Read Ngomba Mɛnu ɛ́ ńdɑ́Ꞌ ńcẅɛt 11 Bible Online

Mɛnu ɛ́ ńdɑ́Ꞌ ńcẅɛt 11 - Ngomba bible

Mɛnu ɛ́ ńdɑ́Ꞌ ńcẅɛt 11

¹Pɛ́ cú pɔ́Ꞌɔ, tɛ ɛ́ kuꞋ, pɛ́ ɡɑ́ yɛcɔ́ ntɛ́ kɛkɑꞋ, ɛ́ pɔ́ pɑ́Ꞌ kɛm yúu mi pɛ́ lɔknɛ fʉꞋ yúu, ŋ́ɡɔ ŋ́ɡɑ́, ḿbɔ́ ńcú mbɔ̌ mɔ ŋɡɔ: «Lɔ sɛ́ ɛ́fʉꞋ ndɑ́-nɔŋpɔꞋ, ɛ́fʉꞋ mbɑ zʉꞋ yi pɛ́ nɔŋnɛ pɔꞋ zúꞋu, ɛ́sɑ́ŋ ndɛn pʉɔ pi pɔ́p tsɛtú ḿbɔ́ ŋ́ɡúꞋlɛ Sɛ́.»

²Lɑ́ ŋ́kɛ́ ŋ́ɡʉ nǔu tɛtɑ́ɑ zʉꞋ-nɔŋpɔꞋ yi ɛ́ nzɛmpíi, ɔ nɑ́ kɛ́ fʉꞋ. MbíꞋŋɡɔ pɛ́ kɑ ɡɑ́ yîyɑ́ tɛtɑ́ɑ mbɔ̌ mɛŋɡɔŋ mi ɛ́ kɑ́ Jí Sɛ́ pɔ́, lɑ́ pɔ́p ɡʉ ŋ́ɡɛ ńnʉŋtɛ tʉ́sɔŋ Ndɛɛnɛlɛ́nɛ́nɛ nʉŋtɛ́nɛ nǔu pɛsɑŋ ntsɔ̌ppɑ́ mɛɡɛ́mɛ́nɛ́kwɑ.

³Ŋ́ɡʉ nǔu pɑjʉ́njʉ́ɔ pɑ́ɑ pɔ pɛ́pɑ́, mɔ ŋ́ɡɛ ŋ́ɡɑ́ wɔ́p nɛ́ mɛtʉʉ nɛlɔk ńcẅi Ŋkʉʉ wɑ́ɑ. Pɔ́p pɔ́, ḿmɑꞋ mɛndẅí lɔk ńdúŋ nɛvú nǔu mɛlɛ́Ꞌlɑ́Ꞌ ntsɑ́Ꞌ nɛ́ ŋkʉ yɛpɑ́ nɛ́ mɛɡɛ́mɛ́nɛ́ntúkú (1.260).

⁴Pîpɑ́ pɑjʉ́njʉ́ɔ pɛ́pɑ́ pi pɔ́p cúnɛ nu yí pɔ́p jínɛ nǔu mɔ, ɛ́ mɛtʉ́-mɛɡwɛ́t-Ɔliivɛ mɛmbɑ́, ŋ́ɡɛ mɛkyɛꞋ mɛmbɑ́ mí ɛ́ tʉ́ʉnɛ mbi Tsɑpʉɔ ẅí ɑ sɑ́Ꞌnɛ mbí tsʉʉ.

⁵Ŋu lɑɑ ḿbɔ́ ńdɔɔ nɛɡɑ́ɑnɛ wɔ́p, ɑ jí ŋɡɔ wɛcɔ́ múk ɡʉ ɛ́fú ntsu pɔ́p ńcẅɛt ḿbík pɛɡɑŋmbuu pɔ́p. Ɛ́ nɛ́nẅín ŋɡɔ ŋu lɑɑ ńdɔɔ nɛɡɑ́ɑnɛ wɔ́p, mbɔ ŋɡɑŋ ɡʉ ḿpfú pɔ pɔ́Ꞌɔ.

⁶Pɔ́p ɡẅɛɛ mɛtʉʉ nɛlɔk ŋ́kíitɛ mbʉŋ nɛfɑŋ, nǔu ntɛ́ yi mbʉŋ ŋ́ɡʉ ŋ́ɡɛ ńdɔ́ nǔu mɛlɛ́Ꞌ mi pɔ́p sɛ́ ńcẅi Ŋkʉʉ-Sɛ́ pɔ́. Pɔ́p pɛn ŋ́ɡẅɛɛ mɛtʉʉ nɛlɔk ɛ́shɔt ŋki ɛ́ tsʉ́Ꞌ mɛci, ḿbɛn ŋ́kuꞋ pɑ́Ꞌ pɔ́p lɑɑ ŋ́kɔŋ ŋkɑ́ kʉ̈ɔ́ lɑ́, pɔ́p ɡɛ ŋɡʉ̈ɔ́Ꞌ ntɛ́ nɛ́ ntɛ́ tɔ́ ndǔ tsɛ́tsɑ́Ꞌ.

