Read Ngomba 2 Jɑ̂ŋ 1 Bible Online

2 Jɑ̂ŋ 1 - Ngomba bible

2 Jɑ̂ŋ 1

¹Mɔ ẅí mɔ ńcẅɛ́ɛmbi tsɛt cúꞋlɛ-pʉɔ-Kɛlístɔ, ŋ ɡɑ́ yɔ ŋwɑꞋnɛ mbɔ̌ mɑ́ pɛ́ mbɔ́ŋkʉ̈ɔ́ ẅi Sɛ́ kɑ tsɔ́Ꞌnɛ. M bɛn ŋ́ɡɑ́ mbɑ mbɔ̌ mbɔ́ŋkʉ̈ɔ́ pɛ́, n tsuŋ ŋ́kɔŋ wʉ́ʉ pɛ́tsʉʉ, mbíꞋŋɡɔ pɛkŋɛ pɛtsʉʉ tɛmtɛ ńtʉ́ʉ nǔu nu nɛ́nẅín, ɛ́ kɑ́ pɔ́ ndɑꞋ wɑ́ɑ wi ŋ kɔŋnɛ wʉ́ʉ pɔ́, mbɑ wɔ̌ lɑ́ ẅi ɑ tʉ́ʉnɛ nǔu nu nɛ́nẅín pɛn ŋ́kɔŋ wʉ́ʉ ɡúu.

²Pɛk kɔŋ wʉ́ʉ, ɛ́ fú nǔu pɑ́Ꞌ nu nɛ́nẅín ɛ́ tsɛt tʉ́m yɛkŋɛ, ɛ́ ŋ́kɛ́ ńdɑ́Ꞌ ńtsẅɛ́ ḿbɔ́ pɔ tsɛtú.

³Sɛ́ Tɑ́t, mbɑ Yɛ́su Kɛlístɔ ẅí ɑ Mɔ́ɔ-Tɑ̌ɑ pɔ́ mbɔ́ nɛ́ pɛkŋɛ, ḿbɔ́ ńdikŋɛ mɛfɑɑnɛ mɛkŋɛ, ḿbɔ́ ńníꞋ mɔ́fíitɛ tʉ́m pɛkŋɛ pi pɛkŋɛ tʉ́ʉnɛ nǔu nu nɛ́nẅín ḿbɛn ŋ́ɡẅɛɛ ŋkɔŋɛ tsɛtsɛt pɛkŋɛ lɑ́.

⁴Nu kɑ tsuŋ ḿbɔŋ wɑ́ɑ tɛꞋ pɑ́Ꞌ ŋ kɑ zúꞋnɛ ŋɡɔ pɛcɔ́ mbɔ́ŋkʉ̈ɔ́ sɛ́ ńnɛn nǔu sɛ̂ndúŋ-nu nɛ́nẅín pɑ́Ꞌ Tɑ́t wɛkŋɛ kɑ cúnɛ mbɔ̌ pɛkŋɛ lɑ́.

⁵Tʉʉndɛn Mɑ́ pɛ mbɔ́ŋkʉ̈ɔ́, yúu mi mɔ sɛ́ ḿbíkŋɛ mbɔ̌ ɡu ŋkɔ̂ɔnɛ ɛ́ pɔ́ ŋɡɔ pɛkŋɛ ɡẅɛɛ ŋkɔŋɛ tsɛtsɛt pɛkŋɛ, yɔ kɛ mbɔɔ pɔ́ pɔ nɛcɔ́ nɛpʉ́ʉ nɛ fí ni ŋ ŋwɑꞋnɛ́nɛ ŋ́ɡɑ́ mbɔ̌ ɡu pɔ́, ɛ́ nɛpʉ́ʉ ni pɛkŋɛ ɡẅɛɛnɛ tɛ ɛ́fú nzɛnɛ.

