Read Ngomba 2 Pyɛ̂ 2 Bible Online

2 Pyɛ̂ 2 - Ngomba bible

2 Pyɛ̂ 2

¹Pɑcẅi Ŋkʉʉ-Sɛ́ pɛ́ cɔtnu kɑ pɔ́ yɛcɔ́ ŋkɑ́ ḿbɔ́ tsɛtsɛt pʉɔ-Íslɑyɛ̂l, ɛ́ ndʉ́ŋndʉŋ pɑ́Ꞌ pɑzíꞋ pʉɔ nɛ́ nu-Sɛ́ pɛ́ cɔtnu ɡʉ ŋ́ɡɛ ńcẅɛt tsɛtsɛt pʉʉ. Pɔ́p ɡʉ ŋ́ɡɛ ńdɔk pɔ ndɑ̌ɑ ndɑɑ ńzíꞋ pʉɔ nɛ́ cɔtnu, ɛ́ pɔ́ yi mbɔ ɛ́ pʉ́ʉpɛ tʉ́m-pʉɔ, ɛ́ pɔ́ pɔ́nɛ tɛ ḿmuŋɛ Ndɛ ẅí ɑ kɑ ɡɛnɛ pɔ́p luk, ŋ́ɡɛ pɔ́Ꞌɔ, ńdɔk ɛ́shuŋ ŋɡʉ̈ɔ́Ꞌ yi ɛ́ ɡʉ ḿbík wɔ́p, ɛ́ kɛ́ ḿbɔɔ líi nɛtɔ́ pɔ́.

²Pʉɔ tɛ ńzɑ́ɑ cʉ́ɔ nzʉʉ pɔ́p ńtsʉ́Ꞌ ŋ́ɡɛ pɔ mɛnu sʉ́ʉ. Pɛ́ lɛɛ nǔu pɔ́p, ńzɔɔtɛ sɛ̂ndúŋ-nu yi ɛ́ nɛ́nẅín.

³Pɑ́Ꞌ pɔ́p kɔŋ ŋkɑ́p tɛꞋ lɑ́, pɔ́p ŋ́ɡɛ ńdɔk sẅiŋɛ yi pɔ́p lʉꞋlɛ lʉꞋlɛ́nɛ, ńdɔk ńdẅɑklɛ wʉ́ʉ, ńcẅɛ́ɛ yúu pʉ́ʉ, ŋ́kɛ́ ŋ́ɡɛ pɔ́Ꞌɔ pɑ́Ꞌɑ, mbɔ Sɛ́ kɑ lɑ́Ꞌ ńzɑ́Ꞌ ntsɑŋ yɔp, tɛ ɛ́ tsʉ́Ꞌ pɔ mɔ́zʉꞋ ŋɡʉ̈ɔ́Ꞌ vu nǔu pɔ́p.

⁴Pɛcʉ̈ɔ́Ꞌ-Sɛ́ kɑ zɛɛ ɛ́fɑɑnɛ nu, Sɛ́ pɔɔ wɔ́p nɑ́. A kɑ tsʉ́ʉ wɔ́p ḿmɑꞋ tsɛt nɛpʉ́ kɛ́ ndúŋ zʉꞋ-nzɛnzʉ́ʉ, pɔ́p ɡɔ́ ḿbɔ́ tsɛt mɛŋkʉ, ḿbɔ́ ńzẅíꞋlɛ lɛ́Ꞌ yi pɛ́ ɡʉ ŋ́ŋɑk mɛtsɑŋ.

⁵Tɛ mbɑ ŋɡɔŋ wɛ ŋkɑ́mbi ẅí pʉɔmɛsɔŋ kɑ pɔ́ tsɛtú, mbɔ ɡɑŋmɛfɑɑnɛ Sɛ́ kɑ kɛ́ nɑ́. A kɑ ɡɛ ŋki fú mɛshʉ́ mɛshʉ́ ŋ́kɔ́Ꞌ, ńjʉ́ tsɛ́tsɑ́Ꞌ, pɛɡɑŋmbuu pɛ́ fʉ̈ɔ́t tsɛtú. Ɛ́ ɡɛ ndɑꞋ Nɔwɛ, ẅí ɑ kɑ pɔ́ ɛ́sẅíi lɑ́Ꞌ nɛ́ nu yí Sɛ́ sɛ́ ŋ́kɔŋ, pɔ́p pʉɔ sɑɑmbɑ́ luknɛ.

