Read Ngomba Jẅidɛ 1 Bible Online

Jẅidɛ 1 - Ngomba bible

Jẅidɛ 1

¹Yɔ ŋwɑꞋnɛ fú mbɔ̌ mɔ Jẅidɛ, ŋu ẅi ɑ fɑꞋnɛ fɑꞋ-Yɛ́su Kɛlístɔ, ḿbɔ́ mɔ́ɔmɑ́ pɛ Jɑ̂k. Ŋ ŋwɑꞋnɛ yɔ ŋwɑꞋnɛ ŋ́ɡɑ́ mbɔ̌ pʉʉ pi Tɑ́t wɛkŋɛ Sɛ́ kɑ fúŋnɛ wʉ́ʉ nɛpɔ́ pʉɔ pɛ́ lɑ́. A kɔŋ wʉ́ʉ ḿbɔ́ ńdẅɛꞋ wʉ́ʉ ńdɔk ńzẅíꞋlɛ Yɛ́su Kɛlístɔ.

²Sɛ́ ɡɑ́ tsɑ́ɑ mɛjʉ́ŋ mɛ́, mbɔ́tnɛ yɛ́, ŋ́ɡɛ kɔŋɛ yɛ́ mbɔ̌ pʉʉ ɛ́ zɑ́ɑ.

³Pɛsúu pɑ́ɑ pɛ́ tʉʉndɛn, ŋ kɑ pɔ́ ńtsɑ́ɑ tɛꞋ nɛŋwɑꞋnɛ ŋwɑꞋnɛ ŋ́ɡɑ́ mbɔ̌ pʉʉ nǔu pɑ́Ꞌ Sɛ́ ɡɛnɛ pɛkŋɛ pɛtsʉʉ luk, lɑ́ ŋkɔ̂ɔnɛ, ɛ́ píkŋɛ ŋɡɔ ŋ ŋwɑꞋnɛ ńdɔk ńníꞋ mɛtʉʉ mʉ́ʉ nɛmɑꞋ ntsɔ nǔu ntɛ́ yi yúu kɛ́ kẅiꞋ nǔu sẅiŋɛ-Sɛ́ yi pɛkŋɛ pɛ́mnɛ yi Sɛ́ ɡɑ́nɛ mbɔ̌ pɛkŋɛ pi pɛkŋɛ pʉɔ pɛ́ tɛ ɛ́fɛ́ɛ.

⁴N cú mbíꞋŋɡɔ pɛcɔ́ pʉɔ kɛpɔŋ sɔ́ ŋ́kúu tsɛtsɛt pʉʉ. Pɔ́p sɛ́ ɛ́shɔt shʉ́ lɔk ńzúꞋ nu yi pɔŋtʉ́m-Sɛ́ wɛkŋɛ lɔknɛ cú, ɛ́shɔt pɔ́Ꞌɔ, ńnɛn pɑ́Ꞌ pɔ́p kɔŋnɛ. Pɔ́p ɡɛ pɔ́Ꞌɔ ńdɔk ḿmuŋɛ Yɛ́su Kɛlístɔ ẅi ɑ ndɑꞋ Ndɛ wɛkŋɛ, ḿbɔ́ ndɑꞋ Tsɑpʉɔ wɛkŋɛ. Ntí ɡú pɑ́Ꞌ pɛ́ kɑ ŋwɑꞋnɛ́nɛ ntɛ́ ŋɡʉ̈ɔ́Ꞌ yi pɑtʉ́ʉ tú mbɔ̌ Sɛ́ lɔ ńjʉ́ɔ tsɛt ŋwɑꞋnɛ-Sɛ́, pîpɑ́ pʉɔ ńdɑ́Ꞌ ńjʉ́ɔ ɡúu.