⁶Nɛɡẅɛɛ ŋkɔŋɛ ɛ́ pɔ́ pɔ nɛkúꞋlɛ mbʉ́ʉ-Sɛ́. Nɛpʉ́ʉ ni pʉʉ kɑ zúꞋnɛ tɛ ɛ́fú nzɛnɛ ɛ́ pɔ́ pɔ ŋɡɔ pʉʉ nɑ́ŋ nɛ́ ŋkɔŋɛ.

⁷Pɑcɔtnu sɑt mɔ́ ndǔmbí tɛ ńzɑ́ɑ. Pɔ́p kɑ́ pɔ́ ḿbɛ́m ŋɡɔ Yɛ́su Kɛlístɔ kɑ tsuŋ ɛ́shɔtnɛ ńtsʉ́Ꞌ ŋumɛsɔŋ pɔ́, pɔ́p kwɑꞋ ɡɑŋcɔtnu, ḿbɔ́ pɛɡɑŋmbuu-Kɛlístɔ.

⁸Pʉʉ lɑk tú yʉ́ʉ ḿbɔ́k pɑ́Ꞌ mbɔ pii yi pʉʉ kɑ jʉ́nɛ nǔu fɑꞋ yɛ́k lɛɛ níinɛ[1]. Pʉʉ sɑ́Ꞌ pɔ tʉʉ, ŋ́ɡɛ ńcẅɛ́ɛ tsɔ́ꞋfɑꞋ yʉ́ʉ pɔ tsʉʉ.

⁹Ŋu lɑɑ mbɔɔ kúꞋlɛ pɔ ndɑꞋ nu yi Kɛlístɔ kɑ zíꞋnɛ wɛkŋɛ pɔ́, ŋ́ɡʉ nǔu ŋ́kẅiꞋ yɛcɔ́ yúu, mbɔ ŋɡɑŋ pɔ́p Sɛ́ kɛ́ tɛmtɛ. Ŋu ẅí ɑ kúꞋlɛ́nɛ nu yi Kɛlístɔ kɑ zíꞋnɛ wɛk, pɔ́p Tɑ̌ɑ tɛmtɛ, mbɑ pɔ́p Mɔ́ɔ pɛn ńtɛmtɛ.

¹⁰Ŋu lɑɑ ńdɔk yɛcɔ́ nu ńtɔ́ tsɛtsɛt pʉʉ, tɛ ɛ́ pɔɔ pɔ́ pɔ yi Kɛlístɔ kɑ zíꞋnɛ wʉ́ʉ pɔ́, kɔɔ pʉʉ kúkŋɛ wɛ́, kɔɔ pʉʉ zɛɛ ḿbúꞋ mbɔ́ mbɔ̌ wɛ́ mbɑ nɛcɛꞋlɛ.

¹¹Ŋu lɑɑ ḿbúꞋ mbɔ́ mbɔ̌ wɛ́, mbɔ pɔ́p ŋɡɑŋ lɔk ḿbɔ́ tɑ́Ꞌ ntsu nǔu mɛfɑꞋ kɛpɔŋ mi ɑ sɛ́ ɛ́fɑꞋ.

¹²Ŋ ɡẅɛɛ mɛnu tɛ ɛ́ zɑ́ɑ zɑ́ɑnɛ mi m bɔ́ ɛ́sẅíi wʉ́ʉ, lɑ́ n jʉ́ɔ ŋɡɔ ŋ kɛ́ ŋwɑꞋnɛ ŋwɑ́Ꞌnɛ́nɛ pɔ́, mbíꞋŋɡɔ mɔ sɛ́ ŋ́kwɑŋɛ nɛtɔ́ lɑ́Ꞌ pʉʉ, nu cẅɛt ntsu mɔ ŋ́kúu ntsu pʉʉ, ńjí ŋɡɔ tsɑ́ɑtɛ yɛkŋɛ tsuŋ ḿbuutɛ.

¹³Mbɔ́ŋkʉ̈ɔ́-mɔ́ɔmɑ́ ɡu wɛ mɑŋɡɛ́ ẅí Sɛ́ kɑ tsɔ́Ꞌnɛ wɛ́, cú ŋɡɔ n cɛꞋlɛ wú ŋ́ɡɑ́ mbɔ̌ pɔ́p.