⁶Sɛ́ kɑ pɛn ńtɛ́m ŋɡʉ̈ɔ́Ꞌ nǔu pʉɔ-tʉ́sɔŋ-Sɔdɔ̂m pɔ́p nǔu pʉɔ-tʉ́sɔŋ-Ŋɡɔmɔ̂ɔ ńdɔk múk ḿbík wɔ́p, ńdɔk ńnyɛt pʉɔ kɛpɔŋ nɛ́ fʉꞋ yúu mi ɛ́ ɡʉ ŋ́ɡɛ ńtɔ́ nǔu pɔ́p.

⁷A kɑ fú zúꞋu ńcẅɛɛtɛ Lɔ̂t. A pɔ́ ŋu ẅí ɑ kɑ pɔ́ ŋ́ɡɛ pɔ yúu mi ɛ́ ndʉ́ŋndʉŋ mbi jʉ́ Sɛ́, tɛ ńjʉ́ɔ tsẅɛ́ kɛpɔŋ, pɔ́p mɛnu sʉ́ʉ mi pʉɔ pɛtʉ́sɔŋ ɛ̂pɑ́ kɑ pɔ́ ɛ́fʉꞋ tɛ ɛ́sɑ́Ꞌ sɑ́Ꞌnɛ, ɛ́ tsuŋ ḿbʉ́k wɛ́ tɛꞋ.

⁸Jʉ́ ŋu ndʉ́ŋndʉŋ mbi Sɛ́, kɑ pɔ́ ńnɑ́ŋ tsɛtsɛt pʉɔ ɛ̂pɑ́, ńjʉ́ɔ ntɛ́ yi pɔ́p lɔknɛ ńnɑ́ŋ, ńzúꞋ mɛnu mi pɔ́p cúnɛ. Pɑ́Ꞌ tʉ́m yɛ́ kɑ tʉ́ʉnɛ pɔ nǔu yúu mi ɛ́ ndʉ́ŋndʉŋ lɑ́, mîmɑ́ mɛnu ɡɑ́ɑnɛ wɛ́ ɡɑ́ɑnɛ́nɛ lɛ́Ꞌ tsʉʉ.

⁹Pɛ́ fú nǔu mɔnɛ mɛnu ńjʉ́ɔ ŋɡɔ Tsɑpʉɔ kɔŋ nɛfú tsɛt ŋɡʉ̈ɔ́Ꞌ ńcẅɛɛtɛ pʉɔ pi pɔ́p jínɛ pɔ ndɑꞋ wɛ́, ɛ́ tsʉ́Ꞌ pʉɔ kɛpɔŋ ɑ nyɛt wɔ́p ŋɡɔ pɔ́p ńzẅíꞋlɛ ŋɡʉ̈ɔ́Ꞌ lɛ́Ꞌ nɛŋɑk mɛtsɑŋ.

¹⁰A ŋ́ɡɛ ḿbɔ́ lɛ́Ꞌ ɛ̂yɑ́, ḿbiitɛ ńtsuŋ ńzɑ́p ŋɡʉ̈ɔ́Ꞌ pɔ tú-pʉɔ pi pɔ́p ńnɑ́ŋnɛ ŋ́ɡɛ yúu mi mbʉʉ yɔ́p tsʉ́ʉnɛ́nɛ wɔ́p nɛɡɛ, ńnɑ́ŋ ńtsɑ́ɑ mɛnu-ncɛ́llɛ́. Sɛ́ cú nu pɔ́p ɡwɑ́k ɡwɑ́knɛ. PɑzíꞋ pʉɔ nɛ́ cɔtnu, pɔ́p kwɛn nzɔꞋ yɔp tɛꞋ, ḿbɛ́m mɛ́m tɛ mbɔɔ pɔ́k nɛzɔɔtɛ mɛzẅikŋɛ mi ɛ́ ɡẅɛɛnɛ nɛɡúꞋ pɔ́.

