Read Ngombale Matyê 12 Bible Online

Matyê 12 - Ngombale bible

Matyê 12

¹Ə́ ghʉ mbə̂ có leʼé nji pəyúda, Yěso pə̂ ndêi cər nkâʼ ngəsâŋ-ncʉ̂ŋ, ghíʼ nji lə pə́ nzáŋə gháp pə ngaŋə-jyêʼ-no* yé lə̂, gháp pə̂ ŋə̂i ńshwi ngəsáŋ ḿpfár.

²Pəcó pye lə́ pəfalísia* jwô yə́rə́, ə́ ndǎʼ lə́ Yěso ngô: «Jwó ghíʼ ngaŋə-jyêʼ-no* zô ghʉ zə̂u yi ləpə̌ʉ* pə́ ndâʼ ńgó koo pə́ ghʉ zěi leʼé njî pəyúda njwó».

³Yěso pwôr lə́ páp ngô: «Pei laa kə́ fúŋ yʉʼ ŋwaʼa Sê yi ə́ leʼtə no yi fou Ndavîd lə ghʉ̌ lə́ mo? Ghíʼ ə́ lə pə̂ có leʼé, ə nji zaŋə́ gháp pə pye pé;

⁴a kə̂u ndə̂ Sê*, ə́ mbyé mbələ̂ghʼ yi pə́ ŋə̂ mbó Sê, ə́ mpfár tə ŋə́ yi ngaŋə-jyêʼ-no* yé, lə́ mə́i ləpə̌ʉ* pə́ ndâʼ ńgó ndaʼ pənuŋú-poʼ* lə́ ghwǒ lə̂ mpfár wěi!

⁵Pei laa kə́ fúŋ cər ŋwaʼa Mə̌usə̂i ə́ nzúʼ ńgó pənuŋú-poʼ Sê* pi gháp ghwǒ faʼ ndə̂ Sê* leʼé njî pəyúda, káa pə́ njî gháp nji mo?

⁶Lə́ m mə̂ ndâʼ wéi ńgó cǒ ŋuu pə́ yaʼa yi a lěi ndə̂ Sê*.

⁷Pei tə̌i ngíʼi njí zə̂u yi yʉʼ ŋwaʼa yi lâʼ ngô: “N nkoŋ tsâa-mə́jʉ̂ŋ, ə́ nděi poʼ yi pə́ ŋə̂ ńdághʼ ńgûʼtə ghâa” lâghʼ ńdâʼ, mə́i káa pei tâghʼ wéi ngwôʼ tû pye pi káa gháp fâa gháp có no.»

⁸Yěso kə̂ ncí ndâʼ lə́ páp ngô: «Môu Ŋuu* lə̂ yǎa ngwǒ lə̂ ndâʼ zə̂u yi mboʼ pə́ ghʉ lə̂ leʼé nji pəyúda.»

⁹Yěso fû yʉʼ wó, ə́ ngwó kə́u cər ndə̂ cûʼtə pəyúda*.

¹⁰Cǒ ŋuu mbiŋə pə̂ yé ndə̂ wei, mə́i pô yé lə kwʉ́ mə́. Pye pi ə́ lə pə́ ndə̂ pə̂ ndôu zə̂u yi gháp wo fú mə́u, ə́ cóghʼ fər paa Yěso, ə́ ntúŋú yé ngô: «Ə́ pə́ lə̂ ləpə̌ʉ* zághʼə ghíʼi, ə́ mbə́ yi mboʼ pə́ ghʉ ŋuu shwítə leʼé nji kəʉ ngə́?»

¹¹Yěso pwôr lə́ páp ngô: «Wǒ ŋuu təcər pei gháʼa, ə́ mbə́ yi a lə̌i ngwô môu ndənzʉ* ye pə́ tâʼ môʼ, a pfúŋ cər tâa leʼé nji, a tî tə́ fú cər wó ntóghʼ nkwárə́ yé?

¹²Ŋuu-məsoŋ zə̂u lətəi-ndwuŋ, ə́ ndêi ndənzʉ*, ə́ pə̂ yə́rə́, pə́ lə̌i ngʉ́ no shʉʼʉ lə́ ŋuu-məsoŋ leʼé nji, ə́ pə̂ ńgó pə́ kə́ fâa yé ləpə̌ʉ.»

¹³Yěso cʉ̂ʼ nkə́ ndáʼ lə́ kwʉ-pô wei ngô: «Shǐ pô zô;» a kə̂ shî, pə́ jwô ə́ təitə ghíʼ có.

¹⁴Ə́ tsə pəfalísia*, gháp fû ndə̂ cûʼtə* nkwár, ə́ ncʉ́ʼ mə́ ndôu məsʉ̂ ghíʼ gháp wo ghʉ̌ poŋə́ jwí Yěso.

