Read Ngombale Matyê 10 Bible Online

Matyê 10 - Ngombale bible

Matyê 10

¹Yěso ghʉ̂ nfúŋ ngaŋə-jyêʼ-no* yé ntsap pwô lə̂ ləghə̂m, ə́ ŋə́ mətəʉ lə́ páp lə̂ ndághʼ ńzǔŋ məzəghʼə tə́poŋ*, mbaa lə̂ ndághʼ ńgʉ̌ məghou mbə̂u lə̂ mbə̂u me lə́ pye, tə mbaa lə̂ ngʉ́ məlǒʼ* mbə̂u lə̂ mbə̂u me ndəu pye.

²Mənyôghʼ pəghaŋə-ntə̂u Yěso ntsap pwô lə̂ ləghə̂m mêi mwo: Nduŋ mbi â Síməu yi pə́ kə̂ ncí fûŋ yé ńgó Pyêh, cǒ tâʼ pə̂ Ndeléya, ə́ mbə́ fə̌r Pyêh. Pəcó pə̂ Jâghʼ môu Zebede gháp fə̌r ye Jâŋ,

³ə́ ngʉ̌ Fílîp gháp Patələmî, ə́ ngʉ̌ Tomásʉ gháp Matyê, mpfu ntsəp Pəlóma*, ə́ ngʉ̌ Jâghʼ môu Aləfê gháp Tadê,

⁴ə́ ngʉ̌ Síməu nzoŋ-məno-lâʼ gháp Yúda Isəkaryôtə yi a lə táa féi Yěso ŋə́.

⁵Yěso ghi tə́u pəghaŋə-ntə̂u pwo ntsap pwô lə̂ ləghə̂m, ə́ ndáʼ lə́ páp ngô: «Koo pei wô cər məlâʼ pye pi káa gháp pə́ Pəyúda, koo pei kə̂u cər mətúsoŋ pye Samalə̂i.

⁶Pei wó cər məndə̂ pye Ísə́lahêl, ə́ ndǒu pə̂ məndənzʉ* Sê mi ə́ lə cwí.

⁷Pei wó sǎghʼ ə́ ndáʼ pye ngô: “Ləfou Sê* cʉ́ŋə́ mə́ tə mbáatə́.”

⁸Pei wó ngʉ̌ pəghou shwítə́, ə́ ngʉ́ pəpfû zʉ́ʉ lə̂ ləwʉ̂, ə́ ngʉ́ pəghaŋə tsóʼ-páp shwítə́, ə́ nzǔŋ məzəghʼə tə́poŋ*. Məŋ ŋə̌ lə́ pei fefe, pei kə́ ŋə̂ zéi fefe lə́ pəcó pye.

⁹Koo pei côghʼ tə̌ʉ-gôl nkəʉ nkâp cər pôu-paa péi, tə mbaa ghíʼ ə́ lə̌i mbə́i mbə́ pə́ lə́;

¹⁰koo pei ghi tsə́ʉ laŋə́, ə́ ndyǎp paa, koo pei pyê kə́pə ndǐ, koo pei pyê kə́pə məlaŋə́, koo pei twûʼ kə́shʉŋ. N ndâʼ gháʼá ńté no ŋuu lə̌i mə́ fâʼ pə́ ghó, pó mə́i məzʉ̂ mé wo kwǎr yʉʼ wó.»

¹¹«Pei lə̌i ndə́r tə nkə́u cər túsoŋ kəʉ cər lâʼ, pei lôu lə̂ njí ńgó kəʉ ŋuu yi a wo mpfú pei wo kwǎr yʉʼ wó, ə́ ndéi tə njwó yé, pei kə̂ nyáŋ pə́ nzeʼ zʉ́ tə ndáʼ fú cər zêi lâʼ ndə̂r.

¹²Pei lə́r tə nkə́u ndə̂ ŋuu, pei lâʼ ngô: “Ə Sê cóghʼ mbwórə cər yo ndə̂.”

¹³Pye pi gháp pə́ cər zêi ndə̂ lə̌i mpfú wéi, mə́i Sê wo cóghʼ mbwórə lə́ páp! Lə́ ə́ mbə́ yi gháp lə̌i ndə́iʼ pfú wéi po, mə́i mbwórə zêi wo pə̌ʉ kə́u lə́ pei.

¹⁴Pei kə́u nzeʼ ŋuu kəʉ pə́ cər có túsoŋ, pə́ lə̂ʼ lə̂ mpfú wéi, ə́ ndə̌ʼ lə̂ nzúʼ tsâr zéi, pei fû wó ńdə́r, ə́ ngí lə̌r, ə́ mpfə̌r pəpə́ lə̂ məku méi ḿmêʼ.

