Read Ngomba Mɛnu ɛ́ ńdɑ́Ꞌ ńcẅɛt 16 Bible Online

Mɛnu ɛ́ ńdɑ́Ꞌ ńcẅɛt 16 - Ngomba bible

Mɛnu ɛ́ ńdɑ́Ꞌ ńcẅɛt 16

¹N zúꞋ yɛcɔ́ ŋɡi tɛnnɛ fú tsɛt zʉꞋ-nɔŋpɔꞋ ḿbɔ́ ńcú mbɔ̌ Pɛcʉ̈ɔ́Ꞌ-Sɛ́ pɑ́ sɑɑmbɑ́ ŋɡɔ: «Pʉʉ ɡʉ ndǔ tsɛ́tsɑ́Ꞌ, ńtswɛt zɑ́ŋ lɔ́ŋ-Sɛ́ yi ɛ́ tsɛt mɛntúꞋ sɑɑmbɑ́ lɑ́.»

²Nduŋmbi ɡʉ ńtswɛt yɛ́ ntúꞋ ndǔ tsɛ́tsɑ́Ꞌ. Yɛcɔ́ ntɛ́ mɛfʉ́ŋ mi ɛ́ zɑ́ŋ pɑ́Ꞌtɛ, cẅɛt nǔu pʉɔmɛsɔŋ pi pɛ́ kɑ cʉɔꞌ lii-ŋkʉꞋnɛ nɑɑ nǔu pɔ́p, pɔ́p pɛn ḿbɔ́ ŋ́ɡúꞋlɛ tɛ́tɔ́k-ŋkʉꞋnɛ nɑɑ ɛ̂wɑ́.

³Mbɑ́ɑtɛ yɛ́pɑ́ tswɛt yɛ́ ntúꞋ tsɛt ŋki kɛ́ nɛpɑt. Ŋki kɛ́ nɛpɑt shɔtnɛ ńtsʉ́Ꞌ pɑ́Ꞌ mɛci-ŋu ẅí ɑ pfúnɛ lɑ́. Kʉ̈ɔ́ lɑ́ yi ɛ́ tsɛt ŋki kɛ́ nɛpɑt tɛ ḿbɔ́ ńnúklɛ nuklɛ́nɛ pûu ḿpfútɛ.

⁴Mbɑ́ɑtɛ yɛ́tɑ́t tswɛt yɛ́ ntúꞋ tsɛt mí mbɑ tsɛt sɑ́Ꞌŋki ɛ̂wɑ́, ɛ́ shɔtnɛ ńtsʉ́Ꞌ mɛci.

⁵N zúꞋ Cʉ̈ɔꞋ-Sɛ́ ẅí ɑ kɑ ɡẅɛɛnɛ nu nǔu mɛŋki pɔ́ ńcú ŋɡɔ: «Gu ẅí ɔ ɡú, mbɔ ɔ kɑ pɔ́ ɡú, ɡu ẅí ɔ Ndɛ́ɛnɛ Lɛ́ɛnɛ́nɛ, ɔ ɡɛ ɛ́ pɔ́ pɔ pɑ́Ꞌ ɛ́ ńzɛɛnɛ ḿbɔ́ pɔ́Ꞌɔ, mbíꞋŋɡɔ, ɔ ɡɛ pɔ ndʉ́ŋndʉŋ.

⁶MbíꞋŋɡɔ pɔ́p kɑ tswɛt mɛci-pʉɔ pú, mbɑ mɛ́ pɑcẅiŋkʉʉ pú. Gu ŋ́ɡɑ́nɛ mɛci pɔ́p ńnɔ́. Ɛ́ pɔ́ pɑ́Ꞌ ɛ́ kɑ pɔ́ ḿbíkŋɛ ŋɡɔ pɛ́ ɡɛ nǔu pɔ́p pɔ́Ꞌɔ.»

⁷N zúꞋ ŋɡi-ŋu fú zʉꞋ yi pɛ́ nɔŋnɛ pɔꞋ zúꞋu ńcú ŋɡɔ: «Tsɑpʉɔ Sɛ́ Ŋɡɑŋmɛtʉʉ tsʉʉ, wu nɛŋɑk ntsɑŋ ɛ́ nɛ́nẅín, ḿbɛn ḿbɔ́ ndʉ́ŋndʉŋ.»

