Read Ngomba 1 Jɑ̂ŋ 5 Bible Online

1 Jɑ̂ŋ 5 - Ngomba bible

1 Jɑ̂ŋ 5

¹Ŋu ẅí ɑ pɛ́mnɛ ŋɡɔ Yɛ́su Nzɑ́Ꞌŋkʉ, ɑ mɔ́ɔ-Sɛ́. Ŋu ẅí ɑ kɔŋnɛ Sɛ́ Tɑ́t, ɑ pɛn ŋ́kɔŋ mbɑ pɔ́ɔ-Sɛ́.

²Yúu mi pɛkŋɛ ɡʉ ɛ́fú nǔu ńjí ŋɡɔ pɛkŋɛ sɛ́ ŋ́kɔŋ pɔ́ɔ-Sɛ́, ɛ́ pɑ́Ꞌ pɛkŋɛ kɔŋnɛ Sɛ́, ḿbɛn ńtík ku nǔu mbʉ́ʉ mɛ́.

³MbíꞋŋɡɔ nɛkɔŋ Sɛ́ ɛ́ píkŋɛ nɛtík ku nǔu mbʉ́ʉ mɛ́, nɛpʉ́ʉ nɛ́ pɛn ŋ́kɛ́ mbɔɔ tɛn ńdɛɛ wɛkŋɛ pɔ́.

⁴MbíꞋŋɡɔ mbɑ wɔ̌ lɑ́ ẅí ɑ mɔ́ɔ-Sɛ́, tɛn ńdɛɛ mbɑ kʉ̈ɔ́ lɑ́ yi ɛ́ tɑɑtɛnɛ wɛ́ ndǔmbí. Yúu mi ɛ́ ɡɛnɛ pɛkŋɛ tɛn ńdɛɛ ndǔmbí, ɛ́ pɑ́Ꞌ pɛkŋɛ zɑ́pnɛ tʉ́m nǔu Yɛ́su Kɛlístɔ.

⁵Mbɔ wɔ̌ zɛɛ ńtɛn ńdɛɛ ndǔmbí? A pɔ́ pɔ ndɑꞋ ŋu ẅí ɑ pɛ́mnɛ ŋɡɔ Yɛ́su ɑ mɔ́ɔ-Sɛ́?

⁶Pɛ́ lɑ́Ꞌ Yɛ́su Kɛlístɔ ẅí ɑ kɑ tɔ́nɛ, pɛ́ nuꞋ wɛ́ tsɛt ŋki, ɑ ɡɛ ńtsẅɛt mɛci mɛ́, pɛ́ ŋkɑɑ nuꞋ wɛ́ pɔ ndɑꞋ tsɛt ŋki pɔ́, pɛ́ kɑ nuꞋ wɛ́ tsɛt ŋki, mbɑ tsɛt mɛci. Zẅikŋɛ-Sɛ́ nǔu ḿbɔ́ jʉ́njʉ́ɔ ŋɡɔ ɛ́ nu nɛ́nẅín. Zẅikŋɛ-Sɛ́ zɛɛ ḿbɔ́ pɔ nɛ́nẅín,

⁷ɛ́ lɔk ḿbɔ́ mɛnu mɛ́ntɑ́t mi ɛ́ lɛ́Ꞌlɛ́nɛ wɛkŋɛ nɛ́ nu nǔu Yɛ́su.

⁸Yɔ Zẅikŋɛ-Sɛ́, yɔ pɔ́ ŋki, ŋ́ɡɛ mɛci, pɔ́p pɛtɑ́t sɛ́ ńdɛꞋlɛ tɑ́Ꞌ nu wɛ́mɔ́Ꞌ.

⁹Pʉɔmɛ́sɔŋ cú yúu mi pɔ́p jínɛ nǔu nu, pɛkŋɛ zúꞋ ḿbɛ́m ŋɡɔ ɛ́ nu nɛ́nẅín. Yúu mi Sɛ́ cúnɛ nǔu nu ɛ́ pɛn ńdɛɛ yi pʉɔmɛsɔŋ cúnɛ. A lɔk mɛnu mɛ́ntɑ́t mîmɑ́, ńcú nu nǔu nu-Mɔ́ɔ nɛ.

¹⁰Ŋu lɑɑ ńzɑ́p tʉ́m yɛ́ nǔu mɔ́ɔ-Sɛ́, mbɔ mɔnɛ mɛnu mɛ́ntɑ́t ɡʉ ḿbɔ́ ɛ́fɑꞋ tʉ́m yɛ́. Ŋu ẅí ɑ kɑ́ pɛ́m nu yi Sɛ́ cúnɛ pɔ́, ŋɡɑŋ lɔk Sɛ́ ŋ́ɡɛ ɡɑŋ cɔtnu, mbíꞋŋɡɔ ɑ kɑ́ zɑ́p tʉ́m yɛ́ nǔu nu yi Sɛ́ cúnɛ mbíꞋ yúu mi jʉ́ Sɛ́ jínɛ nǔu nu-Mɔ́ɔ-nɛ pɔ́.

¹¹Yúu mi Sɛ́ kɑ cúnɛ nǔu nu-Mɔ́ɔ nɛ, ɛ́ pʉ́ɔ ḿbɔ́ ŋɡɔ: Jʉ́ Sɛ́ kɑ ɡɑ́ luk kɛ́mɛ mbɔ̌ pɛkŋɛ, yîyɑ́ luk fú nǔu Mɔ́ɔ nɛ.