⁵Mɔ sɛ́ ŋ́kɔŋ nɛkẅíitɛ wʉ́ʉ nɛ́ nu yi pʉʉ tsuŋ ḿbɔ́ ńjí sʉ́Ꞌnɛ, ɛ́ pɔ́ pɑ́Ꞌ Tsɑpʉɔ kɑ cẅɛɛtɛ́nɛ pʉɔ pɛ́ pʉɔ-Isɑyɛ̂l tsɛt ŋɡɔŋ-Ɛ́ɡíptɔ pɔ́p luk, ḿbɑ́ɑtɛ ŋ́ɡɛ pʉɔ pi pɔ́p ŋ́kɑɑ zɑ́p tʉ́m nǔu wɛ́ tsɛtsɛt pɔ́p pɔ́ lɑ́kŋɛ.

⁶Pʉʉ kẅíitɛ pɛcʉ̈ɔ́Ꞌ-Sɛ́ pi pɔ́p ŋkɑɑ kɔŋ nɛnɑ́ŋ zʉꞋ yi Sɛ́ kɑ tíknɛ wɔ́p zúꞋu pɔ́, ńnɑ́ zʉꞋ yi pɔ́p kɑ pɔ́nɛ. Pɔ́Ꞌɔ lɑ́ Sɛ́ cʉŋɛ nɛ́ mɛcɛ̂n tɛ ndɑꞋ zʉꞋ yi nzɛ́nzʉ́ʉ zúꞋu, pɔ́p zúꞋu ḿbɔ́ ńzẅíꞋlɛ lɛ́Ꞌ ɡwɛ́ yi ɑ ɡʉ ńdɑ́Ꞌ ńzɑ́Ꞌ mɛtsɑŋ.

⁷Pʉʉ pɛn ŋ́kẅíitɛ nu tʉ́sɔŋ-Sɔdɔ̂m mbɑ yɛ́ Ŋɡɔmɔ̂ɔ, tɛ mbɑ yɛ́ mɛcɔ́ mɛtʉ́sɔŋ mi pɔ́p pɛpɔ́p kɑ ɡẅɛɛnɛ nɛpɑt. Pʉɔ-mɛtʉ́sɔŋ ɛ̂mɑ́ kɑ nɛn nǔu sɛ̂ndúŋ-ɡɑ́ɑ pɑ́Ꞌ pɛcʉ̈ɔ́Ꞌ-Sɛ́ ɛ̂pɑ́. Ḿbɔ́ ńdɔɔ nɛnɔɔ nɛ́ pɛcʉ̈ɔ́Ꞌ-Sɛ́ ɛ́ pɔɔ ḿbíkŋɛ pɔ́. Ɛ́ nǔu ŋkɔ̂ɔnɛ mbɔ Sɛ́ níꞋ pʉɔ-tʉ́sɔŋ ɛ̂pɑ́ tsɛt múk ẅi ɛ́ kɛ́ lɑ́Ꞌ ḿbɛ́ pɔ́. Ɛ́ lɔk ńcú nu mbɔ̌ mbɑ wɔ̌ lɑ́.

⁸Pʉɔ pi pɔ́p kɑ sɔ́nɛ ŋ́kúu tsɛtsɛt pʉʉ ɡɛ pɔ pɑ́Ꞌ pʉɔ pi pɔ́p kɑ pɔ́ tsɛt mîmɑ́ mɛtʉ́sɔŋ. Mɛnu-njʉɔ mɔ́p ɡɛ pɔ́p lɔk mbʉʉ yɔp ŋ́ɡɛ mɛnu kɛpɔŋ. Sɛ́ cú nu pɔ́p ɡwɑ́k ɡwɑ́knɛ. Pɔ́p zɔɔtɛ pɛcɔ́Ꞌ-Sɛ́, ɡɑŋnɛɡúꞋ.

⁹Lɑ́ mbɔ Míshɛ̌ɛ, tɑ́tndɑ́ pɛcʉ̈ɔ́Ꞌ-Sɛ́ kɑ kɛ́ ḿbɔɔ pɔ́Ꞌɔ ɡɛ. Ɛ́ kɑ pɔ́ yɛcɔ́ lɛ́Ꞌ yi pɔ́p Sɑ́ttɑ kɑ pɔ́ ńzɔŋ nu nǔu pfú-Mɔ̌sɛ̂ɛ, ɑ kɛ́ mbɔɔ Sɑ́ttɑ zɔɔtɛ, ŋ́kɛ́ mbɔɔ fʉꞋ nɛcú nu-lɔ́Ꞌ yɛ́ ńdɔk ńzɔɔtɛ wɛ́ pɔ́. NdɑꞋ ŋɡɔ ɑ kɑ cú pɔ ŋɡɔ: «Tsɑpʉɔ ńdɑ́Ꞌnɛ ńníꞋ ŋɡʉ̈ɔ́Ꞌ tú ɡu.»