¹¹Pɔ́p zɔɔtɛ wɔ́p pɔ́Ꞌɔ, lɑ́ mbɔ mbɑ pɛcʉ̈ɔ́Ꞌ-Sɛ́ kɛ́ mbɔɔ tɔ́ lɔ́Ꞌ mîmɑ́ mɛzẅikŋɛ pɔ́, ḿbɛn ŋ́kɛ́ mbɔɔ fɛn wɔ́p mbɔ̌ Tsɑpʉɔ pɔ́. Lɑ́ ŋ́kɛ́ ŋ́ɡẅɛɛ mɛtʉʉ ńdɛɛ pîpɑ́ pɑzíꞋ pʉɔ nɛ́ cɔtnu.

¹²Pîpɑ́ pʉɔ pɔ́ pɔ pɑkɛ́jínu pɑ́Ꞌ mɛnɑɑ, mi pɔ́p kɑ fú zúꞋu ḿbɔ́ pɔ yúu mi pɛ́ ɡʉ ńdʉꞋ ɡwɑk ńdɔk ŋ́ɡẅɛɛ ńjẅí. Pɔ́p zɔɔtɛ yúu kɛ́ pɔ́ ńjí pɑ́Ꞌ ɛ́ pɔ́nɛ, pɛ́ ŋ́ɡɛ ńjẅí wɔ́p pɑ́Ꞌ mɛnɑɑ ɛ̂mɑ́.

¹³Pɔ́p lɔk pɔ́Ꞌɔ, ńcẅɛ́ɛ tsɔ́ꞋfɑꞋ-mɛnu kɛpɔŋ mi pɔ́p kɑ fʉꞋnɛ. Nu pɔŋ wɔ́p tɛꞋ nɛɡɛ mɛyúu kɛpɔŋ mi mɛtʉʉ mɔ́p sɛ́ ńtsɑ́ɑ, tɛ pɑ́Ꞌ ɛ́ lɑɑ ḿbɔ́ pɔ nɛnɛm. Pʉʉ pɛ́pɔ́p tɛmtɛ ńnɑ́ŋ sɛ́ ŋ́kwɛ́t yúu lɑ́ ẅîwɑ́ nɛpɔ́ pɔ́ nu-sʉ́ʉ, ḿbʉ́k tɛꞋ, mbíꞋŋɡɔ ɛ́ sɛ́ ḿbɔŋ wɔ́p pɑ́Ꞌ pɔ́p sɛ́ ɛ́fúklɛ wʉ́ʉ.

¹⁴Yɔ́p jínu tʉ́ʉ pɔ nǔu pɑŋɡɛ́. Pɔ́p kɑ́ kɑ́ɑ nɛɡɛ nu kɛpɔŋ pɔ́. Pɔ́p lẅɑklɛ pʉɔ pi pɔ́p pɔ́t pɔ́tnɛ. Tʉ́m yɔ́p ŋkɑ́ tsʉʉ ńtʉ́ʉ pɔ nǔu pii yi mbɔ pɔ́p jʉ́. Ndɔɔ tú pɔ́p.

¹⁵Pɔ́p kɑ mɛꞋ mɔ́ sɛ̂ndúŋ ẅi ɛ́ tʉ́ʉnɛ ndʉ́ŋndʉŋ, ḿbɛ́ ńtsʉ́Ꞌ ńnɛn pɔ nǔu wɛ Mbɑlɑm, mɔ́ɔ-Mbɔzɔ̂ɔ. Mbɔ pɛ́ kɑ ɡɑ́ ŋkɑ́p mbɔ̌ wɛ́, ńdɔk ńzúu wɛ́ pɑ́Ꞌ ɑ ɡʉ ŋ́ɡɛ nu kɛpɔŋ. A líŋɛ ŋkɑ́p ɛ́ pɔŋ wɛ́, ɑ pɛ́m.

¹⁶Lɑ́ Sɛ́ kɑkŋɛ wɛ́ ncẅiŋkʉʉ nǔu nu yi ɑ fɑɑnɛ́nɛ. A zúꞋ njɑkɑ́ɑshi ẅi ɑ lɔɔ ɛ́sẅíŋɛ pɔ́ cú nu pɑ́Ꞌ ŋumɛsɔŋ lɑ́, ńdɔk ńjʉ́ɔꞋ sɛ̂ndúŋ mbɔ̌ wɛ́ nǔu yîyɑ́ ɡɛɡʉʉ nu yi ɑ kɑ pɔ́ ŋ́ɡʉ ŋ́ɡɛ.