¹⁵Lə́ Yěso lêi tə njí no yi gháp pə́ ntáatə́, ə́ fú yʉʼ wó ndə̂r yé. Pye tə nzáa zuŋtə nzəm yé. A ghʉ̂ pəghou pə́tsəm pi gháp lə pə́ təcər páp shwítə.

¹⁶Lə́ a sâa-sǎa ntôʼ gháp lə̂ ngʉ́ tə pə́ jî ŋuu yi a pə̌ wěi.

¹⁷Ə́ pə̂ yə́rə́, ə́ laghʼ ḿbə̂utə lə̂ no yi Sê lə cóghʼ ntsʉ Esǎya ntsətə-nkəʉ ye

¹⁸a lâʼ ngô: «Yo ngaŋə-faʼ ghâa yi n ndə ntsóʼ. N nkoŋ yé gháʼate, zʉ́ lə́ ghʉ n ngwo lətsei cər ntə̂ʉ məŋ. N ntáa cóghʼ Zəghʼə zâa lə́ zʉ́, â nyárə́ pye pi káa pə́ pəyúda, ə́ mbə̂u ləsǎʼ lâʼ yi pə̌ ndʉŋ-ndʉŋ.

¹⁹A táa lou yé məfeʼ po, ə́ kə́ lâʼ yé no tə njî yé wó tʉ́ po. Pə kə́ mbóu nzûʼ yé a tə́ʉ mətû laŋə́-ndə̂u, ə́ ŋə́ tsâr po.

²⁰A láʼ pwôʼ yé kəkaʼa yi ə́ ŋóʼó mə́ po, ə́ kə́ pə̂ghʼ yé mǒghʼ lə́ lâm yi a pə̌ ndou ncwí po, a láʼ kə́ ghʉ pə́ yə́rə́, tə mbə̂u lə lǎghʼ sáʼ lâʼ yi pə̌ ndʉŋ-ndʉŋ lêi zʉ́ maa ŋuu tsəm.

²¹Məngoŋ mə́tsəm cər nzʉ̂ cʉ́ʼ ncôghʼ ntə̂ʉ gháp pə́ lə́ zʉ́».

²²Pə́ laghʼ cǒ ŋuu ńtó mbi Yěso, mə́i có zəghʼə tə́poŋ* lə kə́u lə́ zʉ́, ə́ ngʉ́ a fwôghʼ, ə́ nkə́ ncí ngʉ́ a cʉ̂ʼ cípúʼ. Yěso ghʉ ŋuu wêi shwítə, ə́ nkə́ ntóghʼ ńjí lə̂ ntsár, mbaa lə̂ njwó yʉʼ.

²³Ə lâʼ tsəm jwó, ə́ ndyár gháʼate, ə́ ndǎʼ ngô: «Ndeʼ có a pə̂ ŋuu ngər-ndə̂ fou Ndavîd mo?»

²⁴Lə́ pəfalísia*, zûʼ yə́rə́, ə́ ndǎʼ ngô: «Belzebûl, tə́-ndə̂ məzəghʼə tə́poŋ* lə̂ ŋə̂ yé mətəʉ lə̂ ndághʼ ńzǔŋ məzəghʼə tə́poŋ*.»

²⁵Yěso jî məkwaŋtə máp, ə́ ndǎʼ lə́ páp ngô: «Ə pye tâʼ lâʼ lə̌i shə́rə́ ńdwoʼó ntso təcər páp, mə́i zêi lâʼ wo mě? Ə pye tâʼ túsoŋ kəʉ tâʼ cʉŋə-ndə̂ lə̌i shə́rə́ ńdwoʼó ntso təcər páp, mə́i zêi túsoŋ kəʉ zêi cʉŋə-ndə̂ ə́ wo mě?

²⁶Ləfou yi Sə́tə kə́ mbə́ pə́ kwaʼ yə́rə́, ə pye pé lə̌i ngáptə́, ə́ njǐ lə̂ shə́rə́ ńdwoʼó ntso təcər páp, mə́i ləfou yé wo mě.

²⁷Pei lâʼ ńgó n ndaghʼ pə̂ mətəʉ Belzebûl ńzûŋ məzəghʼə tə́poŋ*, tə péi pye kə́ mə́ nzûŋ záp məzəghʼə tə́poŋ* ghíʼi, ə́ njwô máp mətəʉ ghó mboŋə́ lǎghʼ zǔŋ? Kwaʼ pye péi pêi nyarə gháʼá wéi ńgó pei lâʼ yə́rə́, ə́ ndaghʼ fâa-fǎa.