¹⁰Lɑ́ ŋ́ɡʉ nǔu pʉɔ pí pɔ́p sɔ́tɛ́nɛ ŋ́kúu tsɛtsɛt pʉʉ lɑ́, pɔ́p zɔɔtɛ yúu kɛ́ pɔ́ ńjí pɑ́Ꞌ ɛ́ pɔ́nɛ, ŋ́ɡʉ nǔu yi pɔ́p jínɛ nu nǔu ɛ́ mbɔ̌ pɔ́p ḿbɔ́ pɑ́Ꞌ nu-kɔ́Ꞌtú-nɑɑ ẅí jínu yɛ́ kɑ́ pɔ́ ɡú pɔ́, yúu mi pɔ́p jínɛ nǔu yɔ ntɛ́ ɡɛ pɔ́p fɑɑnɛ ndúŋ.

¹¹Ndɔɔ tú pɔ́p mbíꞋŋɡɔ pɔ́p nɛn nǔu mɛku-Kɑ́yín, ḿbɔ́ ɛ́fɑɑnɛ ndúŋ mbíꞋ ŋkɑ́p pɑ́Ꞌ Mbɑlɑm. Pɔ́p pɔ́Ꞌɔ, mbɔ pɔ́p lɑ́kŋɛ mɔ́, mbíꞋŋɡɔ pɔ́p tʉʉ tú mbɔ̌ Sɛ́ pɑ́Ꞌ Kɔlɛ̂.

¹²Pɔ́p pʉɔ pi pɔ́p cɔŋnɛ ndɛn wʉ́ʉ ŋkɑ́ yi pʉʉ pɛ́ pɔ́ɔpɛ́mɑ́ cúꞋlɛ́nɛ ḿbɔ́ ńjʉ́ yúu, pɔ́p tɔ́ ŋkɔ̂ɔnɛ ŋ́kwɛ́t yúu tɛꞋ, ńnɔ́ mɛluꞋ tɛꞋ, pɔ́p kɑ́ kɔ́ sʉ́ʉ pɔ́, ŋ́kwɑŋɛ pɔ ndɑꞋ yɔ́p tú. Pɔ́p pɑ́Ꞌ mbʉŋ yi ɛ́ kɔ́Ꞌnɛ́nɛ tɛ pɛ́ pɔ́ ńzẅíꞋlɛ ŋɡɔ ɛ́ lɔ́, fɛ́m tíi lɑ́, mɛtʉ́ mi ɛ́ kɛ́ ḿbɔɔ ńzɛ́m ntɑ́ɑ pɔ́, mbɑ ŋkɑ́ yi ɛ́ ńzɛɛ ḿbɔ́ ŋ́ɡʉ ńzɛ́m, mɛtʉ́ mi ɛ́ kɑ muꞋnɛ mɔ́ ḿpfú tɛ ḿpfú.

¹³Pɔ́p pɑ́Ꞌ mɛnʉ́ʉ-ŋki mi ɛ́ sɛ́ ńtɛ́mɛ, mɛfɑꞋ-sʉ́ʉ mɔ́p sɑt zʉꞋ pɑ́Ꞌ mɛkyɑŋɛ mi ŋki lɔknɛ ɛ́sɑt zʉꞋ tsʉʉ lɑ́. Pɔ́p pɑ́Ꞌ pɛcʉ̈ɔ́Ꞌ-sɑŋ pi pɔ́p ɡɔ́ ḿbɔ́ ḿbúunɛ, mbɔ Sɛ́ kɑ niitɛ zʉꞋ yɔ́p tɑ́Ꞌ ŋkɑ́ tsɛt fɛ́m nzɛ́nzʉ́ʉ.

