Read Ngomba Mɛnu ɛ́ ńdɑ́Ꞌ ńcẅɛt 17 Bible Online

Mɛnu ɛ́ ńdɑ́Ꞌ ńcẅɛt 17 - Ngomba bible

Mɛnu ɛ́ ńdɑ́Ꞌ ńcẅɛt 17

¹M bɛn ńjʉ́ɔ wɛcɔ́ tɑ́Ꞌ nǔu pɛcʉ̈ɔ́Ꞌ-Sɛ́ sɑɑmbɑ́ pi pɔ́p kɑ ɡẅɛɛnɛ mɛntúꞋ sɑɑmbɑ́ lɑ́ tɔ́ ńcú mbɔ̌ mɔ ŋɡɔ: «Tɔ́, mɔ ńnyɛt wú pɑ́Ꞌ Sɛ́ ɡʉ ŋ́ɡɛ ńníꞋ ŋɡʉ̈ɔ́Ꞌ tú mɑ́mɑ́ ŋɡɑŋmpfuꞋ mɑŋɡɛ́ pɔ́Ꞌɔ. Ɛ́ mɑ́mɑ́ tʉ́sɔŋ ẅi pɛ́ kɑ kútnɛ mbʉʉ mɛŋki tɛ ńzɑ́ɑ lɑ́.»

²Pɔ́p pɛfɔɔ ndǔ tsɛ́tsɑ́Ꞌ tsʉʉ ŋ́ɡɛ mɔ́ ɡɑp. Pʉɔmɛ́sɔŋ pi pɔ́p ndǔ tsɛ́tsɑ́Ꞌ, nɔ́ mɛluꞋ-mpfuꞋ ɛ̂mɑ́ tɛ ḿbɑ́.

³Zẅikŋɛ Lɛ́ɛnɛ́nɛ tɔ́ ńjʉ́ wɑ́ɑ, Cʉ̈ɔꞋ-Sɛ́ wɑ́ tíi wɑ́ɑ ńdɔk ŋ́ɡʉ nǔu yɛcɔ́ kɔ̂ŋtɛt. N jʉ́ɔ wɛcɔ́ mɑŋɡɛ́ ńnɑ́ŋ ndǔ wɛcɔ́ nɑɑ, ɑ pɑŋ ŋɡɔ ɡʉ̂ʉŋ, mɛlík lɔk ńzɔɔtɛ Sɛ́ pɑ́tɛ mbʉʉ nɑɑ ɛ̂wɑ́, mɛtú mɛ́ pɔ́ sɑɑmbɑ́, mɛndɔ́ŋ mɛ́ pɔ́ nɛɡɛ́m.

⁴Mɑŋɡɛ́ ɛ̂wɑ́ mɑꞋ mɛndẅí tʉʉndɛn, ɛ́ pɑŋ ŋɡɔ ɡʉ̂ʉŋ. Yúu mi ɑ lɔknɛ kẅii mbʉʉ yɛ ɛ́ pɔ́ mbɔ pɛ́ kɑ lɔk tʉ́n-ŋɡɔ̂l, nɛ́ mɛŋɡɔꞋ mi ɛ́ mɛ́ tʉʉndɛn, nɛ mɛtúkcí ńdɔk ńniitɛ. A ɡẅɛɛ yɛcɔ́ ntúꞋ mbɔ̌ wɛ́, mbɔ pɛ́ kɑ lɔk tʉ́n-ŋɡɔ̂l ńniitɛ. Mɛnu ndǔmbí mi ɛ́ fúnɛ nǔu mɛnu-mpfuꞋ ɛ̂mɑ́ pɔ́ tsɛtú tɛ ńdúu.

⁵Mbɔ pɛ́ kɑ ŋwɑꞋnɛ yɛcɔ́ lík nǔu nɛzíi nɛ́. Nɛjí yúu mi ɛ́ lɔknɛ ńcú tɛn tɛꞋ. Lík ɛ̂yɑ́ lɔk ḿbɔ́ ŋɡɔ mɑ́mɑ́ tʉ́sɔŋ-Mbɑbilɔ̂nɛ, mɑ́ pɛ́ pɑɡɛɡɑp mbɑ ntɛ́ ntɛ́ mɛnu kɛpɔŋ mi ɛ́ ndǔ tsɛ́tsɑ́Ꞌ.

