi ŋ kɑ zíꞋnɛ wʉ́ʉ.

¹⁶Pɛk ŋ́kɑɑ kɛ́ ŋ́ɡɔ́ ɛ́sẅíi wʉ́ʉ pɑ́Ꞌ Yɛ́su Kɛlístɔ, Ndɛ wɛkŋɛ ɡʉ ŋ́ɡɛ ńtɔ́, nɛ́ nɛŋwɑ́ŋɛ wɛ, ɛ́fú pɔ nǔu mɛnu mɑ́pítsɔꞋ mi pɛk nɑ́ŋnɛ sɛ́ ńdɔk jínu ńdʉꞋlɛ pɔ́. Pɛk kɑ fú nǔu pɑ́Ꞌ pɛk lɔknɛ mík mɛ́k ńjʉ́ɔ nɛɡúꞋ wɛ.

¹⁷Ŋkɑ́ yi Sɛ́ Tɑ́t kɑ ɡɑ́nɛ nɛɡúꞋ mbɑ mɛkuꞋ mbɔ̌ wɛ́, pɛ́ zúꞋ ŋɡi-Sɛ́ ẅi ɑ ɡẅɛɛnɛ mɛtʉʉ, ɛ́ cú ŋɡɔ: Yɔ Mɔ́ɔ wɑ́ɑ, ŋ kɔŋ wɛ́ tɛꞋ, ɑ yɑ́ɑ tsɑ́ɑtɛ.

¹⁸KwɑꞋ pɛk nɛ́ túmbʉʉ yɛ́k kɑ zúꞋ yîyɑ́ ŋɡi, pɛk kɑ zúꞋ pɑ́Ꞌ ɛ́ fúnɛ tʉ́nɛ́pú ŋkɑ́ yi pɛk pɛ́ Yɛ́su kɑ pɔ́ ndǔ nɛŋkɔ́Ꞌ Lɛ́ɛnɛ́nɛ.

¹⁹Ɛ́ kɑ́ pɔ́ ndɑꞋ pɔ́Ꞌɔ pɔ́ pɛkŋɛ pɛn ŋ́ɡẅɛɛ sẅiŋɛ-pɑcẅiŋkʉʉ-Sɛ́ yi ɛ́ lɑɑ ḿbɔ́ pɛ́ pɔɔ zúꞋ ḿmʉ́Ꞌlɛ pɔ́. Ɛ́ pɔ́ŋ ŋɡɔ pʉʉ tsuŋ ńzúꞋ yîyɑ́ sẅiŋɛ. Ɛ́ pɑ́Ꞌ lɑ̂m ẅí ɛ́ kyɛꞋnɛ zʉꞋ yi ɛ́ sɛ́ sʉ́ʉnɛ lɑ́. Pʉʉ tsuŋ ḿbɔ́ ńzúꞋ ńdɔk ńzẅíꞋlɛ lɛ́Ꞌ yi Yɛ́su ɡʉ ńdɑ́Ꞌ ḿbɛn ńtɔ́. Pɑ́Ꞌ cʉ̈ɔ́Ꞌ-sɑŋ ẅí ɑ kɔ́Ꞌ, njí ɡɔ́ɔ ŋ́kiɛ. A ɡʉ ńtɔ́ ŋ́kyɛꞋ zʉꞋ mbɔ̌ mɛtʉ́m mʉ́ʉ.

²⁰Yúu mi pʉʉ ɡẅɛɛ nɛpiitɛ ńjí ɛ́ pɔ́ ŋɡɔ: Yɛcɔ́ sẅiŋɛ-ncẅiŋkʉʉ-Sɛ́ yi ɛ́ tsɛt ŋwɑꞋnɛ-Sɛ́, ḿbɔ́ yi ɛ́ lɑɑ ḿbɔ́ ŋu lɔk jínu yɛ́ zɛ́nɛ jʉ́ ŋ́kyɛ́Ꞌtɛ ɛ́ kɑ́ pɔ́ ɡú pɔ́[1]

²¹mbíꞋŋɡɔ mbɑ kʉ̈ɔ́ lɑ́ yi pɑcẅiŋkʉʉ-Sɛ́ kɑ cúnɛ, pɔ́p kɑ pɔ́ ŋ́ɡɔ ńcú, ɛ́ pɔɔ ɛ́fú nǔu jínu-ŋumɛsɔŋ pɔ́. Pɔ́p kɑ ɡɔ́ ḿbɔ́ ńcú nu yi Sɛ́ sɛ́ ŋ́kɔŋ ŋɡɔ ḿbɔ́ ńcú, Zẅikŋɛ Lɛ́ɛnɛ́nɛ tsʉ́ʉnɛ́nɛ wɔ́p lɑ pɔ́p cú.