¹⁵Məŋ ngwo lǎʼ wéi, kwaʼ lə́nə́ʉ, leʼé yi Sê táa pə́ zâʼ kôr pye-mə́soŋ, ə ngwôʼ pei pə̂ pye záa ndéi yi pye Sodôm gháp pə yi pye Gomôrə.»

¹⁶Məŋ tə̌u wéi gháʼa ghíʼ pə́ tə̂u mbî təcər pənye-njwi, pei kə́ ŋə́i ńdwóʼtə́ pə́ ghíʼ nô, ə́ mbou mbə́ pəpə̌uʼ ghíʼ məpuŋu lə̂.

¹⁷Pei laghʼə́ tû zéi, ńté no pye-mə́soŋ táa fə̌i wéi pə féʼ wéi, ə́ lǎghʼ məngwaa ńsə́u wéi cər məndə̂ cûʼtə* máp.

¹⁸Pə́ táa fěʼ wéi mbi pəgə́mnaa gháp pə pəfou ńté ghâa. Ə̂ lêitə́ yə́rə́ pei ghwô məsʉ̂ lə̂ ndághʼ ńdǎʼ gháp tə mbaa pye pi káa gháp pə́ Pəyúda, ə́ ŋuu yi məŋ mbə̌ wěi.

¹⁹Pə́ lə̌i ntáa mə́ ndâghʼ wéi ńdə́r, koo pei pə̂uʼ mbəʉ zéi ńgó pei wo kə́u wó lǎʼ ńgó hó? Ə́ táa pə́ mpfu wêi, Sê ŋə̂ wéi tsâr,

²⁰ńté ńgó káa pei lə̂ pə́ ngwô táa lǎʼ no, ə Zəghʼə Tə́ wei lə́ táa lǎghʼ wéi lǎʼ no.

²¹Ŋuu táa ghǒu fə̌r ye ńŋə́ pə jwí, tə́ môu ghôu môu ye ńŋə́ pə jwí, ghəpə́ táa lěsê cʉ́ʼ pəghaŋə mbəu pətə́ páp, ə́ ghʉ̌ pə jwítə́ gháp.

²²Pye pə́tsəm táa nǎa pǎa wéi ńté ghâa, lə́ ŋuu yi a shə̌ghʼ tə́ kâa lə́ táa cwór.

²³Pə́ lə̌i mə́ ntyê wéi cər yo túsoŋ, pei nkhʉ̂ ńdə́r lə̂ cər có. Məŋ ndaʼ wéi kwaʼ lə́nə́ʉ ńgó pei wo láʼ kə̂u wéi cər mətúsoŋ Ísə́lahêl tə myâghʼ tə́ ghó Môu Ŋuu* tô mə́ po.

²⁴«Môu-faʼ kâa lêi yé tə́-faʼ ye, ngaŋə-faʼ kâa kə́ mbôu ndêi yé tə́-faʼ ye.

²⁵Pə́ lə̌i ntsə̌mbi nfúŋ ngaŋə ndə̂ ńgó Belzebûl, mə́i pə́ wo kə́u lə́ pye ndə̂ pé, ə́ poŋə́ nyér tə́ fúŋ gháp yə́rə́ kəʉ hó? Ə́ lə̌i mbə́ yi hó lə ghʉ tə́-faʼ, pó mə́i zêi zə̂u táa ghʉ̌ ŋuu yi a pə̌ njyêʼ no yé, ə́ nkə́ mbə́ yi hó lə ghʉ̌ tə́-faʼ pə ngaŋə-faʼ, pó mə́i zêi zə̂u táa kə́ ghʉ̌ ngaŋə-faʼ yé lə́wó.»

²⁶«Koo pei pôghʼ wéi pye pi gháp ŋə̂ wéi ngwôʼ, ńté no, ə no yi ə́ pə́ leʼé wo ḿbə́ ləlwǒ, ə́ ghwo lə̂ ndáʼ nkwár ndəu zǎa, káa có no pə̂ yé wó yi mboʼ lwo tə pə́ lâʼ ntítə́ jî po.

²⁷Ə no yi məŋ ndaʼ lə́ pei ə́ wə́ cər nzə̌m, yʉʼ lə̌i ngʉ́ fóghʼ pei lâʼ. Ə no yi n ntsəmtə pə́ lətuŋú pei, pei ghʉ̌ kóʼ zǎa poŋə́ tsə́tə́ zêi no.