⁶N jʉ́ɔ mɑŋɡɛ́ ɛ̂wɑ́, mbɔ ɑ nɔ́ mɛci-pʉɔ-Sɛ́ mbɑ mɛ́ pʉɔ pi pɔ́p cúnɛ yúu mi pɔ́p jínɛ nǔu Yɛ́su nɔ́ tɛ ḿbɑ́. N jʉ́ɔ wɛ́ tɛ ḿmɑɑ tɛꞋ.

⁷Lɑ́ Cʉ̈ɔꞋ-Sɛ́ cú mbɔ̌ mɔ ŋɡɔ: «Ɔ mɑɑ kʉ̈ɔ́? Ŋ ɡʉ kyɛꞌ ntsɛm-mɑŋɡɛ́ wɑ́, ẅi ɑ ndǔ nɑɑ lɑ́ ɛ́sẅíi wú, mbɑ jʉ́ nɑɑ ẅí tú yɛ́ sɑɑmbɑ́, mɛndɔ́ŋ mɛ́ pɔ́ nɛɡɛ́m lɑ́.

⁸Nɑɑ ẅí ɔ jʉ́ɔnɛ lɑ́, ɑ kɑ pɔ́ ɡú, lɑ́ ɑ kɛ́ pɛn mbɔ́ ɡú pɔ́. A ɡʉ ŋ́ɡɛ ḿbɛn ḿbɔ́ ɡú, ɛ́fú tsɛt nɛpʉ́ kɛ́ ndúŋ ŋ́kɔ́Ꞌ ŋ́ɡʉ nɛ́ zʉꞋ yi ɑ ɡʉ ŋ́kúu zúꞋu ŋ́kúu pɛ́. Pʉɔ pi pɔ́p ndǔ tsɛ́tsɑ́Ꞌ, mbɔ pɛ́ ŋkɑɑ ŋwɑꞋnɛ lík yɔ́p tsɛt ŋwɑꞋnɛ yi ɛ́ ɡɛnɛ pɛ́ pɔ́ ɡú, tɛ ɛ́fú ŋkɑ́ yi pɛ́ kɑ nɔŋnɛ ndǔmbí pɔ́, pɔ́p ɡʉ ŋ́ɡɛ ńjʉ́ɔ nɑɑ ɛ̂wɑ́ mɑɑ tɛꞋ. MbíꞋŋɡɔ ɑ kɑ pɔ́ ɡú, ɑ kɑ́ pɛn ḿbɔ́ ɡú pɔ́, ŋ́kɛ́ ŋ́ɡɛ ḿbɛn ńcẅɛt.»

⁹Yɔ zʉꞋ yi ɛ́ píkŋɛ́nɛ ŋɡɔ jínu cẅɛt jínu yi ŋu ɡẅɛɛnɛ nɛlɔk ńzúꞋ yúu mi pɛ́ cúnɛ yɛ́tɛ́. Mɛtú ɛ̂mɑ́ sɑɑmbɑ́ lɔk ḿbɔ́ mɛŋkɔ́Ꞌ sɑɑmbɑ́ mi wɔnɛ mɑŋɡɛ́ nɑ́ŋnɛ ndǔ,

¹⁰ḿbɛn ńdɔk ḿbɔ́ pɛfɔɔ sɑɑmbɑ́. Pɛ pɛ́tɑɑ tsɛtsɛt pɔ́p kɑ kɛ́mɔ́ ḿvu, tɑ́Ꞌ pɔ́ ndǔ kɔꞋ ŋkɔ̂ɔnɛ, wɛcɔ́ pɛ́t kɛ́ tɔ́, ɑ ɡʉ ŋ́kɛ́ ŋ́ɡɛ ḿbɔ́ tɛ ńtɔ́, ŋ́kɛ́ ḿbɔɔ ńnɑ́ŋ tɛꞋ pɔ́.

¹¹Nɑɑ ẅí ɑ kɑ zɛɛ ḿbɔ́ ɡú, ɑ pɛn mbɔɔ pɔ́ ɡú pɔ́ lɑ́, jʉ́ nɛ́ túmbʉʉ yɛ́ lɔk ḿbɔ́ fɔɔ mbɑ́ɑtɛ yɛ́nɛ́fɔ́m, ḿbɛn ḿbɔ́ wɛcɔ́ tɑ́Ꞌ nǔu pɛ́ sɑɑmbɑ́. A pɛn ḿbɔ́ ŋ́ɡʉ, nɛɡʉ ŋ́kúu pɛ́.

