Read Ngomba 1 Jɑ̂ŋ 4 Bible Online

1 Jɑ̂ŋ 4 - Ngomba bible

1 Jɑ̂ŋ 4

¹Pɛsúu pɑ́ɑ pɛ́ tʉʉndɛn, kɔɔ pʉʉ zúꞋ ŋu cú ŋɡɔ Zẅikŋɛ Lɛ́ɛnɛ́nɛ nǔu wɛ́, pʉʉ ɡɔ́ɔ ḿbɛ́m pɛ́mnɛ, kɛ́ tsuŋ ńdíŋɛ kɛ ɛ́ kwɑꞋ Zẅikŋɛ-Sɛ́ ɔɔ. MbíꞋŋɡɔ pɑcẅiŋkʉʉ-Sɛ́ pɛ́ cɔtnu zɑ́ɑ ndǔmbí tɛꞋ.

²Yúu mi pʉʉ ɡʉ ńdɔk ńjí Zẅikŋɛ yi ɛ́ fúnɛ mbɔ̌ Sɛ́ pʉ́ɔlɑɑ. Ŋu lɑɑ ḿbɛ́m ŋɡɔ Yɛ́su Kɛlístɔ kɑ shɔtnɛ ńtsʉ́Ꞌ kwɑꞋ ŋumɛsɔŋ, mbɔ ŋɡɑŋ ɡẅɛɛ Zẅikŋɛ yi ɛ́ fúnɛ mbɔ̌ Sɛ́.

³Lɑ́ ŋu lɑɑ ŋ́kɛ́ ńdʉꞋ nɛpɛ́m ŋɡɔ Yɛ́su Kɛlístɔ kɑ tɔ́ ḿbɔ́ ŋumɛsɔŋ, mbɔ ŋɡɑŋ kɑ́ ɡẅɛɛ Zẅikŋɛ yi ɛ́ fúnɛ mbɔ̌ Sɛ́ pɔ́, yɛ́ zẅikŋɛ ɛ́ yi ɛ́ fúnɛ mbɔ̌ ŋɡɑŋmbuu-Kɛlístɔ wi pʉʉ kɑ zúꞋ pɛ́ cú ŋɡɔ ɑ sɛ́ ńtɔ́ lɑ́. A kɑ kɛ́mɔ́ ńdɑ́Ꞌ ńtɔ́ tɛ ḿbɔ́ ndǔmbí.

⁴Pʉʉ mbɔ́ŋkʉ̈ɔ́ pɑ́ɑ, pʉʉ nǔu ɡúŋ yɛ́ Sɛ́. Pʉʉ kɑ kɛ́mɔ́ ńdʉɔ́Ꞌ tɛ ńdɛɛ pɑcẅiŋkʉʉ-Sɛ́ pɛ́ cɔtnu, mbíꞋŋɡɔ Zẅikŋɛ-Sɛ́ yi ɛ́ nǔu pʉʉ ɛ́ tɛn ńdɛɛ ŋɡɑŋmbuu-Kɛlístɔ ẅí ɑ ndǔmbí.

⁵Pɑcẅi Ŋkʉʉ-Sɛ́ pɛ́ cɔtnu, pɔ́p nǔu ɡúŋ yɛ́ pʉɔ-ndǔmbí. Ɛ́ yúu mi ɛ́ ɡɛnɛ pɔ́p zíꞋ yúu ɛ́ pɔ́ pɔ yɛ́ ndǔmbí, pʉɔ-ndǔmbí pɛn ńzẅíꞋlɛ yɔ́p nu.

⁶Ɛ́ ɡʉ nǔu pɛkŋɛ, mbɔ pɛkŋɛ nǔu ɡúŋ-Sɛ́. Ŋu ẅí ɑ sɛ́ ńjí Sɛ́ ɑ sɛ́ ńzẅíꞋlɛ nu yi pɛkŋɛ cúnɛ. Ŋu ẅí ɑ kɑ́ pɔ́ nǔu ɡúŋ-Sɛ́ pɔ́, ɑ pɔɔ yɛkŋɛ nu zẅíꞋlɛ. Pɛkŋɛ fú pɔ pɔ́Ꞌɔ, lɑ́ ńjí nu nɛ́nẅín, ńjí cɔtnu.

