Read Ngomba Mɛnu ɛ́ ńdɑ́Ꞌ ńcẅɛt 1 Bible Online

Mɛnu ɛ́ ńdɑ́Ꞌ ńcẅɛt 1 - Ngomba bible

Mɛnu ɛ́ ńdɑ́Ꞌ ńcẅɛt 1

¹Nu yi ɛ́ tsɛt yɔ ŋwɑꞋnɛ ɛ́ yi ɛ́ kɑ lʉɔmɛ́nɛ, Yɛ́su Kɛlístɔ ɡɛ ŋ́ɡɛ pɛ́ jí. Ɛ́ ɡɔ́ ḿbɔ́, mbɔ Sɛ́ zɑ́Ꞌ njí ŋ́ɡɛ Yɛ́su jí yîyɑ́ nu nɛpɔ́ yi ɑ ɡʉ ńdɛꞋlɛ mbɔ̌ pʉɔ pɛ́ nɛ́ yúu mi ɛ́ ɡʉ fɛ́Ꞌnɛ ńtɔ́. Kɛlístɔ kɑ túu cʉ̈ɔ́Ꞌ wɛ, ɑ ɡʉ ńdɛꞋlɛ yîyɑ́ nu mbɔ̌ Jɑ̂ŋ ẅí ɑ ŋɡɑŋfɑꞋ-Yɛ́su.

²Jɑ̂ŋ ɛ̂wɑ́ ɑ zɑꞋnɛ ḿbɔ́ ŋ́ŋwɑꞋnɛ kʉ̈ɔ́ lɑ́ yi ɑ kɑ jʉ́ɔnɛ. KwɑꞋ jʉ́ sɛ́ ńcú ŋɡɔ ɛ́ fú mbɔ̌ Sɛ́, ḿbɔ́ nu yi ɛ́ nɛ́nẅín, mbɔ Yɛ́su Kɛlístɔ kɑ ɡɛ pɛ́ jí.

³Pɔ́ttú ŋu ẅí ɑ ɡʉ fúŋ yɔ ŋwɑꞋnɛ. Pɛpɔ́ttú pɔ́ pʉɔ pi pɔ́p ɡʉ ńzúꞋ yɔ sẅiŋɛ yi ɛ́ fúnɛ mbɔ̌ Sɛ́, ŋ́ɡɛ yúu mi pɛ́ ŋwɑꞋnɛ́nɛ tsɛtú. MbíꞋŋɡɔ ŋkɑ́ yi mɔnɛ mɛnu ɡʉ ḿbuutɛ kẅɛ́Ꞌlɛ tɛ ḿbɔ́ ḿbɑ́ɑtɛ.

⁴Yɔ ŋwɑꞋnɛ fú mbɔ̌ mɔ Jɑ̂ŋ, ŋ ŋwɑꞋnɛ ŋ́ɡɑ́ mbɔ̌ mɛcúꞋlɛ-pʉɔ-Kɛlístɔ mi ɛ́ sɑɑmbɑ́, ḿbɔ́ tsɛt ŋɡɔŋ-Azîi. Sɛ́ ẅi ɑ ɡú, mbɔ ɑ kɑ pɔ́ ɡú, ɑ pɛn ḿbɔ́ ńtɔ́, pɔ́p mɛzẅikŋɛ sɑɑmbɑ́ mi ɛ́ mbi kɔꞋ-nɛfɔɔ nɛ́, pɔ́p pɔ́ ḿbɔ́ nɛ́ pʉʉ, ḿbɔ́ ŋ́ɡɑ́ fuꞋ níinɛ yʉ́ʉ ḿbɛn ḿbɔ́ ńníꞋ mɔ́fíitɛ tʉ́m pʉʉ.

⁵Yɛ́su Kɛlístɔ ẅi ɑ jʉ́njʉ́ɔ wɛ nɛ́nẅín, ḿbɔ́ nduŋmbi mɔ́ɔ, ḿbɔ́ nduŋmbi ŋu ẅí ɑ kɑ pfúnɛ ḿbɛn ńzẅíimɛ, ḿbɔ́ Fɔɔ ńtsɑ pɛfɔɔ pí pɔ́p ndǔ tsɛ́tsɑ́Ꞌ, ḿbɔ́ ŋ́ɡɑ́ fuꞋ níinɛ yʉ́ʉ, ḿbɛn ḿbɔ́ ńníꞋ mɔ́fíitɛ tʉ́m pʉʉ. Jʉ́ Kɛlístɔ kɔŋ wɛkŋɛ tɛꞋ, ɑ kɑ lɔk mɛci mɛ́ ŋ́kíɛꞋ ŋkʉ mɛnu kɛpɔŋ nǔu pɛkŋɛ.