⁸Mbɑ́ɑtɛ yɛ́nɛ́kwɑ tswɛt yɛ́ ntúꞋ nǔu nɛm, Sɛ́ ɡɛ pɑ́Ꞌ nɛm ɡʉ ńdɔk múk ńtɔɔ pʉɔmɛsɔŋ.

⁹ZʉꞋ kɛ ŋ́ɡɔ́ɔ ńtɔɔnɛ tɔɔnɛnɛ tɛ ńtɔɔ pʉɔmɛsɔŋ. Pɔ́p zɔɔtɛ lík-Sɛ́, ẅí jʉ́ ɡɛnɛ lɑ pɔ́p jʉ́ɔ yɔ ŋɡʉ̈ɔ́Ꞌ ntɛ́ nɛ́ ntɛ́, ŋ́ɡɛ pɔ́Ꞌɔ, ŋ́kɛ́ mbɔɔ kúpmɛ mɑt wɔ́p ŋ́ɡɑ́ nɛɡúꞋ mbɔ̌ Sɛ́ pɔ́.

¹⁰Mbɑ́ɑtɛ yɛ́tɑɑ tswɛt yɛ́ ntúꞋ nǔu kɔꞋ-nɛfɔɔ ŋkʉꞋnɛ nɑɑ ɛ̂wɑ́. Nzɛ́nzʉ́ʉ pûu ńjʉ́ lɑ́Ꞌ-nɑɑ ɛ̂wɑ́. Pʉɔmɛ́sɔŋ jʉ́ɔ ŋɡʉ̈ɔ́Ꞌ jʉ́ɔnɛ tɛ ńnɛ́m lʉ́m yɔ́p.

¹¹Ŋɡʉ̈ɔ́Ꞌ yɔp mbɑ mɛfʉ́ŋ mɔ́p ɡɛ pɔ́p zɔɔtɛ Sɛ́ ẅí ɑ tʉ́nɛ́pú, lɑ́ ŋ́kɛ́ mbɔɔ kúpmɛ mɑt wɔp, ḿmɛꞋ mɛfɑꞋ kɛpɔŋ mɔ́p pɔ́.

¹²Mbɑ́ɑtɛ yɛ́nɛ́ntúkú tswɛt yɛ́ ntúꞋ tsɛt wɛcɔ́ mɑ́mɑ́ mí ẅi pɛ́ fúŋnɛ ŋɡɔ Ɛfɛlɑ̂tɑ. Ŋki mí ɛ̂wɑ́ zúu, ńtsɔ́Ꞌ ndúŋ mbɔ̌ pɛfɔɔ pi pɔ́p fúnɛ nɛ́ Sɑ́Ꞌnɛm.

¹³N jʉ́ɔ yɛcɔ́ zẅikŋɛ kɛpɔŋ fú ntsu-mɑ́mɑ́ nɔ́nɛŋɡɛ́m ńcẅɛt, wɛcɔ́ fú ntsu-ŋkʉꞋnɛ nɑɑ ńcẅɛt, wɛcɔ́ fú ntsu ncẅiŋkʉʉ Sɛ́ wɛ cɔtnu ńcẅɛt, tɛ pɔ́p pɔ́ pɛtɑ́t, ḿbɔ́ pɔ pɑ́Ꞌ pɛtɛtɔꞋ lɑ́,

¹⁴ɛ́ pɔ́ pɔ́Ꞌɔ, ḿbɔ́ mɛzẅikŋɛ kɛpɔŋ mí ɛ́ ŋ́ɡɛ mɛnu mɑɑ mɑɑnɛ. Pɔ́p ɡɛ ŋ́ɡʉ ńjʉ́ɔ pɛfɔɔ pi ɛ́ ndǔ tsɛ́tsɑ́Ꞌ tsʉʉ, nɛpɔ́ yi pɔ́p ɡʉ ńcúꞋlɛ wɔ́p ńdɔk ńzẅíꞋlɛ ntsɔ ẅí ɛ́ ɡʉ ńdɑ́Ꞌ ḿbɔ́ nǔu mɑ́mɑ́ lɛ́Ꞌlɑ́Ꞌ yi, Sɛ́ ŋɡɑŋmɛtʉʉ tsʉʉ ɡʉ ńdɑ́Ꞌ ŋ́ŋɑk pʉɔ pʉɔmɛsɔŋ.