¹²Mɛndɔ́ŋ nɛɡɛ́m mi ɔ lɑ́Ꞌnɛ ńjʉ́ɔ lɑ́ lɔk ḿbɔ́ pɛfɔɔ nɛɡɛ́m pi pɛ́ pɛ́t kɛ́ ɡɑ́ nɔ́p nɛfɔɔ. Lɑ́ pɔ́p pɛ nɑɑ ɡʉ ŋ́ɡɛ tɛmtɛ ɛ́sɑ́Ꞌ lɑ́Ꞌ ndɑꞋ nǔu tɑ́Ꞌ nɛm wɛ́mɔ́Ꞌ.

¹³Pɔ́p nɛɡɛ́m ɡẅɛɛ tɑ́Ꞌ kwɑŋɛ. Ɛ́ pɔ́ nɛtɛmtɛ mɔ́p mɛtʉʉ, pɔ́p nɔ́p nɛfɔɔ, ŋ́ɡɑ́ mbɔ̌ nɑɑ.

¹⁴Pɔ́p ɡʉ ḿmɑꞋ Mɔ́ɔ-Njinjɔ nɛ́ ntsɔ, lɑ́ ɑ kɛ́ ńdɛɛ wɔ́p, mbíꞋŋɡɔ ɑ Tsɑpʉɔ pɛtsɑpʉɔ, ḿbɔ́ Fɔɔ pɛfɔɔ. Pʉɔ pí ɑ kɑ fúŋnɛ wɔ́p, ńtsɔ́Ꞌ wɔ́p, pɔ́p jí pɔ́ ndɑꞋ wɛ́, pɔ́p pɛpɔ́p lɛɛ nɑɑ ɛ̂wɑ́.

¹⁵Cʉ̈ɔꞋ-Sɛ́ pɛn ńcú mbɔ̌ mɔ ŋɡɔ: «Mɛŋki mi ɔ sɛ́ ńjʉ́ɔ, ɛ́ pɔ́ mbʉʉ zʉꞋ yi ŋɡɑŋɡɑ́ɑ mɑŋɡɛ́ wɑ́ tsẅɛ́nɛ zúꞋu lɑ́, mɛŋki ɛ̂mɑ́ lɔk ḿbɔ́ pʉɔ ntɛ́ nɛ́ ntɛ́, ḿbɔ́ pʉɔ mɛnɔɔ mɛnɔɔ, ḿbɔ́ ŋɡɔŋ nɛ́ ŋɡɔŋ, ḿbɔ́ mɛsẅíŋɛ ntɛ́ nɛ́ ntɛ́.»

¹⁶Mɛndɔ́ŋ nɛɡɛ́m mi ɔ lɑ́Ꞌnɛ ńjʉ́ɔ mbɑ nɑɑ lɑ́, pɔ́p ɡʉ ŋ́ɡɛ ḿbɑɑ ŋɡɑŋɡɑ́ɑ mɑŋɡɛ́ ɛ̂wɑ́, mbuu ńcẅɛ́ɛ yúu pɛ́ tɛ ɑ tʉ́ʉ kɛ́ zẅík ndẅí, ŋ́kwɛ́t kup yɛ́, ńtɔɔ pfuꞋ múk.

¹⁷MbíꞋŋɡɔ Sɛ́ kɑ kwɑŋɛ yúu ńníꞋ tsɛt tʉ́m pɔ́p pɑ́Ꞌ pɔ́p ɡʉnɛ tsʉ́Ꞌ ŋ́ɡɛ yúu mi ɑ kɑ kwɑŋɛ́nɛ. Ɛ́ pɔ́ pɑ́Ꞌ mɛndɔ́ŋ ɛ̂mɑ́ nɛɡɛ́m ɡʉ ŋ́ɡẅɛɛ tɑ́Ꞌ kwɑŋɛ, ńcúꞋlɛ nɛfɔɔ nɔ́p ŋ́ɡɑ́ mbɔ̌ nɑɑ, ɛ́ pɔ́ pɔ mbɔ̌ wɛ́ tɛ ńdɑ́Ꞌ ŋ́kúu lɛ́Ꞌ yi yúu mi Sɛ́ kɑ cúnɛ puutɛ́nɛ.

¹⁸Mɑŋɡɛ́ ẅí ɔ sɛ́ ńjʉ́ɔ lɑ́, ɑ lɔk ḿbɔ́ mɑ́mɑ́ tʉ́sɔŋ ẅi ɛ́ sɑ́Ꞌnɛ pɛfɔɔ pi pɔ́p ndǔ tsɛ́tsɑ́Ꞌ.