⁷Pɛsúu pɑ́ɑ pɛ́ tʉʉndɛn, pɛkŋɛ ɡẅɛɛ ŋkɔŋɛ tsɛtsɛt pɛkŋɛ, mbíꞋŋɡɔ ŋkɔŋɛ ɛ́fú mbɔ̌ Sɛ́. Ŋu ẅí ɑ ɡẅɛɛnɛ ŋkɔŋɛ ɑ mɔ́ɔ-Sɛ́, ḿbɔ́ ńjí Sɛ́.

⁸Ŋu lɑɑ ḿbɔɔ ŋumɛsɔŋ kɔŋ, mbɔ ɑ pɛ́t kɛ́ jí Sɛ́, mbíꞋŋɡɔ Sɛ́ ɡẅɛɛ pɔ ŋkɔŋɛ.

⁹Nu yi Sɛ́ kɑ lɔknɛ ńnyɛt wɛkŋɛ ŋɡɔ ɑ kɔŋ wɛkŋɛ pʉɔlɑɑ: A kɑ túu ndɑꞋ Mɔ́ɔ nɛ wɛ́mɔ́Ꞌ ndǔmbí ŋɡɔ pɛkŋɛ lɛɛ nzʉʉ wɛ́ ḿbɔ́ ɡú.

¹⁰Ŋkɔŋɛ kɑ pɔ́ pɔ pɑ́Ꞌnɛ. Pɛkŋɛ ŋkɑɑnɛ kɛ́ ŋ́kɔŋ Sɛ́ pɔ́, jʉ́ kɑ kɔŋnɛ wɛkŋɛ. A kɑ kɔŋ wɛkŋɛ kɔŋnɛ tɛ ńtúu Mɔ́ɔ nɛ, ɑ tɔ́ ńdɔk tú yɛ́ ńnɔŋ pɔꞋ mbíꞋ wɛkŋɛ, ɛ́ yúu mi ɛ́ ɡɛnɛ Sɛ́ likŋɛ mɛnu kɛpɔŋ mɛkŋɛ.

¹¹Pɛsúu pɑ́ɑ pɛ́ tʉʉndɛn, ɛ́ lɑɑ ḿbɔ́ yi Sɛ́ kɑ kɔŋ wɛkŋɛ pɑ́Ꞌnɛ, mbɔ ɛ́ sɛ́ ḿbíkŋɛ ŋɡɔ pɛkŋɛ ɡúu ɡẅɛɛ ŋkɔŋɛ tsɛtsɛt pɛkŋɛ.

¹²Wɛcɔ́ ŋu ẅí ɑ kɑ zɑ́p mɔ́ lík nǔu Sɛ́ kɑ́ pɔ́ ɡú pɔ́. Lɑ́ ḿbɔ́ yi pɛkŋɛ lɑɑ ŋ́ɡẅɛɛ ŋkɔŋɛ tsɛtsɛt pɛkŋɛ, mbɔ pɛkŋɛ pɛ Sɛ́ pɔ́nɛ, ŋkɔŋɛ yɛ́ lɔk ńtsuŋ ḿbɔ́ nǔu pɛkŋɛ tɛ yúu pɔɔ jɑ́k nǔu pɔ́.

¹³Yúu mi ɛ́ ɡɛnɛ pɛkŋɛ jí ŋɡɔ pɛkŋɛ lɑt mbʉʉ yɛkŋɛ nǔu Sɛ́, Sɛ́ lɑt yɛ nǔu pɛkŋɛ ɛ́ pɑ́Ꞌ ɑ kɑ ɡɑ́nɛ Zẅikŋɛ yɛ́ mbɔ̌ pɛkŋɛ.

¹⁴Pɛk kɑ lɔk mík mɛ́k ńjʉ́ɔ tɛ ḿbɔ́ ńcú pɑ́Ꞌɑ, ḿbɔ́ pɑjʉ́njʉ́ɔ nǔu pɑ́Ꞌ ɑ kɑ túunɛ Mɔ́ɔ nɛ, pɑ́Ꞌ ɑ ḿbɔ́ ŋu ẅí ɑ ŋ́ɡɛ pʉɔ-ndǔmbí luk.

