Read Ngomba Mɛnu ɛ́ ńdɑ́Ꞌ ńcẅɛt 8 Bible Online

Mɛnu ɛ́ ńdɑ́Ꞌ ńcẅɛt 8 - Ngomba bible

Mɛnu ɛ́ ńdɑ́Ꞌ ńcẅɛt 8

¹Mɔ́ɔ-Njinjɔ kɑ pɔ́ tɛ ŋ́ŋíɛꞋ ŋɛmɛ-ŋwɑ́Ꞌ nǔu zʉꞋ mbɑ́ɑtɛ Sɑɑmbɑ́, zʉꞋ pûu ńnɑꞋ tʉ́nɛ́pú ŋɡɔ kɛ̂m nǔu yúu mínẅít mɛɡɛ́mɛ́ntɑ́t.

²N jʉ́ɔ pɛ́ ɡɑ́ mɛntɑŋ Sɑɑmbɑ́ mbɔ̌ pɛcʉ̈ɔ́Ꞌ-Sɛ́ sɑɑmbɑ́ pi pɔ́p ntʉ́ʉnɛ mbi Sɛ́.

³Wɛcɔ́ Cʉ̈ɔꞋ-Sɛ́ tɔ́ ńtʉ́ʉ mbʉʉ zʉꞋ yi pɛ́ tɔɔnɛ yúu jɑ́k zúꞋu, ŋ́ɡẅɛɛ yúu mi pɛ́ níꞋnɛ yúu jɑ́k tsɛtú ńtɔɔ. Ɛ́ pɔ́, mbɔ pɛ́ kɑ lɔk tʉ́n-ŋɡɔ̂l ńniitɛ. Pɛ́ ɡɑ́ lɑmɛ́ndɑɑ mbɔ̌ wɛ́ tɛ ɛ́ zɑ́ɑ zɑ́ɑnɛ pɑ́Ꞌ, ɑ ɡʉ tɛmtɛ mɛcɛꞋlɛ-pʉɔ-Sɛ́ nǔu, ńtɔɔ zʉꞋ yi pɛ́ nɔŋnɛ pɔꞋ zúꞋu, ŋ́ɡɑ́ mbɔ̌ Sɛ́. Yîyɑ́ zʉꞋ pɔ́, mbɔ pɛ́ kɑ lɔk tʉ́n-ŋɡɔ̂l ńniitɛ. Ɛ́ pɔ́ mbi kɔꞋ-nɛfɔɔ.

⁴Ndíndí-lɑmɛ́ndɑɑ pɔ́p mɛcɛꞋlɛ-pʉɔ-Sɛ́ fú mbɔ̌ Cʉ̈ɔꞋ-Sɛ́ ŋ́kɔ́Ꞌ ŋ́ɡʉ nɛ́ mbi Sɛ́.

⁵Cʉ̈ɔꞋ-Sɛ́ pɛn ńtíi yúu mi pɛ́ tɔɔnɛ yúu jɑ́k tsɛtú, ńníꞋ múk ẅi ɛ́ fúnɛ zʉꞋ yí pɛ́ nɔŋnɛ pɔꞋ zúꞋu tɛ ɛ́ lúu, ɑ jɛ́Ꞌ ḿmɑꞋ ndǔ tsɛ́tsɑ́Ꞌ. Nɛfɑŋ kwɛnɛ. Pɛ́ zúꞋ mɛŋɡi, ńjʉ́ɔ mɛnɛ́ɛ-mbʉŋ. Tsɛ́tsɑ́ꞌ tsʉ́Ꞌnɛ.

⁶Pɛcʉ̈ɔ́Ꞌ-Sɛ́ pi pɔ́p kɑ ɡẅɛɛnɛ mɛntɑŋ sɑɑmbɑ́ lɑ́, pɔ́p niitɛ mbʉʉ yɔp pɑ́Ꞌ pɔ́p ɡʉnɛ tɔ́ŋ mɛntɑŋ ɛ̂mɑ́.

⁷Nduŋmbi tɔ́ŋ yɛ́ ntɑŋ. Pɛ́ mɑꞋ mɛzẅii nɛ́ múk ndǔ tsɛ́tsɑ́Ꞌ. Ɛ́ ɡɔ́ ḿbɔ́ mbɔ pɛ́ tɛmtɛ mɛci nǔu. Tɑ́Ꞌ nji nǔu tsɛ́tsɑ́Ꞌ nji yɛ́tɑ́t, pûu ɛ́shí nɛ́ mɛtʉ́, pɔ́p nɛɡíi ẅi ɛ́ wɛ fɛ́.

