Read Ngombale Matyê 11 Bible Online

Matyê 11 - Ngombale bible

Matyê 11

¹Yěso lə lâʼ no zêi mbó ngaŋə-jyêʼ-no* yé ntsap pwô lə̂ ləghə̂m tə ə́ kuʼ, a fû yʉʼ wó ndə́r, ə́ ŋə̌i njyêʼ pye zə̂u ə́ mbóu ndêʼtə Nkəʉ Shʉʼʉ cər mətúsoŋ lə́ zêi paghʼə-ngoŋ.

²Ə́ pə̂ mpfu wêi, Jâŋ Mbaptísʉ pə̂ ndə̂-tsâŋ, ə́ nzúʼ pə́ pə̂ mbyêtə məno mi Yěso yi â Kəlísto pə̌ ngʉ̌. A tə̂u có ngaŋə-jyêʼ-no* yé ńgó gháp wó ntúŋú yé ngô:

³«ô Nzaʼ-nkʉ* yi pə́ zʉ́ʼtə yé lə̂, kəʉ paghʼ kə́ mə́ nzʉ̂ʼtə pə̂ cǒ yi ndeʼe?»

⁴Gháp wo njwó Yěso, a pwôr lə́ páp ngô: «Pei wó mbyétə́ zə̂u yi pei zǔʼ tə mbaa yi pei jwǒ ə́ ndǎʼ Jâŋ,

⁵ə́ ndǎʼ yé ńgó pəfwoghʼ-mə́nyôghʼ pə́ njwô yʉʼ, pəkə́niʼí-ku pə̂ ŋə̂i shʉʼʉ, pəghaŋə-nkâʼ pə̂ shwítə́, pəkʉʉ-mə́tuŋú pə̂ nzûʼ yʉʼ, pəpfû pə̂ nzʉ́ʉ lə̂ ləwʉ̂, pə́ pə̂ ntsə̂tə Nkəʉ Shʉʼʉ mbó pəghaŋə-ngwôʼ.

⁶Ndʉʉ-mboŋ â ŋuu yi a wo kotə yé lə́ Môu Ŋuu*, ə́ mpfúŋ sê po!»

⁷Pəghaŋə-ntə̂u Jâŋ lər, Yěso cʉ̂ʼ ndáʼ no ńté Jâŋ, ə́ mbó lâʼ yi ə́ pə́ yʉʼ wó, ə́ ntúŋú gháp ngô: «Ə́ lə pə́ lə̂ mpfu yi Jâŋ, pei wô koŋə-məkwaʼá ə́ njwó hó? Ə́ tâʼ kəkaʼa yi kəfwor pə̂ ncʉʼtə́ áa? Ə́ ngə́ áa?

⁸Tə pei kə wo pə́ njwô hó? Ə́ ŋuu yi a mǎʼ məndǐ nkâp áa? Lə́ pə maʼ zêi mbə̂u məndǐ ə́ ndághʼ ńnyâŋ pə́ ntôʼ.

⁹Tə pei kə wô pə́ njwô wǒ? Ə́ ntsətə-nkəʉ Sê* áa? Ə̂ŋ cʉ̂ʼ n ńdáʼ wéi, a kə pə́ wěi, tə ndêi mbaa ntsətə-nkəʉ Sê*.

¹⁰Jâŋ wêi yaa mbə́ ŋuu yi pə́ lə ŋwáʼá no náŋtə́ yé cər pǎp ŋwaʼa yo ngô: “Zûʼ, n ngwo tə́u ngaŋə-ntə̂u ghâa a pyə̂ghʼ ńtó, ə́ mə́ ntsúŋu laŋə́-ndə̂u zô o poŋə́ tó.”

¹¹Yěso kə̂ ncí nkʉ́ʼʉ́ mə́ ndâʼ ngô: Məŋ ndaʼ wéi kwaʼ lə́nə́ʉ, cǒ ŋuu yi məngyě lə nyáŋ sê njí yé laa kə́ pə́ wó tə ndêi Jâŋ Mbaptísʉ. Lə́ ə́ yo, mə́i ŋuu yi a fǔ nkhwóghʼ lə̂ no Ləfou Sê*, ghǔʼ nděi Jâŋ.

¹²Tə fú lə̂ mpfu yi Jâŋ Mbaptísʉ, ə́ ntó nkə́u mpfu wo, pə́ pə̂ nzóŋə lə̂ nkə́u lə̂ no Ləfou Sê*. Pye pi gháp laghʼ pə̂ təʉ ńgʉ̂ məno máp pə́ ndôu lə̂ fú nkâŋ Ləfou Sê* zei tə ə̂ cʉ́ʼ mbə́ pə̂ zə̂u záp.

¹³Ńté no Mə̌usə̂i gháp pə pətsətə́-nkəʉ Sê pə́tsəm lə lâʼ no tə ngwó nkə́u lə̂ mpfu yi Jâŋ.

¹⁴Pei lə̌i mbóu mə́ nkôŋ lə̂ njí ŋuu yi Jâŋ pə̌ zʉ́, mə́i məŋ ngwo lǎʼ wéi ńgó a laghʼ mbə̂ Elyê* yi a lə təi kə́ cí tó.

¹⁵Ŋuu lə̌i ngwô mətuŋú lə̂ ndághʼ ńzúʼ no a zûʼ!»