¹²Ŋu lɑɑ ńzɑ́p tʉ́m yɛ́ nǔu mɔ́ɔ-Sɛ́, mbɔ ŋɡɑŋ ɡẅɛɛ yîyɑ́ luk, lɑ́ ŋu ẅí ɑ kɛ́ mbɔɔ zɑ́p ɑ kɑ́ ɡẅɛɛ.

¹³Ŋ ŋwɑꞋnɛ mɔnɛ mɛnu ńdɔk ɛ́sẅíi wʉ́ʉ wi pʉʉ zɑ́pnɛ tʉ́m nǔu mɔ́ɔ-Sɛ́ ŋɡɔ: Pʉʉ ɡẅɛɛ luk kɛ́mɛ.

¹⁴Yúu mi ɛ́ ɡɛnɛ pɛkŋɛ tʉ́ʉ mbi Sɛ́ tʉ́m yɛkŋɛ pɔɔ ɡwɛt, ɛ́ pɔ́ pɔ ŋɡɔ: Pɛkŋɛ sɛ́ ńjí ŋɡɔ, pɛkŋɛ lɑɑ ńdɔ́ɔ yúu mbɔ̌ wɛ́, ɛ́ pɔ́ yi ɑ sɛ́ ŋ́kɔŋ, mbɔ ɑ ɡʉ zúꞋ.

¹⁵Pɑ́Ꞌ pɛkŋɛ sɛ́ ńjí ŋɡɔ Sɛ́ sɛ́ ńzúꞋ nu yɛkŋɛ lɑ́, pɛkŋɛ pɛn ḿbɔ́ ńjí ŋɡɔ pɛkŋɛ lɑɑ ńdɔ́ɔ pɔ kʉ̈ɔ́ mbɔ̌ wɛ́ lɑ́, mbɔ ɑ ɡʉ ŋ́ɡɑ́ yúu mi pɛkŋɛ lɔ́ɔnɛ mbɔ̌ pɛkŋɛ.

¹⁶Ŋu lɑɑ ńjʉ́ɔ mɔ́ɔmɑ́ wɛ pɔ́ ŋ́ɡɛ nu kɛpɔŋ, ɛ́ kɛ́ mbɔɔ nu kɛpɔŋ yi ŋɡɑŋ ɡʉ ɛ́fú nǔu ḿpfú pfúnɛ pɔ́, ɑ ḿbúꞋ mbɔ́ mbɔ̌ Sɛ́ nǔu tú-ŋɡɑŋ, mbɔ Sɛ́ ɡʉ ŋ́ɡɛ ŋɡɑŋ luk, pɑ́Ꞌ ɛ́ lɑɑ ńtsuŋ ḿbɔ́ nu kɛpɔŋ yi ɑ kɛ́ fú nǔu ḿpfú pfúnɛ pɔ́. Lɑ́, yɛcɔ́ nu kɛpɔŋ ɡú yi ŋu ɡɛnɛ, ɛ́fú nǔu ḿpfú pfúnɛ, ŋ kɑ́ pɔ́ ńcú ŋɡɔ pɛ́ cɛꞋlɛ Sɛ́ nǔu yîyɑ́ ntɛ́ pɔ́.

¹⁷Mbɑ kʉ̈ɔ́ lɑ́ yi ŋu ɡɛnɛ, tɛ ɛ́ pɔ́ yi Sɛ́ kɑ́ pɔ́ ŋ́kɔŋ pɔ́, ɛ́ nu kɛpɔŋ, lɑ́ ŋu kɑ́ pɔ́ ŋ́ɡɛ pɔ mɛnu kɛpɔŋ tsʉʉ, lɑ ɛ́fú nǔu ḿpfú pfúnɛ pɔ́.

¹⁸Pɛkŋɛ sɛ́ ńjí ŋɡɔ ŋu pɔ́ tɛ ńtsʉ́Ꞌ mɔ́ɔ-Sɛ́, mbɔɔ pɛn ńnɑ́ŋ ɛ́fɑɑnɛ nu fɑɑnɛ́nɛ pɔ́, mbíꞋŋɡɔ mɔ́ɔ-Sɛ́ sɛ́ ńtík wɛ́, ŋu kɛpɔŋ pɔɔ ɡẅɛɛ shʉ́ nɛzɑ́p pɔ́ nǔu wɛ́ pɔ́.

¹⁹Pɛkŋɛ sɛ́ ńjí ŋɡɔ pɛkŋɛ pɔ́ɔ-Sɛ́, lɑ́ ndǔmbí tsʉʉ zúꞋ pɔ mbɔ̌ ŋu kɛpɔŋ.

²⁰Pɛkŋɛ sɛ́ ńjí ŋɡɔ mɔ́ɔ-Sɛ́ kɑ tɔ́ ŋ́ɡɑ́ wɛkŋɛ nɛ́ jínu pɑ́Ꞌ pɛkŋɛ ɡʉ ńdɔk ńjí kwɑꞋ Sɛ́ wɛ nɛ́nẅín, pɛk kɑ lúꞋnɛ pɔ jʉ́ Yɛ́su Kɛlístɔ lɑ pɛkŋɛ pɛ Sɛ́ wɛ nɛ́nẅín tsʉ́Ꞌnɛ ńnɑ́ŋ, mbɔ pɛkŋɛ pɛ́pɔ́p kɑ ńtɛmtɛ mɔ́.

²¹Mbɔ́ŋkʉ̈ɔ́ pɑ́ɑ, pʉʉ lɑk tú yʉ́ʉ nǔu yúu mi pʉɔ ɡúꞋlɛ́nɛ ŋɡɔ ɛ́ sɛ́.