²⁸Koo pei pôghʼ pye-mə́soŋ, gháp kuʼ záp pə́ ndaʼ lə̂ njwí ŋuu, ə́ mbou káa kə́ kuʼ gháp lə̂ ngʉ́ tə ndêi yə́rə́. Pei póghʼ pə́ ndaʼ Sê, ńté no mboʼ a jwî ŋuu, ə́ mbou kûʼ lə̂ máʼ Zəghʼə yé cər mǒghʼ.

²⁹Pə́ lə̌i, fə̂i pətsó-korə pə́pwô ə́ kuʼ yé có zə̂u po. Tə mbaa yə́rə́, mboʼ cǒ tâʼ kə̂ pfûŋ yé sê tə́ ghó Tə́ wei Sê pə̌i po.

³⁰Ə́ ngwǒ lə́ pei, mə́i Sê pə̌ njî ndwuŋ mənyuŋu tû méi.

³¹Ə́ pə̂ yə́rə́, pei páa lə̂ nkə́ mbóghʼ, pei pə́ mbó Sê, ə́ mbə́ zə̂u lətəi-ndwuŋ ə́ ndêi pətsó-korə tə nzáa.»

³²«Ŋuu lə̌i ndâʼ mbi lâʼ ńgó mə̂ŋ ŋuu Yěso, mə́i n ngʉ̌ laʼ zâa mbi Tə́ ghâa yi a pə̌ tʉ̌-lə́pû ńgó ŋuu wə̂ ghaa ŋuu.

³³Lə́ ŋuu póu ndǎʼ mbi lâʼ ńgó kâa m mbə́ ŋuu Yěso, mə́i məŋ Môu Ŋuu*, n ngʉ̌ laʼ zâa mbi Tə́ ghâa yi a pə̌ tʉ̌-lə́pû ńgó ŋuu wə̂ káa a pə̂ yé ghaa ŋuu.»

³⁴«Koo pei kwâŋ ńgó n nkə lâghʼ mbwórə ńtó, n nkə laghʼ pə̂ ghaptə ńtó.

³⁵Məŋ kə tó lə̂ mâʼ ghaptə təsoŋ ŋuu gháp tə́ ye, təsoŋ môu məngyě gháp mə́ ye, təsoŋ ngwě môu gháp mə́ ndə̂u ye.

³⁶Pəghaŋə mbəu ŋuu wo kwǎr pə́ cər cʉŋə-ndə̂ záp.»

³⁷Ŋuu lə̌i nkôŋ tə́ ye kəʉ pə́ mə́ ye, tə ndêi ghâa, mə́i káa ngaŋ kûʼ yé lə̂ mbə́ ghaa ŋuu. Ŋuu kôŋ môu ye yi mbiŋə kəʉ yi məngyě tə ndêi ghâa, mə́i káa a kûʼ yé lə̂ mbə́ ghaa ŋuu.

³⁸Ŋuu lə̌i ndə́iʼ khwor yé tʉ̌-mbʉ̂ŋtə, lə̂ ndághʼ ńtsə́ʉ nzəm məŋ po, mə́i mboʼ a kûʼ yé lə̂ mbə́ ngaŋə-jyêʼ-no* ghâa po.

³⁹Ŋuu lə̌i ńgó a wo páa ləcǐ-mbî ye, pó mə́i a wo cwí wěi, lə́ ŋuu yi a pǒu mbə́i lə̂ ncwí wěi ńté ghâa lə̂ ghʉ̌ ghwǒ wěi.

⁴⁰«Ŋuu lə̌i mpfú wéi, mə́i a pfû pə́ ghâa, ŋuu póu mpfú ghâa, mə́i a pfû pə́ ŋuu yi a lə tə́u ghâa.

⁴¹Ŋuu lə̌i mpfú tâʼ ntsətə-nkəʉ Sê* ghíʼ ntsətə-nkəʉ Sê*, mə́i pə́ táa ŋə́ ye ntsoʼó-faʼ ghíʼ yi ntsətə-nkəʉ Sê*. Ŋuu póu mpfú ŋuu yi a nkúʼtə́ ləpə̌ʉ* Sê ghíʼ ŋuu yi a kûʼtə ləpə̌ʉ* Sê, mə́i pə́ táa ŋə́ ntsoʼó-faʼ yé pə́ ghíʼ yi ŋuu yi kûʼtə ləpə̌ʉ* Sê.

⁴²Məŋ ngwo lǎʼ wéi, kwaʼ lə́nə́ʉ, ŋuu lə̌i ŋə́ pə́ ndaʼ tâʼ tə́tóʼ nci yi ə́ pə́ shwítə́ lə́ mə́ceʼé môu, ńté no wêi môu ngaŋə-jyêʼ-no* ghaa, mə́i yé ntsoʼó-faʼ yé láʼ cwî yé po.»