²⁸Lə́ ə́ ngwǒ lə́ məŋ, mə́i n ndaghʼ pə̂ mətəʉ Zəghʼə Sê ńzûŋ məzəghʼə tə́poŋ. Ə́ laghʼ ńnyárə́ ńgó Sê to mə́, tə mə́ sâʼ nzʉ̂.»

²⁹«Tə mboʼ ŋuu ghʉ̂ gháʼá mboŋə́ pwóʼ ndə̂ tə́-məntəʉ, ə́ khwotə́ məzə̂u mé tə́ ghó a tsəmbi nkə́r yé? A lə̌i ndêi tə nkə́r yé, a kûʼ lə̂ nkə́u ndə̂ fú nkhwór məzə̂u mé mə́tsəm.

³⁰Ŋuu lə̌i ndə̂ʼ lə́ pə́ yi mboʼ paghʼ zʉ́ təm no, ə́ pə̂ ńgó ngaŋ pə̌ mbaa ghâa, ŋuu póu ndə̌iʼ mpfútə́ ghâa lə̂ kəitə pye pâa po, ə́ pə̂ ńgó a pə̌ shaghʼə gháp.

³¹Ə́ pə̂ yə́rə́, m mə̂ ndâʼ lə́ pei ńgó mboʼ Sê lyəghʼə́ məfaa pye-mə́soŋ pə́tsəm ńŋə́ lə́ páp, tə mbaa mətsâr mə́tsəm mi gháp laghʼ ńzôutə yé. Lə́ ŋuu lə̌i nzôutə́ Zəghʼə Ndêi-lěi, mə́i pə́ wo lyəghʼə́ yé ńŋə́ lə́ zʉ́ po.

³²Ŋuu lə̌i nzóutə́ Môu Ŋuu*, mə́i Sê táa lyəghʼə́ ńŋə́ lə́ zʉ́. Lə́ ŋuu lə̌i nzóutə́ Zəghʼə Ndêi-lěi, mə́i pə́ wo lyəghʼə yé ńŋə́ lə́ zʉ́ ə́ cər kəm nzʉ̂ yi mpfu wo tə mbaa cər kəm nzʉ̂ yi ə́ pə́ ntó po.»

³³Yěso kə̂ ncí ndáʼ ngô: «Ə tʉ̌ lə̌i mbə́ tʉ̌ shʉʼʉ, mə́i ə́ wo zə́m pə̂ məntǎa shʉʼʉ. Ə tʉ̌ kə́ mbə́ yi tə́poŋ, mə́i wo kə́ zə́m pə̂ məntǎa tə́poŋ. Pə́ yaa njî tʉ̌ pə́ lə̂ məntǎa měi.

³⁴Ngər mənô, mboʼ pei pə̂ pye tə́poŋ gháʼá lə́, ə́ mbou ndâʼ no shʉʼʉ gháʼá gháʼá? Ŋuu lâʼ pə̂ no yi ə́ pə́ cər ntə̂ʉ zʉ́.

³⁵Pei jí ngô: Ŋuu lə̌i ngwô ntə̂ʉ shʉʼʉ, mə́i a wo ghwǒ ntsâr shʉʼʉ; ə́ ngwǒ ntə̂ʉ tə́poŋ, mə́i tsâr tə́poŋ lə́ wo kwǎr ntsʉ zʉ́.

³⁶Məŋ ndáʼ wéi: Ə́ táa pə́ leʼé yi Sê wo nzáʼ kôr təcər páp pə pye-mə́soŋ, wǒwó ghwô lə̂ mbyêtə́ ntsʉ yé pə́ zʉ́ lə̂ məghəghəʉ mətsâr mi ə́ lə kwatə́ ntsʉ zʉ́.

³⁷Ə Sê táa lǎghʼ pə̂ no yi ə́ lə kwǎr ntsʉ maa wǒwó, ə́ záʼ kôr ye, a lə́iʼ wʉ̌ kôr po, a zʉ̂.»

³⁸Yěso lâʼ yo no tə nyér, pəcó pəkeʼtə́-lə́pə́ʉ Mə̌usə̂i* gháp pə pəcó pəfalísia* lâʼ lə́ zʉ́ ngô: «Cícye, paghʼ pə̌ ntsâa ńgó o ghʉ́ tâʼ nkəʼə-no paghʼ jwó.»

³⁹Yěso pwôr ngô: «Pye pi gháp pə́ cər nzʉ̂ mpfu wo ə̂ pye tə́poŋ, ə́ ntə̂i tû ńŋə̂ mbó Sê; ə́ mbou ntúŋu ńgó pə́ ghʉ́ tâʼ nkəʼə-no gháp jwó áa? Lə́ kâa pə pə́ ngwô yé nyarə́ gháp có zə̂u, tə ndyéʼ ndaʼ no yi ə́ lə ghʉ̌ Yənə́sʉ ntsətə-nkəʉ Sê*.