⁶A kɑ lɔk wɛkŋɛ ŋ́ɡɛ pʉɔ pi pɔ́p tsɛt nu-nɛfɔɔ-Sɛ́, ḿbɛn ńdɔk wɛkŋɛ ŋ́ɡɛ pɑnɔŋpɔꞋ pɑ́Ꞌ pɛkŋɛ ɡʉ ɛ́fɑꞋ mbɔ̌ Tɑ̌ɑ wɛ Sɛ́. Nɛɡúꞌ mbɑ mɛtʉʉ ńdɑ́Ꞌ ḿbɔ́ pɔ mbɔ̌ jʉ́ Yɛ́su Kɛlístɔ nǔu mɛŋɡuꞋ mɛŋɡuꞋ. Ɛ́ pɔ́ꞌɔ.

⁷Pʉʉ kɛ́ ńjí ŋɡɔ ɑ sɛ́ ńtɔ́. A ɡʉ ńdɑ́Ꞌ ńtɔ́ pɔ tsɛt mɛlɑ́ɑ. Mbɑ wɔ̌ lɑ́ ɡʉ ńdɑ́Ꞌ ńzɑ́p lík nǔu wɛ́, tɛ mbɑ pʉɔ pi pɔ́p kɑ sɔpnɛ ɡúŋ ŋɡíi yɛ́. Pʉɔ ŋɡɔŋ nɛ́ ŋɡɔŋ ndǔ tsɛ́tsɑ́Ꞌ ɡʉ ńdɑ́Ꞌ ńzẅík ŋɡɔ́ɔ, ŋ́kʉ́ɔꞋ nɛvú ntɛ́ wɛ́. Ɔ́ɔŋ ɛ́ ɡʉ ńdɑ́Ꞌ ḿbɔ́ pɔ pɔ́Ꞌɔ, tɛ yúu pɔɔ nǔu kúpmɛ. Ɛ́ pɔ́ꞌɔ.

⁸Tsɑpʉɔ Sɛ́ ẅi ɑ ɡú, mbɔ ɑ kɑ pɔ́ ɡú, ɑ pɛn ḿbɔ́ ńtɔ́, ɑ ŋɡɑŋmɛtʉʉ tsʉʉ, ɑ sɛ́ ńcú ŋɡɔ: Mɔ Alfɑ, ḿbɔ́ Ɔmɛŋɡɑ, nduŋmbi ḿbɔ́ ndẅiknzʉʉ.

⁹A mɔ Jɑ̂ŋ, mɔ́ɔmɑ́ wʉʉ, ńdɛɛ nǔu pɑ́Ꞌ pɛkŋɛ lɑtnɛ mbʉʉ nǔu Yɛ́su, Pɛkŋɛ tɛmtɛ ḿbɔ́ ńjʉ́ɔ ŋɡʉ̈ɔ́Ꞌ, ḿbɔ́ tsɛt nu-nɛfɔɔ-Sɛ́, ḿbɛn ḿbɔ́ ńdɔk kɔkmbʉʉ ńzẅíꞋlɛ Yɛ́su. Pɛ́ kɑ ɡʉ Pɑtmɔs, ɛ́ pɔ́ lɑ́Ꞌ yi ŋki kɑ zɛmɛnɛ ńníꞋ sɔŋ, ńnɑ́ wɑ́ɑ, mbíꞋŋɡɔ ɛ sẅíi nu-Sɛ́ ḿbɛn ŋ́kúꞋlɛ yúu mi Yɛ́su Kɛlístɔ kɑ ɡɛnɛ pɛ́ jí.

¹⁰Ɛ́ ɡɛ ḿbɔ́ lɛ́Ꞌlɑ́Ꞌ-Tsɑpʉɔ, Zẅikŋɛ-Sɛ́ jʉ́ wɑ́ɑ. N zúꞋ yɛcɔ́ ŋɡi tɛnnɛ pɔ́ nzʉʉ mɔ, ḿbɔ́ ńcʉ́ɔ pɑ́Ꞌ ŋɡi-ntɑŋ lɑ́,

¹¹ḿbɔ́ ńcú ŋɡɔ: «CúꞋlɛ kʉ̈ɔ́ lɑ́ yi ɔ sɛ́ ńjʉ́ɔ, ŋ́ŋwɑꞋnɛ tsɛt nɛpúꞋ-ŋwɑꞋnɛ, ńtúu ŋ́ɡɑ́ mbɔ̌ mɛcúꞋlɛ-pʉɔ-Kɛlístɔ mi ɛ́ sɑɑmbɑ́, ḿbɔ́ tsɛt mɛtʉ́sɔŋ mɔnɛ: Ɛ́fɛ̂zɛ, Sɛmilnɛ, Pɛlŋɡɑmɛ, Tyɑtîi, Sɑldɛs, Filɑdɛlfîi, Lɑɔdisɛ́.»

¹²N zúꞋ pɔ́Ꞌɔ, ɛ́shɔtnɛ nɛjʉ́ɔ ŋu ẅí ɑ cúnɛ nu mbɔ̌ mɔ, ɛ́shɔtnɛ pɔ́Ꞌɔ, ńjʉ́ɔ mɛkyɛꞋ sɑɑmbɑ́ mi pɛ́ kɑ lɔknɛ tʉ́n-ŋɡɔ̂l ńniitɛ.