¹⁷PɑzíꞋ pʉɔ nɛ́ nu-Sɛ́ pɛ́ cɔtnu ɛ̂pɑ́ pɔ́ pɔ pɑꞋ zʉꞋ yi ŋki kɑ pɔ́ ńcẅɛt zúꞋu, ɛ́ kɑ kɛ́ mɔ́ ńzúu lɑ́, pɔ́p pɔ́ pɔ pɑ́Ꞌ mbʉŋ yi ɛ́ kɔ́Ꞌnɛ́nɛ, fɛ́m tíi ńdɔk ŋ́ɡʉ. Sɛ́ kɑ kɛ́ ńniitɛ zʉꞋ yɔ́p ńtík tsɛt nzɛ́nzʉ́ʉ.

¹⁸Pɔ́p lɔk yúu mi pɔ́p zíꞋnɛ pʉɔ ŋ́ŋɑ́Ꞌlɛ, lɑ́ ɛ́ pɔ́ pɔ fɑ́k fɛ̌ɛ yi ɛ́ zɔtnɛ. Pɔ́p cú mbɔ̌ pʉɔ ŋɡɔ mbɔ ŋu ɡɛ kʉ̈ɔ́ lɑ́ yi ŋumɛsɔŋ tsɑ́ɑnɛ, lɑ́ ɛ́ pɔ́ nu sʉ́ʉ. Pɔ́p lɔk pɔ́Ꞌɔ, ɛ́shuŋ pʉɔ pi pɔ́p kɑ pɛ́t ńcẅɛt tsɛtsɛt pʉɔ pi pɔ́p nǔu sɛ̂ndúŋ kɛpɔŋ,

¹⁹ḿbɛn ḿbɔ́ ɛ́sẅíi wɔ́p ŋɡɔ pɔ́p ɡʉ ŋ́ɡɛ pɔ́p pɔɔ pɛn ḿbɔ́ pɛkwɑɑ pɔ́, lɑ́ kwɑꞋ pɔ́p ɡúu pɔ́ pɛkwɑɑ-yúu mi pɔ́p tsɑ́ɑnɛ, ɛ́ pɛn ḿbɔ́ ḿbík wɔ́p. Yúu lɑɑ ńzɛɛ ńjʉ́ tʉ́m-ŋu, ŋɡɑŋ tsʉ́Ꞌ ḿbɔ́ pɔ ŋkwɑɑ mbɔ̌ yîyɑ́ yúu.

²⁰Pʉɔ lɑɑ ńzɛɛ ńdɔk pɑ́Ꞌ pɔ́p jínɛ Tsɑpʉɔ Yɛ́su Kɛlístɔ ẅí ɑ ɡɛnɛ pɛkŋɛ luk, ɛ́fú nǔu ntsɛ́llɛ́ ẅi ɛ́ ndǔmbí ńcẅɛt, ŋ́ɡɛ ḿbɛn ḿbɛn tsɛtú, ḿbɛ́m mîmɑ́ mɛyúu puu ńjʉ́ wɔ́p, mbɔ pɔ́p ɡʉ ḿbʉ́k tɛ ńdɛɛ pɑ́Ꞌ pɔ́p kɑ zɛɛnɛ ḿbɔ́.

²¹Mbii kɑ pɔ́ pɑ́Ꞌ ɛ́ lɑɑ ḿbɔ́ pɔ́p pɔɔ jí sɛ̂ndúŋ ndʉ́ŋndʉŋ pɔ́, ńtsɑ pɑ́Ꞌ pɔ́p ɡʉ ńjí nɛpʉ́ʉ-Sɛ́ ni n zíꞋnɛ wɔ́p ḿbɛn ḿmɛꞋ.

²²Mbɑ yúu mi ɛ́ ɡɛnɛ wɔ́p, lɔk ḿbuutɛ pɑ́Ꞌ sɑknɛkɛt kɑ cúnɛ ŋɡɔ: «Mɔ̂mvú jɛ́Ꞌ ḿbɛn ńjʉ́ jɛ́Ꞌ yɛ́. Pɛ́ suk njínɑɑ tɛ ŋ́ɡɔ́ ḿbɔ́tnɛ ńnɑ́ŋ ɑ ɡʉ ŋ́kɑtnɛ tsɛt tɛtɔp».