⁷Lɑ́, pɔ́p ɡʉ ŋ́kɛ́ ńcú nu yi pɔ́p sɛ́ ńjí nǔu mɔ tɛ ńnɑ́Ꞌcí, ŋkʉꞋnɛ nɑɑ ẅi ɑ fúnɛ tsɛt ɡɛm kɛ́ ndẅiklɛ ŋ́kɔ́Ꞌ, ɑ tɔ́ mɑꞋ wɔ́p nɛ́ ntsɔ, ńjʉ́ wɔ́p, ńjẅítɛ wɔ́p.

⁸Mɛpfú mɔ́p ɡʉ ŋ́ɡɛ ńnɔɔtɛ ndǔ zɑ́n-mɑ́mɑ́ tʉ́sɔŋ. Pɛ́ lɔk ntɛ́ yi Sɛ́ lɔknɛ ńjʉ́ɔ yɛ́ yúu, ɛ́fúŋ ẅîwɑ́ mɑ́mɑ́ tʉ́sɔŋ ŋɡɔ Sɔdɔ̂m, mbɑ ŋɡɔ Ɛ́ɡíptɔ. Ɛ́ pɔ́ zʉꞋ yí pɛ́ kɑ zɛɛ ŋ́kẅii Tsɑpʉɔ wɔp nǔu tʉ́ mbɑ́ŋtɛ pɑ́ŋtɛ́nɛ zúꞋu.

⁹Pʉɔmɛ́sɔŋ mɛntɛ́ mɛntɛ́, pʉɔ nǔu mɛnjẅɛt mɛnjẅɛt, pɑsẅíŋɛ mɛsẅíŋɛ ntɛ́ nɛ́ ntɛ́, mbɑ pɑkɛ́jí Sɛ́ ɡʉ ńdɑ́Ꞌ ńjʉ́ɔ pɑ́Ꞌ mɛpfú mɔ́p nɔɔtɛ́nɛ ńjʉ́ɔ nǔu lɛ́Ꞌ pɛ́tɑ́t nɛ́ kɛm, ḿbɛn ŋ́kɛ́ mbɔɔ pɛ́m ŋɡɔ pɛ́ tíi mɛpfú mɔ́p ńníꞋ tsɛt mɛshi pɔ́.

¹⁰Pʉɔ-ndǔ tsɛ́tsɑ́Ꞌ ɡʉ ŋ́ɡɛ ńtsɑ́ɑtɛ mbíꞋ pɑ́Ꞌ pʉɔ pɔnɛ pɛ́pɑ́ pfúnɛ. Nu pɔŋ wɔ́p. Ŋu túu nɛpúꞋ ŋ́ɡɑ́ mbɔ̌ súu nɛ, ɑ pɛn ŋ́ɡɑ́ nɛ́. Pɔ́pmɛ́ lɔk pɔ́Ꞌɔ, ńtsɑ́ɑtɛ. MbíꞋŋɡɔ pɑcẅiŋkʉʉ ɛ̂pɑ́ pɛ́pɑ́ kɑ ɡɑ́ pʉɔ nɛ́ ŋɡʉ̈ɔ́Ꞌ ndǔ tsɛ́tsɑ́Ꞌ tɛꞋ.

¹¹Lɑ́, mɛlɛ́Ꞌlɑ́Ꞌ ɛ̂mɑ́ mɛ́ntɑ́t nɛ́ kɛm pɔ́ tɛ ńdɛɛ, Zẅikŋɛ yi ɛ́ ɡɛnɛ pɛ́ pɔ́ ɡú, fú mbɔ̌ Sɛ́, ńtɔ́ ŋ́kúu nǔu pɔ́p. Pɔ́p lɔ sɛ́ ńtʉ́ʉ tʉ́ʉnɛ. Cʉɔꞌ ɡẅɛɛ pʉɔ pi pɔ́p kɑ pɔ́ ńjʉ́ɔ mɛpfú mɔ́p.

¹²Pɑcẅiŋkʉʉ-Sɛ́ pɑ́ pɛ́pɑ́ zúꞋ, yɛcɔ́ ŋɡi tɛnnɛ fú tʉ́nɛ́pú ńcú mbɔ̌ pɔ́p ŋɡɔ: «Pʉʉ kɔ́Ꞌ ńtɔ́ nɛ́ zɑꞋnɛ. Pɔ́p pɔ́ ŋ́kɔ́Ꞌ, ḿbɔ́ tsɛt mɛlɑ́ɑ, pɛɡɑŋmbuu pɔ́p pɔ́ ńjʉ́ɔ.»

¹³Pɔ́p pɔ́ ŋ́kɔ́Ꞌ pɔ́Ꞌɔ, tsɛ́tsɑ́ꞌ tsʉ́Ꞌnɛ tɛꞋ. Tɑ́Ꞌ nji-tʉ́sɔŋ nǔu nji nɛɡɛ́m kɛ́mɛ. Tsɛ́tsɑ́Ꞌ tsʉ́Ꞌnɛ pɔ́Ꞌɔ, ńjẅítɛ pʉɔmɛsɔŋ ntsɑ́Ꞌ sɑɑmbɑ́. Pfuꞌ pʉɔ pi pɔ́p luknɛ, jʉ́ɔ ḿbɔ́k, ŋ́ɡɑ́ nɛɡúꞋ mbɔ̌ Sɛ́ ẅi ɑ nɑ́ŋnɛ tʉ́nɛ́pú.