⁸Mbɑ́ɑtɛ yɛ́pɑ́ tɔ́ŋ yɛ ntɑŋ. Yɛcɔ́ ntɛ́ mɑ́mɑ́ nɛŋkɔ́Ꞌ ni pɛ́ tɛ́mnɛ múk nǔu, pɛ́ jɛ́Ꞌ ḿmɑꞋ tsɛt ŋki kɛ́ nɛpɑt. Tɑ́Ꞌ nji-ŋki kɛ́ nɛpɑt nǔu mɛnji mɛ́ntɑ́t shɔtnɛ ńtsʉ́Ꞌ mɛci.

⁹Tɑ́Ꞌ nji nǔu yúu mi ɛ́ ŋki tɛ ńnuklɛ nuklɛ́nɛ nǔu nji yɛ́tɑ́t pûu ńdɑ́kŋɛ. Tɑ́Ꞌ nji nǔu mɛsɛtímɑ nji yɛ́tɑ́t pûu ńtɑ́ktɛ.

¹⁰Cʉ̈ɔꞋ-Sɛ́ mbɑ́ɑtɛ yɛ́tɑ́t tɔ́ŋ yɛ́ ntɑŋ. Wɛcɔ́ mɑ́mɑ́ cʉ̈ɔ́Ꞌ-sɑŋ fú nɛfɑŋ ḿvu, ḿbɔ́ ŋ́kʉ́ pɑ́Ꞌ mɑ́mɑ́ kyɛꞋ-múk ẅi pɛ́ lyɛtnɛ lɑ́, ḿvu pɔ́Ꞌɔ, ŋ́ɡɑ́ tɑ́Ꞌ nji nǔu mɛŋki ɡwɛ́ nji yɛ́tɑ́t tɛ mbɑ nǔu mɛsɑ́Ꞌŋki.

¹¹Lík ẅîwɑ́ cʉ̈ɔ́Ꞌ-sɑŋ pɔ́ ŋɡɔ yúu lẅinɛ, tɑ́Ꞌ nji nǔu mɛŋki nji yɛ́tɑ́t tsʉ́Ꞌ yúu lẅinɛ ɛ̂yɑ́. Pʉɔmɛ́sɔŋ tɛ ńzɑ́ɑ pfútɛ ntɛ́ pɑ́Ꞌ pɔ́p nɔ́nɛ ẅîwɑ́ ŋki ẅí ɛ́ tsʉ́Ꞌ ńdẅi lẅinɛ lɑ́.

¹²Cʉ̈ɔꞋ-Sɛ́ mbɑ́ɑtɛ yɛ́nɛ́kwɑ tɔ́ŋ wɛ́ ntɑŋ. Yúu lɛɛ nǔu tɑ́Ꞌ nji-lík-nɛm nǔu nji yɛ́tɑ́t, ńdɛɛ nǔu tɑ́Ꞌ nji-lík-sɑŋ nǔu nji yɛ́tɑ́t, ńdɛɛ nǔu tɑ́Ꞌ nji pɛcʉ̈ɔ́Ꞌ-sɑŋ nǔu nji yɛ́tɑ́t nɛpɔ́ yi pɔ́p kii ŋ́kyɛꞋ zʉꞋ pɔ́, nɛnɛm ɡʉ ḿbɛ́ tɑ́Ꞌ nji nǔu nji yɛ́tɑ́t, nɛtúꞋ pɛn ḿbɛ́ yɛ́ tɑ́Ꞌ nji nǔu nji yɛ́tɑ́t.

¹³M bɛ́t ńdíŋɛ líŋɛ́nɛ ńzúꞋ wɛcɔ́ mɑ́mɑ́ mɑ́ɡúu ẅí ɑ kɑ pɔ́ ńtɑt tɛ tʉ́ pɔ́ ńcú nɛ́ ŋɡi tɛnnɛ ŋɡɔ: Pʉʉ pɛpʉ́ktú. Pʉʉ pɛpʉ́ktú. Pʉʉ pɛpʉ́ktú. Pʉʉ pʉɔmɛsɔŋ pi pʉʉ ndǔ tsɛ́tsɑ́Ꞌ, tʉ́ʉ ńjʉ́ɔ mɛntɑŋ mí pɛcʉ̈ɔ́Ꞌ-Sɛ́ pɛ́tɑ́t pɛ́t lɑ ŋ́ɡʉ ńtɔ́ŋ.