¹³N jʉ́ɔ wɛcɔ́ ŋu tʉ́ʉ tsɛtsɛt mɛkyɛꞋ ɛ̂mɑ́, ḿbɔ́ pɔ pɑ́Ꞌ Mɔ́ɔ-ŋumɛsɔŋ lɑ́, ḿmɑꞋ wɛcɔ́ tɑ́Ꞌ sɛsɑ ndẅí ɛ́ cúŋ tɛ ńtʉ́ʉ mɛku wɛ́, ɑ lɔk yɛcɔ́ pɑ́ɑ-yúu ŋ́kíꞋ nzɔꞋ yɛ, ɛ́ pɔ́ yi pɛ́ kɑ lɔknɛ tʉ́n-ŋɡɔ̂l ńniitɛ.

¹⁴Mɛnuk-tú mɛ́ fúk ŋɡɔ ntɔ́t, pɔ pɑ́Ꞌ mɛzẅii lɑ́. Mík mɛ́ kyɛꞌ zʉꞋ pɑ́Ꞌ lʉ́m-múk lɑ́.

¹⁵Mɛku mɛ́ kɑ pɔ́ ŋ́ŋwɑŋɛ pɑ́Ꞌ tʉ́n-mbɛlɔŋzɛ yi pɛ́ pɛ́t ńcẅɛɛtɛ múk lɑ́. Ŋɡi yɛ pɔ́ ńzɔt pɑ́Ꞌ nɛpíi ni ɛ́ jɛ́Ꞌnɛ lɑ́.

¹⁶A ɡẅɛɛ pɛcʉ̈ɔ́Ꞌ-sɑŋ sɑɑmbɑ́ nǔu lɑ́ɑpɔ́ yɛ́ yi tʉʉ. Yɛcɔ́ níi-ntsɔ yi tú yɛ́ shẅítnɛ, ɛ́ ɡẅɛɛ mɛɡʉ́ŋ mɛmbɑ́ ḿbɔ́ fú ntsu yɛ́ ńcẅɛt. Shʉ́ wɛ́ ŋwɑŋɛ pɔ pɑ́Ꞌ lík-nɛm yi ɛ́ tsɛt tʉʉ mɔ́nɛm lɑ́.

¹⁷N jʉ́ɔ wɛ́ pɔ́Ꞌɔ, ḿvu mɛku wɛ́, ńtsʉ́Ꞌ ńnɔɔ zúꞋu, ńtsʉ́Ꞌ ḿbɔ́ pɔ pɑ́Ꞌ mpfú. A zɑ́p pɔ́ yɛ́ yi tʉʉ nǔu mɔ, ńcú ŋɡɔ: «Kɔɔ pɛn ńcʉ̈ɔꞋ, mɔ Nduŋmbi, ḿbɔ́ ndẅiknzʉʉ.

¹⁸Mɔ pɔ́nɛ ŋu ẅí ɑ ntʉʉ. Ŋ kɑ pfú, lɑ́ mɔ ŋkɔ̂ɔnɛ ḿbɔ́ ɡú, ŋ́kɛ́ ńdɑ́Ꞌ ḿbɔ́ pɔ ɡú. Ŋ ɡẅɛɛ mɛtsɔ́Ꞌ mɑ́jɔ́Ꞌ, mi ɛ́ ɡɑ́nɛ wɑ́ɑ nɛ́ mɛtʉʉ nɛlɔk ńjʉ́ɔꞋ zʉꞋ yi pɛpfú zúꞋu, kɛ pɔ nɛlɔk ńtsɔ́Ꞌ ɛ́fú zúꞋu ńcẅɛɛtɛ pʉɔ ɔɔ.»

¹⁹Pɔ́Ꞌɔ lɑ́, ŋwɑꞋnɛ kʉ̈ɔ́ lɑ́ yi ɔ jʉ́ɔnɛ, yi ɔ sɛ́ ńjʉ́ɔ ŋkɔ̂ɔnɛ mbɑ yi ɔ ɡʉ ḿbɛn lɑ ńjʉ́ɔ.

²⁰Ɛ́ ɡʉ nǔu nɛjí yúu mi pɛcʉ̈ɔ́Ꞌ-sɑŋ sɑɑmbɑ́ pi ɔ jʉ́ɔnɛ ŋ ɡẅɛɛ nǔu pɔ́ yɑ́ɑ yi tʉʉ, mbɑ nǔu mɛkyɛꞋ sɑɑmbɑ́ mi pɛ́ kɑ lɔknɛ tʉ́n-ŋɡɔ̂l ńniitɛ, mbɔ ŋ ɡʉ ɛ́sẅíi wú ŋɡɔ: Pɛcʉ̈ɔ́Ꞌ-sɑŋ sɑɑmbɑ́ lɔk ḿbɔ́ pɛcʉ̈ɔ́Ꞌ-Sɛ́ pi pɔ́p pyɛ́pnɛ mɛcúꞋlɛ-pʉɔ-Kɛlístɔ ɛ̂mɑ́ sɑɑmbɑ́, mɛkyɛꞌ sɑɑmbɑ́ lɔk ḿbɔ́ mɛcúꞋlɛ-pʉɔ-Kɛlístɔ ɛ̂mɑ́ sɑɑmbɑ́.