¹⁴Ŋɡʉ̈ɔ́Ꞌ mbɑ́ɑtɛ yɛ́pɑ́ lɔk pɔ́Ꞌɔ, ńdɛɛ. Ɛ́ pʉ́ɔlɑɑ mbɑ́ɑtɛ yɛ́tɑ́t sɛ̂ndúŋ ḿbɔ́ ńtɔ́.

¹⁵Cʉ̈ɔꞋ-Sɛ́ mbɑ́ɑtɛ sɑɑmbɑ́ tɔ́ŋ wɛ́ ntɑŋ. Pɛ́ zúꞋ mɛŋɡi pɔ́ tʉ́nɛ́pú ńdɔk ŋɡi tɛnnɛ ńcú ŋɡɔ: «Nɛsɑ́Ꞌ mbí tsʉ́Ꞌ ḿbɔ́ pɔ nǔu mbɔ́-Tsɑpʉɔ wɛkŋɛ mbɑ nǔu mbɔ́-Nzɑ́Ꞌŋkʉ ẅi ɑ kɑ tsɔ́Ꞌnɛ.» Ẅîwɑ́ nɛsɑ́Ꞌ ɡʉ ńdɑ́Ꞌ ḿbɔ́ nǔu mɛŋɡuꞋ mɛŋɡuꞋ.

¹⁶Pɛlʉ́m pɑ́ ntsɔ̌pɛ́nɛ́kwɑ nɛ́ mɛɡɛ́mɛ́mbɑ́ pi pɔ́p nɑ́ŋnɛ nǔu mɛkɔꞋ-nɛfɔɔ mɔ́p mbi Sɛ́ lɑ́, vu sɛ́ ɛ́sɔp shʉ́ wɔ́p sɛ́, ḿbɔ́ ŋ́ɡúꞋlɛ Sɛ́,

¹⁷ńcú ŋɡɔ: «Pɛk ɡɑ́ pɑ́Ꞌlɑ́ mbɔ̌ ɡu mbɑ̌ɑ Tsɑpʉɔ Sɛ́ Ŋɡɑŋmɛtʉʉ tsʉʉ, Ɔ ɡú, mbɔ ɔ kɑ pɔ́ ɡú, pɛk ɡɑ́ pɑ́Ꞌlɑ́ mbíꞋŋɡɔ ɔ nyɛt mɛtʉʉ mú mi ɛ́ ɡú tɛꞋ, ḿbɛn mbíꞋ pɑꞋ ɡu tsʉ́Ꞌnɛ ɛ́sɑ́Ꞌ mbí ŋkɔ̂ɔnɛ.

¹⁸Ŋɡɔŋ nɛ ŋɡɔŋ kɑ zɑ́ŋ lɔ́ŋ, lɑ́ yú ŋkɑ́ yi ɔ ɡʉ ńnyɛt yú zɑ́ŋ lɔ́ŋ tɔ́, ḿbɛn ḿbɔ́ ŋkɑ́ yi ɔ ɡʉ ńzɑ́Ꞌ ntsɑŋ-pɛpfúsɛ́, ḿbɔ́ ŋkɑ́ yi ɔ ɡʉ ńtsɔ́Ꞌ fɑꞋ ɡɑŋfɑꞋ pú, pɑcẅiŋkʉʉ pú, ńtsɔ́Ꞌ fɑꞋ-pʉɔ pú, pʉɔ pi pɔ́p ŋ́ɡúꞋlɛ́nɛ lík Yú, mbɔ́ŋkʉ̈ɔ́ mbɑ pɛlʉ́m, ḿbɛn ḿbɔ́ ŋkɑ́ yi ɔ ɡʉ ɛ́sɑt pʉɔ pí pɔ́p júknɛ ḿbʉ́ʉpɛ ndǔ tsɛ́tsɑ́Ꞌ.»

¹⁹Pɔ́p cú pɔ́Ꞌɔ, tɛ ŋ́ɡɔ ḿmɛkŋɛ, ntsundɑ́-nɔŋpɔꞋ-Sɛ́ yí ɛ́ tʉ́nɛ́pú tsɔ́Ꞌnɛ ńtʉ́ʉ, ŋkɔp ẅi Sɛ́ kɑ lɔknɛ ŋ́ɡwɑt kɑɑ cẅɛt ńtʉ́ʉ tsɛt zʉꞋ yɛ́ yîyɑ́. Mɛnɛ́ɛ-mbʉŋ kyɛꞌ zʉꞋ. Pɛ́ zúꞋ mɛŋɡi, ńzúꞋ nɛfɑŋ kwɛnɛ ŋɡɑ ŋɡɑ. Tsɛ́tsɑ́ꞌ tsʉ́Ꞌnɛ. Mɛzẅii pûu ḿvutɛ pɑ́ꞋtɛꞋ.