¹⁶Yěso kə̂ ncí ndáʼ ngô: «Tə məŋ ngwo lǎghʼ hó pyé fəiʼ lə́ pye pi ə́ pə́ cər nzʉ̂ mpfu wo? Gháp cʉ́ʼ mbə́ pə́ ghíʼ ghəpə́ yi gháp nyáŋtə́ ndəu zǎa, ə́ mə́ nzâp təcər páp, ə́ ntô zap ə́ mbə̂i ngô:

¹⁷“paghʼ kə pə̂uʼ ləluŋú káa pei píŋ, ə́ máʼ ləwʉ̂ káa pei lâa.”

¹⁸Zə̂ kwaʼ ghíʼ gháp lə ghʉ̌ lə́ Jâŋ. A lə tó káa pə́ zʉ̂ yé zə̂u, káa pə́ nô yé məluʼ, gháp laʼ ńgó â pə.

¹⁹Môu Ŋuu* pou ntô yé mpfu wo, ə́ mə́ mpfâr zə̂u ə́ mbóu mə́ nô məluʼ, gháp laʼ ńgó pə́ náŋ yé njwó, ŋuu wə̂ pə̌ pə̂ fou məzʉ̂, ə́ mbə́ nó-nó, ə́ mbə́ sə̌u pəpfǔ-ntsəp Pəlóma* tə mbaa yi pəcó pye tə́poŋ. Lə́ pə́ pə̂ njwô ngô: “Pə́ lei lə̂ məfaʼ Sê, ə́ njwó ńgó jîno yé pə́ faʼ shʉʼʉ.»

²⁰Yěso lâʼ yə́rə́, ə́ njǐ lə̂ shúŋtə́ mətuŋú pye cər mətúsoŋ mi a lə wǒ wó, ə́ ngʉ̌ mənkəʼə məno tə nzáa, lə́u gháp pə̂i gháp lə̂ shə́rə́ ńtsə́ʉ nzəm Sê po.

²¹A lâʼ lə́ páp ngô: «Ndou wə́ tû pei pye Kolazêŋ, tə mbaa tû pei pye Mbetsayída, ńté ńgó məno mwo mi pə́ lə ghʉ̌ təcər pei lo, ə́ lə pə́ ghíʼi mbə́ pə́ cər túsoŋ Tîr gháp túsoŋ Sidôŋ, mə́i gháp kə mə́ ndáʼ nkə́p cǐ záp, ə́ fʉ̌, ə́ sə̌ məpaa ngwér, ə́ nzóʼ pfû ndaghʼ ńdúŋ.

²²Ə̂ zə̂u yi ə́ ghʉ̌, n ndâʼ ńgó ə́ táa pə́ leʼé yi Sê wo nzáʼ kôr təcər páp pə pye-mə́soŋ, ə zei ngwôʼ lêi yi pye Tîr gháp pə yi pye Sidôŋ.

²³Ə́ ngwo lə́ pei pye Kapérnawûm, pei nkwaŋ ńgó Sê wo koʼó wéi koʼó tə pei kə́u ləfaŋ áa? N ndaʼ wéi ńgó ə ngə́, a wo shúʼú wéi shúʼú, pei shíʼ tə nkə́u lâʼ pəpfû-sê. Ńté no pə pəndǎa-jwô-mə́no mi pə́ lə ghʉ̌ lâʼ pei, pə́ lə ghíʼi ngʉ́ pə́ túsoŋ Sodôm, mə́i Sodôm pə́ yé pə́ wó tə nkə́u leʼé wo.

²⁴Ə̂ zə̂u yi ə́ ghʉ̌ n ndâʼ ńgó ə́ táa pə́ leʼé yi Sê wo nzâʼ kôr təcər páp pə pye-mə́soŋ, zei ngwôʼ lêi yi pye Sodôm.»

²⁵Yěso ghʉ̂ ndâʼ ngô: «Tǎa, ə́ Nde gho yi o sâʼ tʉ̌-lə́pû tə mbaa ndesé, m mə̌ ŋə̂ nkhwo lə́ gho ghíʼ o kə nyarə́ mwo məno ə́ mbó məghəghəʉ, ə́ ndwǒ měi mbó pənjino gháp pə pye pi pə́ lə jyéʼ gháp měi.

²⁶Ə̂ŋ Tǎa, o lə jwó ńgó o wo ghʉ̌ no zêi pə́ yə́rə́.»

²⁷Yěso kə̂ ncí ndâʼ ngô: «Tə́ ghaa lə nyêr zə̂u tsəm mbó məŋ. Mboʼ cǒ ŋuu jî yé ŋuu yi Môu pə̌ zʉ́ po, tə ndyéʼ Tə́. Káa ŋuu póu nkə́ mə́ njî yé ŋuu Tə́ ye pə̌ zʉ́, tə ndyéʼ Môu ye, ə́ mbǒu ngʉ́ ŋuu yi Môu kǒŋ lə̂ ngʉ̂ ńgó a jí ŋuu yi Tə́ ye pə̌ zʉ́.»

²⁸«Pei pə́tsəm pi pei khwor pyeʼ yi ə́ pə́ njwər wéi, pei pôu mə́ nkáa, pei tó ńcə́r ghâa, n ngʉ́ pei zə́tə́.

²⁹Pei wé kəʼtə́* zâa lóŋ pei, ə́ mbǒu mbə́i ńgó n njyêʼ wéi ghíʼ pei wo ghʉ̌, ńté no m mbworə̂, ə́ mbou ngwô shúʼu-mbəʉ, pei lə̌i ngʉ̂ yə́rə́, mə́i pei wo ghwǒ mə́shwítə cər məntə̂ʉ pei.

³⁰Kəʼtə́* zâa pwórə, pyeʼ yi n ngwo ghʉ̌ pei khwôr, ə́ záŋə lə̂ khwôr.»