¹⁴Ɛnɔ̂k ẅí ɑ nǔu mɛzuŋ sɑɑmbɑ́ nɛfú nǔu Ádɑm, ɑ kɑ zɑ́Ꞌ njí ńcẅi Ŋkʉʉ-Sɛ́ ẅí ɛ́ líŋɛ́nɛ wɔ́p ńcú ŋɡɔ: «Pʉʉ zúꞋ Tsɑpʉɔ ɡʉ ńdɔk pɛcʉ̈ɔ́Ꞌ pɛ́ pɛ Lɛ́ɛnɛ́nɛ, ńtɔ́ tɛ pɔ́p zɑ́ɑ zɑ́ɑnɛ tɛ ḿbɔ́ pɛ́ pɔɔ sɑ́ŋ ńjí ndɛn pɔ́.»

¹⁵Ńtɔ́ pɔ́Ꞌɔ, nɛzɑ́Ꞌ ntsɑŋ yɔ́p pʉɔ tsʉʉ, ńníꞋ ŋɡʉ̈ɔ́Ꞌ tú-pʉɔ kɛpɔŋ tsʉʉ mbíꞋ mɛfɑꞋ kɛpɔŋ mi pɔ́p kɑ fɑꞋnɛ. Mbɑ́ɑtɛ nǔu pʉɔ pɔ́p kɑ tʉʉnɛ tú mbɔ̌ Sɛ́, tɛ mbɑ nǔu sẅiŋɛ yɔ́p tsʉʉ yi ɛ́ pʉ́k pʉ́knɛ, yi pʉɔ kɛpɔŋ ɛ̂pɑ́ pi pɔ́p ŋ́kɑɑ ɡẅɛɛ mɛkuꞋ pɔ kɑ pɔ́ ńcú nǔu Sɛ́.

¹⁶Pʉɔ ɛ̂pɑ́ nɑ́ŋ ŋkɑ́ tsʉʉ nu pɔ́ ńzɑ́ŋ wɔ́p zɑ́ŋnɛ, ḿbɔ́ ŋ́kíi ŋɡʉ̈ɔ́Ꞌ yɔp, ńnɑ́ŋ ŋ́ɡɛ pɔ yúu mi mbʉʉ yɔp sɛ́ ńtsʉ́ʉnɛ wɔ́p nɛɡɛ, pɔ́p ŋkɑ́ tsʉʉ ɛ́sẅíi pɔ sẅiŋɛ yi pɔ́p lɔk ŋ́ŋɑ́Ꞌtɛ ŋɑ́Ꞌtɛ́nɛ, ḿbɔ́ ńdẅɑklɛ ŋu ḿbɔ́ ńjí pii yi pɔ́p ɡʉ ńjʉ́ nǔu wɛ́.

¹⁷Lɑ́ ɛ́ ɡʉ nǔu pʉʉ mbɑ̌ɑ pɛsúu pɑ́ɑ pɛ́ tʉʉndɛn, pʉʉ kẅíitɛ mɛnu mi ɡɑŋntúu-Tsɑpʉɔ wɛkŋɛ Yɛ́su Kɛlístɔ kɑ zɑ́Ꞌnɛ njí ńcú mbɔ̌ pʉʉ.

¹⁸Pɔ́p kɑ cú mbɔ̌ pʉʉ ŋɡɔ, ɛ́ ɡʉ ńdɑ́Ꞌ ḿbɔ́ nǔu ŋkɑ́ yi ndǔmbí ɡʉ ḿmɛ, pɛcɔ́ pʉɔ ɡwɛ wʉ́ʉ, ŋ́ɡɛ mɛnu kɛpɔŋ nǔu ntɛ́ yi mbʉʉ yɔp sɛ́ ńtsʉ́ʉnɛ wɔ́p nɛɡɛ pɔ́Ꞌɔ.

¹⁹Pɔ́p pɔ́nɛ pʉɔ pi pɔ́p mɑꞋnɛ fɑkŋɛ tsɛtsɛt pʉɔ-Kɛlístɔ. Pɔ́p ɡɛ pɔ yúu mi pɔ́p zúꞋnɛ sɔŋ-mbʉʉ pɔ́p, Zẅikŋɛ-Sɛ́ kɑ́ pɔ́ nǔu pɔ́p pɔ́.

