Read Ngomba Mɛnu ɛ́ ńdɑ́Ꞌ ńcẅɛt 19 Bible Online

Mɛnu ɛ́ ńdɑ́Ꞌ ńcẅɛt 19 - Ngomba bible

Mɛnu ɛ́ ńdɑ́Ꞌ ńcẅɛt 19

¹N jʉ́ɔ mɔnɛ mɛyúu tɛ ḿbɔ́tnɛ ńnɑ́ŋ, ńzúꞋ yɛcɔ́ ŋɡi tɛnnɛ ɛ́ pɔ́ pɔ pɑ́Ꞌ ŋɡi mɑ́mɑ́ nɔɔ lɑ́Ꞌ lɑ́, ɛ́ pɔ́ tʉ́nɛ́pú ḿbɔ́ ńcú ŋɡɔ: «Alɛlúyɑ[4], luk ŋ́ɡɛ nɛɡúꞋ mbɑ mɛtʉʉ mbɔ̌ Sɛ́ wɛkŋɛ,

²mbíꞋŋɡɔ wɛ nɛŋɑk ntsɑŋ ɛ́ nɛ́nẅín ḿbɛn ḿbɔ́ ndʉ́ŋndʉŋ. A kɑ kɛ́mɔ́ ŋ́ŋɑk ntsɑŋ mɑ́mɑ́ ŋɡɑŋɡɑ́ɑ mɑŋɡɛ́ ẅi ɑ ḿbɔ́ ńdɔk nu ɡɑ́ɑ yɛ́, ńtɑ́k zʉꞋ ndǔ tsɛ́tsɑ́Ꞌ. A pɑꞌ pɛnnu-mɛci-ɡɑŋfɑꞌ pɛ́ pinɛ ŋɡɑŋɡɑ́ɑ ɛ̂wɑ́ kɑ tswɛtnɛ. A pɑꞋ pɔ́ kwɑꞋ nǔu wɛ́.»

³Nɔɔ-lɑ́ꞌ pɛn ńcú ŋɡɔ: «Alɛlúyɑ! Ndíndí ẅí ɛ́ fúnɛ nǔu tʉ́sɔŋ yi ɛ́ shinɛ, ɛ́ ɡʉ ńdɑ́Ꞌ ŋ́kɔ́Ꞌ kɔ́Ꞌnɛ nǔu mɛŋɡuꞋ mɛŋɡuꞋ.»

⁴Pɛlʉ́m pɑ́ ntsɔ̌pɛ́nɛ́kwɑ nɛ́ mɛɡɛ́mɛ́mbɑ́, mbɑ mɛyúumɛku mɑ́ mɛ́nɛ́kwɑ kẅíꞋlɛ sɛ́, ŋ́ɡúꞋlɛ Sɛ́ ẅi ɑ nɑ́ŋnɛ ndǔ kɔꞋ-nɛfɔɔ, ḿbɔ́ ŋ́ɡúꞋlɛ wɛ́, ńcú ŋɡɔ: «Ɛ́ pɔ́Ꞌɔ! Alɛlúyɑ!»

⁵Yɛcɔ́ ŋɡi-ŋu fú zʉꞋ-kɔꞋ-nɛfɔɔ ńcú ŋɡɔ: «Pʉʉ ɡúꞋlɛ Sɛ́ wɛkŋɛ, pʉʉ ɡɑŋfɑꞋ pɛ́ tɛ ḿmɛk wʉ́ʉ, pʉʉ mbɔ́ŋkʉ̈ɔ́ mbɑ pɛlʉ́m pi pʉʉ pɔ́knɛ wɛ́.»

⁶N zúꞋ ŋɡi-nɔɔ-lɑ́Ꞌ zɔt pɑ́Ꞌ nɛpíi ni ɛ́ jɛ́Ꞌnɛ lɑ́, ḿbɛn ḿbɔ́ pɑ́Ꞌ ntʉʉ nɛfɑŋ ni ɛ́ kwɛnɛ́nɛ lɑ́, ḿbɔ́ ńcú ŋɡɔ: Alɛlúyɑ. MbíꞋŋɡɔ Tsɑpʉɔ Sɛ́ wɛkŋɛ, ḿbɔ́ Ŋɡɑŋmɛtʉʉ tsʉʉ, nɔŋ nɛfɔɔ nɛ́.

⁷Pɛkŋɛ tsɑ́ɑtɛ, ŋ́ɡɑ́ wûuẅíi, ŋ́ɡɑ́ nɛɡúꞋ mbɔ̌ wɛ́. MbíꞋŋɡɔ mɔ́ɔ-Njinjɔ ɡʉ ńzɔ́Ꞌ. Nzwɛ́ŋɡʉʉ, kẅii mɔ́ mbʉʉ yɛ tɛ ḿbɔ́ ńzẅíꞋlɛ.