⁴⁰Ə́ ndʉŋ-ndʉŋ ghíʼ Yənə́sʉ lə nyáŋ ləpəm tə́koʼ shû təcər leʼé tárə́ lə̂; Môu Ŋuu* táa ghʉ̌ yé leʼé tárə́ cər ndesé.

⁴¹Pei cʉ́ʼ n ndâʼ wéi, ə́ táa pə́ leʼé yi Sê wo nzáʼ kôr təcər páp pə pye-mə́soŋ, ə pye Ninîvə lesê ńtó ńtə́ʉ, ə́ ncóghʼ fər paa pye pi gháp pə́ cər nzʉ̂ mpfu wo. Ńté no Yənə́sʉ lə lâʼ no lə́ páp, gháp zûʼ, ə́ nkə́p cǐ záp. Ŋuu yi a pou ndâʼ no lə́ pei leʼé wo pei lə̂ʼ lə̂ nzúʼ lo, a lei Yənə́sʉ.

⁴²Ə́ táa pə́ leʼé yi Sê wo nzáʼ kôr təcər páp pə pye-mə́soŋ, maa-fou pye Shéba lesê ńtó ńtə́ʉ, ə́ ncóghʼ fər paa pye pi gháp pə́ cər nzʉ̂ mpfu wo, ńté no a lə zúʼ ńgó jîno fou Salə́məu lei yi maa ŋuu tsəm, ə́ fú lâʼ zʉ́ nděsê ńtó ńjwó yé. Ŋuu yi a pou ndâʼ wéi no leʼé wo pei lə̂ʼ lə̂ nzúʼ lo, yé jîno lei yi fou Salə́məu.»

⁴³«Ə zəghʼə tə́poŋ* nyáŋ lə́ ŋuu tə nkwár, ə́ ŋáa nkár ŋə̂i məyʉʼ mi káa ŋuu pə̂ yé wó, ə́ ndôu yʉʼ yi ə́ wo pwórə́ nyáŋ wó, ə́ ndə̌iʼ jwô yé po,

⁴⁴ə́ cʉ̂ʼ ndáʼ ngô: “Ə́ poŋ ńgó m mbə̂ʉ ghâa lə̂ ndə̂ məŋ, ə́ yʉʼ yi n nkə yǎa mbə́ wó”. Ə́ lə̌i mbə̂ʉ nzəm ńjwó ə tə́ʉ fe, mə́i pə́ zaghʼ mə́, ə́ ntʉ́ŋtə́ məzə̂u cər wó,

⁴⁵mə́i a wǒ ghə́u məcó məzəghʼə tə́poŋ* saambwô, ə̂ pə́ mi ə́ fú nzáa sôu tə ndêi yé, gháp pə pǎp pə̂ʉ nzəm ńkə́u lə́ ŋuu wə̂, ə́ ndághʼ yé ńgʉ́ ndə̂ zap. Ngwôʼ ngaŋ fú nzáa ndéi ghíʼ ə kə yǎa mbə́. Ə́ táa kə́ pə́ pə́ yə́rə́, lə́ pye pi gháp pə́ cər nzʉ̂ mpfu wo; ə́ mbə́ ngər zə̂u tə́poŋ.»

⁴⁶Yěso lə pyér mə́ ndâʼ no laʼá mbó lâʼ, mə́ ye gháp pə pəfə̌r pé tô ńtə́ʉ péi, ə́ mə́ ndôu lə̂ njwó yé.

⁴⁷Cǒ ŋuu tô ńdáʼ lə́ Yěso ngô: «Mə́ gho gháp pə pəfə̌r pô pə́ péi ə́ mə́ ndôu lə̂ njwó ghô.»

⁴⁸Yěso pwôr lə́ páp ngô: «Wǒ ŋuu mə́ ghâa, pəwǒ pə̂ pəfə̌r pâa?»

⁴⁹Ə́ ndǎʼ yə́rə́, ə́ ndǎghʼ pô nyarə́ ngaŋə-jyêʼ-no* yé, ə́ ndǎʼ ngô: «Mə́ ghâa gháp pə pəfə̌r pâa pwo lə.»

⁵⁰Ŋuu lə̌i ngʉ́ zə̂u yi Tə́ ghâa yi a pə́ tʉ̌-lə́pû pə̌ nkǒŋ, mə́i wêi ŋuu fə̌r ghâa yi mbiŋə, ə́ mbə́ fə̌r yi məngyě, ə́ mbə́ mə́ ghâa.