¹⁵Tsɑpʉɔ cú ŋɡɔ: «Pʉʉ kɛ́ ńjí ŋɡɔ, mɔ ńtɔ́ pɑ́Ꞌ ntsɔ́ŋ lɑ́. Pɔ́ttú ɑ ŋu ẅí mɔ ŋ́ɡɛ ŋ́ɡɔ ńtɔ́, ɑ pɔɔ ḿbɔ́ ńdɛ́ pɔ́, mɛndẅí mɛ́ pɔ́ nǔu wɛ́, ḿbɔ́k pɑ́Ꞌ ɑ ɡʉ ńdɔ sɛ́ ńnɛn kɛ́ zẅík ndẅí, sʉ́ʉ kɔ́ wɛ́.»

¹⁶Mɛzẅikŋɛ kɛpɔŋ ɛ̂mɑ́ ɡɔ́ɔ ŋ́kɛ́ ńcúꞋlɛ pɛfɔɔ nǔu yɛcɔ́ zʉꞋ yi pɛ́ fúŋnɛ nǔu sẅiŋɛ-pɑhɛbɛlʉ ŋɡɔ: Amɑŋɡɛdɔ̂ŋ.

¹⁷Cʉ̈ɔꞋ-Sɛ́ mbɑ́ɑtɛ sɑɑmbɑ́ tswɛt yɛ ntúꞋ tʉ́ tsɛt fɑ́k. Yɛcɔ́ ŋɡi tɛnnɛ fú nǔu kɔꞋ-nɛfɔɔ ní ɛ́ tsɛt zʉꞋ-nɔŋpɔꞋ ńcẅɛt, ńcú ŋɡɔ: «Ɛ́ kuꞋ.»

¹⁸Mɛnɛ́ɛ-mbʉŋ kyɛꞌ zʉꞋ, pɛ́ zúꞋ mɛŋɡi-pʉɔmɛsɔŋ, nɛfɑŋ kwɛnɛ ŋkɑ́ nɛ́ ŋkɑ́, tsɛ́tsɑ́ꞌ tsʉꞋnɛ tɛꞋ, mbɔ tɛ fúnɛ pɑ́Ꞌ ŋumɛsɔŋ ndǔ tsɛ́tsɑ́Ꞌ, ɛ́ ŋkɑɑ mɔ́ kɑ́ tsʉꞋnɛ pɔ́Ꞌɔ pɔ́.

¹⁹Mɑ́mɑ́ tʉ́sɔŋ ɛ̂wɑ́ sɑ́ɑnɛ nji yɛ́tɑ́t. Mɛtʉ́sɔŋ mi ɛ́ ŋɡɔŋ nɛ́ ŋɡɔŋ kɛ́mɛ. Sɛ́ ɡɔ́ɔ ŋ́kɛ́ ŋ́kẅíitɛ mɑ́mɑ́ tʉ́sɔŋ-Mbɑbilɔ̂nɛ, ŋ́ɡɛ ɑ ńnɔ́ ntúꞋ-mɛluꞋ zɑ́ŋlɔ́ŋ yɛ́ yi ɛ́ ɡɑ́Ꞌ mɔ́ tɛꞋ.

²⁰Mɛlɑ́Ꞌ mi ŋki kɑ zɛmɛ́nɛ ńníꞋ sɔŋ sɔ́ ŋ́kúu ŋki. Pɛ́ pɔɔ pɛn ńjʉ́ɔ mɛŋkɔ́Ꞌ mi ɛ́ ndǔ tsɛ́tsɑ́Ꞌ pɔ́.

²¹Mɛmɑ́ mɛzẅii mi ɛ́ jʉ́nɛ kílɔ mɛɡɛ́mɛ́nɛ́kwɑ, fú tʉ́ ḿvutɛ nǔu pʉɔmɛsɔŋ. Pʉɔmɛ́sɔŋ zɔɔtɛ Sɛ́, mbíꞋ ŋɡʉ̈ɔ́Ꞌ yi pɔ́p jʉ́ɔnɛ, ɛ́ fú nǔu mɛzẅii, mbíꞋŋɡɔ yɛ́tɛ́ ŋɡʉ̈ɔ́Ꞌ lɑ́ tɛn tɛꞋ.