⁸Pɛ́ kɑ ɡɛ nǔu ntɛ́ yi ɑ ɡʉ ḿmɑꞋ ndẅí tʉʉndɛn yi ɛ́ ŋwɑŋɛ́nɛ ḿbɔ́ kɛ́ lɔ́Ꞌ. MbíꞋŋɡɔ ndẅí tʉʉndɛn lɔk ḿbɔ́ mɛfɑꞋ-pʉɔ-Sɛ́ mi ɛ́ tʉ́ʉnɛ ndʉ́ŋndʉŋ.

⁹Wɛcɔ́ Cʉ̈ɔꞋ-Sɛ́ cú mbɔ̌ mɔ ŋɡɔ: «ŊwɑꞋnɛ tsɛt ŋwɑꞋnɛ ŋɡɔ pɛpɔ́ttʉ́ pʉɔ pí pɛ́ fúŋnɛ wɔ́p zʉꞋ-ndínɑ lɑ́ɑndɑ́-mɔ́ɔ-Njinjɔ, ḿbɛn ńcú mbɔ̌ mɔ ŋɡɔ: Ɛ́ sẅiŋɛ yi ɛ́ cẅɛtnɛ kwɑꞋ ntsu-Sɛ́.»

¹⁰N zúꞋ pɔ́Ꞌɔ, ńnɔɔ mɛku wɛ́ nɛɡúꞋlɛ wɛ́. Lɑ́ ɑ cú mbɔ̌ mɔ ŋɡɔ: «Kɔɔ ɡɛ pɑ́Ꞌɑ lɑ́.» M bɛn ḿbɔ́ yɑ́ɑ pɔ wɛcɔ́ ŋu nǔu ɡɑŋkufɑꞋ yʉ́ʉ, ḿbɛn ḿbɔ́ wɛ pɛcɔ́ pɔ́ɔpɛ́mɑ́ pú pi, pʉʉ pɛ́pɔ́p ɡẅɛɛnɛ yúu mi Yɛ́su Kɛlístɔ kɑ ɡɛnɛ pɛ́ jí. Nɛpɔ́ jʉ́njʉ́ɔ-Yɛ́su, ɛ́ nɛcú ŋɡɔ yúu mi pɛ́ ŋɡɛ́mndʉ̈ɔ́Ꞌ-Sɛ́ kɑ cúnɛ ɛ́ nɛ́nẅín!

¹¹M bɛn ńjʉ́ɔ ntsu-tʉ́nɛ́pú ŋíɛꞋnɛ ńtʉ́ʉ, fúfú lʉ́ɔ cẅɛt ńtʉ́ʉ. Ŋu ẅí ɑ nɑ́ŋnɛ ndǔ ẅîwɑ́ lʉ́ɔ, pɛ́ fúŋ wɛ́ ŋɡɔ kɛkúp sẅiŋɛ, mbɑ nɛ́ ŋu ẅí ɑ ɡɛ pɔ yúu mi ɛ́ nɛ́nẅín. A zɑ́Ꞌ ntsɑŋ pɔ ndʉ́ŋndʉŋ, ńdʉɔ́Ꞌ pɔ ntsɔ ẅí ɛ́ ndʉ́ŋndʉŋ.

¹²Mík mɛ́ kyɛꞌ zʉꞋ pɑ́Ꞌ lʉ́m-múk lɑ́, ɑ tɔꞋ mɛcɔꞋ-nɛfɔɔ tɛ ɛ́ zɑ́ɑ zɑ́ɑnɛ, mbɔ pɛ́ ŋwɑꞋnɛ mɛcɔ́ mɛlík nǔu wɛ́, mi wɛcɔ́ ŋu kɑ́ jí yúu mi ɛ́ lɔknɛ ńcú pɔ́ tɛ ndíꞋ ndɑꞋ jʉ́.

¹³A mɑꞋ yɛcɔ́ ndẅí-fɑ́k, mbɔ pɛ́ kɑ nuꞋ tsɛt mɛci. Pɛ́ fúŋ wɛ́ ŋɡɔ sẅiŋɛ-sɛ́.

¹⁴Mɛnɔɔ-ntsɔ mi ɛ́ tʉ́nɛ́pú ḿbɔ́ nzʉʉ yɛ́, nɑ́ŋtɛ ndǔ pɛfúfú lʉ́ɔ, ḿmɑꞋ mɛndẅí tʉʉndɛn mi yɛcɔ́ pɑ́p kɑ́ pɔ́ nǔu pɔ́.

¹⁵Yɛcɔ́ níi-ntsɔ pɔ́ ɛ́fú ntsu-ŋu ɛ̂wɑ́ ẅi ɑ nɑ́ŋnɛ ndǔ fúfú lʉ́ɔ lɑ́ ńcẅɛt. Ɛ́shẅítnɛ shẅítnɛnɛ, ḿbɔ́ yi ɑ ɡʉ ńdɔk ŋ́kʉ́ɔꞋ pʉɔ pinɛ pɔ́p tsɛt mɛŋɡɔŋ mɛŋɡɔŋ. A pɔ́ ŋu ẅí ɑ ɡʉ ńdɔk ntẅí-tʉ́n ɛ́sɑ́Ꞌ pʉɔmɛsɔŋ, ḿbɔ́ ŋu ẅí ɑ ɡʉ ńcúꞋ mɛntɑ́ɑ mi pɛ́ lɔknɛ ńniitɛ mɛluꞋ tsɛt ɡʉ́ɔ-mɛluꞋ mi ɛ́ lɛꞋlɛ́nɛ ŋɡɔ Sɛ́ ŋɡɑŋmɛtʉʉ tsʉʉ sɛ́ ńzɑ́ŋ lɔ́ŋ tɛꞋ.