²⁰Lɑ́ ŋ́ɡʉ nǔu pʉʉ mbɑ̌ɑ pɛsúu pɑ́ɑ pɛ́ tʉʉndɛn, pʉʉ kẅiꞋ ńnɛn pɔ nǔu sẅiŋɛ yi pɛ́ kɑ zíꞋnɛ wʉ́ʉ ɛ́ fú mbɔ̌ Sɛ́ pʉʉ pɛ́m lɑ́. Pʉʉ lɔk mɛtʉʉ-Zẅikŋɛ Lɛ́ɛnɛ́nɛ ńcɛꞋlɛ Sɛ́.

²¹Pʉʉ ɡɛ Sɛ́ kɛ́ ḿbɔ́ ŋ́kẅiꞋ ŋ́kɔŋ wʉ́ʉ kɔŋnɛ, ḿbɔ́ ńzẅíꞋlɛ ŋɡɔ Tsɑpʉɔ wɛkŋɛ Yɛ́su Kɛlístɔ ŋ́ɡʉ ŋ́ɡɛ pʉʉ ɡẅɛɛ luk kɛ́mɛ, mbíꞋŋɡɔ ɑ tsɑ́ɑ mɛjʉ́ŋ mʉ́ʉ.

²²Pʉʉ tsɑ́ɑ mɛjʉ́ŋ pʉɔ pi pɔ́p sɛ́ ḿmʉ́Ꞌlɛ mʉꞋlɛ́nɛ[1]

²³Pʉʉ fú tsɛt múk ńcẅɛɛtɛ wɔ́p, pɔ́p luk. Pɛcɔ́ pʉɔ pɛn ḿbɔ́ ɡú pi pʉʉ ɡʉ ḿbɛn ńtsɑ́ɑ mɛjʉ́ŋ mɔ́p, ŋ́ɡɔ́ ńtsɑ́ɑ, ḿbɔ́ ḿbɑ́ɑ yʉʉ mbʉʉ. Pʉʉ pɑ́ɑ mbɑ mɛndẅí mɔ́p pɑ́Ꞌ ntsɛ́llɛ́-mɛnu kɛpɔŋ ɡɔ́ ŋ́kúu nǔu ɛ́fú nǔu yúu mi mbʉʉ yɔp tsɑ́ɑnɛ.

²⁴Gúꞌlɛ pɔ́ mbɔ̌ ŋu ẅí ɑ kuꞋ nɛtʉ̈ɔ́Ꞌlɛ wʉ́ʉ tɛ pʉʉ pɔɔ vu, jʉ́ ẅi ɑ kuꞋ nɛɡɛ pʉʉ cẅɛt ńtʉ́ʉ nǔu zʉꞋ-nɛɡúꞋ yi kwɑꞋ jʉ́ ɑ zúꞋu tɛ lɔ́Ꞌ pɔɔ nǔu pʉʉ pɔ́, ḿbɔ́ ńtsɑ́ɑtɛ tsɑ́ɑtɛ́nɛ,

²⁵ŋu ɛ̂wɑ́ pɔ́nɛ ndɑꞋ Sɛ́. A kɑ lɔk Tsɑpʉɔ wɛkŋɛ Yɛ́su Kɛlístɔ ŋ́ɡɛ pɛkŋɛ luk. Pɛ́ ɡúꞌlɛ pɔ wɛ́, jʉ́ ɡẅɛɛnɛ nɛɡúꞋ, jʉ́ ɡẅɛɛnɛ mɛtʉʉ, jʉ́ sɑ́Ꞌnɛ pʉɔ, pɑ́Ꞌ ɑ kɑ lɑ́Ꞌnɛ ńzɛ, ɛ́ kɛ́ ḿbɔ́ pɔ pɔ́Ꞌɔ, tɛ ŋ́kúu ŋkɔ̂ɔnɛ, ɛ́ ńdɑ́Ꞌ ḿbɔ́ pɔ pɔ́Ꞌɔ, nǔu mɛŋɡuꞋ mɛŋɡuꞋ. Ɛ́ pɔ́Ꞌɔ.