¹⁵Ŋu lɑɑ ḿbɛ́m ŋɡɔ Yɛ́su mɔ́ɔ-Sɛ́, mbɔ Sɛ́ ɡʉ ńdɑt mbʉʉ yɛ nǔu ŋɡɑŋ, ŋɡɑŋ pɛn ńdɑt yɛ nǔu Sɛ́.

¹⁶Ɛ́ ɡʉ nǔu pɛk, mbɔ pɔ́p sɛ́ ńjí pɑ́Ꞌ Sɛ́ kɔŋnɛ wɛ́k pɔ́Ꞌɔ, pɛk kɑ jʉ́ɔ yîyɑ́ ntɛ́ ŋkɔŋɛ tɛ ḿbɛ́m. Sɛ́ ɡẅɛɛ pɔ ŋkɔŋɛ, ŋu lɑɑ ḿbɔ́ ŋ́kɔŋ pʉɔmɛsɔŋ, mbɔ ŋɡɑŋ ńdɑt mbʉʉ yɛ nǔu Sɛ́, Sɛ́ lɑt yɛ nǔu wɛ́.

¹⁷Pɛkŋɛ lɑɑ ŋ́ɡẅɛɛ ŋkɔŋɛ tʉ́m pɛkŋɛ tɛ yɛcɔ́ yúu pɔɔ jɑ́k nǔu pɔ́, pɛkŋɛ pɔɔ kwɑŋɛ lɛ́Ꞌ nɛŋɑk mɛtsɑŋ tʉ́m yɛkŋɛ ɡwɛt pɔ́. Pɔ́Ꞌɔ, mbíꞋŋɡɔ wɛkŋɛ nɛnɑ́ŋ ndǔmbí yɔ ɛ́ pɑ́Ꞌ nɛnɑ́ŋ-Yɛ́su Kɛlístɔ.

¹⁸Ŋkɔŋɛ piitɛ tɛ ḿbɔ́ sɛ́, cʉɔꞌ mɛ. Ŋkɔŋɛ lɑɑ ḿbɔ́ tɛ yɛcɔ́ yúu pɔɔ jɑ́k nǔu pɔ́, ɛ́ pík cʉɔꞌ, ŋu ɡɔ́ ńcʉ̈ɔꞋ, mbɔ ɑ fɑɑnɛ nu lɑ ḿbɔ́ ḿbɔ́k. Pɔ́Ꞌɔ lɑ́, ŋu lɑɑ ńcʉ̈ɔꞋ, mbɔ ɛ́ lɔk ḿbɔ́ ŋɡɔ yúu pɛ́t ńjɑ́k nǔu ŋkɔŋɛ yi ɑ ɡẅɛɛnɛ.

¹⁹Ɛ́ ɡʉ nǔu pɛk, pɛk kɔŋ ŋumɛsɔŋ, mbíꞋŋɡɔ Sɛ́ kɑ piitɛ ŋ́kɔŋ wɛ́k.

²⁰Ŋu lɑɑ ńcú ŋɡɔ ɑ sɛ́ ŋ́kɔŋ Sɛ́, ŋɡɔ ńcú pɔ́Ꞌɔ, ḿbɔ́ ḿbɑɑ mɔ́ɔmɑ́ wɛ, mbɔ ɑ ŋɡɑŋ cɔtnu. MbíꞋŋɡɔ ŋu lɑɑ mbɔɔ kɔŋ mɔ́ɔmɑ́ wɛ ẅí ɑ sɛ́ ńjʉ́ɔ wɛ́ pɔ́, ɑ pɔɔ kuꞋ nɛkɔŋ Sɛ́ ẅí ɑ kɑ́ pɔ́ ńjʉ́ɔ wɛ́ pɔ́ pɔ́.

²¹Nɛpʉ́ʉ ni Kɛlístɔ kɑ ɡɑ́nɛ mbɔ̌ pɛkŋɛ, ɛ́ pʉ́ɔ. Ŋu lɑɑ ŋ́kɔŋ Sɛ́, ɑ pɛn ŋ́kɔŋ mɔ́ɔmɑ́ wɛ ŋumɛsɔŋ.