¹⁶Mbɔ pɛ́ ŋwɑꞋnɛ yɛcɔ́ lík nǔu ndẅí-fɑ́k yɛ́, mbɑ nǔu ntɑ́ɑ wɛ́, ɛ́ pɔ́ ŋɡɔ: «Fɔɔ ńtsɑ pɛfɔɔ, mbɑ ŋɡɔ Tsɑpʉɔ pɛtsɑpʉɔ.»

¹⁷M bɑ́ɑtɛ ńjʉ́ɔ wɛcɔ́ cʉ̈ɔ́Ꞌ-Sɛ́ tʉ́ʉ nǔu lík-nɛm, ńdɔk ŋɡi tɛnnɛ ńcú mbɔ̌ pɛshʉ́ŋ tsʉʉ pi pɔ́p sɛ́ ńtɑtɛ tɛ tʉ́ nɛfɑŋ ŋɡɔ: «Pʉʉ tɔ́. Pʉʉ cúꞋlɛ nɛjʉ́ mɑ́mɑ́ ndíinɑ-Sɛ́,

¹⁸nɛkwɛ́t mbɑp-mbʉʉ-pɛfɔɔ. Nɛkwɛ́t mbɑp-mbʉʉ-pɛtɑ́tndɑ́-ntsɔ. Nɛkwɛ́t mbɑp-mbʉʉ-pɛtʉʉpʉɔ. Nɛkwɛ́t mbɑp-pɛlʉ́ɔ, mbɑ mbɑp-mbʉʉ-pʉɔmɛsɔŋ pí pɔ́p nɑ́ŋtɛ́nɛ ndǔ. Nɛkwɛ́t mbɑp-mbʉʉ-pʉɔmɛsɔŋ tsʉʉ. Pɔ́p pɑnɑ́ŋ ḿbɔ́ pɛlúunút kɛ pɑnɑ́ŋ ḿbɔ́ pɛkwɑɑ ɔɔ, mbɔ́ŋkʉ̈ɔ́ mbɑ pɛlʉ́m.»

¹⁹M bɛn ńjʉ́ɔ ŋkʉꞋnɛ nɑɑ ɛ̂wɑ́, ńjʉ́ɔ pɛfɔɔ ndǔ tsɛ́tsɑ́Ꞌ mbɑ mɛnɔɔ-pɑlʉ̈ɔ́Ꞌntsɔ pɔ́p. Mbɔ pɔ́p cúꞋlɛ nɛmɑꞋ ŋu ẅí ɑ nɑ́ŋnɛ ndǔ lʉ́ɔ pɔ́p nɔɔ-pɑlʉ̈ɔ́Ꞌntsɔ pɛ́ nɛ́ ntsɔ.

²⁰Pɛ́ jʉ́ɔ ŋkʉꞋnɛ nɑɑ ɛ̂wɑ́, ŋ́ɡẅɛɛ wɛ́, ḿbɛn ŋ́ɡẅɛɛ mbɑ ŋɡɛ́mndʉ̈ɔ́Ꞌ-Sɛ́ wɛ cɔtnu ẅi, ɑ kɑ tʉ́ʉnɛ mbi yɛ́, ŋ́ɡɛ mɛnu mɑ̌ɑmɑɑnɛ ńdɔk ɛ́fúklɛ pʉɔ pi pɔ́p kɑ pɛ́m pɛ́ cʉɔꞌ lii ŋkʉꞋnɛ nɑɑ ɛ̂wɑ́ nǔu pɔ́p, pɔ́p pɛn ŋ́ɡúꞋlɛ tɛ́tɔ́k-nɑɑ ɛ̂wɑ́ lɑ́. Pɛ́ ɡẅɛɛ wɔ́p pɔ́Ꞌɔ, ńjɛ́Ꞌ wɔ́p pɛ́pɑ́ pɔ ntʉʉ, ḿmɑꞋ tsɛt ɡʉ́ɔ-ntʉʉ múk.

²¹Ɛ́ ɡʉ nǔu pɛcɔ́ pʉɔ, níi ntsɔ yi ɛ́ kɑ pɔ́ ɛ́fú ntsu-ŋu ẅí ɑ nɑ́ŋnɛ ndǔ lʉ́ɔ ńcẅɛt lɑ́, jẅítɛ wɔ́p. Ŋɡɔŋ pɛshʉ́ŋ tsʉʉ kwɛ́t mbɑp yɔp tɛ ńzwɛ́t.